M’Cheyne Bible Reading Plan

आसा क आखिरी बरिसन

16 आसा क राज्जकाल क छत्तीसवें बरिस बासा यहूदा क भुइँया पइ हमला किहस। बासा इस्राएल क राजा रहा। उ रामा नगर गवा अउर एका लोगन क राजा आसा क लगे जावइ अउ आवइ स रोकइ बरे किला बनाइ दिहस। ² आसाने यहोवा क मन्दिर क कोसागार मँ रखे भए चाँदी अउर सोना क लिहस अउर उ राजमहल स चाँदी सोना लिहस। तब आसा बेन्हदद क सँदेसा पठएस। बेन्हदद अराम क राजा रहा अउर दमिस्क मँ रहत रहा। आसा क सँदेसा रहा: ³ “बेन्हदद, मोरे अउर अपने बीच एक ठु सन्धि होइ द्या। इ सन्धि क वइसे ही होइ द्या जइसा उ हमरे बाप अउर तोहरे बाप क बीच कीन्ह गइ रही। धियान द्या, मइँ तोहरे लगे चाँदी सोना पठवत हउँ। अब तू इस्राएल क राजा बासा क संग कीन्ह गइ सन्धि क तोड़ द्या जेहसे उ मोका अजाद छोड़ देब्या अउर मोका परेसान करब बन्द कइ देब्या।”

⁴ बेन्हदद आसा क बात मान लिहस। बेन्हदद आपन फउजे क सेनापतियन क इस्राएल क नगरन पइ हमला करइ क बरे पठएस। एन सेनापतियन इय्योन, दान अउर आबेल्मैम नगरन पइ हमला किहस। उ पचे नप्ताली देस मँ ओन सबहिं नगरन पइ हमला किहस जहाँ खजाने रखे रहेन। ⁵ बासा इस्राएल क नगरन पइ हमला क बात सुनेस। एह बरे उ रामा मँ किला बनावइ क काम रोक दिहस अउर आपन काम छोड़ दिहस। ⁶ तब राजा आसा यहूदा क सबहिं लोगन क बटोरेस। उ पचे रामा नगर क गएन अउर काठ अउ पाथर उठाइ लाएन जेनकर उपयोग बासा किला बनावइ बरे किहे रहा। आसा अउर यहूदा क लोग पाथरन अउ काठे क उपयोग गेवा अउ मिस्पा नगरन क जियादा मजबूत बनावइ बरे किहस।

⁷ उ समइ द्रस्टा हनानी यहूदा क राजा आसा क लगे आवा। हनानी ओहसे कहेस, “आसा, तू मदद क बरे अराम क राजा पइ आस्रित रह्या, किन्तु तू यहोवा आपन परमेस्सर पइ मदद बरे आस्रित नाहीं रह्या। एह बरे अराम क राजा क फउज तोहसे पराइ निकरी। ⁸ कूस अउ लुबी बहोत बिसाल अउ सक्तीसाली फउज रखत रहेन। ओकरे लगे अनेक रथ अउ सारथी रहेन। किन्तु आसा, तू उ बिसाल सक्तीसाली फउज क हरावइ मँ मदद क बरे यहोवा पइ आस्रित भए अउर यहोवा तोहका ओनका हरावइ दिहस। ⁹ यहोवा क आँखिन सारी धरती पइ ओन लोगन क लखत फिरत हीं जउन ओकरे बरे स्रद्धालु अहइँ जेहसे उ ओन लोगन क सक्तीसाली बनाइ सकइ। आसा, तू बेवकूफी क काम किहा। एह बरे अब स लइके आगे तलक तोहका जुद्ध क सामना करइ क पड़ी।”

¹⁰ आसा हनानी पइ उ बात स कोहाइ गवा जउन उ कहेस। आसा ऍतना किरोध स पागल होइ उठा कि उ हनानी क बन्दीघरे मँ डाइ दिहस। आसा उ समइ कछू लोगन पइ अत्याचार भी करत रहा।

