M’Cheyne Bible Reading Plan

योआस फुन मन्दिर बनावत ह

24 योआस जब राजा बना सात बरिस क राहा। उ यरूसलेम मँ चालिस बरिस तलक सासन किहस। ओकरी महतारी क नाउँ सिब्या रहा। सिब्या बेर्सेबा नगर क रही। ² योआस उ काम जउन यहोवा क नज़र मँ नीक अहा तब तलक करत रहेन जब तलक याजक यहोयादा जिअत रहा। ³ यहोयादा योआस क बरे दुइ मेहररुअन चुनेस। योआस क पूत अउर बिटियन रहिन।

⁴ तब कछू समइ पाछे, योआस यहोवा क मन्दिर दुबारा बनावइ क निहचइ किहस। ⁵ योआस याजकन अउ लेवीबंसियन क एक संग बोलाएस। उ ओनसे कहेस, “यहूदा क नगरन मँ जा अउर उ धने क बटोरा जेकर भुगतान इस्राएल क लोग हर बरिस करत हीं। उ धने क उपयोग परमेस्सर क मन्दिर दुबारा बनावइ मँ करो। हाली करा अउर एका पूरा कइ ल्या।” मुला लेवीबंसियन हाली नाहीं किहन।

⁶ एह बरे राजा योआस मुख्य याजक, यहोयादा क बोलाएस। राजा कहेस, “यहोयादा, तू यहूदा अउ यरूसलेम स यहोवा क सेवक मोसा दुआरा कर क धन वसूलइ बरे लेवीबंसियन क नाहीं लिहा? मूसा अउर इस्राएल क लोग पवित्तर तम्बू बरे इ कर क धन क उपयोग किहे रहेन।”

⁷ पुराने जमाने मँ अतल्याह क पूत, परमेस्सर क मन्दिर मँ जबरदस्ती घुस गए रहेन। उ पचे यहोवा क मन्दिर क पवित्तर चिजियन क उपयोग अपने बाल देवतन क पूजा क बरे किहस। अतल्याह एक ठु दुट्ठ मेहरारु रही।

⁸ राजा योआस एक ठु सन्दूख बनावइ क आदेस दिहेस अउर ओका यहोवा क मन्दिर क दुआरे क बाहेर रखइ क आदेस दिहस। ⁹ तब लेविबंसियन यहूदा अउ यरूसलेम मँ इ घोसणा किहन। उ पचे लोगन स कर क धन यहोवा क बरे लिआवइ क कहेन। यहोवा क सेवक मूसा इस्राएल क लोगन स रेगिस्ताने मँ रहत समइ जउन कर क रुप मँ धन मँगे रहा ओतना ही इ धन अहइ। ¹⁰ सबहिं प्रमुख अउर सबहिं लोग खुस रहेन। उ पचे धन लइके आएन अउर उ पचे ओका सन्दूखे मँ डाएन। उ पचे तब तलक देत रहेन जब तलक सन्दूख नाहीं भरि गवा। ¹¹ तब लेवीबंसियन क राजा क अधिकारियन क समन्वा सन्दूख लइ जाइ क पड़ी। उ पचे लखेन कि सन्दूख धन स भरि गवा ह। राजा क सचिव अउर प्रमुख याजक क अधिकारी आएन अउर उ पचे धने क सन्दूख स निकारेन। तब उ पचे सन्दूख क अपनी जगहिया पइ फुन वापस लइ गएन। उ पचे बार-बार किहन अउर धन बटोरेन। ¹² तब राजा योआस अउर यहोयादा उ धन ओन लोगन क दिहस जउन यहोवा क मन्दिर क बनावइ क कार्य करत रहेन अउर यहोवा क मन्दिर बनावइ मँ कार्य करइवालन यहोवा क मन्दिर क दुबारा बनावइ बरे कुसल बढ़ई अउर काठे पइ खुदाई क कार्य करइवालन क मजदूरी पइ धरेन। उ पचे यहोवा क मन्दिर क दुबारा बनावइ बरे कँसे अउर लोहा क काम करइ क जानकरी रखइवालन क भी मजूरी पइ रखेन।

