M’Cheyne Bible Reading Plan

16 “I wen tell you guys dis stuff awready, cuz no good bumbye you guys no stick wit me no moa. ² Da Jewish peopo goin throw you guys outa dea churches. An even goin get one time wen whoeva kill you guys goin tink dey doing someting good fo God. ³ Dey goin make lidat to you guys cuz dey donno my Fadda an dey donno me. ⁴ I wen tell you guys dis stuff too, so wen da time come, you guys goin rememba dat I wen tell you guys bout um. I neva tell you guys dis stuff befo, cuz I was wit you guys.

Wat Godʼs Spirit Do

⁵ “But now I going to da One dat wen send me. But still yet, you guys no even aks me wea I going. ⁶ I wen tell you guys dis stuff awready. Dass why you guys stay all sad an crying inside. ⁷ Dis da trut, wat I stay telling you guys: Mo betta fo you guys if I go way. Cuz if I no go way, da One who goin kokua you guys no goin come hea. But if I go way, den I goin send him to you guys.

⁸ “Wen da Kokua Guy come, he goin show da peopo inside da world how dey mess up. Dat mean, da Kokua Guy goin show peopo dat dey do bad kine stuff, an dat dey no do wat stay right, an dat God goin be dea Judge. ⁹ He goin show dem dat dey do bad kine stuff, cuz dey no like trus me. ¹⁰ He goin show dem dat dey no do wat stay right, cuz I going to my Fadda, an den you guys no goin see me no moa. ¹¹ He goin show dem dat God goin be dea Judge, cuz God awready wen judge da main leada fo dis world, da Devil.

¹² “I still yet get plenny mo stuff fo tell you guys, but dass mo den you guys can handle right now. ¹³ Wen da Spirit come dat make you guys know da trut, he goin show you guys how fo do da true stuff. He no goin talk by himself, but he goin tell wat my Fadda wen tell him. An he goin tell you guys bout da stuff dat goin happen bumbye. ¹⁴ Dass how he goin show how awesome I stay, cuz he goin take all da true stuff bout me an show you guys wat all dat mean. ¹⁵ Everyting my Fadda get, dass mines too. Dass why I wen say, Godʼs Spirit goin take all da true stuff bout me, an show you guys wat dat mean.

You Guys Goin Cry Inside, An Afta Dat, You Goin Stay Good Inside

¹⁶ “In litto wile, you guys no goin see me. Den litto wile moa, you guys goin see me.”

¹⁷ Den some a da guys he wen teach wen tell each odda, “Eh, wass he talking bout? He say, ‘In litto wile, you guys no goin see me. Den litto wile moa, you guys goin see me.’ An how come he say, ‘Cuz I going to my Fadda’?” ¹⁸ So dey wen say, “Wass dis he mean, ‘In litto wile’? We donno wat he talking bout.”

¹⁹ Jesus know dey like aks him question, so he tell um, “I wen say, ‘In litto wile you guys no goin see me. Den litto wile moa, an you guys goin see me.’ Dat wat you aksing each odda bout? ²⁰ Dass good you aks! An I like tell you guys dis too: you guys goin cry an come sad inside, but da peopo hea inside da world, dey goin stay good inside. You guys goin be crying inside, but afta, you guys goin stay good inside. ²¹ You know, wen one wahine goin born one baby, she sad cuz she stay suffa. But afta da baby born, she no tink bout dat no moa. Den she stay good inside cuz one baby wen born hea inside dis world. ²² Same ting wit you guys: Now, you guys stay sad an crying inside, but bumbye I goin see you guys again, an den you guys goin stay good inside. Dat time, no goin get nobody can make you feel bad again.

²³ “Wen dat time come, you guys no goin need aks me bout notting. Dass right! I tell you guys, wateva you guys aks my Fadda fo do cuz you my guys, he goin do um fo you guys. ²⁴ Befo now, you guys neva aks my Fadda fo do notting cuz you my guys. Aks now, an you guys goin get um, so you guys can stay good inside to da max.

Jesus, He Da Winna

²⁵ “Till now I wen teach you guys wit stories. Da time goin come wen I no goin teach you guys wit stories lidat no moa. Den I goin tell you strait out bout my Fadda. ²⁶ Wen dat time come, you guys goin aks my Fadda fo do stuff cuz you my guys. No need fo me aks him fo you guys. ²⁷ My Fadda, he da One dat get love an aloha fo you guys, cuz you guys get love an aloha fo me, an you stay shua dat I wen come from God. ²⁸ Befo, I wen go way from wea my Fadda stay, an wen come inside da world. Now I going outa da world, an going back to my Fadda.”

²⁹ Den da guys he teaching tell him, “Eh! Now you talking strait out, an not ony teaching wit stories! ³⁰ Now, we know fo shua dat you know everyting. You no need nobody fo aks you notting, cuz you know awready wat dey like aks an wat da answer. Dat show us dat you wen come from God.”

