M’Cheyne Bible Reading Plan

यहूदा क राजा अमस्याह

25 अमस्याह राजा बनई क समइ पचीस बरिस क रहा। उ यरूसलेम मँ उन्तीस बरिस तलक हुकूमत किहस। ओकरी महतारी क नाउँ यहोअद्दान रहा। यहोअद्दान यरूसलेम क रही। ² अमस्याह उहइ किहस जेका यहोवा नीक समुझत ह। मुला उ पूरे हिरदइ स नाहीं किहस। ³ अमस्याह क हाथ मँ राजसत्ता सुदृढ़ होइ गइ। तब उ ओन अधिकारियन क मार डाएस जउन ओकरे बाप राजा क मारे रहेन। ⁴ मुला अमस्याह ओन अधिकारियन क बच्चन क नाहीं मारेस। काहेकि उ मूसा क किताबे मँ लिखे नेमन क मानेस। यहोवा आदेस दिहे रहा, “पिता लोगन क अपने पूतन क पाप बरे नाहीं मरइ चाही। बच्चन अपने बाप क पापन क बरे नाहीं मरइ चाही। हर एक मनई क अपने खुद क पाप क बरे मरइ चाही।”

⁵ अमस्याह यहूदा क लोगन क बटोरेस। उ ओनके परिवार क एक ठु बर्ग बनाएस अउर ओन बर्गन क अधिकारि सेनाध्यच्छ अउर नायक नियुक्त कीन्ह गएन। उ पचे प्रमुख यहूदा अउर बिन्यामीन क सबहिं फउजियन क अधिकारी भएन। सबहिं लोग जउन फउजी होइ बरे चुने गएन, बीस बरिस क या ओहसे जियादा क रहेन। उ पचे सब तीन लाख प्रसिच्छित फउजी भालन अउर ढार क संग लड़इवालन रहेन। ⁶ अमस्याह एक लाख फउजियन क इस्राएल स भाड़े पइ रखेस। उ पउने पौने चार टन चाँदी क भुगतान ओन फउजियन क किराये पइ लेइ बरे किहस। ⁷ मुला परमेस्सर क एक मनई अमस्याह क लगे आवा। परमेस्सर क मनई कहेस, “राजा, अपने संग इस्राएल क सेना क न जाइ द्या। परमेस्सर इस्राएल क संग नाहीं अहइ। परमेस्सर एप्रैम क लोगन क संग नाहीं अहइ। ⁸ हिआँ तलक कि अगर तू आपन आप क मज़बूत बनाइ लिहा अउर जुद्ध बरे तइयार होइ गवा, तउ भी परमेस्सर तोहका हराइ देब, काहेकि जीत अउर हार दुइनउँ यहोवा क मदद पइ निर्भर करत ह।” ⁹ अमस्याह परमेस्सर क मनई स कहेस, “किन्तु हमरे धने क का होइ जउन मइँ पहिले ही इस्राएल क फउज क दइ दिहे हउँ?” परमेस्सर क मनई जवाब दिहस, “यहोवा क लगे बहोत जियादा अहइ। उ ओहसे भी जियादा तोहका दइ सकत ह।”

¹⁰ एह बरे अमस्याह इस्राएल क फउज क वापस घर एप्रैम क पठइ दिहस। उ सबइ लोग राजा अउर यहूदा क लोगन क खिलाफ बहोत कोहाइ गएन। उ पचे बहोत जियाद किरोधित होइके अपने घरे लउटेन।

¹¹ तब अमस्याह बहोत हिम्मती होइ गवा अउर उ अपनी फउज क एदोम देस मँ नमक क घाटी मँ लइ गवा। उ जगह पइ अमस्याह क फउज सेईर क दस हजार फउजियन क मार डाएस। ¹² यहूदा क फउज सेईर स दस हजार मनई धरेस। उ सबइ ओन मनइयन एक ऊँच चोटि पइ लइ गएन। उ सबइ लोग तब तलक जिअत रहेन। तब यहूदा क फउज ओन मनइयन क उ ऊँच चट्टान क चोटी स खाले लोकाइ दिहस अउर ओनकर तन खाले क चट्टानन पइ ध्वस्त होइ गएन।