¹³ काम क निगरानी रखइवाले मनई बहोत बिस्सास क जोग्ग रहेन। यहोवा क मन्दिर क दुबारा बनावइ गवा। उ पचे परमेस्सर क मन्दिर क पहिले क तरह ही बनाएन अउर इ पहिले स जियादा मजबूत बनाएन। ¹⁴ जब कारीगरन कार्य पूरा कइ लिहन तउ उ पचे उ धने क जउन बचा रहा राजा योआस अउर यहोयादा क लगे लइ आएन। उ पचे धन क उपयोग यहोवा क मन्दिर बरे चिजियन बनावइ बरे किहन। उ सबइ चिजियन मन्दिर क सेवाकार्य मँ अउर होमबलि चढ़ावइ मँ काम आवति रहिन। उ पचे खोरन अउर दूसर चिजियन क सोना अउ चाँदी स बनाएन। याजकन यहोवा क मन्दिर मँ हर एक दिन क होमबलि तब तलक चढ़ाएन जब तलक यहोयादा जिअत रहा।

¹⁵ यहोयादा बूढ़ा भवा। उ बहोत लम्बी उमिर बिताएस तब उ मरा। यहोयादा जब मरा, उ एक सौ तीस बरिस क रहा। ¹⁶ लोगन यहोयादा क दाऊद क नगर मँ हुवाँ दफनाएन जहाँ राजा दफनाए जात हीं। लोगन यहोयादा क हुवाँ दफनाएन काहेकि अपनी जिन्नगी मँ उ परमेस्सर अउ परमेस्सर क मन्दिर बरे बहोत अच्छे कार्य किहस।

¹⁷ यहोयादा क मरई क पाछे यहूदा क प्रमुख आएन अउर उ पचे राजा योआस क समन्वा निहुरेन। राजा एन प्रमुखन क सुनेस। ¹⁸ राजा अउ प्रमुखन उ यहोवा, परमेस्सर क मन्दिर क छोड़ दिहेस जेकर अनुसरण ओनकर पुरखन करत रहेन। उ पचे असेरा स्तम्भ अउर दूसर मूरतियन क पूजा सुरू किहस। परमेस्सर यहूदा अउ यरूसलेम क लोगन पइ कोहाइ गवा काहेकि राजा अउ उ प्रमुखन अपराधी रहेन। ¹⁹ परमेस्सर लोगन क लगे नबियन क ओनका यहोवा कइँती लउटाइ क बरे पठएस। नबियन लोगन क चितउनी दिहन। किन्तु लोग सुनइ स इन्कार कइ दिहन।

²⁰ तब परमेस्सर क आतिमा याजक यहोयादा क पूत जकर्याह पइ उतरी। जकर्याह लोगन क समन्वा खड़ा भवा अउर उ कहेस, “जउन यहोवा कहत ह उ इ अहइ: ‘तू लोग यहोवा क आदेस पालन करइ स काहे इन्कार करत अहा? तू कामयाब नाहीं होब्या। तू यहोवा क तजा ह। एह बरे यहोवा भी तोहका छोड़ दिहस ह।’”

²¹ लेकिन लोग जकर्याह क खिलाफ जोजना बनाएस। राजा जकर्याह क मार डावइ क आदेस दिहस, एह बरे उ पचे ओह पइ तब तलक पाथर मारेन जब तलक उ मर नाहीं गवा। लोगन इ मन्दिर क आँगन मँ किहन। ²² राजा योआस अपने ऊपर यहोयादा क दयालुता क भी याद नाहीं रखेन। यहोयादा जकर्याह क बाप रहा। मुला योआस यहोयादा क पूत जकर्याह क मार डाएस। मरइ क पहिले जकर्याह कहेस, “यहोवा ओह क लखि जउन तू करत अहा अउर तोहका दण्ड देइ।”

²³ बरिस क आखीर मँ अराम क फउज योआस क खिलाफ आइ। उ पचे यहूदा अउ यरूसलेम पइ हमला किहन अउर लोगन क सबहिं प्रमुखन क मार डाएन। उ पचे सारी कीमती चिजियन दमिस्क क राजा क लगे पठइ दिहन। ²⁴ अराम क फउज बहोत कम सैनिकन क संग आइ रही किन्तु यहोवा ओका यहूदा क बहोत बड़ी फउज क हरावइ दिहस। यहोवा इ एह बरे किहस कि यहूदा क लोग यहोवा परमेस्सर क तजि दिहन जेकर अनुसरण ओनकर पुरखन करत रहेन। इ तरह योआस क सजा मिली। ²⁵ जब अराम क लोग योआस क छोड़ेन, उ बुरी तरह घायल रहा। योआस क अपने सेवकन ओकरे खिलाफ जोजना बनाएन। उ पचे अइसा एह बरे किहन कि योआस याजक यहोयादा क पूत जकर्याह क मार डाए रहा। सेवकन योआस क ओकरी अपनी चारपाई पइ मार डाएन। योआस क मरइ क पाछे लोग ओका दाऊद क नगर मँ दफनाएन। किन्तु लोग ओका उ जगहिया पइ नाहीं दफनाएन जहाँ राजा दफनाए जात हीं।

