M’Cheyne Bible Reading Plan

Da Army Guys Take Jesus

19 Den Governa Pilate tell his guys fo take Jesus an cut him up wit da whip. ² Da army guys wen twist togedda big kine thorn branches fo make one crown, an dey put um on top his head. Den dey put one purple kine robe on top him. ³ An dey coming in front him, an tell, “Hui! King fo da Jews!” An dey slap his face wit dea hands.

⁴ Den Pilate go outside one mo time, an tell everybody, “Eh, look! I goin bring him outside fo you guys, so you guys can know dat I neva find notting wrong fo punish him.” ⁵ Jesus wen come outside wit da crown a thorns on top his head an da purple robe. Den Pilate tell da peopo, “Look, da guy!”

⁶ Wen da main priest guys an da police guys see Jesus, dey make big noise, an dey yelling, “Kill him on top one cross! Kill him on top one cross!”

Pilate tell um, “You guys take him an kill um on top one cross! I no find notting wrong fo punish him.”

⁷ Da Jews tell Pilate, “Us guys get Rules from God, an da Rules say dis guy gotta mahke, cuz he wen go talk like he Godʼs Boy.”

Governa Pilate Talk To Jesus

⁸ Wen Governa Pilate hear wat dey wen tell um, he come mo scared. ⁹ He go back inside da army headquarters an aks Jesus, “Eh, you! Wea you come from?” But Jesus neva say notting. ¹⁰ Den Pilate tell him, “You no like talk to me, o wat? Eh, you donno dat I get da right fo make dem kill you on top one cross, an I get da right fo let you go?”

¹¹ Jesus tell, “Ony one way you get da right fo hurt me. Ony if God Up Dea Inside Da Sky let you do all dis, den you can. Dass why da guy who wen turn me ova to you, he do mo worse ting den you.”

¹² From dat time, Pilate try fo let him go. But da Jews make big noise an yell, “If you let dis guy go, you not King Cesarʼs friend. If anybody make himself one king, he agains King Cesar.”

¹³ So, wen Pilate hear da tings dey saying, he bring Jesus outside, an he sit down on top da judge chair by da place dey call “Stone Pavemen Square,” an da Jews call um “Gabbata.”

Pilate Say Jesus Gotta Mahke

¹⁴ Was da Day Fo Make Ready Fo Da Passova. Bout noon time, Pilate tell da Jews, “Look now, yoa king!”

¹⁵ But dey make big noise an yell, “Take um away! Take um away! Kill um on top one cross!”

Pilate tell um, “Wot! You mean, yoa king, I gotta kill um?”

Da main priest guys tell, “Us guys, we no mo no odda king, ony King Cesar!” ¹⁶ Den Pilate turn ova Jesus fo da army guys kill um on top one cross.

Dey Wen Nail Jesus to One Cross

So dey take charge a Jesus, ¹⁷ an he wen carry his own cross outside da town, da place dey call “Da Skull Place,” an da Jews call um “Golgota,” dea language.

¹⁸ Ova dea dey wen nail Jesus to one cross. Same ting fo two odda guys, one on top one cross on da left side, da odda one on top one nodda cross on da right side, an Jesus inside da middle.

¹⁹ One nodda ting: Pilate wen tell da army guys fo make one sign an put um on top da cross. Da sign say,

²⁰ Dis sign, plenny Jews wen read um, cuz da place dey wen kill him stay near Jerusalem town. Da army guys wen write da sign in three language: Hebrew, Greek, an Latin. ²¹ Da Jewish main priest guys tell Pilate, “Eh, no write, ‘Da King Fo Da Jews’! Mo betta write, ‘Dis guy wen say, I da King fo da Jews’.”

²² Pilate tell um, “I wen tell my guys wat fo write, an dass how goin stay!”

²³ Da army guys, afta dey wen nail Jesus to da cross, dey take his clotheses an make four piles. Was one pile fo every army guy. Had his robe too, dat neva have seam, cuz dey wen weave um from da top an all ova. ²⁴ So dey say, “Mo betta no broke up da robe. We go throw da dice fo um, yeah? Fo find out who goin get um.” Dat was fo make happen jalike da Bible wen say from befo time: “Dey wen split my clotheses. An my robe, dey wen throw da dice fo um.”

