M’Cheyne Bible Reading Plan
Ony By Jesus We Can Go To Da Fadda
14 “No need you guys come all bodda inside yoa heart. Trus God, an trus me too. 2 Inside my Faddaʼs house, get plenny place fo stay. If neva have, I wen tell you guys awready. I going ova dea fo make you guys place ready. 3 Afta I go an make da place ready, I goin come back, an take you guys ova dea wit me, so da place I stay, you guys goin stay dea too. 4 Da place I going, you guys know how fo go ova dea.”
5 Thomas tell um, “Eh Boss! Us guys, we donno wea you going. How we goin know how fo go ova dea?”
6 Jesus tell um, “No mo odda guy can bring peopo to da Fadda, ony me. I bring peopo to um, jalike I da road. I da guy who get da trut. I da guy dat make da peopo come alive fo real kine. 7 You guys know me, so dass mean you guys goin know my Fadda. An from now, you guys know him, an see him.”
8 Philip tell um, “Eh Boss, show us yoa Fadda, an dass nuff fo us guys.”
9 Jesus tell him, “I stay wit you guys long time, an you still yet donno who me, Philip? Whoeva wen see me, dey wen see my Fadda. So how come you say, ‘Show us yoa Fadda’? 10 You no trus me, o wat, wen I say dat I stay tight wit my Fadda, an he stay tight wit me? Da stuff I telling you guys, all dat no come from me, come from my Fadda. He stay tight wit me, an he da One dat stay doing all dis kine stuff. 11 Trus me wen I say dat I stay tight wit my Fadda an he stay tight wit me. If you guys no can believe dat, den trus me cuz a da stuff I stay doing.
12 “Dass right! An I tell you guys dis too: Whoeva trus me, dey goin do da same kine stuff I do. An dey goin do even mo betta stuff, cuz I going by my Fadda. 13 Wateva you guys aks me fo do cuz you my guys, I goin do um. Den everybody can know how awesome my Fadda stay, cuz I his Boy, an I show dem how awesome he stay. 14 Wateva you guys aks me fo do cuz you my guys, I goin do um fo you.
Jesus Tell Dat Godʼs Spesho Spirit Goin Come
15 “If you guys get love an aloha fo me, you goin do wat I tell you guys fo do. 16 I goin aks my Fadda, an he goin give you guys one nodda One fo kokua you guys. An dat One goin stay wit you guys foeva. 17 Dass Godʼs Spirit dat teach you guys da trut. But da peopo inside da world no like take him, cuz dey no see him, an dey donno him. You guys know him, cuz he stay by you guys, an he goin stay tight wit you guys.
18 “I no goin leave you guys all alone. I goin come back by you guys. 19 Litto wile moa, da peopo inside da world no goin see me. But you guys goin see me. Cuz I goin come back alive, dass why you guys goin come alive fo real kine. 20 Wen I come back alive, you guys goin know fo shua dat I stay tight wit my Fadda, an you guys stay tight wit me, an I stay tight wit you guys.
21 “Whoeva take wat I tell um fo do, an do um, dass da ones dat get love an aloha fo me. My Fadda goin get love an aloha fo dem, an I goin get love an aloha fo um, an I goin show um who me fo real kine.”
22 Had one nodda guy name Judas, not da Iscariot guy. He wen aks Jesus, “Boss, how come you goin show us guys who you fo real kine, an not show da odda peopo inside da world?”
23 Jesus wen tell him, “Whoeva get love an aloha fo me, dey goin do wat I tell um. My Fadda goin get love an aloha fo dem too. Den me an my Fadda going by dem, an jalike we goin make house wit dem togedda. 24 Whoeva no mo love an aloha fo me, dey no goin do wat I say. All da stuff you wen hear me tell, dat no come from me, come from my Fadda who wen send me.
25 “I wit you guys still yet, az why I stay telling you guys all dis stuff now. 26 My Fadda, bumbye he goin send you guys his Good an Spesho Spirit fo kokua you guys fo me. He goin teach you guys everyting, an help you guys rememba all da stuff I wen tell you guys awready.
27 “Wen I go way, I goin make you guys hearts rest inside, da kine rest dat ony I can give. All da stuff inside da world no can make you guys rest inside lidat. No let yoa heart come all funny kine inside! No scared! 28 You guys wen hear me say, ‘I going way from you guys, an I goin come back by you guys.’ So, no feel bad. If you guys wen get love an aloha fo me, den you guys stay good inside, cuz I going by my Fadda. Cuz my Fadda, he mo importan den me. 29 I wen tell you guys all dis stuff befo da ting happen. So wen da ting happen, you guys goin trus me. 30 I ony goin talk to you guys litto wile moa, cuz da Devil stay coming. Fo now, he in charge a da peopo inside dis world, but he no mo power ova me. 31 But no matta he coming, cuz I goin do wat my Fadda wen tell me fo do. Dat goin show da peopo inside da world dat I get love an aloha fo my Fadda.”
“Come on! We going!”
Christʼs Peopo Stay Tight Wit Each Odda
4 I one prisona guy, cuz I stay tight wit da Boss, an dass why I telling you guys dis. Eh! You know how I like you guys live? Da Boss wen tell you guys fo come be his guys, an dass how you guys gotta live fo real kine. 2 Everytime put da odda guy first befo you. Make nice kine to dem. Hang in dea wit each odda. No get huhu wit each odda, cuz you guys get plenny love an aloha fo each odda. 3 Go all out fo stay tight wit each odda, cuz Godʼs Spirit wen make you guys stay tight awready. An you guys goin stick togedda, cuz you guys make good wit each odda.
