M’Cheyne Bible Reading Plan

Mary Put Perfume On Top Jesus Feet

12 Den six days befo da Passova religious time, Jesus wen go to Betany. Dass wea Lazarus wen stay, da guy Jesus wen make come back alive from mahke. ² So dey wen make one dinna fo Jesus. Marta wen bring da food to da peopo, an Lazarus stay sit by Jesus at da table. ³ Den Mary wen take one pound nard kine perfume dat cost plenny, pour um on top Jesus feet, an den wipe um wit her hair. Den wen smell real good all ova inside da house.

⁴ But Judas Iscariot, one a Jesus guys, da guy dat lata goin set him up fo mahke, he wen say, ⁵ “Eh, how come dey neva sell dis perfume fo three hundred silva coins, an give da money to da peopo dat no mo notting?” ⁶ Da guy, he no mo aloha fo da peopo dat no mo notting, he ony talk lidat cuz he one steala guy. He stay in charge a da money bag fo Jesus dem, an he cockaroach um.

⁷ But Jesus say, “Eh, no bodda her! She wen stash dis perfume fo use um wen dey goin make me ready fo bury.” ⁸ You guys everytime get peopo dat no mo notting wit you. But you guys no goin get me wit you everytime.

Da Main Priest Guys Talk How Dey Can Kill Lazarus

⁹ Dat time plenny Jewish peopo wen find out dat Jesus was dea inside Betany town, an dey wen come fo see him. An not ony him, but Lazarus too. Cuz dey wen hear dat Jesus wen make Lazarus come back alive from mahke. ¹⁰ So da main priest guys wen talk togedda how dey goin kill Lazarus too. ¹¹ Cuz plenny Jewish peopo wen hear bout Lazarus, an see him. Az why dey wen bag dea leadas, an trus Jesus.

Jesus Go Inside Jerusalem Jalike One King

¹² Da nex day, plenny peopo dat wen come Jerusalem fo da Passova wen hear dat Jesus stay coming dea. ¹³ Dey wen cut branches from da palm trees fo wave cuz dey like cheer Jesus, an dey wen go fo meet Jesus. Dey yelling,

¹⁴ Jesus wen find one young donkey an sit down on top um, jalike da Bible say,

¹⁶ Dat time, Jesus guys no can figga all da stuff dat stay happen. But latas, Jesus wen come back alive from mahke an God wen make um come awesome. Den, dey wen rememba dat da Bible wen say all dis tings bout him. An dey wen rememba dat da peopo wen make lidat to him.

¹⁷ Now, all da peopo dat wen stay wit Jesus, da time he wen make Lazarus come back alive from mahke, dey wen tell wat dey wen see. ¹⁸ Dass why plenny peopo wen go outside Jerusalem fo meet Jesus, cuz dey wen hear bout da awesome ting he wen do dat wen show who him. ¹⁹ Den da Pharisee guys tell each odda, “Look! Everybody in da whole world stay going wit Jesus! An us guys no can do notting fo stop um!”

Had Greek Guys Dat Like See Jesus

²⁰ Had some Greek guys dat wen go Jerusalem wit da odda peopo fo da Passova religious time, fo go down an show God love an respeck dea. ²¹ Dey come by Philip, da guy who come from Betsaida town, Galilee side, an dey tell him, “Eh Mista, us guys, we like meet Jesus.”

²² Philip, he go tell Andrew. Den Andrew an Philip, dey go togedda an tell Jesus. ²³ Jesus tell dem, “Time awready fo me, da Guy Dass Fo Real. Now God goin make me come awesome fo real kine! But befo I come awesome, I gotta mahke. ²⁴ An I like tell you guys dis too: I jalike da wheat seed dat gotta fall down inside da groun an mahke, an den can grow, fo make plenny mo seeds. If da seed no mahke, stay ony one seed. ²⁵ Whoeva like hang on to dea life, dey goin lose um. But whoeva give up dea life in dis world, goin hang on to um, an stay live to da max foeva. ²⁶ Whoeva like be my helpa gotta go wit me an be my guy. Wea I stay, my helpa guy goin stay dea too. An my Fadda goin show respeck to dat helpa guy.”

Jesus Tell How He Goin Mahke

²⁷ Den Jesus tell, “Right now I feel all funny kine inside. Wat I goin say? ‘Fadda, no let me mahke right now’? No way I goin say dat! Dass why I wen come hea, so I can mahke. ²⁸ I say dis: ‘Fadda, let um happen, so everybody can know how awesome you stay.’ ”

Den one voice from da sky wen say, “I wen show dem I stay awesome awready, an I goin show um one mo time.”