¹¹ आसा जउन कछू सुरु स आखीर तलक किहस। उ इस्राएल अउर यहूदा क राजा लोगन क इतिहास क पुस्तक मँ लिखा अहइ। ¹² आसा क गोड़ ओकरे राज्जकाल क उनतालीसवें बरिस मँ रोगी होइ गवा। ओकरे रोग बहोत बुरा रहा किन्तु उ यहोवा स मदद नाहीं चाहेस। आसा वैद्यन स मदद चाहेस। ¹³ आसा अपने राज्जकाल क इकतालीसवें बरिस मँ मरा अउर इ प्रकार आसा अपने पुरखन क संग बिस्राम किहस। ¹⁴ लोग आसा क ओकरी कब्र मँ दफनाएन जेका खुद दाऊद क नगर मँ बनाए रहा। लोग ओका एक आखिरी चारपाई पइ रखेन जेह पइ सुगन्धित द्रव्य अउर अलग-अलग तरह क मिले इत्र रखे रहेन। लोग आसा क सम्मान करइ क आगी क महाज्वाला किहन।

5 फिन मइँ देखा कि जउन सिंहासन प बिराजमान रहा, ओकरे दाहिने हाथे मँ एक लपेटा चमड़ा क पत्र मतलब एक अइसी किताब जेका लिखके लपेट दीन्ह जात रहा। जेकरे दुइनउँ कइँती लिखावट रही। ओका सात मोहर लगाइके छाप दीन्ह ग रहा। ² मइँ एक सक्तिमान सरगदूत कइँती देखेउँ जउन ऊंची आवाज मँ घोसणा करत रहा, “इ लपटा भवा चमड़न क पत्र मोहरन क तोड़इ अउर एका खोलइ मँ कउन मनई समर्थ अहइ।” ³ मुला सरग मँ अथवा जमीन प या पताललोक मँ कउनउँ अइसा नाहीं रहा जउन उ लपटा चर्मपत्र क खोलइ अउर ओका भीतर झाँकइ।

⁴ काहेकि उ चर्मपत्र क खोलइ क ताकत राखइवाला या अन्दर स ओका देखइ क ताकत रखइवाला कउनउँ नाही मिल पाए रहा। इ बरे मइँ सुबक सुबक क रोय दीन्ह।

⁵ फिन ओन बुजुर्गन मँ स एक मोसे कहेस, “रोउब बन्द करा! सुना, यहूदा क बंसज क सेर जउन दाऊद क बंसज क अहइ जीत हासिल किहे अहइ। उ एन सात मोहरन क तोड़इ अउर इ लिपटा चर्मपत्र क खोलइ मँ समरथ अहइ।”

⁶ फिन मइँ देखेउँ कि उ सिंहासन अउर ओन चार प्रानीयन क समन्वा अउर ओन बुजुर्गन क समन्वा एक ठु मेमना खड़ा अहइ। उ अइसे देखात रहा जइसे ओकरे बलि चड़ाई ग रही होइ। ओकरे सात सीग रहेन अउर सात आँखी रहिन, जउन परमेस्सर क सात आतिमा अहिन। जेनेका पूरी धरती प भेजा ग रहा। ⁷ फिन उ आवा अउर जउन सिंहासन प विराजमान रहा, ओकरे दाहिने हाथे स उ लिपटा चर्मपत्र लइ लिहेस। ⁸ जब उ ओनसे लिपटा चर्मपत्र लइ लिहेस तउ ओन चारउ प्रानी अउर चौबीसउ बुजुर्गन उ मेमना क झुकके प्रणाम किहेन। ओनमाँ स प्रत्येक क हाथ मँ वीना अउर सोने का कटोरा रहेन। उ सब बोलत रहेन: अउर महकत सोने क धूपदान थामे रहेन जउन परमेस्सर क लोगन क पराथना अहइ। ⁹ उ एक नवा गाना गावत रहेन:

¹¹ तबहिं मइँ देखेउँ अउर तमाम सरगदूतन क आवाज सुनेउँ। उ पचे सिंहासन, जीवित प्रानीयन अउर बुजुर्गन क चारिहुँ कइँती खड़ा रहेन। अउर उहाँ सरगदूतन क तादाद लाखन करोड़न मँ रही ¹² अउर उ पचे जोर जोर स कहत रहेन:

¹³ फिन मइँ सुनेउँ कि सरग क, धरती पइ क पाताललोक क, समुद्दर मँ का, समूची दुनिया क अउर समूचे ब्रहाण्ड़ हर एक प्रानी जउन इ जगह मँ रहत रहा कहत रहेन:

¹⁴ फिन उ चारिहुँ प्रानी कहेन, “आमीन!” कहेन अउर बुजुर्गन झुकिके आराधना करेन।

यहोवा आपन लोगन क वापसी चाहत ह

1 दारा क राज्जकाल क दूसर बरिस क अठएँ महीना मँ, यहोवा क सँदेसा बेरेक्याह क पूत जकर्याह नबी क लगे आवा। (बेरेक्याह इद्दो क पूत रहा।) सँदेसा इ अहइ:

² यहोवा तोहरे पुरखन पइ बहोत कोहान रहा। ³ एह बरे लोगन स कहा: इ उहइ अहइ जउन सर्वसक्तिमान यहोवा कहत ह: “मोरे लगे वापस आवा अउर मइँ तोहार लगे वापस आउब।” इ उहइ अहइ जउन सर्वसक्तिमान यहोवा कहेस।

⁴ यहोवा कहेस, “आपन पुरखन क नाई न बना जेनका बीते भए समइँ मँ नबी उपदेस दिहेस। उ पचे कहेन, ‘सर्वसक्तिमान यहोवा चाहत ह कि तू पचे आपन बुरा रहन-सहन क तजि द्या। बुरा काम बंद कइ द्या।’ मुला तोहार पचन्क पुरखन मोर नाहीं सुनेन।” यहोवा इ सबइ बातन कहेस।

⁵ परमेस्सर कहेस, “अब तोहार पचन्क पुरखन कहाँ बाटइ? का नबी हमेसा जिअत रहतेन? ⁶ नबी मोर सेवक रहेन। मइँ ओनकर उपयोग तोहरे पचन्क पुरखन क आपन व्यवस्था अउर आपन सिच्छा देइ बरे किहेस। आखिरकार तोहार पुरखन सिच्छा ग्रहण किहेन। उ पचे पस्चाताप किहेन अउर कहेन, ‘सर्वसक्तिमान यहोवा हमार मारग अउ कामन क अनुसार ठीक वइसा ही जइसा उ निर्णय किहे रहा, किहेस ह।’ इ तरह उ पचे परमेस्सर क लगे वापस लउटेन।”

घोड़न क दर्सन

⁷ दारा क दूसर बरिस क सबित क ग्यारहनें महीना क चउबीसवें दिन यहोवा क इ सँदेसा बेरेक्याह क पूत जकर्याह नबी क लगे आवा। (बेरेक्याह इद्दो क पूत रहा।)

⁸ रात मँ मइँ लखेउँ कि एक मनई लाल घोड़े पइ सवार अहइ। उ एक घाटी मँ कछू मेंहदियन क बृच्छ क बीच खड़ा रहा। ओकरे पाछे लाल, भूरा अउ सफेद रंग क घोड़न रहेन। ⁹ मइँ पूछेउँ, “महोदय इ सबइ घोड़न क का मतलब अहइँ?”

सरगदूत जउन मोहसे बात करत रहा, मोका जवाब दिहेस, “मइँ तू पचन्क देखाउब कि ओकर का मतलब अहइँ।”

¹⁰ एह बरे मेंहदियन क बृच्छ क बीच रहत भवा मनई जवाब दिहेस, “इ सबइ यहोवा दुआरा धरती प गस्त लगाइ बरे पठएस ह।”

¹¹ तब उ पचे यहोवा क सरगदूतन जउन मेंहदियन क बृच्छ क बीच खड़ा भवा रहा कहेन, “हम पचे धरती गस्त लगाइ चुका अहइ। फुरइ समूचा धरती सान्त अउ सुख-चैन मँ अहइ।”

¹² तब यहोवा क सरगदूत कहेस, “हे सर्वसक्तीमान यहोवा, आप यरूसलेम अउ यहूदा क सहरन पइ केतॅना दिना तलक दाया नाहीं करब जेकर संग तू सत्तर बरिस तलक किरोधित रहा ह।”

¹³ तब यहोवा नीक अउ सान्तिदायक सब्दन स उ सरगदूत क जवाब दिहेस जउन मोसे बात करत रहा।

¹⁴ एह बरे सरगदूत जउन मोसे बात करत रहा मोसे कहेस, इ घोसणा करा:सर्वसक्तीमान यहोवा इ कहत ह:

सींगन क दर्सन

¹⁸ तब मई ऊपर नजर उठाएउँ अउर चार सींगन क दिखेउँ। ¹⁹ तब मइँ उ सरगदूत पूछेस कउनो मोसे बातन करत रहा, “इ सींगन क अरथ का अहइ?”

