M’Cheyne Bible Reading Plan

14 अबिय्याह अपने पुरखन क संग बिस्राम किहस। लोगन ओका दाऊद नगर मँ दफनाएन। तब अबिय्याह क पूत आसा अबिय्याह क जगह पइ नवा राजा भवा। आसा क समइ मँ देस मँ दस बरिस सान्ति रही।

यहूदा क राजा आसा

² आसा उहइ काम किहेस जउन यहोवा ओकर परमेस्सर क समन्वा अच्छा अउ ठीक रहा। ³ आसा ओन विचित्र वेदियन क हटाइ दिहस जेनकर उपयोग मूरतियन क पूजा क बरे होत रहा। आसा ऊँच जगहन क हटाइ दिहस अउर पवित्तर पाथरन क बर्बाद कइ दिहस अउर आसा असेरा खम्भन क तोर डाएस। ⁴ आसा यहूदा क लोगन क ओनकइ पुरखन क यहोवा परमेस्सर क अनुसरण करइ क आदेस दिहस। अउ आसा लोगन क यहोवा क नेमन अउ आदेसन क पालन करइ क आदेस दिहस। ⁵ आसा ऊँची जगहन क अउर सुगन्धि क वेदियन क यहूदा क सबहिं नगरन स हटाएस। इ तरह जब आसा राजा रहा, राज्ज सान्त रहा। ⁶ आसा यहूदा मँ सान्ति क समइ सक्तीसाली नगर बनाएस। आसा एन दिनन जुद्ध स मुक्त रहा काहेकि यहोवा ओका सान्ति दिहस।

⁷ आसा यहूदा क लोगन स कहेस, “हम पचन क नगरन क निर्माण अउ एनके चारिहुँ कइँती चरहदीवार बनावइ द्या। हम गुम्बद, दुआर अउ दुआरन मँ छड़न लगावइँ। हम पचन क तब तलक करइ द्या जब तलक इ देस हमार अहइ। इ हमार देस अहइ काहेकि हम लोग अपने यहोवा क अनुसरण किहा ह। उ हम लोगन क सब कइँती स सान्ति दिहस ह।” एह बरे उ पचे इ सबइ बनाएस अउर उ पचे सफल भएन।

⁸ आसा क लगे यहूदा क परिवार समूह स तीन लाख अउर बिन्यामीन क परिवार समूह स दुइ लाख अस्सी हजार फउज रही। यहूदा क मनइयन बड़ी ढारन अउर भालन लइके चलत रहेन। बिन्यामीन क मनइयन नान्ह ढारन अउ धनुस स चलइवाले बाण लइ चलत रहेन। उ पचे सबहिं बलवान अउर साहसी जोधा रहेन।

⁹ जब जेरह आसा क फउज क खिलाफ आवा। जेरह कूस द रहा। जेरह क फउज मँ दस लाख मनई अउर तीन सौ रथ रहेन। जेरह क फउज मारेसा नगर तलक गइ। ¹⁰ आसा जेरह क खिलाफ लड़इ बरे गवा। आसा क फउज मारेस क निअरे सापता घाटी मँ जुद्ध क बरे तइयार भइ।

¹¹ आसा यहोवा परमेस्सर क गोहराएस अउर कहेस, “यहोवा, तू केवल तू ही बलवान लोगन क खिलाफ कमजोर लोगन क मदद कइ सकत ह। हे मोर यहोवा परमेस्सर हमार मदद करा। हम तोह पइ निर्भर अही। हम तोहरे नाउँ पइ इ बिसाल फउज स जुद्ध करित ह। हे यहोवा, तू हमार परमेस्सर अहा। अपने खिलाफ कउनो क जीतइ न द्या।”

