M’Cheyne Bible Reading Plan

Da Story Bout Da Smart Luna

16 Jesus wen tell da guys he teaching, “You wen hear da story bout da rich guy dat get one luna, an he wen spend da rich guyʼs money on all kine stuffs? ² So da rich guy tell da luna fo come, an he say, ‘Eh, wat dis I hear bout you? You betta give me one paper dat tell how you wen spend my money, cuz you no goin be in charge no mo.’

³ “Da luna tink, ‘Wat I goin do now? My boss goin fire me, an I not strong nuff fo dig da ditch, an I shame fo beg. ⁴ I know wat I goin do, so dat wen I no mo job hea, da peopo goin let me come dea house.’

⁵ “Den da luna tell all da guys dat owe da rich guy money fo come. He aks da first guy, ‘How plenny money you owe my boss?’ ⁶ Da guy say, ‘One hundred barrel olive oil.’ Da luna say, ‘Dis yoa bill. Hurry up! Sit down an write fifty.’ ⁷ Da luna aks anodda guy, ‘How plenny money you owe?’ He say, ‘One tousand bushel wheat.’ Da luna say, ‘Dis yoa bill. Write eight hundred.’ ⁸ No matta da luna wen do stuff dass not right befo, now da boss talk good to him bout dis smart ting he wen do. You know, da peopo dat stick wit dis world mo smart wit da kine money stuff den da peopo dat stick wit Godʼs light.”

⁹ “I telling you, no matta can use money fo all kine stuff dass not right, you guys can use um too fo make friends fo yoaself. Den bumbye, wen da time come dat da money an everyting goin pau, God goin tell you guys ‘Aloha!’ inside his place dat stay foeva. ¹⁰ Whoeva do da small kine stuff he suppose to, you can trus him fo do da big kine stuff he suppose to. Whoeva no do da right ting fo da small kine stuff, you can trus him fo no do da right ting fo da big kine stuff. ¹¹ So, no matta peopo can get money fo do stuff dass not right, if you not da kine guy peopo can trus wit even dat kine money, no way God goin trus you fo take care all his rich kine stuffs dass fo real. ¹² An if nobody can trus you fo take care odda peopoʼs stuffs, no way God goin give you stuff fo yoaself.”

¹³ “Da worka guy no can work, an two boss guys own him same time. Bumbye he goin hate one boss an love da odda boss. He goin do good kine stuff fo one boss an tink bad bout da odda boss. You no can work fo da God dass fo real an da money god.”

¹⁴ But da Pharisee guys, dey love money. Wen dey hear all da stuff Jesus wen say, dey make fun a him. ¹⁵ Jesus tell um, “You da guys dat tell da peopo you do da right kine stuff, but God know how you guys stay inside. Da stuff da peopo tink stay real good, dass da stuff God tink no good.”

Odda Stuff Jesus Say

¹⁶ “Had da Rules Moses wen write down, an da stuff da guys dat talk fo God wen write down, till John Da Baptiza Guy come. Afta dat us guys tell da Good Stuff bout how peopo can get God fo dea King, an everybody stay jamming, cuz dey like get God fo dea King. ¹⁷ Stay mo easy fo da sky an da earth fo go pau den fo one litto line from Godʼs Rules fo go pau.

¹⁸ “Whoeva dump his wife an marry anodda wahine, dass jalike he stay fool aroun somebody not his wife. An da guy dat marry one wahine afta her husban wen dump her, dass jalike he stay fool aroun wit anodda guyʼs wife.”

Da Rich Guy An Lazarus

¹⁹ Jesus say, “One time had one rich guy dat wear da rich kine clotheses. Everytime he live jalike one king. ²⁰ Had one begga guy name Lazarus dat get sores all ova him. Every day his friends wen put him down by da rich guyʼs gate. ²¹ You know, he like eat da stuff dat fall down from da rich guyʼs table. An da dogs even wen come lick his sores.

²² “Bumbye da begga guy wen mahke an da angel guys carry him by Abrahamʼs side wit God. An da rich guy mahke too, an dey bury him. ²³ Inside da Mahke Peopoʼs Place da rich guy wen suffa plenny, an he look up. He spock Abraham far away wit God, wit Lazarus by his side.

²⁴ “So he yell, ‘Eh Abraham, my ancesta guy! Pity me an send Lazarus fo dip da tip a his finga in water fo cool my tongue, cuz I stay suffa plenny inside dis fire.’

²⁵ “But Abraham say, ‘My boy, rememba dat wen you wen stay alive, you wen get all da good kine stuffs, an Lazarus wen get all da bad kine stuffs. Now he stay good ova hea, an you stay suffa inside dis fire. ²⁶ Anodda ting, in da middle get one real big ditch. You stay on one side, an we stay on da odda. Da peopo dat like go from ova hea to you no can, an da peopo dat like go from ova dea to ova hea no can.’

²⁷ “Da rich guy say, ‘Den I beg you, cuz you my ancesta guy, send Lazarus to my faddaʼs house, ²⁸ cuz I get five bruddas. He gotta tell dem bout dis place, so dat dey no come hea an suffa.’

²⁹ “Abraham say, ‘Yoa bruddas get Moses Rules, an da tings da odda guys dat talk fo God wen write down inside da Bible. Yoa bruddas can hear wat dey say.’

