M’Cheyne Bible Reading Plan

राजा हिजकिय्याह सुधार करत ह

31 फसह पर्व क उत्सव पूरा भवा। इस्राएल क जउन लोग फसह पर्व क क बरे यरूसलेम मँ रहेन, उ पचे यहूदा क नगरन क चले गएन। तब उ पचे पाथर क ओन मूरतियन क नेस्तनाबूत किहन जउन ओन नगरन मँ रहिन। ओन पाथर क मूरतियन क पूजन लबार देवतन क रुप मँ होत रहा। ओन लोग असेरा क खम्भन क भी काट डाएन अउर उ पचे ओन ऊँची जगहियन अउर वेदियन क भी तोर डाएन जउन बिन्यामीन अउर यहूदा क पूरे देसन मँ रहेन। लोग एप्रैम अउर मनस्से क छेत्र मँ उहइ किहन। लोग इ तब किहन जब उ पचे लबार देवतन क पूजा क सबहिं चिजियन क नस्ट नाहीं किहन। तब सबहिं इस्राएली अपने नगरन क घर लउट आएन।

² राजा हिजकिय्याह फुन याजकन अउ लेवीबंसियन क समूहन मँ बाँटेस अउर हर एक समूह क आपना बिसेस कार्य करब होत रहा। एह बरे राजा हिजकिय्याह ओन समूहन क आपन कार्य फुन स करइ क कहेस। एह बरे याजकन अउ लेवीबंसियन क फुन स होमबलि अउ मेलबलि चढ़ावइ क काम रहा। ओन क काम मन्दिर मँ सेवा करब, गाना अउ यहोवा क भवन क दुआर पइ परमेस्सर क स्तुति करब रहा। ³ हिजकिय्याह अपने गोरुअन मँ स कछू क होमबलि बरे दिहस। इ सबइ गोरु हर रोज भिंसारे अउ साँझ क होमबलि बरे प्रयोग मँ आवत रहेन। इ सबइ गोरु सबित क दिनन मँ अउर नवचन्द्र क समइ अउर दूसर बिसेस उत्सवन पइ दीन्ह जात रहिन। इ वइसे ही कीन्ह जात रहा जइसा यहोवा क ब्यवस्था मँ लिखा अहइ।

⁴ हिजकिय्याह यरूसलेम मँ रहइवाले लोगन क आदेस दिहस कि आपन अनाज क हींसा याजकन अउ लेवीबंसियन क देइँ। तबहिं याजक अउ लेवीबंसी आपन क यहोवा क नेम क अनुसार सेवा बरे देइ चाही रही। ⁵ देस क चारिहुँ कइँती क लोग इ आदेस क बारे मँ सुनेन। एह बरे इस्राएल क लोग अपने कटा भवा अन्न, अंगूर, तेल, सहद अउ जउन कछू भी उ पचे अपने खेतन मँ उगावत रहेन ओन सबहिं फसलन क पहिला हींसा दिहेस। उ पचे स्वेच्छा स एन सबहिं चिजियन क दसवाँ हींसा लिआएन। ⁶ इस्राएल अउ यहूदा क लोग जउन यहूदा क नगरन मँ रहत रहेन अपने गोरुअन अउ भेड़िन क दसवाँ हींसा भी लिआएन। उ पचे ओन चिजियन क दसवाँ हींसा भी लिआएन जेका अलगाइ दीन्ह ग रहेन अउर यहोवा ओनका परमेस्सर क अर्पित कीन्ह ग रहेन। उ पचे ओन सबहिं चिजियन क अपने यहोवा, परमेस्सर क बरे लइके आएन। उ पचे ओन सबहिं चिजियन क ढेरन मँ धरेन।

⁷ लोग तीसरे महीने मँ अपनी चिजियन क संग्रह क लिआउब सुरु किहन अउर उ पचे संग्रह क लिआउब सातवे महीने पूरा किहन। ⁸ जब हिजकिय्याह अउ प्रमुख लोग आएन तउ उ पचे संग्रह कीन्ह गइ चिजियन क ढेरन क लखेन। उ पचे यहोवा क स्तुति किहन अउर इस्राएल क लोगन अर्थात यहोवा क लोगन क बड़कई किहन।