उ जवाब दिहेस, “इ सबइ उ सब सींगन अहइँ, जउन इस्राएल, यहूदा अउ यरूसलेम क लोगन क रास्टन क बीच छितराइ दीन्ह गवा ह।”

²⁰ तब यहोवा मोका चार सिल्पकारन क देखाएस। ²¹ मइँ ओनसे पूछेउँ, “इ सबइ का करइ बरे आवत अहइँ?”

उ जवाब दिहेस, “सींगन यहूदा क अइसा तितर-बितर कइ दिहे रहा कि कउनो आपन सिर न उठाइ सकी। परन्तु कारिगर ओका आतंकित करइ बरे अउ ओन जातियन क सींगन क काटन बरे आव ह जउन यहूदा लोगन देस क विरुद्ध आपन सींगन एह बरे उठाएस ह कि उ तितर-बितर हो जाइ।”

ईसू अउर सामरी स्त्री

4 अउर जब ईसू क पता चला कि फरीसियन इ सुने अहइँ कि ईसू यूहन्ना स जियादा लोगन क बपतिस्मा देत अहइ अउर ओनका आपन चेलन बनावत अहइ। ² (वइसे ईसू खुदइ बपतिस्मा नाहीं देत रहा। बल्कि ओकर चेलन इ कारज करत रहेन्ह।) ³ उ यहूदिया छोड़िके एक बार फिन गलील लौट ग रहा। ⁴ इ दाईं ओका सामरिया होइके जाइका पड़ा।

⁵ एह बरे उ सामरिया क एक नगर सूखार मँ आवा। इ नगर उहइ भुइँया क पास रहा। जउने क याकूब अपने बेटवा यूसुफ क दिहे रहा ⁶ हुवाँ याकूब क कुआँ रहा। ईसू इ जात्रा मँ एकदम थक ग रहा, एह बरे उ कुआँ क पास बइठ गवा। उ समइ करीब करीब दुपहरिया रही। ⁷ एक ठु सामरी^[a] स्त्री पानी भरइ क बास्ते आइ! ईसू ओसे कहेस, “मोका पिअइ क पानी दइ द्या।” ⁸ उ समइ सब चेलन खाना बेसहइ क बरे सहर चला गवा रहेन।

⁹ सामरी स्त्री ओसे कहेस, “तू यहूदी होइके मोसे पानी काहे मांगत अहा, मइँ तउ सामरी स्त्री अहउँ?” (यहूदी तउ सामरियन स कउनो मतलब नाहीं रखत रहेन।)

¹⁰ ओकरे जवाब मँ ईसू ओसे कहेस, “जदी तू ऍतना जनतेउ कि परमेस्सर का दिहेस अउर उ कउन अहइ जउन तोहसे कहत अहइ कि ‘मोका पानी द्या’ तउ तू ओसे खुदइ मँगतिउ, अउर उ तोहका जीवन जल दइ देत।”

¹¹ उ स्त्री ओसे कहेस, “महासय, तोहरे लगे तउ कउनो बासन तक नाहीं बाटइ अउर कुआँ बहुत गहिर अहइ फिन तोहरे पास जीवन जल कइसे होइ सकत ह? ¹² जरूर तू हमरे पूर्वज याकूब स बड़ा अहा जेक हमका कुआँ दिहेन अउर अपने लड़िकन्ह अउर जानवरन्ह क साथ खुदइ एकर पानी पिए रहेन्ह।”

¹³ ईसू एकरे जवाब मँ कहेस, “जउन मनई इ कुआँ क पानी पिअत ह, ओका फिन पियास लगी। ¹⁴ मुला जउन मनई उ पानी क पी लेई जउन पानी मइँ देब, ओका फिन कबहूँ पियासन लगी। मोर दीन्ह पानी ओकरे दिल मँ एक पानी क झरना क नाई बन जाई जउन घुमड़ घुमड़ क ओका अनन्त जीवन देई।”

¹⁵ तब उ स्त्री ओसे कहेस, “हे महासय, मोका उहइ पानी दइ द्या जेहसे कि मइँ कबहूँ पियासी न रही अउर मोका फिन पानी खँइचे क बरे न आवइ क पड़इ।”

¹⁶ इ सुनके ईसू ओसे कहेस, “जा अपने पति क बोलावा अउर हियाँ आवा।”

¹⁷ एकरे जवाब मँ स्त्री कहेस, “मोर कउनो पति नाहीं बाटइ।”