¹³ किन्तु उहइ समइ इस्राएली फउज यहूदा क कछू नगरन पइ हमला करत रही। उ सबइ सोमरोन स बेथोरोन नगर तलक क नगरन पइ हमला करत रहेन। उ पचे तीन हजार लोगन क मार डाएन अउर उ पचे बहोत स कीमती चिजियन लइ गएन। उ फउजे क लोग एह बरे कोहान रहेन काहेकि अमस्याह ओनका जुद्ध मँ अपने संग सामिल नाहीं होइ दिहस।

¹⁴ अमस्याह एदोमी लोगन क हरावइ क पाछे घरे लउटा। उ सेइर क लोगन क ओन देवमूरतियन क लिआवा जेनकर उ पचे पूजा करत रहेन। अमस्याह ओन देवमूरतियन क पूजब सुरु किहस। उ ओन देवतन क प्रणाम किहस अउर ओनका सुगन्धि भेंट किहस। ¹⁵ यहोवा अमस्याह पइ बहोत कोहाइ गवा। यहोवा अमस्याह क लगे एक नबी पठएस। नबी कहेस, “अमस्याह, तू ओन देवतन क काहे पूजा किहा जेनका उ सबइ लोग पूजत रहेन? उ सबइ देवता तउ अपने लोगन क भी तोहसे रच्छा न कइ सकेन।”

¹⁶ जब नवी इ बोला, अमस्याह नवी स कहेस, “हम लोग तोहका कबहुँ राजा क सलाहकार नाहीं बनावा। चुप रहा, जदि तू चुप नाहीं रह्या तउ मार डावा जब्या।” नबी चुप होइ गवा, मुला उ तब कहेस, “परमेस्सर फुरइ तोहका नस्ट करइ क निहचइ कइ लिहस ह। काहेकि तू बुरी बातन करत अहा अउर मोर सलाह नाहीं सुनत्या।”

¹⁷ यहूदा क राजा अमस्याह अपने सलाहकार क संग सलाह किहस। तब उ योआस क लगे सँदेसा पठएस। अमस्याह योआस स कहेस, “हम लोग आपने आमने-सामने मिलइ द्या।” योआस यहोआहाज क पूत रहा। यहोआहाज येहू क पूत रहा। येहू इस्राएल क राजा रहा।

¹⁸ तब योआस अपना जवाब अमस्याह क पठएस। योआस इस्राएल क राजा रहा अउर अमस्याह यहूदा क राजा रहा। योआस इ कथा सुनाएस: “लबानोन क एक ठु नान्ह कँटेहरी झाड़ी लबानोन क एक बिसाल देवदारु क बृच्छ क सँदेसा, पठएस। नान्ह कँटेहरी झाड़ी कहेस, ‘अपनी बिटिया क बियाह मोरे पूत क सँग कइ द्या, मुला एक ठु जंगली जनावर निकरा अउर उ कँटेहरी झाड़ी क कुचरेस अउर ओका नस्ट किहस। ¹⁹ तू कहत ह, ‘मइँ एदोम क हराएउँ ह।’ तोहका ओकर घमण्ड अहइ अउर ओकर डीगं हाँकत अहा। मुला तोहका घरे मँ घुसा रहइ चाही। तोहका खतरा मोल लेइ क जरूरत नाहीं अहइ। जदि तू मोहसे जुद्ध करब्या तउ तू अउर यहूदा नस्ट होइ जइहीं।”

²⁰ मुला अमस्याह सुनइ स इन्कार कइ दिहस। इ परमेस्सर कइँती स भवा। परमेस्सर यहूदा क इस्राएल क जरिये हरावइ क जोजना बनाएस काहेकि यहूदा क लोग ओन देवतन क अनुसरण करत रहेन जेनकर अनुसरण एदोम क लोग करत रहेन। ²¹ एह बरे इस्राएल क राजा योआस बेतसेमेस नगर मँ यहूदा क राजा अमस्याह स आमने-सामने मिला। बेतसेमेस यहूदा मँ अहइ। ²² इस्राएल यहूदा क हराएस। यहूदा क हर एक मनई अपने घरन क पराइ गवा। ²³ योआस अमस्याह क बेतसेमेस मँ धरेस अउर ओका यरूसलेम लइ गवा। अमस्याह क बाप क नाउँ योआस रहा। योआस क बाप क नाउँ यहोआहाज रहा। योआस छ: सौ फुट लम्बी यरूसलेम क उ देवार क जउन एप्रैम फाटक स कोने क फाटक तलक रही, गिराइ दिहस। ²⁴ तब योआस परमेस्सर क मन्दिर क सोना, चाँदी अउ कइउ दूसर सामान लइ लिहस। ओबेदेदोम मन्दिर मँ ओन चिजियन क सुरच्छा क जिम्मेदार रहा। मुला योआस ओन सबहिं चिजियन क टाइ लिहस। योआस राजमहल स भी कीमती चिजियन क लिहस। तब योआस कछू लोगन क बन्दी क रूप मँ लिहा अउर सोमरोन लउटि गवा।