²⁶ जउन सेवकन योआस क खिलाफ जोजना बनाएन, उ पचे इ सबइ अहइँ जाबाद अउ यहोजाबाद जाबाद क महतारी क नाउँ सिमात रहा। सिमात अम्मोन क रही। यहोजाबाद क महतारी क नाउँ सिम्रित रहा। सिम्रित मोआब क रही। ²⁷ योआस क पूतन क कथा, ओकर खिलाफ बहोत सारी भविस्सबाणियन अउर उ फुन परमेस्सर क मन्दिर कइसे बनाएस, राजा लोगन क व्याख्या नाउँ क किताबे मँ लिखा अहइ। ओकरे पाछे योआस क पूत अमस्याह नवा राजा भवा।

दुइ साच्छी

11 एकरे बाद नापइ क बरे मोका एक सरकंड़ा दीन्ह गवा जउन नापइ वाली छड़ी क तरह दिखाई पड़त रही। मोसे कहा गवा, “उठा अउर परमेस्सर क मंदिर क अन्दर वेदी क नाप ल्या अउर जउन मनई मंदिर क अन्दर आराधना करत अहइ, ओनके गिनती करा। ² मुला मंदिर क बाहर आंगन क रहइ द्या, ओका न नापा काहे बरे कि इ गैर यहूदियन क दीन्ह ग अहइ। उ पचे बयालीस महीना तक पवित्तर नगर क अपने पैर क नीचे रौंद देइही। ³ मइँ अपने दुइ गवाहन क खुली छूट देब अउर उ 1,260 दिन तक भविस्सबाणी करिहइँ उ पचे टाट क कपरा पहिने रइही जेनका दु:ख परगट करइ क बरे पहिना जात ह।”

⁴ इ दुइनउँ साच्छी उ दुइ जइतून क पेड़ अउर उ दुइ ठु दीपादान अहइँ जउन धरती क पर्भू क समन्वा अहइँ। ⁵ जदि केउ ओनका नुकसान पहुँचावा चाहत ह तउ ओकरे मुँहे स आग निकरइ लागत ह अउर ओनके दुस्मनन क निगल लेत ह। जदि केउ ओनका नुकसान पहुँचावइ क कोसिस करत ह तउ ओकर मउत निस्चित तौर प होइ जात ह। ⁶ उ पचे अकास क बादल बाँधके रखइ क ताकत रखतही जेहसे जब उ पचे भविस्सबाणी करत होइँ तउ ओ समइ पानी न बरसी। ओनकै झरनन क पानी प अधिकार रहा जेका उ पचे खून मँ बदल सकत रहेन। ओनमाँ अइसी ताकत रही कि उ जेतना बार चाहतेन, ओतनी बार धरती प हर तरह क विनास कइ सकत रहेन।

⁷ ओनके साच्छी दइ चुकइ क बाद, उ जानवर महागर्त स बाहर निकरी अउर ओन पइ हमला करी। उ ओनका हराइ देइ अउर मारि ड़ाई। ⁸ ओनकर ल्हास महानगर क गलियन मँ पड़ी रहिहइँ। इ सहर क प्रतीक रुप मँ सदोम अउर मिस्त्र कहा जात रहा। हिआँ प ओनकर पर्भू क क्रूस प चड़ाइके मारा ग रहा। ⁹ सब जातियन, उपजातियन, भाखा अउर रास्ट्र क मनई ओनकी ल्हास क साड़े तीन दिन तक देखत रइही, अउर ओनकी ल्हास क कब्र मँ न रखइ देइही। ¹⁰ धरती प रहइवाले आनन्द मनईहइँ उ पचे त्यौहार मनईहइँ अउर एक दूसर क तोहफा देइहइँ। इ दुइनउँ नबियन धरती प रहइवाले मनइयन क बहुत दु:ख दिहे अहइँ।