¹² तब यहोवा यहूदा कइँती स आसा क फउज क उपयोग कूस क फउज क पराजित करइ बरे किहस अउर कूस क फउज भाग खड़ी भइ। ¹³ आसा क फउज वूस क फउज क लगातार गरार नगर तलक पाछा किहस। एतने जियादा कूस क लोग मारे गएन कि उ पचे जुद्ध करइ बरे एक फउज क रूप मँ फुन बटुर न सकइँ। उ पचे यहोवा अउ ओकरी फउज क जरिये कूचर दीन्ह गएन। आसा अउर ओकर फउज दुस्मन स बहोत सारी लूट क माल लइ लिहन। ¹⁴ आसा अउर ओकर फउज गरार क नजिक क सबहिं नगरन क हराएस। ओन नगरन मँ रहइवाले लोग यहोवा स डरात रहेन। ओन नगरन मँ अनगिनत कीमती चिजियन रहिन। आसा क फउज ओन नगरन स एन कीमती चिजियन क संग लइ आइ। ¹⁵ आसा क फउज ओन डेरन पइ भी हमला किहस जेनमाँ गड़रियन रहत रहेन। उ पचे अनेक भेड़िन अउ ऊँट लूट लिहेन अउर ओनका लइ गएन। तब आसा क फउज यरूसलेम लउटि गइ।

आसा क परिवर्तन

15 परमेस्सर क आतिमा आदेद क पूत अजर्याह पइ उतरी। ² अजर्याह आसा स भेंटइ गवा। अजर्याह कहेस, “आसा अउ यहूदा अउ बिन्यामीन क सबहिं लोग मोर सुनइँ। यहोवा तोहरे संग तब अहइ जब तू ओकरे संग अहा। जदि तू यहोवा क हेरब्या तउ तू ओका पउब्या। किन्तु जदि तू ओका छोड़ब्या तउ उ तोहका तजि देइ। ³ बहोत समइ तलक इस्राएल बिना सच्चे परमेस्सर क, सिच्छा देइ वाला बिना याजक क अउ बिना नेम क रहेन। ⁴ किन्तु जब इस्राएल क लोग कस्ट मँ पड़इँ तउ उ पचे फुन इस्राएल क यहोवा परमेस्सर कइँती लउटइ। उ पचे यहोवा क हेरेन अउ ओका पाएन। ⁵ ओन बिपत्ति क दिनन मँ कउनो मनई सुरच्छित जात्रा नाहीं कइ सकत रहा। सबहिं रास्ट्र बहोत जियादा उपद्रव ग्रस्त रहेन। ⁶ एक रास्ट्र दूसरे रास्ट्र क अउर एक नगर दूसरे नगर क नस्ट करत रहा। इ एह बरे होत रहा कि परमेस्सर हर तरह क बिपत्तियन स ओनका परेसान करत रहा। ⁷ किन्तु आसा, तू अउर यहूदा अउ बिन्यामीन क लोगो, सक्तीसाली बना। कमजोर न पड़ा, ढीले न पड़ा काहेकि तोहका पचन्क अपने नीक काम क पुरस्कार मिली।”

⁸ आसा जब एन बातन अउर ओदेद नबी क संदेसा क सुनेस, तउ उ बहोत उत्साहित भवा। तब उ सारे यहूदा अउ बिन्यामीन छेत्र स घिनौनी मूरतियन क हटाइ दिहस अउर उ एप्रैम क पहाड़ी देस मँ अपने अधिकार मँ लाए गए नगरन मँ मूरतियन क हटाएस अउर उ यहोवा क उ वेदी क मरम्मत किहस जउन यहोवा क मन्दिर क ओसारे क समन्वा रही।

⁹ तब आसा यहूदा अउ बिन्यामीन क सबहिं लोगन क बटोरेस। उ एप्रैम, मनस्से अउर सिमोन परिवारन क भी बटोरेस जउन इस्राएल देस स यहूदा देस मँ रहइ बरे आइ ग रहेन। ओनकर बड़ी गनती यहूदा मँ आइ काहेकि उ पचे लखेन कि आसा क यहोवा परमेस्सर, आसा क संग अहइ।

