Old/New Testament

^4 (D)Akaddiyizza omubiri gwange n’eddiba lyange
    era amenye n’amagumba gange.
^5 (E)Antaayizza n’anzijuza
    obulumi n’okubonaabona.
^6 (F)Antadde mu kizikiza
    ng’abafu abaafa edda.

^7 (G)Ankomedde n’okuyinza ne siyinza kudduka,
    ansibye enjegere ezizitowa.
^8 (H)Ne bwe mukoowoola ne mukaabira nga mmusaba anyambe,
    okusaba kwange akuggalira bweru.
^9 (I)Anteeredde amayinja mu kkubo lyange
    era akyamizza amakubo gange.

¹⁰ Ng’eddubu bwe liteega,
    n’empologoma bwe yeekweka
^11 (J)yansikambula n’anziggya mu kkubo lyange n’antaagulataagula
    n’andeka awo nga sirina anyamba.
^12 (K)Yanaanuula omutego gwe,
    n’anteekawo okuba ssabbaawa ey’obusaale bwe.

^13 (L)Yafumita omutima gwange
    n’obusaale okuva mu mufuko gwe.
^14 (M)Nafuuka ekisekererwa eri abantu bonna,
    era bannyooma nga bannyimbirira okuzibya obudde.
^15 (N)Anzijuzza ebikaawa
    era ampadde ekikompe eky’obubalagaze nkinywe.

^16 (O)Ampadde oluyinjayinja okululya amannyo gange ne gamenyeka;
    anninnyiridde mu nfuufu.
¹⁷ Emmeeme yange terina mirembe,
    n’okujjukira sijjukira bugagga bwe bufaanana.
^18 (P)Era njogera nti, “Ekitiibwa kyange kigenze,
    n’essuubi lyonna lye nalina mu Mukama limpeddeko.”

¹⁹ Nzijukira okubonaabona kwange n’okuwankawanka kwange,
    n’obulumi n’obubalagaze.
^20 (Q)Mbijjukira bulungi
    era bwe mbirowoozaako omutima gwange gulumwa.
²¹ Ebyo byonna mbijjukira,
    kyenvudde mbeera n’essuubi.

^22 (R)Olw’okwagala kwa Mukama okutaggwaawo,
    tetulimalibwawo, kubanga ekisa kye tekiggwaawo.
^23 (S)Buli lukya ekisa kyo kiba kiggya;
    n’obwesigwa bwo bwa lubeerera.
^24 (T)Njogera mu mutima gwange nti, “Mukama gwe mugabo gwange,
    kyenaava mbeera n’essuubi mu ye.”

^25 (U)Mukama mulungi eri abo abamulinamu essuubi,
    eri oyo amunoonya.
^26 (V)Kirungi omuntu okulindirira
    obulokozi bwa Mukama n’obukkakkamu.
²⁷ Kirungi omuntu okwetikka ekikoligo kye
    mu buvubuka bwe.

^28 (W)Atuulenga yekka mu kasirise
    kubanga Mukama y’akimwambiseemu.
^29 (X)Leka akweke amaaso ge mu nfuufu, mpozi wanaabaawo essuubi.
^30 (Y)Leka aweeyo oluba lwe okukubibwa,
    era amalibwe n’okuvumibwa.

^31 (Z)Kubanga Mukama taligobera bantu bweru
    ebbanga lyonna.
^32 (AA)Newaakubadde ng’aleeta obulumi, aliraga ekisa
    kubanga okwagala kwe kungi nnyo tekuggwaawo.
^33 (AB)Tagenderera kuleeta bulumi
    newaakubadde okubonaabona ku baana ba bantu.

³⁴ Mukama akkiriziganya
    n’okulinnyirira abasibe,
³⁵ n’okuggyako omuntu obwetwaze bwe
    mu maaso g’Oyo Ali Waggulu Ennyo,
^36 (AC)oba n’obutaba na bwenkanya eri omuntu?

^37 (AD)Ani ayinza okwogera ekintu ne kituukirira,
    Mukama nga takiragidde?
^38 (AE)Mu kamwa k’oyo Ali Waggulu Ennyo,
    si mmwe muva ebigambo eby’okubeerwa n’eby’okubonereza?
^39 (AF)Lwaki omuntu omulamu yeemulugunya,
    bw’abonerezebwa olw’ebibi bye?

^40 (AG)Twekebere engeri zaffe, era tuzeetegereze,
    tudde eri Mukama.
^41 (AH)Tuyimuse emitima gyaffe n’emikono gyaffe
    eri Katonda mu ggulu, twogere nti,
^42 (AI)“Twayonoona ne tujeema,
    tokyerabiranga era tonatusonyiwa.

^43 (AJ)“Ojjudde obusungu n’otugobaganya,
    n’otutta awatali kutusaasira.
^44 (AK)Weebisseeko ekire,
    waleme okubaawo okusaba n’okumu okutuuka gy’oli.
^45 (AL)Otufudde obusa n’ebisasiro
    mu mawanga.