So dass wat da army guys wen do.

Jesus Tell John Fo Take Care Jesus Mudda

²⁵ Had Jesus mudda standing by da cross wit her sista, an Mary, Clopas wife, an Mary from Magdala. ²⁶ Jesus wen see his mudda standing dea, wit one guy he wen teach, da one he get plenny love an aloha fo. (Dass was me, you know.) So Jesus tell his mudda, “Look, Ma, dis yoa boy now.” ²⁷ Den Jesus tell me, “Look! Make like her yoa mudda now.” An I wen take her to my own place from dat time.

Jesus Mahke

²⁸ Afta dat, Jesus wen know dat he wen pau do everyting he suppose to do. Den fo make come true everyting da Bible wen say befo time, he say, “I thirsty!” ²⁹ Had one jug full a cheap wine ova dea. Dey fill up one sponge wit dat wine, put um on top one oregano branch, an put um up to his mout. ³⁰ Wen Jesus wen suck da cheap wine he say, “Everyting pau awready!” An he wen bend down his head, an den let go his spirit.

Dey Stab Jesus

³¹ Was da Day Fo Make Everyting Ready Fo Da Passova. Da Jews neva like fo da mahke bodies fo stay on top da cross on da Rest Day. Dat Rest Day stay real spesho, so da leada guys wen go beg Pilate fo broke da guys legs fo kill um mo quick, so dey can take down da bodies. ³² Da army guys wen go dea. Da two guys dey wen kill um on top da odda crosses same time wit Jesus, dey wen broke da first guyʼs legs, an den da odda guyʼs legs. ³³ But wen dey go by Jesus, dey see dat he mahke awready, so dey neva broke his legs. ³⁴ But one army guy wen stab him wit his spear on da side, an blood an water come out. ³⁵ (You know, one a da guys dat wen see all dat happen, dass me. I tell da tings I wen see, an I tell da trut. I know I telling true kine stuff, so you guys can trus wat I say.) ³⁶ All dis wen happen jalike da Bible wen say befo time, “Dey no goin broke even one bone.” ³⁷ An da Bible wen tell one nodda ting, “Dey goin look at him, da guy dey wen stab.”

Dey Bury Jesus

³⁸ Had one guy, name Joseph from Arimatea. He wen like learn plenny from Jesus, but he neva tell nobody, cuz he scared da Jewish leada guys. He wen go aks Pilate fo let him take Jesus body, an Pilate let him. So he go an take away Jesus body. ³⁹ Nicodemus, he go ova dea wit Joseph too. He da guy who befo time wen go by Jesus, nite time, fo talk to him. He wen bring aloe an myrrh, all mix up, bout hundred pounds, fo put on top Jesus body befo dey bury him. ⁴⁰ Dey wen take Jesus body an wrap um up inside linen kine cloth wit da aloe an myrrh inside, cuz dass how da Jews bury da mahke guys.

⁴¹ Now da place dey wen kill Jesus, had one garden wit trees, an one new place fo bury dat da owna guy jus pau dig outa one cave, an dey neva put nobody inside dea yet. ⁴² Dass wea dey put Jesus, cuz was da Day Da Jews Make Ready Fo Da Passova, an dat place stay near.

How Fo Get Um Right Wit God

3 Kay den, bruddas an sistas. Stay good inside, cuz you guys stay tight wit da Boss! Da kine stuff I telling you guys inside dis letta, dat fo help you guys fo stay outa trouble, an dat no make bodderation fo me fo tell you guys dat one mo time.

² Eh! Watch out da kine peopo dat ack pilau kine! Dey da kine peopo dat everytime do bad kine stuff. Dass da kine peopo dat say you gotta knife up da body. ³ Dey tell, “Fo be Godʼs guy fo real kine, gotta cut skin.” But you know, us guys, we da guys dat get Godʼs Spirit. Dass jalike da mark fo show dat we Godʼs guys fo real kine, not dem. Cuz wen we do stuff fo God, da Spirit help us do um, dass why. Us guys can feel real proud cuz we stay tight wit Godʼs Spesho Guy, Jesus Christ. We no tink we okay jus cuz somebody wen do someting to our body.