¹⁰ आसा क हुकूमत क पन्द्रहवें बरिस क तीसरे महीने मँ आसा अउर उ सबइ लोग यरूसलेम मँ बटुरेन। ¹¹ उ समइ उ पचे यहोवा क सात सौ बर्धन अउ सात हजार भेड़िन अउ बोकरन क बलि दिहन। आसा क फउज ओन जनावरन अउर दूसर कीमती चिजियन क अपने दुस्मनन स लिहे रहा। ¹² तब उ पचे आपन पुरखन क यहोवा परमेस्सर क सेवा पूरे हिरदइ अउर आपन पूरी जान स करइ क एक करार अउर वाचा मँ किहन। ¹³ कउनो मनई जउन यहोवा परमेस्सर क सेवा स इन्कार करत रहा, मार दीन्ह जात रहा। इ बात क कउनो महत्व नाहीं रहा कि उ मनई महत्वपूर्ण या साधारण अहइ या मनसेधू या मेहरारु अहइ। ¹⁴ तब आसा अउ लोगन यहोवा क किरिया लिहन। उ पचे ऊँची अवाज मँ उद्घोस किहन। उ पचे तुरही अउ भेड़न क सींग बजाएन। ¹⁵ यहूदा स सबहिं लोग खुस रहेन काहेकि उ पचे पूरे हिरदइ स किरिया खाए रहेन। उ पचे पूरे हिरदइ स यहोवा क अनुसरण किहन अउ यहोवा क खोज किहन अउर ओका पाएन। एह बरे यहोवा यहोवा ओनके पूरे देस मँ सान्ति दिहस।

¹⁶ राजा आसा अपनी महतारी आका क राजमाता क पद स हटाइ दिहस। आसा इ एह बरे किहस काहेकि माका असेरा क सम्मान देइ बरे एक भयंकर खम्भा खड़ा किहे रहा। आसा इ खम्भा क काट दिहस अउर एका नान्ह नान्ह टूकन मँ तहस नहस कइ दिहस। तब उ ओन नान्ह टूकन क किद्रोन घाटी मँ बार दिहस। ¹⁷ ऊँच जगहन क यहूदा स नाहीं हटावा गवा, किन्तु आसा क हिरदइ जिन्नगी भइ यहोवा क बरे स्रद्धालु रहा।

¹⁸ आसा ओन पवित्तर भेंटन यहोवा क मन्दिर मँ लिआएस जेनका ओकर बाप राखस रहेन। उ सबइ चिजियन चाँदी अउ सोना क बनी रहिन। ¹⁹ आसा क हुकूमत क पैंतीस बरिस तलक कउनो जुद्ध नाहीं भवा।

सरग क दर्सन

4 एकरे बाद मइँ आपन निगाह उठाएउँ तउ उहाँ सरग क खुला दरवाजा मोरे सामने रहा। अउर उहइ आवाज जउने क मइँ पहले सुने रहेउँ, तुरही क आवाज जइसी मँ मोसे कहत रही, “हिआँ ऊपर आइ जा। मइँ तोहका उ देखाउब जउन आगे चलिके होइवाला अहइ।” ² फिन तुरन्तइ मइँ आतिमा क बस मँ होइ गएउँ। मइँ देखेउँ कि मोर सामने सरग मँ सिंहासन अहइ अउर ओकरे ऊपर केउ बइठा अहइ। ³ जउन ओह प बइठा रहा ओकै चमक यसब अउर गोमेद क तरह रही। सिंहासन क चारिहुँ कइँती एक मेघधनुस रहा जउन पन्ना क तरह दमकत रहा।

⁴ उ सिंहासन क चारिहुँ कइँती चौबीस सिंहासन अउर रहेन। ओकरे ऊपर चौबीस बुजुर्गन^[a] बइठा रहेन। उ पचे सफेद कपरा पहिने रहेन। ओनके मूड़े प सोने क मुकुट रहेन। ⁵ सिंहासन भरा बिजली क चकाचौध, घड़घड़ाहट, अउर बादर गरजइ क आवाज आवत रही। सिंहासन क समन्वा लपलपात सात मसाल जरत रहिन। इ मसाल परमेस्सर क सात आतिमा अहइँ। ⁶ सिंहासन क समन्वा पारदर्सी कांच क स्फटिक समुद्दर जइसा फइला रहा।

सिंहासन क ठीक समन्वा अउर ओकरे दुइनउँ तरफ चार जीवित प्रानी रहेन। ओनके आगे अउर पाछे आंखिन रहिन। ⁷ पहला जीवित प्रानी सेर क तरह रहा, दूसर जीवित प्रानी बइल जइसा रहा, तीसरे जीवित प्रानी क मुँह मनई जइसा रहा। अउर चौथा प्रानी उड़ते हए गरुड़ क समान रहा। ⁸ इ चारु ही प्रनियन क छ: छ: ठू पखना रहेन। ओकरे चारो तरफ अउर भीतर आंख आंख भरी पड़ी रहिन। दिन रात उ पचे हमेसा कहत रहेन:

⁹ जउ उ जिअत प्रानी उ सदैव रहत क महिमा, आदर अउर धन्यबाद करत रहेन, जउन सिंहासन प बइठा रहा, तउ ब उ ¹⁰ चौबीसौ बुजुर्गन ओकरे पैरन मँ गिरके हमेसा जिअत रहइवाले क आराधना करत ही। उ सिंहासन क समन्वा आपन मुकुट डाय देत ही अउर कहत ही:

यहोवा क लोगन क प्रेरणा देब

2 यहोवा क सँदेसा सतएँ महीना क इक्कीसवे दिना हाग्गै क मिला। सँदेसा मँ कहा गवा, ² “अब यहूदा क सासक सालतीएल क पूत जरूब्बाबेल, यहोसादाक क पूत महायाजक यहोसू स बातन करा अउ जउन लोग बचा अहइँ ओनसे कहा: ³ ‘का तू पचन मँ कउनो अइसा बचा अहइँ जउन उ मंदिर क आपन पहिले क बैभव मँ देखेस ह। अब तू पचन्क कइसा लागत ह का खण्डहर भवा इ मन्दिर ओ पहिले बैभववाला मंदिर क मुकाबले कहूँ ठहर पावत ह ⁴ मुला जरूब्बाबेल, “अब तू हिम्मती बना!” अउर यहोसादाक क पूत महायाजक यहोसू, “तू भी हिम्मती बना।” अउर तू सबइ लोग जउन हिआँ रहत ह, हिम्मती बना। यहोवा इ भी कहत ह, “काम करा, काहेकि मइँ तोहारे संग अहउँ।” सर्वसक्तीमान यहोवा इ कहत ह।’”

⁵ यहोवा कहत ह, “‘जहाँ तलक मोरी प्रतिग्या क बान अहइ, जउन मइँ तू पचन क मिस्र स बाहेर निकारइ क समइ तू पचन स किहेउँ, उ मोर आतिमा तू पचन मँ अहइ। डेराअ जिन।’ ⁶ काहेकि सर्वसक्तीमान यहोवा इ कहत ह: ‘एक दाई फुन मइँ हाली ही भुइँया अउ आसमान अउ समुद्दर अउ सूखी भुइँया क कँपकँपाइ देबउँ। ⁷ मइँ सबहिं रास्ट्रन क कँपाइ देब, अउर उ सबहिं रास्ट्र आपन सम्पत्तियन क संग तू पचन क लगे अइहीं। तब मइँ इ मन्दिर क महिमा स भरि देबउँ।’ सर्वसक्तीमान यहोवा इ कहत ह। ⁸ ‘ओनकर चाँदी मोर अहइ अउर ओनकर सोना मोर अहइ।’ सर्वसक्तीमान यहोवा इहइ कहत ह। ⁹ ‘इ मंदिर क परवर्ती गौरव पहिले मंदिर क गौरव स बढ़िके होइ।’ सर्वसक्तीमान यहोवा इ कहत ह अउर इ ठउर पइ मइँ सान्ति क ठहराउब। सर्वसक्तीमान यहोवा इ कहत ह।”

कारज सुरू होइ चुका अहइ बरदान मिली

¹⁰ यहोवा क सँदेसा दारा क दूसर बरिस क नौवें महीना क चउबीसवें दिना नबी हाग्गै क मिला। सँदेसा मँ कहा ग रहा, ¹¹ “सर्वसक्तीमान यहोवा इ कहत ह, अब याजक स पूछा कि इ बिसय क बारे मँ व्यवस्था का कहत ह। ¹² ‘होइ सकत ह कउनो मनई आपन ओढ़नन क तहन मँ पवित्तर मांस लइ चलइ। होइ सकत ह कि उ ओढ़ना जउन मँ उ पवित्तर मांस लइ जात रहा होइ, रोटी या पका भोजन, दाखरस, तेल या कउनो दूसर भोजन क छुइ लेइ। का उ चीज जेकर छुअब ओढ़ना स होत ह पवित्तर होइ जाइ?’”