⁹ तब हिजकिय्याह याजकन अउ लेवीबंसियन क ढेरन क सम्बंध मँ पूछेस। ¹⁰ सादोक परिवार क मुख्य याजक अजर्याह हिजकिय्याह स कहेस, “उ समइ स जब स लोग भेंटन क यहोवा क मन्दिर मँ लिआउब सुरू कइ दिहेन ह एह बरे हम लोगन क लगे खाइ बरे बहोत जियादा अहइ। हम लोग भर पेट खाए अउर अबहिं तलक हम लोगन क लगे बहोत बचा ह। यहोवा अपने लोगन क सच मँ आसीस दिहेस ह। एह बरे हम लोगन क लगे इ सब बचा ह।”

¹¹ तब हिजकिय्याह याजकन क आदेस दिहस कि उ पचे यहोवा क मन्दिर मँ भण्डार घर तइयार रखइँ। एह बरे इ कीन्ह गवा। ¹² तब याजक लोग उपहार, भेंटन क दसमांस अउर दूसर चिजियन लिआएन जउन सिरिफ यहोवा क दीन्ह जाब रहिन। उ पचे सबहिं संग्रह कीन्ह गइ चिजियन मन्दिर क भण्डार घरन मँ रख दीन्ह गइन। लेवीबंसि कोनन्याह सबहिं संग्रह कीन्ह गइ चिजियन क अधीच्छक रहा। कोनन्याह क भाई सिमी ओन चिजियन क उपाधीच्छक रहा। ¹³ कोनन्याह अउ ओकर भाई एन मनइयन क निरीच्छक रहेन: अहीएल, अजज्याह, नहत, असाहेल, यरीमेत, योजाबाद, एलीएल, यिस्मक्याह, महत अउर बनायाह। राजा हिजकिय्याह अउ यहोवा क मन्दिर क अधीच्छक अधिकारी अजर्याह ओन मनइयन क चुनेस।

¹⁴ यिम्ना लेवी क पूत कोरे ओन भेंटन क अधीच्छक रहा जेनका लोग स्वेच्छा स चढ़ावत रहेन। उ ओन चिजियन क उत्तरदायी रहा जउन यहोवा क दीन्ह जात रहेन अउ उ ओन उपहारन क बाँटइ क जिम्मेदार रहा जउन यहोवा बरे पवित्तर बनाई जात रहिन। कोरे पूवीर् दुआर क दुआरपाल रहा। ¹⁵ एदेन, मिन्यामीन, येसू समायाह, अमर्याह अउ सकन्याह कोरे क मदद करत रहेन। उ सबइ लोग ईमानदारी स ओन नगरन मँ सेवा करत रहेन जहाँ याजक रहेत रहेन। उ पचे बहोत महत्त्वपूर्ण अउर कम महत्त्वपूर्ण दुइनँउ याजकन क समान मात्रा मँ चिजियन दिहेन।

¹⁶ इ सबइ लोग संग्रह कीन्ह भइ चिजियन क तीन बरिस अउ ओहसे जियादा उमिर क लरिकन अउर मनइयन क भी देत रहेन जेनकर नाउँ लेविबंस क इतिहास मँ लिखा भवा रहेन। एन सबहिं मनइयन यहोवा क मन्दिर मँ आपन हर दिन क सेवा अउर दूसर काम जेकर उ जिम्मेदार रहेन, बरे जाइ क रहेन। हरेक समूह क आपन नेतिक जिम्मेदारी रहेन। ¹⁷ याजकन क संग्रह कीन्ह भवा चिजियन स ओनकर हींसा दीन्ह जात रहेन। परिवारिक आधार पइ, परिवार क इतिहास मँ लिखित सूची अनुसार इ कीन्ह गए रहेन। बीस बरिस या ओहसे अधिक उमिर क लेवीबंसियन क संग्रह क ओनकर हींसा दीन्ह जात रहा। इ ओनकर जिम्मेदारी अउ वर्ग क अनुसार कीन्ह जात रहा। ¹⁸ लेवीबंसियन क बच्चन, मेहररुअन, पूत अउ बिटियन भी संग्रह चिजियन क आपन हींसा पावत रहेन। इ ओन सबहिं लेवीबंसियन क बरे कीन्ह जात रहा जउन परिवार क इतिहासन मँ अंकित रहेन। इ लेवीबंसियन बरे कीन्ह ग रहेन ताकि उ पचे आपन आप क बिस्सास क संग पवित्तर राखेन अउर सेवा करइ बरे तइयार रहेन।