³¹ Jesus tell um, “Fo real? You guys trus me now? ³² You know wat? Da time goin come, an almos stay hea now, wen all you guys goin bag, an run all ova da place. Everybody goin go his own place, an I goin stay by myself. But I no stay by myself, cuz my Fadda stay wit me.

³³ I wen tell you guys all dis stuff so yoa hearts can rest inside, cuz you guys stay tight wit me. Da peopo inside da world goin make you guys suffa. But make strong! I da winna ova all da power inside da whole world!”

Da Kids Get Respeck Fo Da Fadda-Mudda Guys

6 Same ting fo you kids, listen to yoa mudda an yoa fadda guys, cuz you guys stay tight wit da Boss, an cuz dass da right ting fo do. ² Da Bible say, “Show respeck fo yoa mudda an yoa fadda.” From da Ten Commandments, dass da first Rule dat God make promise too, you know. ³ Dis wat God wen say wen he wen give dat Rule: “Wen you do dis, den everyting goin come okay fo you, an you goin live long time, on top da earth.”

Da Fadda Guys Get Respeck Fo Dea Kids

⁴ Same ting fo you fadda guys, no hassle yoa kids so dey come huhu. Mo betta, teach um right, an show um everyting da Boss like um fo know an do.

Da Worka Guys Get Respeck Fo Dea Boss Guys

⁵ Same ting fo you slave worka guys, listen yoa boss guys on top dis earth. Show respeck fo dem, an be scared fo no do da right ting. Do um wit good heart, jalike you listen to Christ. ⁶ No good if you do yoa work ony if yoa boss watching you, o fo make peopo feel good bout you. Mo betta, do wat God like from yoa heart, cuz Christ da One you working fo. ⁷ Work wit everyting you get, jalike you working fo da Boss, an not fo peopo. ⁸ Cuz you guys know dat da Boss goin give back good kine stuff to everybody dat do good kine stuff, no matta dey one slave o not one slave.

Da Boss Guys Get Respeck Fo Dea Worka Guys

⁹ Same ting fo you guys dat stay bosses, show respeck fo yoa slave worka guys. No tell dem you goin punish dem if dey no listen you, cuz you know dat da Boss inside da sky, he da Boss fo both dem an you. An he no make diffren kine to diffren peopo.

Stand Strong!

¹⁰ So den, make strong cuz you guys stay tight wit da Boss, an he get all da power you guys need fo make you guys strong inside. ¹¹ Jalike da army guys get armor fo stand agains da odda army guys, God get everyting you guys need fo stand agains all da stuff da Devil like try use fo bulai you guys. So take all da stuff God like give you guys!

¹² Eh! Us guys get war now, you know! But we not fighting agains regula kine peopo wit skin an bones. We stay fighting agains da spirit leadas, agains da spirits dat get plenny power, agains da main gods dat stay in charge a dis dark world, agains da spirits wit power inside da sky dat you no can see, but dey bad kine.

¹³ So den. Take all da stuff God give you guys fo fight. Den wen da bad time come, you guys goin win! Afta you guys pau do everyting you gotta do, you goin be da ones dat still stay standing on yoa feet.

¹⁴ Stand strong! Wen you trus wass true, dass jalike one army belt fo yoa waist. An wen you do da right kine stuff, dass jalike one metal vest fo cover yoa chest. ¹⁵ An wen you guys stay ready fo tell da Good Stuff bout coming friends wit Christ, dass jalike da army boots fo yoa feet. ¹⁶ Wen you guys trus God, dass jalike one shield fo kill all da burning arrows da Bad Guy send fo mess you up, no matta wat happen. ¹⁷ Wen you guys let God take you outa all da kine bad stuff you stay in, dass jalike one helmet fo yoa head. Wen you guys tell wat God say, dass jalike one sword dat Godʼs Spirit give you.

¹⁸ Fo stand strong, everytime, pray an stay tight wit Godʼs Spirit. Pray bout everyting, an aks God fo help you. Make shua you guys watch out, an hang in dea an pray fo all da peopo dat stay spesho fo God. ¹⁹ Try pray fo me too, so wen I tell da Good Kine Stuff From God, I tell um da right way an I no scared. You know, nobody wen undastan dat stuff befo time, cuz was secret. ²⁰ I jalike Godʼs messenja guy fo tell da Good Kine Stuff Bout Christ, no matta I stay all chain up. Pray dat I goin tell da Good Stuff, an no be scared, jalike I suppose to.

Aloha To Da Bruddas An Sistas

²¹ Tykicus, he one brudda I get love an aloha fo, an you guys can trus him. He everytime work fo da Boss. He goin tell you guys everyting, so den you guys goin know how I stay, an wat I doing. ²² Dass why I goin send him by you guys, so you guys can know how we stay, an so he can give you guys good kine words.

²³ I like all you bruddas an sistas stay good wit each odda, an stay trussing dat God da Fadda an da Boss Jesus Christ, dey get plenny love an aloha fo you guys. ²⁴ I like God do plenny good kine tings fo all da peopo dat hang in dea wit love an aloha fo our Boss Jesus Christ.