¹¹ मुला साढ़े तीन दिन क बाद परमेस्सर कइँती स ओनके जीवन मँ सास आइ गइ अउर उ पचे अपने गोड़े प खड़ा होइ गएन। जे ओनका देखे रहेन, उ पचे बहुत डेराइ गएन। ¹² फिन उ दुइनउँ नबियन जोर क आवाज मँ आकासबाणी क ओनसे कहत भए सुनेन, “हिआँ ऊपर आइ जा!” इ बरे उ अकास क भीतर बादल मँ ऊपर चला गएन। ओनका ऊपर जात ओनकर खिलाफत करइवाले देखेन।

¹³ ठीक उही समइ प हुवा बहुत बड़ा भूचाल आइ गवा अउर सहर क दसवा हिस्सा ड़ह गवा। भूचाल मँ सात हजार मनई मारा गएन अउर जउन बच ग रहेन उ सबेन्ह बहुत ड़ेराइ गएन अउर उ सरग क परमेस्सर क महिमा क बखान करइ लागेन।

¹⁴ इ तरह स अब दूसरउ आफत बीत गइ। मुला सावधान! तीसरी महाविपत्ति जल्दी आवइवाली अहइ।

सातवी तुरही

¹⁵ सातवाँ सगरदूत जब आपन तुरही फूँकेस तउ सरग स जोर क आवाजन आवइ लागिन। उ सबइ कहत रहिन:

¹⁶ अउर उही समइ परमेस्सर क समन्वा अपने अपने सिंहासन प बइठा चौबीसउ बुजुर्गन दण्ड़वत प्रणाम कइके परमेस्सर क आराधना किहेन। ¹⁷ उ पचे बोलेन:

¹⁹ फिन सरग मँ परमेस्सर क मंदिर क खोला गवा जहाँ ओकरे मंदिर मँ करार क उ पेटी देखाई पड़ी। फिन बिजली क चकाचौध होइ लगी। मेघन क गरजन, तरजन, अउर घड़घड़ाहट क आवाज, भूकम्प अउर भयानक ओला बरसइ लागेन।

यहोवा दाया अउ करूणा चाहत ह

7 फारस मँ दारा क राज्जकाल क चउथे बरिस, जकर्याह क यहोवा क एक सँदेसा मिला। इ नउवे महीना (अर्थात् किस्लव) क चउथा दिन रहा। ² बेतेल क लोग सरेसेर, रेगेम्लेक अउ आपन साथियन क यहोवा स एक ठु सवाल पूछइ क पठएस। ³ उ पचे यहोवा क मंदिर मँ नबियन अउ याजकन क लगे गएन। ओन लोग ओनसे इ सवाल पूछेन: “हम लोग कई बरिस तलक मंदिर क नेस्त नाबूद होइ क सोक मनाए अही। हर बरिस क पाँचवें महीना मँ, रोवइ अउर उपवास राखइ क हम लोगन क खास समइ रहा। का हमका एका करत रहइ चाही?”

⁴ तब सर्वसक्तीमान यहोवा क इ बचन मोह पइ आएस अउ कहेस: ⁵ “याजकन अउ इ देस क अन्य लोगन स इ कहा: ‘जउन उपवास अउर सोक पाछे क सत्तर बरिस स बरिस क पाँचवे अउ सातवें महीना मँ तू पचे करत आवत अहा का उ उपवास, सच ही, मोरे बरे रहा? नाहीं। ⁶ अउर जब तू पचे खाया अउ पिया, आपन बरे जिन खाया अउ पिया रहा। ⁷ का इ उहइ बचन नाहीं अहइ जेका यहोवा आपन पहिले क नबियन दुआरा उ समइ घोसना किहे रहेन जब यरूसलेम आबाद रहा, अउर अपन चरिहुँ कइँती क नगरन सहित समृद्ध रहा, अउर जब नेगव सकेला अर्थात् नीचे क देस भी आबाद रहा?’”

चरवाहा अउर ओकर भेड़ी

10 ईसू कहेस, “मइँ तोहसे सच्ची बात बतावत अहउँ कि जउऩ मनई भेड़िन क बाड़े मँ दरवाजा स न घुसिके कउनो अउर रस्ते स घुसत ह तउ, उ चोर अहइ, लुटेरा अहइ। ² मुला जउन मनई दरवाजे स घुसत ह, उ भेड़िन क चरवाहा अहइ। ³ दरवाजे क रखवाला ओकरे बरे दरवाजा खोल देत ह, अउर भेड़न क ओकर आवाज सुनत हीं। अपनी भेड़िन क नाउँ लेइ लेइ पुकारत ह अउर ओऩका बाड़े स बाहर निकारत ह। ⁴ जब उ आपन सब भेड़ निकार लेत ह तउ ओऩके आगे-आगे चलत ह अउर भेड़िन सब ओका पिछुआय लेति हीं, काहेकि उ ओकर आवाज पहिचानात हीं। ⁵ भेड़ कबहूँ कउनो अजनबी मनई क नाहीं पिछुआय लेतिन। ओसे उ दूर भागत हीं, काहेकि उ अजनबी क आवाज नाहीं पहिचनतिन।”