¹⁹ याजक हारून क कछू संतानन क लगे कछू खेती जोग्ग नगर क लगे हुवाँ रहेन जहाँ लेवीबंसी रहत रहेन अउर हारून क संतानन मँ स कछू नगरन मँ भी रहत रहेन। ओन नगरन मँ स हर एक मँ हारून क एन संतानन क संग्रह चिजियन क हींसा देइ बरे मनई नामांकन क जरिये चुने जात रहेन। मनसेधू अउर उ सबइ सबहिं जेनकर नाउँ लेवीबंस क इतिहास मँ रहा सबहिं संग्रह चिजियन क हींसा पानत रहेन।

²⁰ इ तरह राजा हिजकिय्याह पूरे यहूदा मँ उ सबइ सब चिजियन क किहन। उ उहइ किहस जउन यहोवा, ओकरे परमेस्सर क दृस्टि मँ अच्छा, ठीक अउर बिस्सास जोग्ग रहा। ²¹ उ जउन भी कार्य परमेस्सर क मन्दिर क सेवा मँ, नेमन व सबइ आग्या क पालन करइ मँ अउर अपने परमेस्सर क अनुसरण करइ मँ किहेस ओहमाँ ओक कामयाबी मिली। हिजकिय्याह इ सबइ सबहिं कार्य अपने पूरे हिरदइ स किहस।

जनावर प बइठी स्त्री

17 एकरे बाद ओन सात सरगदूतन, जउने क लगे कटोरा रहेन, ओहमाँ स एक ठु मोरे लगे आवा अउर बोलेस, “आवा, मइँ तोहका तमाम नदियन क किनारे बइठी उ महान वेस्या क दीन्ह जाइवाला दण्ड़ देखाई। ² धरती क राजा ओकरे साथ सम्बंध बनाएन। अउर जउन मनई धरती प रहत हीं, उ पचे ओकरी विलास मदिरा स मतवाला होइ गएन।”

³ फिन मइँ आतिमा क कहे क मान कीन्ह अउर उ सरगदूत मोका बीहड़ जंगल मँ लइ गवा जहाँ मइँ एक स्त्री क लाल रंग क एक अइसे जानवर प बइठा देखेउँ जउने प परमेस्सर क बरे गारी लिखी गइ रही। ओकरे सात मूँड़ रहेन अउर दस सींग रहेन। ⁴ उ स्त्री बइजनी अउर लाल रंग क कपरा पहिने रही। उ सोने, बेसकीमती रत्नन अउर मोतिअन स सजी रही। उ अपेन हाथ मँ सोने क एक कटोरा लिहे रही जउन बुरी बातन अउर वेस्यापन क बुराई स भरा रहा। ⁵ ओकरे माथे प एक निसानी रही जेहकर गुप्त अरथ अहइ:

महान बाबुल क

सबइ महतारी वेस्या

अउर धरती प होइवाली सब बुराईयन क पइदा करइवाली।

⁶ मइँ देखेउँ कि उ स्त्री परमेस्सर क पवित्तर लोगन क खून पिए रही जउन ईसू क बरे अपने बिस्सास क साच्छी क बरे आपन प्राण छोड़ दिहेन।

ओका देखके मइँ बड़े अचरज मँ पड़ गएउँ। ⁷ तबइ उ सरगदूतन मोसे पूछेस, “तू अचरज मँ काहे पड़ा अहा? मइँ तोहका इ स्त्री क अउर जउने जनावर प उ बइठी अहइ, ओकरे प्रतीक क समझावत अहउँ। सात सिर अउर दस सींगवाला इ जनावर ⁸ जउन तू देखे अहा, पहिले कबहूँ जिन्दा रहा, मुला अब जिन्दा नाहीं अहइ। फिन उ पताल स अबहीं निकरइवाला अहइ। अउर तबहिं ओकर बिनास होइ जाई। फिन धरती क उ मनई जउने क नाउँ दुनिया क सुरुआतइ स जीवन क पुस्तक मँ नाहीं लिखा ग अहइ, उ जानवर क देखके चकित होइहीं काहे बरे कि उ जिन्दा रहा, मुला अउर जिन्दा नाहीं अहइ, मुला फिन उ आवइवाला अहइ।