²⁵ अमस्याह योआस क मरइ क पाछे पन्द्रह बरिस जिअत रहा। अमस्याह क बाप यहूदा क राजा योआस रहा। ²⁶ अमस्याह सुरु स आखीर तलक दूसर जउन कछू किहस उ सब, इस्राएल अउर यहूदा क राजा क इतिहास नाउँ क किताबे मँ लिखा अहइ। ²⁷ जब अमस्याह यहोवा क आग्या क पालन करब तजि दिहस, यरूसलेम क लोग ओकरे खिलाफ एक ठु जोजना बनाएन। उ लाकीस नगर क पराइ गवा। किन्तु लोग लाकीस मँ मनइयन क पठएन अउर उ पचे अमस्याह क हुवाँ मार डाएन। ²⁸ तब उ पचे अमस्याह क ल्हासे क घोड़न पइ लइ गएन अउर ओका ओकरे पुरखन क संग दाऊद नगर मँ दफनाएन।

स्त्री अउर बडा क अजगर

12 एकरे बाद आसमान मँ एक बड़ी स निसानी परगट भइ: एक स्त्री दिखाई पड़ी जउन सूरज क धारन करे रही अउर चाँद ओकरे पाँव क नीचे रहा। ओकरे माथे प मुकुट रहा, जेहमाँ बारह तारा जड़ा रहेन। ² उ गर्भवती रही। ओकर दिन निकटाइ ग रहा, इ बरे उ पीड़ा स कराहत रही।

³ सरग मँ एक निसानी प्रकट भइ। मोरे समन्वा एक ठु इ लाल रंग क बड़ा क अजगर खड़ा रहा। ओकरे सातउ क सिर प सात मुकुट रहेन। ⁴ ओकर पूँछ आकास क तारन क एक तिहाई हिस्सा क सपाटा मारिके धरती प नीचे फेंक दिहेस। उ स्त्री जउन बच्चा पइदा करइवाली रही ओकरे समन्वा उ अजगर खड़ा होइ गवा जइसे कि जउन बच्चा पइदा होइ, ओका उ खाइ जाइ।

⁵ फिन उ स्त्री एक बच्चा क जन्म दिहेस जउन कि लरका रहा। ओका सब जातिन प लोहे क दण्ड़ क साथ सासन करइ क रहा। मुला ओकर बच्चा क उठाइके परमेस्सर अउर ओकरे सिहांसन क समन्वा लइ जावा गवा। ⁶ अउर उ स्त्री सूनसान जंगल मँ भाग गइ। ओका एक अइसी जगह रखा गवा जउने क परमेस्सर उही बरे बनवाए रहा, जइसे कि ओका 1,260 दिन तक जीवित रखा जाइ सकइ।

⁷ फिन सरग मँ एक लड़ाई होइ लाग मीकाएल अउर ओकरे सरगदूतन क उ भयंकर अजगर स लड़ाई होइ लाग। उ अजगर भी ओकरे दूतन क साथ लड़ाई लड़ेस। ⁸ मुला उ ओनके ऊपर भारी नाहीं पड़ा अउर उ भयंकर अजगर अउर ओकर सरगदूतन सरग मँ आपन जगह खोइ दिहेन। ⁹ फुन उ अजगर सरग क नीचे डकेल दीन्ह गवा। इ उहइ पुरान महानाग बाटइ जेका दानव अउर सइतान कहा ग अहइ। इ पूरी दुनिया क ठगत ह हाँ, एका फिन धरती प ढकेल दिन्ह गवा।