4 Ony get one peopo dass Godʼs peopo, you know, an one Spirit. God wen tell you guys fo come be his guys, an now ony get one ting you stay waiting fo.
5 Ony get one Boss.
Ony get one way fo trus him.
Peopo get baptize fo show
Dey stay tight wit ony one Guy.
6 Ony get one God,
He da ony Fadda fo everybody.
He stay in charge a everybody.
He stay use everybody
Fo do wat he like.
An he stay by everybody.
Get Diffren Kine Peopo Inside Christʼs Ohana
7 You know wat? Christ wen give power to all us guys. Everybody get da kine power fo do wat Christ like um fo do. 8 Dass why da Bible say,
“He wen go up to da high place.
He wen fight an win, an take plenny prisonas.
An he give plenny stuffs to da peopo.”
9 Wen da Bible say, “He wen go up,” dass jalike one picha, you know. Dat mean dat Christ wen go all da way down to da earth, an afta, den he wen go up inside da sky. 10 Dat One dat wen go all da way down to da earth, he da same One dat wen go all da way up inside da sky. He wen go mo high den da sky, fo show he da King fo everyting.
11 Dass da same One dat wen “give us power.” Dat mean, he wen give power to da church peopo. Some guys, he give um power fo go all ova fo tell peopo bout him. Odda guys, he give um da power fo talk fo him. Odda guys he give da power fo tell peopo da Good Stuff bout him so dey can trus him. An odda guys, he give um da power so dey can teach his peopo an take care dem jalike da sheep farma guys take care dea sheeps. 12 Christ give um dat kine power so all da peopo dat stay spesho fo him can be ready fo work fo him, an do stuff fo help odda peopo. Den all Christʼs peopo goin come mo strong. Cuz we Christʼs peopo, you know. 13 Den bumbye we all goin trus Christ togedda da same way. Togedda we goin know Godʼs Boy fo real kine. Togedda we goin come jalike one grown up guy, da kine guy dat stay perfeck inside, jalike Christ.
14 Get guys dat like teach us guys all kine stuff fo bulai us, an dey sly buggas. But we no goin listen dem. We no goin be jalike small kids dat believe any kine. We no goin be jalike one boat dat da waves push all ova da place, an da wind go blow um hea an dea.
15 Mo betta dis: us guys tell da trut everytime wit love an aloha. An we goin come jalike grown up guys in everyting -- fo us come jalike Christ. Cuz he jalike da head an us guys jalike da body. 16 Christ make us guys get love an aloha fo each odda, jalike get tings inside our body dat make all da parts work togedda good. Az why, da whole body can grow up an come strong jalike suppose to, you know.
Da Old Kine Life an da New Kine Life
17 I like tell you guys dis, an I get da right fo say um, cuz I da Bossʼs guy: Stop making jalike da odda kine peopos all ova da world dat donno God. How dey live, dey ony stay tinking stuff dat wase time. 18 Dey ony hard head, so dey donno notting. Dey no undastan notting, jalike dey trying fo see inside one dark place an no can. Dass why dey no stay close to God, an dey cut off from God. 19 Dey no mo shame. Dey go buckaloose fo do any kine ting dea body like. So dey do all kine pilau stuff, an dey no like stop. Dey ony like do um mo an moa.
20 But you guys, wen you guys wen learn bout Christ, you guys neva learn fo make lidat! 21 Fo shua you guys wen hear bout Christ, an dey wen teach you guys da true stuff dat ony Jesus get, cuz you his guys. 22 Dey wen teach you guys dis: No make like how you guys was befo time, wen you guys wen ony like do da kine stuff dat goin bulai you guys an mess you guys up. Dat ony goin make you guys come all pilau inside. 23 But let God make you guys come all new kine inside, how you feel an how you tink. 24 You guys gotta start fo live da new kine way. God wen make dat new kine life so you guys can come jalike him. Den you guys goin be fo real an be good an spesho fo God, an live da true way.
How fo Live da New Kine Way
25 Kay den. No bulai no moa. All you guys gotta tell each odda da trut, cuz we all stay jalike da same ohana. 26 If you guys huhu, no go do bad kine stuff cuz a dat. No stay huhu. No good da sun go down an you guys still yet stay huhu, you know. 27 An no let da Devil get one chance fo jam you guys up.
28 Whoeva steal stuffs gotta stop. Now dey gotta work hard fo do good kine stuff wit dea hands. Den dey can give stuffs to da peopo dat need um. 29 No go talk pilau kine stuff notting. But weneva you talk, say good kine stuff dat goin help da peopo dat listen, an make um come mo strong inside. Cuz dey need fo hear da kine stuff dat goin do good fo um.
30 No go do notting dat goin make Godʼs Good an Spesho Spirit come sore inside. Cuz Godʼs Spirit stay in charge a you guys, an dat show proof dat you guys Godʼs peopo, an dat show dat bumbye he goin cut loose you guys from da power dat da bad kine stuff get ova you guys. 31 No make like da kine peopo dat wen had it wit somebody an no like let um go. No get hot an snap. No stay huhu. No make big noise. No talk stink. Wipe out all dat kine stuff, an no hate nobody no moa. 32 Mo betta, make nice to each odda. Show pity an aloha to each odda. Let each odda go, jalike God wen let you guys go, cuz a wat Christ wen do.
Copyright © 2000 by Wycliffe Bible Translators International. All rights reserved