⁹ “इहइ उ जगह आटइ जहाँ बुद्धिमान मनइयन क बद्धि क जरुरत अहइ। इ सात सिर, उ सात पर्वत अहीं जउने प उ स्त्री बइठी अहइ। उ सात सिर, उ सात राजन क प्रतीक अहइ। ¹⁰ जउने मँ स पहिले पाँच क पतन होइ चुका अहइ, एक ठु अबे राज करत अहइ अउर दूसर अब तक आइ नाहीं बा। मुला जब उ आई तब उ बहुत कम समइ तलक रुकी। ¹¹ उ जनावरन जउन पहिले कबहूँ जिन्दा रहा, मुला अउर जिन्दा नाहीं अहइ, खुदइ अठवाँ राजा अहइ जउन ओन सातउ मँ स एक अहइ, ओकइ बिनास होइवाला अहइ।

¹² “जउन दस सींग तू देखे अहा, उ दस राजा अहीं, उ पचे अबहि तलक आपन सासन सुरु नाहीं कर अहइँ मुला जनावर क साथे एक घण्टा क बरे ओनका सासन करइ क अधिकार दीन्ह जाई। ¹³ इ दसउ राजन क एक्कइ उद्देस्य रहा कि उ आपन ताकत अउर आपन अधिकार उ जनावर क दइ देइँ। ¹⁴ उ मेमना क खिलाफ लड़ाई लड़िहइँ मुला मेमना अपने बोलाए, अपने स चुने अउर अपने बिस्सासियन क साथ मिलके ओनका हराइ देई। काहे बरे कि उ अउर प्रर्भूअन क प्रर्भू अउर राजा लोगन क राजा अहइ!”

¹⁵ उ सरगदूत मोसे फिन कहेस, “उ सबइ नदियन जउने क तू देखे रह्या, जहाँ उ वेस्या बइठी रही, तमाम खानदानन, समुदायन, जातियन अउर भाखन क प्रतीक अहइ। ¹⁶ उ दस सींग जउने क तू देख्या, अउर उ जनावर उ वेस्या स नफरत करिहइँ अउर ओकर सब चीज छीनके ओका नंगी छोड़ देइँहइँ। उ ओकर सरीर क खाइ जइहइँ अउर ओका आगी मँ जलाइ देइहइँ। ¹⁷ आपन प्रयोजन पूरा करइ क बरे परमेस्सर ओनके सबनके एक राय कइके, ओनके मन मँ इ बइठाइ दिहे अहइ, जइसे कि जब तक परमेस्सर क बचन पूरा न होइ जाइ, तब तक सासन करइ क आपन अधिकार उ जनावर क सौंप देइँ। ¹⁸ उ स्त्री जउने क तू देखे रह्या उ महानगरी रही, जउन धरती क राजन प सासन करत ह।”

लबार नबी भविस्स मँ नाहीं

² सर्वसक्तीमान यहोवा कहत ह, “उ दिना, मइँ धरती प स सबहिं मूर्तियन क नाउँ हटाइ देब। अउर लोग ओनकर नाउँ भी याद नाहीं रखिहीं। अउर मइँ लबार नबियन अउर असुद्ध आतिमा क इ भुइँया स हटाइ देब। ³ जदि कउनो मनई भविस्सबानी करत ह तउ ओका सजा मिली। हिआँ तलक कि ओकरे माता-पिता, ओकर आपन महतारी अउर आपन बाप ओहसे कइहीं, ‘तू यहोवा क नाउँ झूठ बोल्या ह। एह बरे तोहका मरि जाइ चाही।’ ओकर आपन महतारी अउर ओकर आपन बाप भविस्सवाणी करइ क कारण ओका छूरी भोकं देइहीं। ⁴ उ समइ नबी आपन भविस्सवाणी अउर आपन दर्सन क खातिर लज्जित होइ जइहीं। उ पचे लोगन क धोखा देइ बरे रोंएदार चो़गा नाहीं पहरिहीं। ⁵ उ सबइ लोग कइहीं, ‘मइँ नबी नाहीं हउँ मइँ एक किसान हउँ। मइँ बचपना स किसान क रूप मँ काम किहेउँ ह।’ ⁶ दूसर लोग कइहीं, ‘मुला तोहरे हाथन पइ घाव कइसे अहइँ?’ उ कही, ‘इ चोट मोका अपने मित्र के घरे लगी।’”