¹⁰ फिन मइँ जोरदार आवाज मँ एक आकासबाणी क कहत सुनेउँ, “इ हमरे परमेस्सर क जीत क घड़ी अउर सासन बाटइ। उ आपन ताकत अउर संप्रभुता क जनवाइ देहेस। ओका मसीह आपन ताकत क देखाइ दिहेस काहेकि हमरे भाइयन प परमेस्सर क सामने दिन रात लांछन लगावइवाला क नीचे ड़केल दीन्ह गवा। ¹¹ उ पचे मेमना क बलिदान क खून अउर ओकरी साच्छी स ओका हराइ दिहेन। उ पचे अपने प्राणन क गवाँइ देइ तलक अपने जीवन क परवाह नाहीं किहेन। ¹² इ बरे हे सरग, अउर सरग मँ रहइवाले मनई खुसी मनावा! मुला हाय धरती अउर समुद्दर! तोहरे बरे केतना बुरा होई काहे बरे कि सइतान अउर हुवाँ उतरके गवा अहइ। उ गुस्सा स तमतमात अहइ। ओका पता अहइ कि अउर ओकरे पास अधिक समइ नाहीं अहइ।”

¹³ जब उ भयंकर अजगर देखेस कि ओका धरती प गिराइ दीन्ह ग अहइ तउ उ स्त्री क पीछा करइ लाग जउन कि बचवा क जनम दिहे रही। ¹⁴ मुला उ स्त्री क उकाब क दुइ ठु बड़ा बड़ा पखना दीन्ह ग रहेन जइसे कि उ रेगिस्तान मँ उड़ जाइ, जउन ओकरे बरे तइयार कीन्ह ग रहा। हुवउँ प भयंकर अजगर स दूर ओका साड़े तीन साल तक पालन पोषण कीन्ह जाइ क रहा। ¹⁵ तउ उ महानाग उ स्त्री क पाछे अपने मुँहे स नदी क तरह पानी क धारा बहाएस जइसेन कि उ ओहमाँ बूड़ जाइ। ¹⁶ मुला धरती आपन मुँह खोलके उ स्त्री क मदद किहेस अउर उ भयंकर अजगर जउने नदी क अपने मुँहे स निकारे रहा, ओका निगल लिहेस। ¹⁷ एकरे बाद तउ उ भयानक अजगर उ स्त्री क ऊपर बहुत गुस्सा करेस अउर ओकरे बचवन क साथ लड़ाई लड़इ क बरे चल पड़ा जउन कि परमेस्सर क हुकुमन क पालन करत ही अउर ईसू क साच्छी क धारण करत ही

¹⁸ अउर समुद्दर क किनारे जाइके खड़ा होइ गवा।

यहोवा यरूसलेम क आसीर्बाद देइ क प्रतिग्या करत

8 फुन सर्वसक्तीमान यहोवा क बचन मोर लगे आएन अउ कहेन: ² इ उहइ अहइ जउन सर्वसक्तीमान यहोवा कहत ह: “सिय्योन बरे मोका अत्यधिक जलन भवा। मइँ ओहसे बहोत जियादा जलन करत हउँ।” ³ इ उहइ अहइ जउन यहोवा कहत ह: “मइँ सिय्योन क लगे वापस आवत हउँ अउर मइँ यरूसलेम मँ रहबउँ। यरूसलेम बिस्सास सहर कहा जाइ। मोर पर्वत, पवित्तर पर्वत कहा जाइ।”

⁴ इ उहइ अहइ जउन सर्वसक्तीमान यहोवा कहत ह: “एक बार फुन एक बूढ़ मनसेधु अउर एक बूढ़ा मेहरारू यरूसलेम क चौराहे पइ बइठब। लोग ऍतनी लम्बी उमर तलक जिअत रइहीं कि ओनके सहारे क छड़ी क जरूरत होइ। ⁵ सहर क चौराहे लरिकन अउ लड़िकियन स भरा होइ।” ⁶ इ उहइ अहइ जउन यहोवा सर्वसक्तीमान कहत ह: “भले ही इ जिअत लोगन क नज़र मँ असम्भव लगे, का एका मोर नज़र मँ भी असम्भव लगइ चाही? यहोवा सर्वसक्तीमान कहत ह।”