⁶ ईसू नजीर देइके ओऩका सबका समझावा चाहत रहा, मुला ओन सबकी समझ मँ इ बात नाहीं आइ कि ईसू ओऩका बतावत अहइ।

ईसू नीक चरवाहा

⁷ तब ईसू ओनसे फिन कहेस, “मइँ तोहका सच्ची सच्ची बात बतावत अहउँ, कि भेड़िन क बरे दरवाजा मइँ अहउँ। ⁸ उ सबेन्ह जउन मोसे पहिले आइ रहेन, चोर अउर लुटेरा अहइँ। मुला भेड़िन ओनके बात नाहीं सुनिन। ⁹ मइँ दरवाजा अहउँ। जदि कउनो मोसे होइके भीतर घुसइ चाहत ह, तउ ओकर बचाव होइ, उ अन्दर जाइ सकत ह अउर बाहर जाइ सकत ह अउर ओका चारागाह मिल जाई। ¹⁰ चोर केवल चोरी करइ क बरे, कतल करइ क बरे अउर सत्यानास करइ क बरे आवत ह। मुला मइँ इ बरे आइ अहउँ कि सब मनई भरपूर जिन्नगी पाइ सकइँ।

¹¹ “मइँ अच्छा चरवाहा अहउँ। नीक चरवाहा भेड़िन क बरे आपन जान तक देइ देत ह। ¹² मुला जउन केराए क मजदूर होत ह, उ चरवाहा न होइ क कारण, भेड़िया क आवत देखिके भेड़िन क छाँड़िके भाग जात ह, काहेकि उ भेड़ ओकर तउ रहत नाहीं। भेड़िया ओनके ऊपर हमला कइके ओनका छितराय देत ह। ¹³ इ बरे भाग जात ह, काहेकि उ रोजमर्रा की मजूरी पर काम करत ह अउर ओका भेड़िन क गिन क कउनो परवाह नाहीं रहत।

^14-15 “मइँ नीक चरवाहा अहउँ। आपन भेड़िन क मइँ जानित ह अउर मोर भेड़िन मोका वइसे जानत हीं, जइसे परमपिता मोका जानत ह अउ मइँ परमपिता क जानित ह। अपनी भेड़िन क बरे मइँ आपन जान दइ देइत हउँ। ¹⁶ मोर अउर भेड़िन अहइँ जउन इ बाड़ा क न अहीं। मोका ओनहूँ क लियावइ क अहइ। ओनहूँ मोर आवाज सुनिहइँ अउर इहइ बाड़ा मँ आइके एकट्ठी होइ जइहीं। फिन एक भेड़िन क समूह क एक चरवाहा रही। ¹⁷ परमपिता मोसे इहइ बरे पिरेम करत ह काहेकि मइँ आपन जान देइ देइत ह। मइँ आपन जिन्नगी इ बरे दइ देइत ह जइसे मइँ एका फिन पाइ जाई। कउनो हमसे ऍका लइ नाहीं लेत ¹⁸ मइँ खुदइ अपनी इच्छा स ऍका दइ देइत ह। मोका ऍका फिन वापस लेइ क अधिकार भी अहइ। इ आदेस मोका परमपिता स मिला अहइ।”

¹⁹ एन सब्दन सुनिके यहूदियन मँ फिन स फूट पैदा होइ गइ। ²⁰ बहुत इ कहइ लागेन, “इ तउ पगलाइ गवा अहइ। एकरे ऊपर कउनो बुरी दुस्ट आतिमा सवार अहइ। तू सबेन्ह काहे बरे एका सुनत अहा।”

²¹ दूसर कछू मनई कहइ लागेन, “इ सब्दन अइसे मनई क नाहीं होइ सकत जेकरे ऊपर दुस्ट आतिमा सवार होइ। कउनो दुस्ट आतिमा कबहूँ कउनो आँधर क आँखी नाहीं दइ सकत।”