⁴ Now me, if I like, I can tink I okay cuz a who me, an wat I wen do, but no need. If da odda guys figga dey can trus dat stuff, I figga I get plenny mo fo trus den dem guys. Listen up! ⁵ Dey wen cut skin on me one week afta I born. I from da Israel peopo, from da Benjamin ohana. I hundred percent one Hebrew guy. I wen work real hard fo do everyting Godʼs Rules say, jalike da Pharisee guys teach um. ⁶ I wen go all out fo make da church peopo suffa plenny. If you figga can get um right wit God if you do jalike Godʼs Rules say, I do all dat awready. No can poin finga me an say I neva.

⁷ But you know wat? No matta I wen figga all dat stuff do me plenny good, now, I figga all dat stuff ony junk! Cuz I stay tight wit Christ now, dass why. ⁸ Mo den dat, jalike I wen say, now I figga everyting ony junk. Cuz now, I know my Boss Jesus Christ fo real kine, an dass mo betta! I wen lose everyting cuz I his guy, you know. An I figga, all dat kine ony rubbish! Cuz I like come real tight wit Christ. ⁹ I like everybody know dat I stay tight wit Christ. I do wat Godʼs Rules say, but dat no make me get um right wit God. I get um right wit him cuz I trus Christ, dass why! Dat way, wen I trus him, God da One dat wen make me come right wit him.

¹⁰ Main ting, I like know Christ to da max. He wen come back alive afta he wen mahke, an he get plenny power. I like him make dat power work inside me. Wen I suffa cuz I Christʼs guy, I like handle um jalike him. I like come jalike Christ, so wen I go mahke, I goin handle um jalike him. ¹¹ So den if can, I figga, bumbye afta I mahke, God goin let me come back alive.

I Like Win Da Race

¹² I not saying dat I wen win da race awready. I not perfeck yet. Mo like I go all out, cuz I like da medal fo come mines. Jesus Christ make me come his guy awready. Dass why I go all out fo win. ¹³ Eh, bruddas an sistas! I know dat da medal not mines yet. But I doing da main ting so I can get um -- I not even tinking bout all da stuff dat wen happen awready. I going fo broke fo da stuff dat goin happen bumbye. ¹⁴ I running all out fo win da race. An you know wat kine medal I goin get fo dat? Dis: God goin tell me, “Eh! Come up hea by me!” An I going dea cuz a Jesus Christ, dass why.

¹⁵ You know, all us guys dat stay grown up an solid inside, good we all tink an feel da same way. If you guys tink diffren, God goin show you how you suppose to tink. ¹⁶ You guys doing okay, so stick wit da stuff you know an stay do um.

¹⁷ Eh, bruddas an sistas! Help each odda fo ack how I ack. Get odda guys dat do jalike I do. Check out dem guys too. You guys get all us guys fo copy, so you guys can do jalike we do. ¹⁸ But eh! Jalike I wen tell you guys ova an ova awready, an even now I stay crying wen I telling you guys dis: Get plenny guys dat stay agains Christ, an dey no can take dat he wen mahke on top da cross. ¹⁹ Dem guys, bumbye dey goin wipe out. Dey ony live fo eat. Everytime dey do shame kine stuff, an dey figga dey so hot stuff wen dey make lidat. Dey da guys dat ony like tink bout da kine stuff from dis world.

²⁰ But us guys, we get our own place wit God inside da sky. Dass wea our Boss Jesus Christ stay. We stay waiting fo him come back from dea, cuz he da guy dat goin take us outa da bad kine stuff we stay in. ²¹ He goin make our bodies come real diffren, no matta our bodies stay kinda junk kine right now. Christ, his body wen come real awesome, an he goin make us come jalike him. He can do dat, cuz he get da power fo take ova everyting.