M’Cheyne Bible Reading Plan

Jesus Wash His Guys Feet

13 Was jus befo da Passova time. Jesus wen know dat was time fo him fo go outa dis world, an go by his Fadda. He everytime get love an aloha fo his peopo dat stay inside da world, an he get love an aloha fo dem all da way.

² Jesus dem was eating da Passova dinna. An da Devil wen awready make Judas, Simon Iscariotʼs boy, tink dat he like set Jesus up.

³ Jesus know dat his Fadda wen give him all da power ova everyting. He know he wen come from God an now he going back to God. ⁴ So Jesus wen stand up from da table, take off his robe, an put one towel aroun his waist. ⁵ Den he wen pour water inside one small wash tub, an wen start fo wash his guys feet, first one guy, den da odda. An den he dry um wit da towel he wen get aroun his waist. ⁶ Den he wen go by Simon Peter. An Peter wen aks him, “Eh, Boss! Wat you doing? You goin wash my feet?”

⁷ Jesus tell him, “You no undastan how come I doing dis now, but bumbye you goin undastan um.”

⁸ Peter tell him, “No way you eva goin wash my feet!”

Den Jesus tell him, “If I no wash you, den you no can be my guy.”

⁹ Den Simon Peter tell him, “Kay den, Boss. No wash ony my feet. Wash my hands an my head too!”

¹⁰ Jesus tell him, “Whoeva wen bafe, dey ony need wash dea feet. Dea body stay clean awready. You guys stay clean inside, but not all you guys.” ¹¹ (Cuz Jesus know awready who goin set him up. Dass why he say, “All you guys not clean.”)

¹² Afta Jesus wen wash dea feet, he put on his robe an go back to da table. Den he aks um, “Eh, you guys undastan how come I wen wash you guys feet? ¹³ You guys call me ‘Teacha’ an ‘Boss.’ Dass good, cuz dass who me. ¹⁴ I you guys Boss an Teacha, yeah? an I wen wash you guys feet. Kay den. You guys suppose to wash each oddaʼs feet too. ¹⁵ I wen show you guys wat fo do, cuz jalike I wen do fo you guys, you guys suppose to do too. ¹⁶ Dass right! An I tell you guys dis too: Da slave guy not mo importan den his boss. An da messenja guy not mo importan den da guy dat wen send him. ¹⁷ You guys know all dis stuffs. So, if you guys do um, you guys goin stay good inside.

¹⁸ “I not talking bout all you guys. I know da guys I wen pick. But gotta happen jalike da Bible say from befo time, ‘One guy dat wen eat wit me, like go agains me.’ ¹⁹ I stay telling you guys dis now, befo he do um, so wen he do um, you guys goin know fo shua dat I Godʼs Spesho Guy. ²⁰ Dass right! An I like tell you guys dis too: Whoeva stick wit da guy I send, dey stick wit me too. An whoeva stick wit me, dey stick wit da One who wen send me too.”

Dey Goin Set Up Jesus fo Mahke

²¹ Afta Jesus wen say dat, he come all funny kine inside. He tell da guys he teaching, “Dis fo shua wat I telling you guys: One a you guys goin set me up fo mahke.”

²² His guys wen look at each odda, an dey no can figga who he talking bout. ²³ Had one a Jesus guys was sitting by him at da table. Jesus get plenny love an aloha fo him. ²⁴ So Simon Peter nod da head at da guy an say, “Eh! Try find out who he talking bout.”

²⁵ So da guy wen move mo close an aks Jesus, “Eh, Boss! Who da guy?”

²⁶ Jesus say, “I goin take one piece bread, dip um inside da sauce, an give um to da guy.” So he take da bread, dip um inside, an give um to Judas, Simon Iscariotʼs boy. ²⁷ Judas wen take da bread, an right den an dea, da Devil take ova him. Den Jesus say, “Hurry up an go do wat you goin do!” ²⁸ But da odda guys sitting dea neva undastan how come Jesus wen tell him dat. ²⁹ Some a Jesus guys was tinking dat Jesus telling Judas, “Go get wat we need fo da Passova,” o “Go give someting to da peopo dat no mo notting.” Dey tinking lidat cuz Judas stay in charge a da money fo all da guys.

³⁰ So afta Judas take da bread, he go outside quick. Was nite time.

Da New Ting Dey Gotta Do

³¹ Afta Judas go way, Jesus say, “I da Guy Dass Fo Real. Now everybody goin see how awesome I stay. An from dat, dey goin find out how awesome God stay. ³² I goin show how awesome God stay, an he goin make me awesome too, cuz I stay tight wit him. An he goin do um right away. ³³ Eh guys! I get plenny love an aloha fo you guys! But I goin stay wit you guys ony litto wile moa. Den you guys goin look fo me, but jalike I wen tell da Jewish leada guys, I telling you guys now, ‘Da place wea I going, you guys no can go dea.’