⁷ इ उहइ अहइ जउन सर्वसक्तीमान यहोवा कहत ह, “लखा, मइँ पूरब अउ पच्छिम क देसन स आपन लोगन क बचाउब, ⁸ अउर मइँ ओनका यरूसलेम मँ रहइ बरे लिआउब। उ पचे मोर लोग होइहीं अउर मइँ ओनकर बढ़िया अउ बिस्सास क जोग्ग परमेस्सर होबउँ।”

⁹ सर्वसक्तीमान यहोवा कहत ह, “उ जउन इ सब्दन क नबी क मुँहे स सुन्या ह, सक्तीसाली बना! तू पचे उ नबियन स सुने रहा जउन जब सर्वसक्तीमान यहोवा आपन मंदिर क फुन स बनावइ बरे नेवं डाएस। इ मन्दिर सर्वसक्तीमान यहोवा क अहइ। ¹⁰ अउर उ समइ क पहिले, हुवाँ लोगन क या जानवर क किराया पइ लेइ बरे धन नाहीं रहा। हुवाँ दुस्मनन क कारण आवागमन सुरच्छित नाहीं रहा। कहेकि उ मइँ रहा जउन एक दूसरे क खिलाफ कइ दिहे रहेउँ। ¹¹ मुला अब मइँ वइसा नाहीं करब जइसा इ बचा भवा लोगन क संग बीते दिना मँ किहे रहेउँ ह,” सर्वसक्तीमान यहोवा इ सबइ कहेस ह।

¹² “काहेकि हुवाँ सान्तिपूवर्क खेती-बारी होइहीं। अंगूरे क लता फल देइहीं: भुइँया अच्छी पइदावार देइ, अउ अकास आपन ओस देइहीं। मइँ इ सबहिं चिजियन लोगन क देब जउन जिअत रहब। ¹³ हे यरूसलेम अउ यहूदा लोग, मइँ तोहका बचाउब। बीते समइ मँ तू लोग जातियन क बीच मँ सराप क उदाहरण बनि ग रहेन। मुला अब मइँ तू लोगन क जातियन क बीच मँ आसीर्बाद क उदाहरण बाउब। जिन डेराअ। सक्तीसाली बना।”

¹⁴ फुरइ इ उहइ अहइ जउन सर्वसक्तीमान यहोवा कहत ह: “जब तू सबन क पुरखन मोका कोहाइ दिहन, मइँ ओन पइ विपत्तियन लावइ क जोजना बनाएउँ, अउर मइँ आपन इरादा क न बदलेउँ।” सर्वसक्तीमान यहोवा इ सब कहत ह, ¹⁵ “ठीक उहइ तरह, अब मइँ यरूसलेम अउ यहूदा क लोगन बरे नीक करइ क जोजना किहेउँ ह। जिन डेराअ। ¹⁶ मुला तू सबन क इ करइ चाही, एक दूसर क संग तोहका सिरफ फुरइ बोलइ चाही: जब तू पचे आपन अदालतन मँ निर्णय ल्या, तउ लोगन क उचित निआव प्रदान करा। ¹⁷ अपन हिरदइ मँ दूसर बरे बुरा योजना जिन बनावा अउर लबार प्रतिग्या जिन करा। काहेकि मइँ ओन बातन स घिना करत हउँ।” यहोवा इ सबइ कहेस।

¹⁸ सर्वसक्तीमान यहोवा क इ सँदेसा मोर लगे फुन आएन अउर कहेन: ¹⁹ इ उहइ अहइ जउन सर्वसक्तीमान यहोवा कहत ह: “चउथे महीना पचाँए महीना सतएँ महीना मँ तोहार सोक मनावइ अउर उपवास क दिन यहूदा क लोगन बरे गावइ, अनन्द मनाइ, अउ खुस होइ क होइ। एह बरे तू पचन्क सच्चाई क अउ सान्ति क पिरेम करइ चाही।”

