M’Cheyne Bible Reading Plan

Lazarus Come Back Alive

11 Had one guy, name Lazarus. He get two sistas, Mary an Marta, an dey all come from Betany town. Mary, she da wahine dat wen put da perfume on top da Boss Jesus feet, an wipe um wit her hair. Now, Lazarus wen come sick. ³ So Lazarus sistas, dey send guys fo tell Jesus, “Boss, yoa good friend Lazarus, he stay sick.”

⁴ Wen Jesus wen hear dat, he wen say, “Lazarus no goin mahke from dis sick. Dis wen happen so everybody goin know how awesome God stay. I Godʼs Boy, an everybody goin find out from dis how awesome I stay too.”

⁵ Now Jesus get love an aloha fo da sistas, Marta an Mary, an fo Lazarus too. ⁶ Afta Jesus hear dat Lazarus stay sick, he still yet stay ova dea da odda side da Jordan River two mo days. ⁷ Den he tell his guys, “Come on. We go back Judea side, wea Lazarus stay.”

⁸ Da guys Jesus teaching wen tell him, “Eh, Teacha, ony litto wile befo dis da Jewish peopo wen like throw stones at you fo kill you. An you still like go back ova dea again?”

⁹ Jesus tell dem, “No scared! God goin take care us guys, cuz he jalike da light. Day time get twelve hours, yeah? If you walk aroun day time, you no goin trip an fall down, cuz da light dat shine inside dis world let you see. ¹⁰ But if you walk aroun nite time, you goin trip an fall down, cuz you no mo light.”

¹¹ Afta Jesus wen say dat, he tell dem, “Our friend Lazarus wen go sleep, but I going ova dea fo wake him up.”

¹² Jesus guys wen say, “Boss, if he sleeping, he goin come good.”

¹³ Jesus mean he mahke die dead, but his guys tink he talking bout rest an sleep. ¹⁴ Den Jesus tell um strait, “Lazarus mahke awready. ¹⁵ I feel good inside fo you guys, cuz I neva stay ova dea wen he wen mahke. Cuz you guys goin trus me cuz a wat goin happen. An now, we going ova dea by him.”

¹⁶ Den Thomas da Twin tell Jesus odda guys, “Eh, mo betta we go wit Jesus too, so we can mahke wit him.”

Jesus Make da Mahke Peopo Come Alive Fo Real Kine

¹⁷ Den wen Jesus go Betany, he wen find out dat Lazarus wen stay inside da grave four days awready. ¹⁸ Now, Betany stay not too far from Jerusalem, not even two miles. ¹⁹ Plenny Jewish peopo wen come fo kokua Marta an Mary, cuz dea brudda wen mahke.

²⁰ Den Marta wen find out dat Jesus stay coming. She go outside da town an meet him. But Mary stay inside da house. ²¹ Marta tell Jesus, “Boss, if you was hea, my brudda no wen mahke! ²² But I know dat even now, God goin do wateva you aks him fo do.”

²³ Jesus tell her, “Yoa brudda goin come back alive again.”

²⁴ Marta tell him, “I know dat he goin come back alive, bumbye wen all da mahke guys goin come back alive, an dis world goin pau.”

²⁵ Jesus tell her, “I da Guy dat make peopo come back alive an stay live fo real kine. Whoeva trus me goin come alive, no matta dey mahke. ²⁶ Whoeva stay live fo real kine an trus me, dey no goin mahke inside, eva! You believe dat, Marta?”

²⁷ She tell him, “Yeah, Boss! I trus you, dat you da Christ, da Spesho Guy God Wen Send. You Godʼs Boy, da Guy dey wen tell us goin come inside dis world.”

Jesus Cry

²⁸ Afta Marta wen say dat, she go back by her sista Mary. Dey talk wea nobody can hear wat dey say. She say, “Da Teacha wen come, an he like see you.” ²⁹ Mary wen hear dat. She get up quick an go outside wea Jesus stay. ³⁰ You know, Jesus neva come inside da town yet, but he stay da place wea Marta meet him. ³¹ Da Jewish peopo dat stay inside da house wit Mary, fo kokua her, dey wen see her get up quick an go outside. So dey wen go too. Dey tink she going to da grave fo cry ova dea.

³² Den Mary wen come wea Jesus stay, an see him. She go down in front his feet an say, “Boss, if you was hea, my brudda no wen mahke.”

³³ Wen Jesus see her crying, an da Jewish peopo who wen come wit her crying too, he come all bodda an funny kine inside. ³⁴ He say, “Wea you guys wen bury him?”

Dey say, “Boss, come see.”