याजकन जवाब दिहस, “नाहीं।”

¹³ तब हाग्गै पूछेस, “का होइ अगर कउनो मनई कउनो जउन कि ल्हासे क छुइ क कारण असुद्ध होइ गवा ह, इ चिजियन मँ स कउनो चीज क छुवत ह का इ भी अपवित्तर होइ जाब?”

तब याजकन जवाब दिहस, “हाँ, उ अपवित्तर होइ जाइ।”

¹⁴ तब हाग्गै जवाब दिहस, “परमेस्सर यहोवा कहत ह, ‘मोर नज़र मँ, इ ऍन लोगन अउर इ रास्ट्र बरे नेम अहइ। जउन कछू उ करी अउर जउन कछू उ मोका भेंट करिहीं उ अपवित्तर होइ।

¹⁵ “‘अब सोचा आज क पहिले का भवा। यहोवा परमेस्सर क मन्दिर मँ तोहार जरिये एक पाथर पइ दूसर पाथर रखइ स पहिले चिजियन कइसा रहेन? ¹⁶ एक मनई बीस माप अनाज क ढेर क निअरे आवत ह, मुला हुआँ ओका सिरिफ दस ही मिलत ह अउर जब तलक एक मनई दाखरस क पीपा क निअरे पचास माप निकारइ आवत ह तउ हुआँ उ सिरिफ बीस ही पावत ह! ¹⁷ मइँ, तू पचन क अउर तू पचन क काम क सजा दिहन। मइँ तोहार पउधन क नास करइ बरे जेका तू उगाएस ह बेरामियन क भेजा हउँ। मइँ फपूँदी अउर ओलन क भेजेस जउन कि तोहार सारे पइदावान क तबाह कइ दिहेस। मुला तू पचे फुन भी मोरे लगे नाहीं आया।’ यहोवा इ कहत ह।

¹⁸ “यहोवा कहत ह, ‘इ दिना स अगवा सोचा अर्थात नौवाँ महीना क चौबीसवें दिन जउने दिन यहोवा, क मंदिरे क नेंव तइयार कीन्ह गइ। सोचा। ¹⁹ का बिआ अबहुँ भी भण्डार-गृह मँ बाटइ? का अंगूरे क बेलन, अंजीर क बृच्छ, अनार अउ जइतून क बृच्छ अब तलक फल नाहीं दइ पावत अहइँ? नाहीं। मुला आजु क दिन स, अगवा क बरे मइँ तू पचन क आसीर्वाद देबउँ।’”

²⁰ तब महीन क चौबीसवे दिन हाग्गै क दूसरी दाई यहोवा क सँदेसा मिला। सँदेसा मँ कहा गवा, ²¹ “यहूदा क प्रसासक जरुब्बाबेल स कहा, मइँ आसमान अउ भुइँया क कँपावइ जात हउँ ²² अउर मइँ राज्जन क सिंहासनन क लोकाइ देबउँ अउ रास्ट्रन क राज्जन क सक्ति क बरबाद कइ देबउँ अउर मइँ रथन अउर ओनके सवारियन क नीचे फेंक देबउँ। तब घोड़न अउर ओनके घुड़सवार भहरइहीं। भाई, भाई क दुस्मन होइ जाइ।” ²³ सर्वसक्तीमान यहोवा कहत ह, “मइँ उ दिना सालतीएल क पूत, आपन सेवक, जरुब्बाबेल क लेबउँ। यहोवा इ कहत ह अउर मइँ तू पचन क मुंद्रा स छापी भइ अंगूठी बनाउब। काहेकि मइँ तू पचन क चुनेउँ ह।”

सर्वसक्तीमान यहोवा इ सब कहेस ह।

ईसू अउर नीकुदेमुस

3 हुआँ फरीसियन क एक ठु मनई रहा, जेकर नाउँ रहा नीकुदेमुस। उ यहूदियन क नेता रहा। ² उ ईसू क लगे रात मँ आवा अउर ओसे बोला, “गुरू, हम जानत अही कि तु गुरू अह्या अउर परमेस्सर तोहका भेजेस, इहइ कारण अहइ कि तू अइसे अइसे अद्भुत कारजन करत अहा। इ सब कारज परमेस्सर क सहायता क बिना कउनो नाहीं करि सकत।”