³⁴ “I give you guys one new ting you gotta do: Show love an aloha fo each odda. Jus like I get love an aloha fo you guys, dass how you guys gotta get love an aloha fo each odda. ³⁵ If all you guys get love an aloha fo each odda, den everybody goin know you my guys.”

Bumbye Peter Goin Say He Donno Jesus

³⁶ Simon Peter aks him, “Eh, Boss, wea you going?”

Jesus tell him, “Da place I going, you no can go dea now, but bumbye you going dea.”

³⁷ Peter tell him, “Eh, Boss, how come I no can go wit you now? I stay ready fo mahke fo you!”

³⁸ Jesus tell him, “Fo real? You tink you stay ready fo mahke fo me? Dass right! But I tell you dis too: Befo da roosta make noise early today, you goin say three times dat you donno who me!”

Paul Go To Da Diffren Peopos

3 Dass why I praying to God. Dis me, Paul. I da prisona guy, cuz I Jesus Christʼs guy. An I stay in jail fo help you guys dat not Jews. ² Fo shua you guys wen hear bout da good ting God wen do fo me. How God wen give me dis job, dat goin help you guys. ³ God wen show me da secret stuff dat nobody wen figga out befo time, jalike I wen write um litto bit awready. ⁴ Bout dis stuff, wen you guys read um, den you guys goin figga out how come I undastan da plan dat was secret befo time, bout da ting dat Christ wen go do. ⁵ All da peopos dat wen live befo time, God neva let dem know da secret plan. But now, Godʼs Good an Spesho Spirit wen show da secret plan to his spesho guys dat talk fo God, an to da guys dat God wen send all ova da place fo tell da peopo bout Christ. ⁶ Dis da secret stuff: Da Good Stuff From God tell dat da peopo dat not Jews can come Godʼs kids too, jalike da Jewish peopo. Da peopo dat not Jews an da Jewish peopo, goin be jalike ony one peopo, an dey all goin get all da good kine stuffs God wen promise his peopo. All dat stuff goin happen cuz dey stay tight wit Christ. ⁷ An me, God wen make me one worka guy fo him. God wen go give me dis job, jalike one spesho gif, fo tell da Good Kine Stuff From Him. An he give me da job cuz he get da power fo do wateva he like do inside me.

⁸ No matta all da peopo dat stay spesho fo God, stay mo importan den me, still yet God wen like give me dis job: fo tell all da diffren kine peopos dat not Jews all da unreal an awesome kine stuffs bout Christ, mo plenny den anybody can figga. Dis job, jalike one spesho gif God wen go give me. ⁹ An, God let me help everybody undastan da plan dat was secret befo time. From da time God wen make everyting, he neva let nobody know da secret plan till now. ¹⁰ But now, God like use his church peopo fo show all da kine leada guys an da guys wit power dat stay inside da sky, dat God know wat fo do bout everyting fo real kine.

¹¹ God, he wen make da plan from befo time fo do all dat stuff. An Jesus Christ, our Boss, he da One dat wen do um. ¹² An us guys dat stay tight wit Christ, we know fo shua we no need shame, an we can go talk to God any time we like. We trus um, az why. ¹³ So, I stay telling you guys, no bum out jus cuz I stay suffa plenny fo you guys. I do dis so peopo goin know how awesome you guys stay, you know.

Christ Get Love an Aloha fo Us Guys

¹⁴ All dat stuff I stay telling you guys, az why I go down on my knees an pray to da Fadda. ¹⁵ An dis Fadda, he da Fadda fo real kine. All da diffren ohanas all ova da world an inside da sky, dey get dea faddas, an dey call um “faddas” cuz dey make litto bit jalike da real Fadda. ¹⁶ You know, God, he stay plenny awesome! He get everyting we need! Az why I like him fo send his Spirit fo give you guys da power fo come mo strong inside. ¹⁷ Den Christ goin live inside you guys, cuz you guys trus um. I aks God dat you guys goin everytime get love an aloha fo God an everybody. An dat kine love goin make you guys strong jalike da root fo one big tree, an jalike da foundation fo one house. ¹⁸ Den you guys togedda wit all da peopo dat stay spesho fo God, goin get power fo undastan inside yoa hearts how plenny love an aloha Christ get fo everybody everytime. Dis love an aloha, no goin pau eva! Az jalike da love an aloha, stay real deep. ¹⁹ Yeah, an I like you guys get power fo know an feel how plenny love an aloha Christ get fo you guys, no matta no mo nobody can undastan um all da way. An den you guys goin be jalike God. Az wat he like you guys fo be, jalike him.

²⁰ God, he get plenny power! Wateva we like aks him fo do, o wateva we tink he can do, he can do plenny mo den dat! Dass da kine power he get fo change us guys inside. ²¹ So, all da church peopo goin show how awesome God stay, dass all da church peopo dat stay alive now, an all da church peopo dat goin come afta. An Christ, he stay show how awesome God stay, fo eva an eva. Dass it!