²² अनेक लोग अउ अनेक सक्तीसाली रास्ट्र यरूसलेम आहहीं अउ सर्वसक्तीमान यहोवा क उपासना करिहीं अउ उ पचे ओसे मदद मागिहीं। ²³ इ उहइ अहइ जउन सर्वस्कतीमान यहोवा कहत ह: “उ दिना मँ, अलग-अलग रास्ट्रन स अलग-अलग भाखन क बोलइया दस ठु मनई एक ठु यहूदी क कोट क पल्ला धरिहीं अउर कइहीं, ‘हम पचे तोहार संग आवइ चाहत हउँ, काहेकि हम पचे सुना ह कि परमेस्सर तू पचन्क संग अहइ।’”

लाजर क मउत

11 बैतनिय्याह क लाजर नाउँ क एक ठु मनई बीमार रहा। इ उहइ सहर रहा जहाँ प मरियम अउर ओकर बहिन मार्था रहत रहिन। ² (मरियम उ स्त्री रही जउऩ पर्भू क ऊपर, इतर डाए रही अउर अपने मूँडे क बारे स ओकर गोड़ पोंछे रही। लाजर नाउँ क रोगी ओकर भाई रहा।) ³ इ बहिनियन ईसू क लगे समाचार भेजे रहिन, “पर्भू, जेहिका तू मया करत अहा उ बीमार अहइ।”

⁴ ईसू जब इ सुनेस तउ बोला, “इ बीमारी जान लेवा नाहीं अहइ। इ तउ परमेस्सर क महिमा परगट करइ क बरे अहइ। इहइ स परमेस्सर क पूत क महिमा मिली।” ⁵ (ईसू मार्था ओकर बहिन अउर लाजर क पियार करत रहा) ⁶ इ बरे जब उ सुनेस कि लाजर बीमार होइ गवा अहइ, तब जहाँ उ ठहरा रहा, हुवाँ दुइ दिन अउर रूक गवा। ⁷ फिन ईसू अपने चेलन स कहेस, “आवत जा हम सब यहूदिया लौटि चली।”

⁸ इ सुनिके ओकर चेलन कहेन, “गुरू कछू दिन पहेल यहूदी नेता तोहरे ऊपर पथराव करइ क कोसिस करे रहेन अउर तू फिन हुवाँ जात अहा?”

⁹ ईसू जवाब दिहेस, “का एक दिन मँ बारह घंटा नाहीं होतेन। जब कउनो मनई दिन क रोसनी मँ चलत ह तउ उ ठोकर नाहीं खात, काहेकि उ इ दुनिया क रोसनी क देखत ह। ¹⁰ मुला जदि कउनो रात मँ चलत ह तउ ठोकर खाइ क गिर जात ह, काहेकि रोसनी नाहीं रहत।”

¹¹ उ फिन इ कहेस, “अउर ओनसे बोला, हमार मीत लाजर अबहीं सोवत अहइ मुला मइँ ओका जगावइ जात अहउँ।”

¹² फिन ओकर चेलन ओसे कहेन, “पर्भू, जदि ओका नींद आइ ग अहइ तउ उ नीक होइ जाई।”

¹³ ईसू लाजर क मउत क बाबत बतावत रहा मुला ओकर चेलन सोचेन कि उ प्राकृतिक नींद क बारे मँ कहत बाटइ। ¹⁴ इ बरे ईसू ओनसे साफ साफ कहेस, “लाजर मरि गवा अहइ। ¹⁵ मइँ तोहरे बरे खुस अहउँ कि मइँ हुवाँ नाहीं रहेउँ। इ बरे कि अब तू पचे मोरे मँ बिसवास करि सकत ह। आवा अब हम ओकरे पास चली।”

¹⁶ फिन थोमा, जेका लोग दिदुमुस कहत रहेन, दूसरे चेलन स कहेस, “आवा हमहूँ सबइ पर्भू क पास चली जइसे कि हमहूँ सबे उहइ क साथे मर सकी।”

बैतनिय्याह मँ ईसू

¹⁷ इ तरह स ईसू चला गवा अउर हुवाँ जाइके उ पाएस कि लाजर क कब्र मँ रखे चार दिन होइ चुका रहेन। ¹⁸ (बैतनिय्याह यरूसलेम स करीब तीन किलोमीटर दूर रहा।) ¹⁹ भाई क मउत पर मार्था अउर मरियम क तसल्ली दियावइ क बरे अउर तमाम यहूदी नेता आवा रहेन।