³⁵ Jesus wen cry. ³⁶ Den da Jewish peopo say, “Look, how plenny love an aloha he get fo Lazarus!”

³⁷ But some a dem say, “Eh! Dis guy wen make da blind guys see. How come he no can make Lazarus come good, so he no mahke, aah?”

Lazarus Come Back Alive

³⁸ One mo time Jesus wen come all funny kine inside. He go to da cave wea dey wen bury Lazarus. An had one big stone dea dat cover da cave so nobody can go inside. ³⁹ Jesus say, “Take away da big stone.”

Marta, da mahke guyʼs sista, she say, “Auwe, Boss, he mahke four days awready! Goin get bad smell!”

⁴⁰ Jesus tell her, “I wen tell you awready dat if you trus God, you goin find out how awesome he stay, yeah?” ⁴¹ Den some guys wen take da stone away from da puka. Jesus look up to da sky an say, “Fadda, mahalo plenny dat you wen listen to me. ⁴² I know dat you everytime listen to me. But I wen say dat so dey goin believe me, dat you wen send me hea.” ⁴³ Afta he say dat, he talk real loud, “Lazarus, come outa dea!” ⁴⁴ Da mahke guy wen come outside. He get bandage fo mahke guys aroun his hands an feet, an anodda bandage aroun his face. Jesus say, “Hemo da bandage from his face, an let him go.”

Dey Talk How Dey Goin Kill Jesus

⁴⁵ Den plenny Jewish peopo dat wen come fo kokua Mary, an wen see all da awesome stuff Jesus wen do, dey wen trus him. ⁴⁶ But odda guys wen go by da Pharisee guys, an tell dem all da stuff Jesus wen do.

⁴⁷ Den da main priest guys an da Pharisee guys wen tell all da Jewish leadas fo come togedda. Dey say, “Dis guy Jesus doing all kine awesome stuff dat show who him! Wat we goin do? ⁴⁸ If we let him stay do dis kine stuff, everybody goin go trus him jalike he dea king! An cuz a dat, da Rome army guys goin come an wipe out our temple an our peopo.”

⁴⁹ One a dem, Kaiafas, da Head Priest guy dat year. He tell dem, “You guys donno notting! ⁵⁰ Mo betta fo you guys if one guy mahke fo all da peopo. If not, da Rome guys goin wipe out all da Jewish peopo!” ⁵¹ Kaiafas neva say dat by himself, but he da Head Priest guy dat year, dass why he can talk lidat. He wen talk fo God wen he say dat Jesus goin mahke fo all da Jewish peopo. ⁵² An he no goin mahke ony fo da Jewish peopo, but fo all Godʼs kids dat stay all ova da world, fo bring dem all togedda fo come one peopo.

⁵³ Dass why, from dat time, da Jewish leada guys wen talk togedda how dey goin kill Jesus.

⁵⁴ So Jesus no go aroun no moa wea da Jewish leada guys can see him. He go one place near da boonies, Efraim town. An he wen stay ova dea wit da guys he teaching.

⁵⁵ Now, almos time fo da Jewish Passova religious time. Plenny peopo from da boonies wen go Jerusalem befo da Passova, so dey can do all da stuff Godʼs Rules say fo do fo make demself clean fo pray Passova time. ⁵⁶ Da peopo stay looking fo Jesus. Wen dey standing inside da temple yard, dey aks each odda, “Wat you guys tink? You tink Jesus goin come to da spesho religious time, o wat?” ⁵⁷ But da main priest guys an da Pharisee guys wen tell dat if anybody know wea Jesus stay, dey gotta tell dem, so dey can send da police guys fo bus Jesus.

Paulʼs Aloha to da Peopo Efesus Side

1 Aloha! Dis letta from me, Paul. You know Jesus Christ, da Spesho Guy God Wen Send. Jesus wen send me all ova fo tell peopo bout him, cuz dass wat God like me fo do. Dis letta fo you guys dat stay Efesus side. You guys da peopo dat stay spesho fo God. Peopo trus you guys, cuz you guys stay tight wit Jesus Christ. ² I like our Fadda God an our Boss Jesus Christ do plenny good kine tings fo you guys, an make yoa hearts rest inside.