⁷ सर्वसक्तीमान यहोवा कहत ह, “तरवार, गड़रिया पइ चोट करा। मोरे मित्र क मारा। गड़रिया पइ वार करा अउर भेड़िन पराइ जइहीं अउर मइँ ओन छोटन क सजा देब।” ⁸ सर्वसक्तीमान यहोवा करत ह, “पूरी धरती क दुइ तिहाई लोग हटाइ जाइहीं अउर उ पचे मरिहीं, मुला एक तिहाई लोग बचा रइहीं। ⁹ मइँ इ एक तिहाई लोगन क आगी मँ डाइ देब। मइँ ओका उहइ तरह स सुद्ध करब जइसा चाँदी क सुद्ध कीन्ह जात ह। मइँ ओका अइसा परखब जइसा सोना क जाँचा जात ह। तउ उ पचे मोका आपन नाउँ स पुकारिहीं अउर मइँ ओका जवाब देब। मइँ कहब, ‘उ पचे मोर लोग अहा,’ अउर उ पचे कइहीं, ‘यहोवा मोर परमेस्सर अहइ।’”

16 “इ सब बात मइँ तोहसे इ बरे बतावत अही कि तोहार बिसवास डगमगाय न जाइ। ² उ पचे तोहका सबन्क आराधनालय स निकार देइहीं सही-सही तउ उ समइ आवइवाला अहइ जब तोहरे मँ स कउनो क मारके हर एक इहइ सोची कि उ परमेस्सर क सेवा करत अहइ। ³ उ सबेन्ह अइसा इ बरे करिहइँ, काहेकि उ न तउ परमपिता क जानत हीं अउर न तउ मोका। ⁴ मुला मइँ तोहसे इ सब इ बरे कहत अही जइसे कि जब ओनकइ समइ आइ जाइ तउ तोहका इ याद रहइ कि मइँ ओनके बाबत तोहका बताए रहे जब मइँ तोहरे साथ रहेउँ।

पवित्तर आतिमा क कारज

“सुरआत मँ इ सब बात मइँ तोहका नाहीं बताए रहेउँ, काहेकि मइँ तोहरे साथ रहेउँ। ⁵ मुला अब मइँ ओकरे पास जात अही, जे मोका भेजेस अउर तोहरे बीच स कउनो मोसे इ न पूछी, ‘तू कहाँ जात अहा?’ ⁶ काहेकि मइँ इ बात बताइ दिहे अही, तोहार दिल दुःखी होइ गवा अहइ। ⁷ मुला मइँ तोहसे सच्ची सच्ची कहत अही कि एहमाँ तोहरा भलाई अहइ कि मइँ जात अही। काहेकि जदि मइँ न जाउँ तउ सहायक तोहरे पास न आई। जदि मइँ हियाँ स चला जाब तउ मइँ ओका तोहरे पास भेजब।

⁸ “अउर जब उ आइ तउ पाप, धार्मिकता अउर निआव क बावत दुनिया क सक दूर करी। ⁹ पाप क बावत इ बरे कि उ पचे मोर मँ बिसवास नाहीं करतेन। ¹⁰ धार्मिकता क बावत इ बरे कि अब मइँ परमपिता क पास जात अही। अउर तू सबेन्ह अब अउर जियादा समइ तक मोका न देखब्या। ¹¹ निआव क बावत, इ बरे कि इ जगत क सासक क अपराधी ठहरावा ग अहइ।

¹² “मोका तोहसे अबहिं तमाम बात बतावइ क अहइ, मुला तू सबेन्ह ओका सह न पउब्या। ¹³ मुला जब सच्चाई क आतिमा आई तउ उ तोहका पूरी सच्चाई क राह देखाई काहेकि उ अपनी तरफ स कछू न कही। उ जउन कछू सुनी उहइ बताई। अउर जउन कछू होइवाला अहइ, ओका उजागर करी। ¹⁴ उ मोर महिमा करी, काहेकि जउन मोर अहइ, ओका लइके उ तोहका बताई। ¹⁵ हर चीज जउन परमपिता क अहइ, उ मोर अहइ। इहइ बरे मइँ बताए अहउँ, जउन कछू मोर अहइ, ओका उ लइ लेई अउर तोहका बताई।

दुःख खुसी मँ बदल जाई

¹⁶ “थोड़े समइ क बाद तू पचे मोका अउर नाहीं देख पउब्या। अउर कछू समइ क बाद तू सबेन्ह मोका फिन देखब्या।”