^46 (AM)“Abalabe baffe bonna batwogerako
    ebigambo ebibi.
^47 (AN)Tubonyeebonye olw’entiisa n’emitego
    n’okunyagibwa n’okuzikirizibwa.”
^48 (AO)Amaaso gange gakulukuta emigga gy’amaziga
    olw’okuzikirira kw’abantu bange.

^49 (AP)Era amaaso gange ganeeyongeranga okukulukuta amaziga
    awatali kusirika,
^50 (AQ)okutuusa Mukama lw’alisinzira
    mu ggulu n’alaba.
⁵¹ Bye ndaba bireeta ennaku ku mutima gwange,
    olw’ebyo ebyatuuka ku bawala b’ekibuga kyange.

^52 (AR)Abalabe bange banjigganya olutata
    ne baba ng’abayigga ennyonyi.
^53 (AS)Bagezaako okuzikiririza obulamu bwange mu bunnya,
    ne bankasuukirira amayinja;
^54 (AT)amazzi gaabikka omutwe gwange,
    ne ndowooza nti, nsanyeewo.

^55 (AU)“Nakoowoola erinnya lyo, Ayi Mukama,
    nga ndi mu bunnya wansi ennyo;
^56 (AV)wawulira okwegayirira kwange: toziba matu go
    eri okukaaba kwange.”
^57 (AW)Bwe nakukoowoola wansemberera
    n’oyogera nti, “Totya!”

^58 (AX)Mukama watunula mu nsonga yange,
    era n’onunula obulamu bwange.
^59 (AY)Ayi Mukama, walaba ebibi bye bankola,
    obasalire omusango nga bwe kibagwanira.
^60 (AZ)Walaba bwe bampalana,
    n’enkwe zaabwe zonna ze bansalira.

⁶¹ Wawulira bye banvuma, Ayi Mukama Katonda,
    n’enkwe zaabwe zonna ze bansalira,
^62 (BA)obwama n’ebirowoozo eby’abalabe bange
    bye bantesaako obudde okuziba.
⁶³ Batunuulire mu kutuula kwabwe ne mu kuyimirira kwabwe;
    bannyooma nga bwe bannyimbirira.

^64 (BB)Obasasule nga bwe kibagwanira Ayi Mukama Katonda,
    olw’ebikolwa eby’emikono gyabwe.
^65 (BC)Osseeko ekibikka ku mitima gyabwe,
    n’ekikolimo kyo kibabeereko.
⁶⁶ Obayigganye mu busungu bwo obazikirize
    ng’osinziira mu ggulu lya Mukama Katonda.
4 ^(BD)Zaabu ng’ettalazze!
    Zaabu ennungi ng’efuuse!
Amayinja ag’omuwendo gasaasaanye
    buli luguudo we lutandikira.

² Abaana ba Sayuuni ab’omuwendo
    abaali beenkana nga zaabu ennungi,
kaakano bali ng’ensuwa ez’ebbumba,
    omulimu gw’emikono gy’omubumbi.

^3 (BE)Ebibe biyonsa
    abaana baabyo,
naye abantu bange bafuuse ng’abatalina kisa,
    bafaanana nga bammaaya mu ddungu.

^4 (BF)Olw’ennyonta omwana ayonka gy’alina,
    olulimi lwe lukwatira ku kibuno ky’akamwa ke;
abaana basaba emmere
    naye tewali n’omu agibawa.

^5 (BG)Abaalyanga ebiwoomerera
    basabiriza ku nguudo;
n’abo abaakuzibwa ng’abambala engoye ezinekaaneka
    bali ku ntuumu ez’ebisasiro.

^6 (BH)Ekibonerezo ky’abantu bange
    kisinga ekya Sodomu,
ekyawambibwa mu kaseera akatono,
    nga tewali n’omu azze kukibeera.

⁷ Abalangira baabwe baatukula nnyo okusinga omuzira,
    nga beeru okusinga amata;
n’emibiri gyabwe nga mimyufu okusinga amayinja amatwakaavu,
    era banyirivu nga safiro.

^8 (BI)Naye kaakano badduggala okusinga enziro,
    era tebakyasobola kutegeerekeka mu nguudo.
Olususu lwabwe lukalidde ku magumba gaabwe;
    lukaze ng’ekiti ekikalu.

^9 (BJ)Abafa ekitala bafa bulungi
    okusinga abafa enjala,
kubanga abafa enjala bayongobera ne baggwaawo
    olw’obutaba na mmere mu nnimiro.

^10 (BK)Abakazi ab’ekisa abaagala abaana
    bafumbye abaana baabwe;
abaana abaafuuka emmere
    abantu bange bwe baazikirizibwa.

^11 (BL)Mukama akituukirizza mu busungu bwe obungi,
    era abayiyeeko obusungu bwe obungi.
Yakoleeza omuliro mu Sayuuni
    ogwayokya emisingi gyakyo.

^12 (BM)Bakabaka b’ensi
    n’abantu ab’ensi endala tebakkiriza,
nti abalabe n’ababakyawa baliyingira
    mu wankaaki wa Yerusaalemi.

^13 (BN)Ebyo byabatuukako olw’ebibi bya bannabbi be,
    n’olw’obutali butuukirivu bwa bakabona be,
abaayiwa omusaayi
    gw’abatuukirivu abaababeerangamu.