Da Good Tings God Goin Do fo Us Wen We Stay Tight wit Christ

³ Good everytime fo tell how good God stay! He da God an da Fadda fo our Boss Jesus Christ. God everytime do good kine tings fo us, cuz he put all kine good stuff inside our hearts, all dat strait from wea God stay inside da sky. He put all dat inside our hearts cuz we stay tight wit Christ. ⁴ Befo God wen make da world, he wen pick us awready fo be his guys an fo stay tight wit Christ. He wen like us be good an spesho fo him. so den no goin get nobody fo poin finga us guys. God know everyting bout us guys. He get choke love an aloha fo us. ⁵ From befo time, God wen make plan fo everyting. He wen make plan fo make us his kids. He wen make plan fo Jesus Christ fo make all dat happen. Dass wat God wen like, an dass wat stay make him stay good inside. ⁶ God like his kids tell how awesome all da good kine tings he stay do fo us. God do good kine tings fo us, cuz we stay tight wit Christ, an he get plenny love an aloha fo Christ.

⁷ No matta us guys wen broke Godʼs Rules, still yet Christ da One dat wen go bleed an mahke fo us. Christ wen cut us guys loose from da power da bad kine stuff get ova us, an he hemo our shame, cuz he like do plenny good kine stuff fo us, an cuz we stay tight wit him. ⁸ God everytime go all out fo us guys. He know how everyting stay, an he know da right tings fo do. ⁹ God, he know da tings he like do. Befo time he neva tell nobody notting, but now he wen tell us guys. He wen go make plan fo all da tings dat he wen like do, an he wen pick Christ fo do um. ¹⁰ God wen make one plan fo do all dat wen da right time stay come. Dis da plan: God goin make everyting dat he wen make come togedda, an his Spesho Guy Christ goin be in charge. Dat mean Christ goin be in charge a everyting inside da sky an inside da world!

¹¹ An us guys dat stay tight wit Christ, was us God wen pick from befo time. An cuz we his kids awready, he stay give us all da tings he get fo us. He wen go make everyting jalike he wen figga befo time. God, he da One dat can make everyting he like happen. ¹² God wen go do all dat, cuz he wen like us guys dat wen go trus Christ first, show da oddas how awesome God stay. Den da odda peopo goin tell how awesome he stay too.

¹³ Same ting wit all you guys dat stay tight wit Christ, you guys wen hear da true kine stuff God wen say. Dass da Good Kine Stuff bout how God take you guys outa da bad stuff you guys stay in.

An cuz you guys wen go trus Jesus, an stay tight wit him, God wen give you guys his Spesho Spirit, jalike he wen promise befo time. Dass da Spirit dat make you guys go all out fo him, an da Spirit jalike one mark fo show dat you his guys. ¹⁴ Wen we stay tight wit Godʼs Spirit, dass da first proof fo show us all da good kine stuff God goin give his kids. Bumbye God goin cut loose his kids from all da power dat da bad kine stuff get ova dem, an den everybody goin tell how awesome he stay.

Paul Pray Fo Da Bruddas an Sistas Efesus Side

¹⁵ Cuz I wen hear dat you guys trus da Boss Jesus, an you guys get love an aloha fo all da peopo dat go all out fo him, ¹⁶ az why I no stop telling God, “Mahalo plenny fo dem guys!” I everytime tink bout you guys, an pray fo you guys.

¹⁷ Everytime, dis how I pray: “God, you da God fo our Boss Jesus Christ. You our Fadda, an you stay awesome! I like you help da Efesus peopo fo know inside dea heart wat fo do. An show dem plenny bout Christ, so dey goin know him mo betta. ¹⁸ God, I like you help da Efesus bruddas an sistas fo undastan mo betta da good kine stuff you wen promise fo do fo dem bumbye. Az jalike you goin open one light inside dea hearts fo dem fo see. Den dey goin start fo wait fo da tings you wen promise, cuz you wen tell dem fo come be yoa guys. Help dem fo know dat goin be plenny, all da awesome stuff you wen promise fo give us. Az jalike same ting you goin give all yoa kids, cuz dey stay all out fo you. ¹⁹ Plus, I like dem know how strong you stay fo help us guys dat stay trussing you, cuz you get da power fo make anyting happen!”

²⁰ You know how strong da power God get? He wen go make Christ come back alive afta he wen mahke, dass how strong his power! Den God wen put Christ da mos importan place, by his own right side up dea inside da sky. ²¹ Dat show dat Christ mo importan den all da kine leadas inside da sky, an all ova da place, an da leadas dat get da right fo tell odda peopo wat fo do, an all da guys dat get power fo do tings to odda peopo, an all da bosses, an all da guys dat get big name. Christ, he stay da mos importan leada now, an he goin be da mos importan leada inside da time dat goin come bumbye. ²² God wen make everyting inside da world an inside da sky unda Christ. An same time he wen make Christ da head guy fo us church peopo. ²³ Us church guys, we jalike Christʼs body. Cuz we da ones dat goin pau do everyting dat Christ wen start wen he was hea. He stay tight wit all his peopo, an he get plenny power fo make everyting come jalike suppose to be.