यहूदियन ईसू क विरोध करत हीं

²² फिन यरुसलेम मँ समर्पण क त्यौहार^[a] आइ गवा। जाड़ा का दिन रहा। ²³ ईसू मन्दिर मँ सुलैमान क दलान मँ ठहरत रहा। ²⁴ उहइ समइ यहूदियन ओका घेर लिहेन अउर कहेन, “तू हमका सबेन्ह का कब तलक परेसान करत रहब्या? जदि तू मसीह अह्या तउ साफ साफ बतावा।”

²⁵ ईसू जवाब दिहेस, “मइँ तोहका बताइ चुका अहउँ अउर तू बिसवास नाहीं करत अहा। उ सबइ काम जउन मइँ पिता क नाउँ प करत अहउँ, खुदइ मोर साच्छी अहइँ। ²⁶ मुला तू सबेन्ह बिसवास नाहीं करत अहा, काहेकि तू पचे मोरी भेड़िन मँ स न अह्या। ²⁷ मोर भेड़ मोर आवाज पहिचानत ही अउर मइँ ओनका जानित अहउँ। उ सबइ मोरे पीछे पीछे चलत हीं अउर मइँ ओनका पहिचानित ह। ²⁸ उ सबइ मोरे पीछे पीछे चलत थीं अउर मइँ ओनका अनन्त जीवन देइत ह। ओनकइ कबहूँ नास नाहीं होतइ, अउर न तउ केहू ओनका मोसे छीन पाई। ²⁹ मोर परमपिता ओन सबन क दिहे अहइ, जउन सबसे महान अहइ। ओनका मोरे परमपिता स कउनो भी नाहीं छीन सकत। ³⁰ मोर परमपिता अउर मइँ दुइनउँ एक अही।”

³¹ फिन यहूदियन ईसू क मारइ क बरे पाथर उठाइ लिहन। ³² ईसू ओनसे कहेस, “अपने परमपिता क तरफ स मइँ तू पचे क बहुत नीक नीक कारज देखाएउँ। ओहमाँ स कउने काम क एवज मँ तू सबेन्ह मोका पत्थर मारइ चाहत अहा?”

³³ यहूदियन जवाब दिहेन, “हम पचे तोहरे ओन सभी नीक काम बरे पाथर नाहीं मारत अही, मुला इ बरे अइसा करत अही कि तू परमेस्सर क अपमान करे अहा अउर मनई होत भए खुदइ क परमेस्सर कहत अहा।”

³⁴ ईसू जवाब दिहेस, “का इ तोहरे व्यवस्था मँ नाहीं लिखा अहइ, ‘मइँ कहेउँ कि तू सब जने परमेस्सर अह्या?’^{(A) 35} का हियाँ परमेस्सर ओनका नाहीं कहा ग अहइ जेनका परमेस्सर क सन्देस मिल चुका बाटइ? (अउर पवित्तर सास्तर क बात काटी नाहीं जाइ सकत) ³⁶ का तू परमेस्सर क अपमान करत अहा ओकरे बरे कहत अहा, जेका परमपिता इ दुनिया मँ अर्पण कइके भेजे अहइ, केवल इ बरे कि मइँ इ कहेउँ, ‘मइँ परमेस्सर क पूत अहउँ?’ ³⁷ जदि मइँ अपने परमपिता क कारज नाहीं करत अहउँ तउ मोर बिसवास जिन करा, ³⁸ मुला जदि मइँ अपने परमपिता क कारज करत अहउँ, अउर तू मोर बिसवास नाहीं करत अहा, तउ मोरे कारण बिसवास करा जइसे कि तू इ जानि सका कि पिता मोरे अन्दर अहइ अउर मइँ अपने पिता मँ अहउँ।”

³⁹ इ सुनि क यहूदी एक बार फिन ओका बन्दी बनावइ क कोसिस किहेन मुला ईसू ओनके हाथ स निकरि गवा।

⁴⁰ ईसू फिन हुआँ स हट कर यरदन क दूसरे पार उ जगह चला गवा जहाँ प यूहन्ना बपतिस्मा देत रहा। ईसू हुवाँ ठहरा, ⁴¹ तमाम मनई ओकरे पास आएन अउर कहइ लगेन, “यूहन्ना कउनो अद्भुत कारज नाहीं करेस मुला इ मनई क बारे मँ जउऩ कछू कहे रहा, उ बिल्कुल सही निकरा।” ⁴² फिन हुवाँ तमाम मनई ईसू मँ बिसवास करइ लागेन।