³ एकरे जवाब मँ ईसू ओहसे कहेस, “मइँ तोहका एकदम सच सच बतावत अहउँ कि अगर कउनो मनई एकदम स नवा जनम न लेइ तउ उ परमेस्सर क राज्य नाहीं देख सकत।”

⁴ नीकुदेमुस ओसे कहेस, “कउनो मनई बुढ़वा होइ क बाद फिन जनम कइसे लइ सकत ह? कउनो अपनी महतारी क कोख मँ घुसि क जनम कहसे लइ सकत ह?”

⁵ ईसू जवाब दिहेस, “मइँ तोहका सच बतावत अहउँ। अगर कउनो मनई पानी अउर आतिमा स जनम नाहीं लेत तउ उ परमेस्सर क राज्य मँ घुसइ नाहीं पावत। ⁶ जउन सरीर स पइदा होइ सकत ह, उहइ सरीर अहइ जउन आतिमा स पइदा होत ह, उहइ आतिमा अहइ। ⁷ मइँ तोहसे जउन बताए अहउँ, ओहमाँ कउनो अचरज करइ क जरुरत नाहीं अहइ, ‘तोहका फिन स जनम लेइ क होई।’ ⁸ हवा जउने तरफ चाहत ह, उहइ तरफ बहत ह। तू ओकर आवाज तउ सुनि सकत ह, मुला तू इ नाहीं जानि सकत ह कि उ कहाँ स आवत अहइ अउर कहाँ जात अहइ। आतिमा स पइदा भवा हर एक मनई इहइ तरह अहइ।”

⁹ एकरे जवाब मँ नीकुदेमुस ओसे कहेस, “इ कइसे होइ सकत ह?”

¹⁰ ईसू ओका जवाब दिहेस, “तू तउ इस्राएलियन क गुरू अह्या मुला तू इ बात नाहीं जानत रह्या? ¹¹ सच्ची बात मइँ बतावत अहउँ, हम पचे जउन जानत अही, उहइ बतावत अही, जउन हम देखत अही मुला तू पचे हमरी बात मँ कम बिसवास करत अहा। ¹² मइँ तोहका धरती क बात बतावत अहउँ, अउर तू ओका नाहीं मानत अहा, अबहीं जब मइँ तोहका पचे क सरग क बात बतावउँ तउ तू ओका कइसे मान लेब्या? ¹³ सरग मँ कबहुँ कउनो नाहीं गवा, केवल ओका छोड़ कर, जउन सरग स उतरके आवा ह – उहइ मनई क पूत।

¹⁴ “जइसे मूसा रेगिस्तान मँ साँप क उठाइ लिहे रहा वइसे मनई क पूत क ऊपर उठाइ लीन्ह जाई। ¹⁵ जइसे कि ओहमाँ बिसवास करइवाले सब मनई अनन्त जीवन पाइ सकइँ।”

¹⁶ परमेस्सर इ दुनिया स इतना पिरेम करत रहा कि अपने एकलौता पूत क दइ दिहेस, जइसे कि ओहमाँ बिसवास करइवाला कउनो मनई क नास न होइ, ओका अनन्त जीवन मिल जाइ। ¹⁷ परमेस्सर आपन पूत इ बरे नाहीं पठएस कि उ दुनिया क अपराधी साबित करइ, उ तउ इ बरे भेजेस अइसे कि समूची दुनिया क उद्धार होइ जाइ। ¹⁸ जउन मनई परमेस्सर क पूत मँ बिसवास करत हीं, ओनका दोसी न ठहरावा जाइ, मुला जे ओनके मँ बिसवास नाहीं करतेन, ओका तउ दोसी ठहरावा जाइ चुका अहइ, काहेकि उ परमेस्सर क एकलौता पूत मँ बिसवास नाहीं करत ह। ¹⁹ इ निरनय क आधार इ बाटइ कि ज्योति इ दुनिया मँ आइ गइ अहइ, मुला कछू मनई अइसे अहइँ कि ज्योति क न देखिके आँधियारे क जियादा महत्व देत अहइँ काहेकि ओनके सब करम बुरा अहइँ। ²⁰ पाप करइवाला मनई हमेसा ज्योति स घिणा करत ह अउर ओकरे पास कबहूँ नाहीं आवत, एह बरे कि ओकरे पाप क उजागिर होइ क डर बना रहत ह। ²¹ मुला जउन मनई सच्चाई क रस्ता प चलत ह उ परमेस्सर क द्वारा ज्योति क किरन क लगे अइहीं जइसे इ उजागिर होइ जाइ कि ओके सब कारज परमेस्सर करावत अहइ।