^14 (BO)Badoobera mu nguudo
    nga bamuzibe;
bajjudde omusaayi
    so tewali ayaŋŋanga okukwata ku byambalo byabwe.

^15 (BP)Abantu baabagobaganya nga boogera nti, “Muveewo, mmwe abatali balongoofu!
    Muviireewo ddala, so temutukwatako!”
Bwe baafuuka emmombooze,
    amawanga gabagobaganya nga boogera nti,
    “Tebakyasaana kubeera wano.”

^16 (BQ)Mukama yennyini abasaasaanyizza,
    takyabafaako.
Bakabona tebakyassibwamu kitiibwa,
    newaakubadde abakadde okuweebwa ebifo eby’oku mwanjo.

^17 (BR)Amaaso gaffe gakooye
    olw’okulindirira okubeerwa okutajja;
nga tulindirira
    eggwanga eriyinza okutulokola.

^18 (BS)Baatucocca
    ne batulemesa okutambulira mu nguudo zaffe;
enkomerero yaffe n’eba kumpi,
    n’ennaku zaffe ne ziggwaayo.

^19 (BT)Abaatuyiganyanga baatusinga embiro
    okusinga n’empungu ez’omu bbanga.
Baatugobera mu nsozi
    ne batuteegera mu ddungu.

^20 (BU)Oyo Mukama gwe yafukako amafuta
    yagwa mu mitego gyabwe.
Twalowooza nga tulikwekebwa mu kisiikirize kye
    ne tubeeranga mu mawanga.

^21 (BV)Sanyuka ojaguze, ggwe Omuwala wa Edomu,
    abeera mu nsi ya Uzi;
naye lumu olinywa ku kikompe
    n’otamiira ne weeyambula.

^22 (BW)Ggwe Muwala wa Sayuuni, ekibonerezo kyo kikomye awo,
    talikwongerayo mu busibe.
Naye ggwe omuwala wa Edomu, Mukama alikubonereza,
    n’ayanika ekibi kyo mu lujjudde.
5 ^(BX)Jjukira Ayi Mukama ekitutuuseeko.
    Tunula olabe ennaku yaffe.
^2 (BY)Omugabo gwaffe guweereddwa bannamawanga,
    n’amaka gaffe gatwaliddwa abatali ba mu nnyumba.
^3 (BZ)Tufuuse bamulekwa abatalina bakitaabwe,
    ne bannyaffe bafuuse bannamwandu.
^4 (CA)Tusasulira amazzi ge tunywa;
    n’enku tuteekwa okuzigula.
^5 (CB)Abatucocca batugobaganya;
    tukooye ate nga tetulina wa kuwummulira.
^6 (CC)Twakola endagaano ne Misiri n’Abasuuli
    okutufuniranga ku mmere.
^7 (CD)Bajjajjaffe baayonoona, ne bafa,
    naye tubonerezebwa olw’ebikolwa byabwe ebitaali bya butuukirivu.
^8 (CE)Abaddu be batufuga,
    tewali n’omu ayinza okutulokola mu mukono gwabwe.
⁹ Tuba kumpi n’okuttibwa nga tunoonya emmere,
    olw’ekitala ekiri mu ddungu.
^10 (CF)Olususu lwaffe luddugadde ng’enziro
    olw’enjala ennyingi.
^11 (CG)Abakyala ba Sayuuni,
    n’abawala embeerera ab’omu bibuga bya Yuda bakwatiddwa olw’amaanyi.
^12 (CH)Abalangira bawanikibbwa baleebeetera ku mikono gyabwe
    n’abakadde tewali abassaamu kitiibwa.
¹³ Abavubuka bawalirizibwa okusa emmere ku jjinja ne ku lubengo,
    n’abalenzi batagala nga beetisse entuumu z’enku.
^14 (CI)Abakadde tebakyatuula mu wankaaki w’ekibuga,
    n’abavubuka tebakyayimba.
^15 (CJ)Emitima gyaffe tegikyasanyuka,
    n’okuzina kwaffe kufuuse kukungubaga.
^16 (CK)Engule egudde okuva ku mitwe gyaffe.
    Zitusanze kubanga twonoonye!
^17 (CL)Emitima gyaffe kyegivudde gizirika,
    era n’amaaso gaffe kyegavudde gayimbaala.
^18 (CM)Olw’okuba nga olusozi Sayuuni lulekeddwa nga lwereere,
    ebibe kyebivudde bitambulirako.

^19 (CN)Ggwe, Ayi Mukama obeerera ennaku zonna;
    entebe yo ey’obwakabaka ya mirembe na mirembe.
^20 (CO)Lwaki otwelabiririra ddala okumala ennaku ezo zonna?
    Tuddiremu, Ayi Mukama, tudde gy’oli.
^21 (CP)Tukomyewo gy’oli Ayi Mukama,
    otuzze buggya ng’edda;
^22 (CQ)wabula ng’otusuulidde ddala,
    era ng’otusunguwalidde nnyo nnyini obutayagala na kutuddiramu.