¹⁷ तउ ओके चेलन आपस मँ कहेन, “इ कावा जउन उ मोका बतावत अहइ, ‘तनिक देर क बाद मोका न देख पउब्या अउर तनिक देर क बाद तू पचे फिन मोका देखब्या?’ अउर ‘मइँ परमपिता क पास जात अहउँ?’ ¹⁸ फिन उ पचे कहइ लागेन, “इ ‘तनिक’ देर क बाद का मतलब अहइ? जेकरे बावत उ बतावत अहइ? उ का कहत अहइ, हम समझ नाहीं पावत अही।”

¹⁹ ईसू इ समझ गवा कि उ पचे कछू पूछा चाहत अहइँ। इ बरे ईसू ओसे कहेस, “का तू पचे जउन मइँ कहेउँ उहइ पर सोच विचार करत अहा, ‘थोड़ा समइ क पाछे तू मोका अउर जियादा न देख पउब्या अउर फिन थोड़े समइ क बाद तू मोका देखब्या?’ ²⁰ मइँ तोहका सही बतावत अहउँ, तू सबइ रोउब्या अउर सोक पउब्या मुला इ दुनिया खुस होई। तोहका दुःख होई मुला तोहार दुःख आनन्द मँ बदल जाई।

²¹ “जब कउनो स्त्री बच्चा पइदा करत ह तउ ओका बड़ी तकलीफ होत ह, काहकि उ दरद क समइ रहत ह। मुला जब उ बच्चा पइदा कइ चुकत ह तउ उ इनता आनन्द होत ह कि एक ठु इन्सान इ दुनिया मँ पइदा भवा अहइ अउर आपन सब दुःख भूल जात ह। ²² इ बरे तू पचे इ समइ वइसे दुःख अहा, मुला जब मइँ तोहसे फिन मिलबइ तउ तोहार दिल मँ आनन्द होई। अउर तोहार आनन्द तोहरे कउनो भी छीन न पाई। ²³ उ दिन तू पचे हमसे कउनो चीज न पूछ्या। मइँ तोहसे सच्ची बात बतावत अही, मोरे नाम स परमपिता स जउन कछू तू पचे मँगब्या, उ ओका तोहका दइ देई। ²⁴ अब तक मोरे नाउँ स तू पचे कछू नाहीं मांगे अहा। मांगा, तोहका जरूर मिली। ताकि तोहका भरपूर आनन्द मिलइ।

दुनिया प जीत

²⁵ “इ सब बातिन क मइँ उदाहरण दइके बताए अहेउँ अब उ समइ आवत अहइ जब मइँ तोहसे उदाहरण दइके बात न कर पाउब मुला परमपिता क बावत खुलके तोहसे बतियाब। ²⁶ उ दिन तू मोरे नाउँ स मँगब्या अउर मइँ तोहसे इ नाहीं कहत अहउँ कि मइँ तोहरे तरफ स परमपिता स पराथना करब। ²⁷ परमपिता खुदइ तोहरे पिरेम करत ह, काहेकि तू मोसे पिरेम करत ह। अउर यह मान लिहा कि मइँ परमेस्सर स आवा अहउँ। ²⁸ मइँ परमपिता स परगट भएउँ अउर इ दुनिया मँ आएउँ। अउर अब मइँ इ दुनिया क छोड़के परमपिता क पास जात अही।”

²⁹ ओकर चेलन कहेन, “देखा अब तू हम पचन क बिना कउनो दिस्टान्त क खोलके बतावत अहा। जउन कठिन सब्द अहइँ ओनका तू नाहीं बइपरत अहा। ³⁰ अब हम पचे समझ ग अही की तू सब कछू जानत अहा। अब तू नाहीं चाहत अहा कि केहू कउनो प्रस्न पूछइ एसे हमका सबन्ह क बिसवास होइ ग अहइ कि तू परमेस्सर स परगट भवा अहा।”

³¹ ईसू ओनसे कहेस, “का तोहका अब इ बिसवास भवा अहइ? ³² सुना, अब समइ आवत अहइ, हिआँ तक कि आइ ग अहइ, जबहिं तू पचे सब तितर बितर होइ जाब्या अउर तोहरे मँ स सब कउनो अपने अपने घरे चला जाब्या अउर मोका अकेले छोड़ देब्या, मुला मइँ अकेले नाहीं अही, काहेके परमपिता मोरे साथ अहइ।

³³ “इ सब बातन मइँ तोहसे इ बरे बतावत कहेउँ जइसे कि मइँ तोहका सान्ति दइ सकउँ। इ दूनिया तोहका कस्ट देत ह, सतावत ह, मुला हिम्मत रखा, मइँ दुनिया जीत लिहे अही!”