यूहन्ना ईसू क बपतिस्मा दिहेस

²² ओकरे बाद ईसू अपने चेलन क साथ यहूदिया क इलाका मँ चला गवा। हुवाँ ओनके साथ ठहरिके उ सब लोगन्ह क बपतिस्मा देइ लाग। ²³ हुवाँ प सालेम क नजदीक ऐनोन मँ यूहन्ना भी बपतिस्मा देत रहा, एह बरे कि हुवाँ इफरात मँ पानी रहा। तमाम मनई हुवाँ आवत रहेन अउर बपतिस्मा लेत रहेन। ²⁴ (अब तक यूहन्ना क बंदी नाहीं बनावा ग रहा।)

²⁵ अब यूहन्ना क कछू चेलन अउर एक ठु यहूदी क बीच स्वच्छताकरण क लइके बहस होइ लाग। ²⁶ एह बरे उ सब यूहन्ना क लगे आएन अउर कहेन, “गुरु, जउन मनई यरदन क ओहॅ पार तोहरे साथ रहा अउर जेकरे बारे मँ तू बताए रह्या, उ लोगन्ह क बपतिस्मा देत अहइ, अउर सब मनई ओकरे पास जात अहइँ।”

²⁷ एकरे जवाब मँ यूहन्ना कहेस, “कउनो मनई क तब तक कछू नाहीं मिल सकत जब तक कि ओका परमेस्सर स न दीन्ह ग होइ। ²⁸ तू पचे इ बात क साच्छी अहा कि मइँ कहे रहेउँ, ‘मइँ मसीह न अहउँ मोका तउ ओकरे बरे रस्ता बनाइ बरे पठवा गवा अहइ।’ ²⁹ दूल्हा तउ उहइ बा, जेका दुलहिन मिलइ। मुला दूल्हा क दोस्त जउन ओकरे अगुवाई मँ खड़ा रहत ह जब दूल्हा क आवाज सुनत ह, तउ बहुत खुस होत ह। इहइ मोर खुसी अहइ जउन अब पूरी भइ। ³⁰ अब इ जरुरी अहइ कि ओकर महिमा बढ़इ अउर मोर कम होइ।

उ जउन सरग स उतर

³¹ “जउन ऊपर स आवत ह, उ सबसे महान अहइ। उ जउन घरती स बाटइ, धरती स जुड़ा अहइ। एह बरे उ धरती क चीजन क बारे माँ बात करत ह। जउन सरग स उतरा ह, सबके ऊपर अहइँ, ³² उ जउन कछू देखे अहइ, अउर सुने अहइ, उ ओकर साच्छी देत ह अउर ओकर साच्छी क कउनो मनई नाहीं चाहत। ³³ जउन ओकरी साच्छी क मानत ह, उ प्रमाणित करत ह कि परमेस्सर सच्चा अहइ। ³⁴ काहे बरे कि जेका परमेस्सर पठए अहइ, परमेस्सर क बातन करत ह। काहेकि परमेस्सर ओका आतिमा क अनन्त दान दिहे अहइ। ³⁵ परमपिता अपने पूत क स पिरेम करत ह अउर ओकरे हाथे मँ उ सब कछू क अधिकार सौंपि दिहेस। ³⁶ एह बरे जउन ओकरे पूत मँ बिसवास करत ह, अनन्त जीवन पइहइँ मुला जे परमेस्सर क पूत क बात नाहीं मानत ओका इ जीवन नाहीं मिली। एकरे बजाय उ परमेस्सर क कोप का भाजन बनी।”