ईसू ओसे कहेस, “जब तू कहति अहा कि तोहार कउनो पति नाहीं बाटइ, तउ तू ठीक कहति अहा ¹⁸ तोहरे पाँच पति रहेन अउर जउने पुरूस क साथ तू रहित अहा, उ तोहार पति न अहइ, एह बरे जउन तू कहति अहा उ ठीक अहइ।”

¹⁹ इ सुनिके उ स्त्री ओसे कहेस, “महासय, मोका तउ लागत अहइ कि तू कउनो नबी अहा। ²⁰ हमरे पूर्वजन इ पर्वत प आराधना किए रहेन्ह मुला तू कहत अहा कि यरूरलेम आराधना क स्थान अहइ।”

²¹ ईसू ओसे कहेस, “हे स्त्री मोरी बात माँ बिसवास करा। उ समइ आवइवाला अहइ जब तू परमपिता क आराधना न तउ एहि पर्वत प करइ पउबू अउर न तउ यरूसलेम मँ। ²² तू सामरी लोगन्ह ओका नाहीं जानत अहइँ जेकर आराधना करति अह। मुला हम यहूदी ओका जानित ह जेकर आराधना करति अहा। सबन क उद्धार यहूदियन स मिली। ²³ मुला उहइ समइ आवत अहइ, ‘अउर आइ ग’ बाटइ जब सच्चे आराधकन परमपिता क आराधना, आतिमा अउर सच्चाई मँ करिहीं। परमपिता अइसे आराधक चाहत ह। ²⁴ परमपिता आतिमा अहइ अउर एह बरे जउन ओकर आराधना करी ओका आतिमा अउर सच्चाइन मँ आराधना करइ क पड़ी।”

²⁵ फिन स्त्री ओसे कहेस, “मइँ जानत अहउँ कि मसीह आवइवाला अहइ।” (यानी “ख्रीष्ट”) “जब उ आई तउ हम पचन क सब कछू बताई।”

²⁶ ईसू ओसे कहेस, “मइँ जउन तोहसे बतियात अहउँ मइँ उहइ अहउँ।”

²⁷ उहइ समइ ओकर चेलन लौट आएन। अउर ओनका इ देखिके बहुत अचरज भवा कि उ एक ठु स्त्री स बात करत अहइ। मुला कउनो ओह इ नाहीं कहेस, “तोहका इ स्त्री स का मतलब अहइ?” अउर या “ई स्त्री स तू काहे बरे बतियात अहा?”

²⁸ उ स्त्री आपन पानी भरइवाली गगरी छोड़िके सहर चली गइ अउर मनइयन स कहेस, ²⁹ “आवा जा अउर देखा, एक ठु अइसा मनई अहइ, जउन मोर कीन्ह सच मोका बताइ दिहेस। का तू इ नाहीं सोचत अहा कि उ मसीह अहइ?” ³⁰ इ सुनिके सब लोगन्ह सहर छोड़िके ईसू क लगे जाइ पहुँचेन।

³¹ उहइ समइ ईसू क चेलन ओसे बिनती करत रहेन्ह, “गुरू कछू खाइ ल्या!”

³² मुला ईसू ओनसे कहेस, “मोरे पास खाइ बरे, अइसा खाना अहइ जेकरे बारे मँ तू पचे कछू नाहीं जानत अहा।”

³³ इ सुनिके सब चेलन आपस मँ एक दूसरे स पूछइ लागेन, “का ओकरे बरे कउनो खाइ बरे कछू लिआवा होई?”

³⁴ ईसू ओनसे कहेस, “मोर खाना ओकर (परमेस्सर) इच्छा क पूरी करब अहइ जउन मोका पठएस ह। जउन कारज मोका सौंपा गवा बाटइ, ओका मोका पूरा करइ क अहइ, ³⁵ तू पचे अक्सर कहत ह, ‘चार महीना बाकी बा तब जाइके फसल आई’ मुला मइँ तोहका पचेन्क बतावत अही कि आपन आपन आँखी खोला अउर खेतन क तरफ देखा उ सब काटइ क बरे तइयार होइ गवा अहइँ। उ जउन कटाई करत अहइ आपन मजूरी पावत अहइ। ³⁶ अउर अनन्त जीवन क बरे फसल इकट्ठा करत बा, एह बरे कि फसल बोवइवाला अउर ओका काटइवाला दुइनउँ साथे साथे खुस रहइँ। ³⁷ इ हमार बात एकदम स सच्ची निकरी, ‘एक मनई बोवत ह अउर दूसर मनई ओका काटत ह।’ ³⁸ मइँ तोहका इ फसल काटइ क बरे भेजे अही जेहि पइ तोहार मेहनत नाहीं लागी बाटइ। जेहि पइ दूसरे क मेहनत लगी अहइ अउर ओकरी मेहनत क फल तोहका मिला अहइ।”