³⁰ “But da rich guy say, ‘No way, Abraham, my ancesta guy! But if one guy come back to dem from mahke, dey goin come sorry fo da bad kine stuff dey wen do, an pau do um.’

³¹ “But Abraham say, ‘If dey no listen to Moses Rules, an to da guys dat wen talk fo God, dey no goin listen an trus God, even if one guy come back alive from mahke.’ ”

“Aloha!”

1 Aloha! Dis letta from me, Paul. God wen send me all ova fo tell peopo da Good Stuff From Godʼs Spesho Guy, Jesus. Brudda Timoty, he stay hea an he say same ting.

I writing dis fo all da peopo dat come togedda fo church an stay spesho kine fo God, inside Corint town an all ova Akaia side. ² I like God our Fadda an Jesus Christ our Boss do plenny good tings fo you guys an make everyting come okay fo you guys.

Paul Tell God “Mahalo Plenny”

³ We like everybody talk good bout God. He da God an Fadda fo our Boss Jesus Christ. He da Fadda dat pity us an give us plenny chance, an he da God dat everytime give us good kine words. ⁴ He give us good kine words weneva we get hard time, an cuz a dat, we can give good kine words to da odda peopo dat get any kine hard time. We give dem good kine words jalike God wen give us. ⁵ Christ, Godʼs Spesho Guy, wen suffa plenny fo us guys. So, cuz Christ wen do dat, his Fadda give us choke good kine words wen we suffa. ⁶ Weneva me an Timoty get hard time, God give us good kine words. Same time, good you guys figga God goin give you good kine words too, an take you outa da bad kine stuff you stay in. Weneva you guys suffa jalike us, God give you guys good kine words too, so den you guys know you can handle da whole ting. ⁷ Az why we stay shua you guys goin come out okay. We know dat wen you guys suffa jalike us, God goin kokua you guys jalike he kokua us.

⁸ Bruddas an sistas, we like you guys know da hard time we wen get ova hea Asia side. We had plenny presha, mo plenny den we can handle, dat we even wen give up an tink we goin mahke. ⁹ We wen bum out plenny, jalike one crook guy feeling wen da judge say he gotta mahke. But all dat wen happen so dat we can learn fo trus God an no trus ourself. God, he get power fo even make da peopo alive again dat wen mahke. ¹⁰ He wen take us outa da bad kine stuff, wen we almos wen mahke. An he goin take us outa da bad kine stuff nex time too. We still yet stay shua he goin take us outa da bad kine stuff ova an ova. ¹¹ If you guys stay pray fo us too, den dat goin help us guys cuz God goin do plenny stuffs fo us. He goin do dat cuz plenny peopo wen pray. Den plenny peopo goin tell God “Mahalo plenny” wen dey tink bout us guys.

Paul Change His Plan

¹² Dis how come we talk big. We know inside us dat da way we do stuff in dis world, we do wat God like us fo do, an we no move from dat, so everybody can see dat we fo real. We no do um wit da kine smarts da peopo inside dis world get, but wit da kine smarts dat God give us cuz he get good heart fo us. Az how we wen do um even mo plenny, dat time we wen stay wit you guys. ¹³ Da ony stuff we write to you guys, you guys can read an can undastan um. Den da stuff you guys undastan litto bit awready, I stay shua dat bumbye you guys goin undastan um mo betta. ¹⁴ Right now, you guys ony undastan litto bit bout us guys. But wen our Boss Jesus come back, I stay shua you guys goin undastan plenny. Den you guys goin talk big bout us, jalike we goin talk big bout you guys.

¹⁵ Cuz I wen know dat, da first ting I wen tink fo do was go back by you guys, so you guys can get someting good two times. ¹⁶ I wen tink I goin come see you guys wen I go Macedonia side, an one mo time wen I coming back, cuz I like you guys kokua me so I can go Judea side. ¹⁷ Wen I wen tink fo come by you guys, you guys tink I change mind everytime? Nah! Wen I tink fo do someting, you guys tink I like do um ony my way, jalike all da odda peopo inside da world? You guys tink I saying “Oh yeah” an “No way” same time?

¹⁸ Jalike we can trus God fo do wat he say, wat I tell you guys everytime not “Oh yeah” an “No way” same time. ¹⁹ Me an Silas an Timoty wen teach you guys bout Jesus Christ, Godʼs Boy. Jesus, he not one “Oh yeah” an “No way” same time kine guy. He everytime “Yeah!” ²⁰ Da stuff God wen promise fo do, you guys tink he can do um? Jesus say, “Yeah!” An us guys can say, “Dass right!” cuz we know wat Jesus Christ wen do. We say dat fo show how awesome God stay. ²¹ God, he da One dat make us guys an you guys all be Christʼs peopo, an no mo notting goin change dat. God wen pick us fo be his guys. ²² God wen put his awesome Spirit in charge a us guys, fo show wat he goin do fo us bumbye. Dass jalike he wen put his mark on top us fo show he own us.

²³ Wen I say dis, I aks God fo back me up, cuz he know me inside. He know how come I no going Corint still yet. I no like make you guys shame, dass why I no going dea still yet. ²⁴ We no ack like boss an try fo tell you guys who you gotta trus. We work wit you guys so you can stay good inside. Cuz you know you guys can be strong wen you trus God.