²⁰ जब मार्था सुनेस कि ईसू आवा अहइ तउ उ ओसे मिलइ क बास्ते गइ। जबकि मरियम घरे मँ रूकी रही ²¹ हुआँ जाइके तब मार्था ईसू स कहेस, “पर्भू, जदि तू हियाँ होत्या तउ मोर भाई न मरत। ²² मुला मइँ जानत अहउँ कि तू अबहूँ अगर परमेस्सर स जउऩ कछू मँगब्या, उ तोहका देई।”

²³ ईसू ओसे कहेस, “तोहार भाई जी उठी।”

²⁴ मार्था ओसे कहेस, “मइँ जानित ह कि पुनरूत्थान क आखिरी दिन लोग जिवावा जइहीं।”

²⁵ ईसू ओसे कहेस, “मइँ पुनरूत्थान अहउँ मइँ जीवन अहउँ जउऩ मनई मोहमाँ बिसवास करत ह, जी उठी। ²⁶ अउर उ मनई जउन जियत ह अउर मोहमाँ बिसवास करत ह, कबहूँ न मरी। का तू ऍहमा बिसवास करति अहा?”

²⁷ उ ईसू स बोली, “हाँ पर्भू, मइँ बिसवास करित ह कि तू मसीह अह्या, उहइ परमेस्सर क पूत, जउन इ दुनिया मँ आवइवाला रहा।”

ईसू रोय दिहेस

²⁸ फिन ऍतना कहिके उ हुवाँ स चली गइ अउर अपने बहन क अकेले मँ बोलाइके बोली, “गुरू हियाँ अहइ, अउर तोहका बोलावत अहइ।” ²⁹ जब मरियम इ सुनेस तउ उ तुरन्त उठिके ओसे मिलइ क चलि दिहेस। ³⁰ ईसू अबहुँ तलक गाँव मँ नाहीं आवा रहा। अबहीं उ उहइ जगह रहा जहाँ मार्था ओसे मिली रही। ³¹ फिन जउन यहूदी घरे प ओका तसल्ली देत रहेन, जब मरियम क झटपट उठिके जात देखेन तउ इ सोचेन कि उ कब्र प रोवइ क बरे जात अहइ, इ बरे उ पचे ओकरे पीछे चल दिहेन। ³² मरियम जब हुवाँ पहुँची, जहाँ ईसू रहा तउ ईसू क देखिके ओकरे गोड़े प गिर पड़ी अउर बोली, “पर्भू जदि तू हियाँ होत्या तउ मोर भाई न मरत।”

³³ ईसू जब ओका अउर ओकरे साथ आए रहेन यहूदियन क रोअत चिल्लात देखेस तउ ओकर आतिमा तड़पइ अउर उ बहुत ब्याकुल होइ लाग। उ बहुत घबराइ गवा। ³⁴ अउर बोला, “तू ओका कहाँ रखे अहा?”

उ पचे ओसे बोलेन्ह, “पर्भू आवा अउर देखा।”

³⁵ ईसू क फूटि फूटिके रोवइ लाग।

³⁶ इ देखिके यहूदी कहइ लागेन, “देखा! इ लाजर क बहोत पियार करत ह!”

³⁷ मुला ओहमाँ स कछू लोग कहेन, “इ मनई जउऩ आँधरे क आँखी दिहेस, का लाजर क मरइ स बचाइ नाहीं सकत?”

ईसू लाजर क फिन जिआइ दिहेस

³⁸ तउ ईसू अपने मन मँ एक दाई फिन विचलित होइ गवा अउर कब्र कइँती गवा। उ एक गुफा रही अउर ओकर दरवाजा एक ठु चटूटान स ढका रहा। ³⁹ ईसू कहेस, “इ चटूटान क हटावा।”

जउऩ मनई मरा रहा, ओकर बहिन मार्था कहेस, “पर्भू अब तलक तउ हुवाँ स गन्ध आवइ लाग, काहेकि ओका दफनाए चार दिन होइ गएन।”

⁴⁰ ईसू ओसे कहेस, “का मइँ तोह कहे नाहीं कि जदि तू बिसवास करबू तउ परमेस्सर क महिमा का दर्सन पउबू।”