³⁹ उ सहर क तमाम मनइयन ईसू मँ बिसवास किहेन, एह बरे कि उ स्त्री क बात क सच्ची मान लिहेन जउन कहेस, “मइँ जउन कछू करे रहेउँ, उ ओका ओकरे बारे मँ सब बताइ दिहेस।” ⁴⁰ जब सामरी ओकरे पास आएन तउ ओन सबे ओसे ठहरइ क बरे चिरौरी करेन्ह ऍकरे बाद उ दुइ दिन हुवाँ ठहर गवा। ⁴¹ ओकरी बात स प्रभावित होइके तमाम जने ओहमाँ बिसवास करइ लागेन। ⁴² ओन सब उ स्त्री स कहेन, “अब हम सिरिफ तोहरी साच्छी क नाईं बिसवास ही नाहीं करत अही, मुला अब तउ हम सब खुदइ सुनि अउर देख लीन्ह। अब हम पचे जान लीन्ह कि सचमुच उ मनई संसार क उद्धार करइवाला बाटइ।”

राजकर्मचारी क बेटवा क जीवन दान

(मत्ती 8:5-13; लूका 7:1-10)

⁴³ दुइ दिन क बाद उ हुवाँ स गलील क चल दिहेस। ⁴⁴ (एक बरे कि ईसू खुद कहे रहा कि कउनो नबी अपने देस मँ कबहुँ आदर नाहीं पावत।) ⁴⁵ इ तरह जब उ गलील आवा तउ गलील क रहइवाले ओकर स्वागत करेन्ह काहे बरे उ पचे उ सबइ कछू लखे रहेन्ह जउन कछु फसह क त्यौहार यरूसलेम मँ उ किहे रहा: काहेकि उ पचे सबहिं त्यौहार मँ सामिल रहेन।

⁴⁶ ईसू एक बार फिन गलील मँ काना गवा जहाँ उ पानी क दाखरस बनाइ दिहे रहा। अब की दाई कफरनहूम मँ एक ठु राजकर्मचारी रहा जेकर बेटवा बीमार रहा। ⁴⁷ जब राजकर्मचारी सुनेस कि यहूदिया स ईसू गलील आवा अहइ तउ उ ओकरे पास आवा अउर इ विनती किहेस कि उ कफरनहूम जाइके ओकरे बेटवा क चंगा कइ दे ओकर बेटवा एकदम मरइ क किनारे आइ गवा रहा। ⁴⁸ ईसू ओसे कहेस, “अद्भुत कारजन अउर अचरजे कारजन क देखे बिना तू पचे बिसवास न करब्या।”

⁴⁹ राजकर्मचारी ओसे कहेस, “महासय, एकरे पहले कि मोर बेटवा मरि जाइ, तू मोरे साथे घरे चला।”

⁵⁰ ईसू जवाब दिहेस, “जा तोहार बेटवा जिअत रही।” ईसू जउन कहे रहा, उ पचे ओह पइ बिसवास किहेस अउर घर चला गवा। ⁵¹ उ घर लौटत ही रास्ते मँ रहा कि ओकर नउकर मिल गएन अउर इ समाचार सुनाएन, “तोहार बेटवा चंगा होइ गवा।”

⁵² उ पूछेस, “ओकर हालत कब स ठीक होइ लाग ह?”

उ जवाब दिहसे, “कल दुपहरिया मँ एक बजे ओकर बुखार उतर गवा।”

⁵³ उ लरिका क बाप क इ याद आइ गवा कि इहइ ठीक समइ रहा जब ईसू ओसे कहेस, “तोहार बेटवा जिअत रही।” इ तरीका स ओकर पूरा परिवार ईसू मँ बिसवास करइ लाग।

⁵⁴ इ दूसर अद्भुत कारज रहा जउन ईसू यहूदियन क गलील आए क बाद देखाएस।