⁴¹ तउ उ पचे उ चट्टान क हटाय दिहेन। अउर ईसू आपन आँखी ऊपर उठाइके कहेस, “परमपिता, मइँ तोहार धन्यबाद करत अहउँ, इ बरे कि तू मोर सुनि लिहा। ⁴² मइँ जानित ह कि तू हमेसा मोर बात सुनि लेत ह मुला मइँ हियाँ चारिउँ तरफ इकट्ठा भीड़ स कहे अही जइसे लोग बिसवास कइ लेइ कि मोका तू भेजे अहा।” ⁴³ इ कहिके उ बड़े जोर की आवाज दइके बोलाएस, “लाजर बाहर आइ जा!” ⁴⁴ उ मनइ जउन मरि ग रहा, बाहर आइ गवा। ओकर हाथ गोड़ अबहुँ तक कफन स बंधा रहेन। ओकर मुँह कपरा स लिपटा रहा।

ईसू ओऩ लोगन स कहेस, “एका खोल द्या अउर जाइ द्या।”

यहूदी नेतन क जरिए ईसू क मारि डाइ क साजिस

(मत्ती 26:1-5; मरकुस 14:1-2; लूका 22:1-2)

⁴⁵ एकरे बाद मरियम क साथ आए यहूदियन मँ स तमाम ईसू क इ काम देखिके ओह प बिसवास करइ लागेन। ⁴⁶ मुला ओहमाँ स कछू फरीसियन क लगे गएन अउर जउऩ कछू ईसू करे रहा, ओऩका बताएऩ। ⁴⁷ फिन मुख्याजकन अउर फरीसियन यहूदी महासभा क बैठक बोलाएन अउर कहेन, “हमका सबेन्ह क अब का करइ चाही? इ मनई बहुत अद्भुत कारजन देखॅावत अहइ। ⁴⁸ अगर हम पचे एका अइसे करइ देब तउ ओकरे ऊपर सब बिसवास करइ लगिहइँ अउर इ तरह स रोमी लोग हियाँ आइ जइहीं अउर हमरे मन्दिर क अउर हमरे देस क बरबाद कइ देई।”

⁴⁹ मुला उ साल क मुख्ययाजक काइफा ओऩसे कहेस, “तू पचे कछू नाहीं जानत अह। ⁵⁰ अउर तोहका सबेन्ह क इहउ समझ नाहीं अहइ कि इहइ करइ मँ तोहार फायदा अहइ, अपनी सारी जात क बचावइ क बरे सबके फायदे क बरे एक मनई क मारइ क होई।”

⁵¹ इ बात उ अपनी तरफ स नाहीं कहे रहा, मुला उ साल क मुख्ययाजक होइ क नाते इ भविस्सबाणी किहे रहा, कि ईसू यहूदी रास्ट्र क बरे मरइ जात अहइ, ⁵² केवल यहूदी रास्ट्र क बरे नाहीं बल्कि परमेस्सर क सन्तान क बरे जउन तितर-बितर अहइ ओनका इदट्ठा करइ क बदे।

⁵³ इ तरह स उही दिन स उ पचे ईसू क मारइ क साजिस करइ लागेन। ⁵⁴ ईसू फिन यहूदियन क बीच मँ खुलके नाहीं आवा अउर यरूसलेम छोड़के उ निरजन रेगिस्तान क लगे इफ्राईम सहर जाइके अपने चेलन क साथे रहइ लाग।

⁵⁵ यहूदियन क फसह क त्यौहार आवइवाला रहा। तमाम मनई अपने अपने गाँव स यरूसलेम चला गएन, जइसे कि फ़सह क त्यौहार क पहले खुद क पवित्तर कइ लेइँ। ⁵⁶ उ पचे ईसू क खोजत रहेन। इ बरे जदि उ सबेन्ह मन्दिर मँ खड़ा रहेन तउ आपस मँ एक दूसरे स पूछब, सुरू करेन्ह, “तू सबेन्ह का सोचत अहा, का उ इ त्यौहार मँ न आई?” ⁵⁷ फिन मुख्ययाजकन अउर फरिसियन इ आदेस दिहेन कि कउनो क एकर पता लगावा जाइ कि क कउनो जानत ह कि ईसू कहाँ अहइ, तो उ बताइ देइ, जेहसे कि उ ओका बन्दी बनाइ सकइँ।