²⁹ Da peopo dat wen stand dea an hear um, wen say, “Eh! Get thunder!”

Da odda peopo wen say, “Nah, az was one angel messenja guy from da Boss dat wen talk to him.”

³⁰ Jesus tell dem, “Dis voice not fo me, but fo you guys. ³¹ Now da peopo inside dis world goin stand in front God da Judge, an God goin throw out da Bad Guy dat stay in charge a da peopo all ova da world. ³² Wen dey lift me up from da groun fo kill me, den I goin bring everybody by me.” ³³ (He wen say dat fo show dem how he goin mahke.)

³⁴ Da peopo tell him, “We wen hear from Godʼs Rules dat da Christ Guy goin live foeva. Den how come you say, ‘Dey goin take me, da Guy Dass Fo Real, an lift me up from da groun fo kill me’? Who dis Guy Dass Fo Real dat you talking bout?”

³⁵ Jesus wen tell dem, “Me, I jalike da light fo you guys. Ony litto wile mo da light goin stay hea wit you guys. Live da right way now wen get light still yet, cuz no good da dark pio da light you get inside you. Whoeva walk aroun inside da dark, dey donno wea dey going. ³⁶ Right now, I stay hea wit you guys. I jalike da light fo you guys. So go trus me. Den you guys can come da kine peopo dat know wea dey going cuz dey get da light inside.”

Jesus say dat. Den he go way from da peopo so he can stay by himself.

Da Jewish Peopo No Trus Jesus

³⁷ No matta Jesus wen do plenny awesome stuff in front da peopo fo show who him, dey still yet no trus him. ³⁸ Jalike da guy Isaiah wen say, dat wen talk fo God long time ago,

³⁹ Az why da Jewish peopo no can trus God nowdays, jalike Isaiah wen say one nodda time,

⁴¹ Isaiah wen say dat cuz he wen see how awesome Jesus stay, an he wen tell wat goin happen wit Jesus.

⁴² Plenny Jewish main leada guys wen trus Jesus, but dey no like tell everybody, cuz dey scared da Pharisee guys goin throw um outa da Jewish church. ⁴³ Cuz da leada guys, dey like da peopo talk good bout dem, mo den dey like God talk good bout um.

Wat Jesus Say Show Wat Kine Peopo Dem

⁴⁴ Jesus wen talk loud an say, “Whoeva trus me, he no trus ony me, but he trus da One dat wen send me hea too. ⁴⁵ Whoeva see me, he see da One dat wen send me hea too. ⁴⁶ I wen come jalike da light inside da world, so dat whoeva trus me, dey no goin stay dark inside. ⁴⁷ Whoeva hear wat I say an no do um, I no goin punish dem. I neva come fo punish da peopo inside da world. Me, I wen come fo take um outa da bad kine stuff dey doing. ⁴⁸ Whoeva no take me an wat I say, dat guy goin get one nodda judge. In da end time wen da world goin pau, all da stuff I wen say goin show how dat guy stay. ⁴⁹ Cuz I neva talk by myself, but my Fadda who wen send me wen tell me everyting he like me fo say. ⁵⁰ I know dat wat da Fadda tell us fo do show everybody how dey can come alive foeva fo real kine. So everyting I say, dass jalike my Fadda wen tell me.”

Now Jalike You Guys Wen Come Back Alive

2 An wit you guys, same ting you know. Befo time, you guys was cut off from God, jalike you stay mahke inside, cuz everytime you guys go agains da Rules God wen make, an same time you guys stay doing all da bad kine stuff. ² Wen was dat time, you guys wen go make jalike all da odda peopo all ova da world. You guys wen like listen to da Bad Guy, I talking bout da guy dass da leada fo all da bad kine spirits up inside da sky. An you guys wen like go do wat he wen tell you guys fo do. Az da same spirit dat go make peopo go tink fo go agains wat God say. ³ An you know wat? All us guys dat time was acking same ting, jalike da peopo dat go agains God. Everyting our body wen like do, we wen go do um. Wateva we wen feel, an wateva we wen tink, we jus go do um. Inside we was jalike da odda peopo. But God neva take da kine tings we was doing.

⁴ Plus, but you know wat? God give us everytime choken chance! He get choke love an aloha fo us guys! ⁵ No matta us guys was cut off from God, jalike we stay mahke inside awready, cuz we wen go agains da Rules God wen make, God wen go make his Spesho Guy Christ come back alive. Dass jalike same time he wen go make us guys come back alive too. He wen like do plenny fo all you guys. Dass why he hemo you guys from da bad kine stuff you guys stay doing. ⁶ God wen make us guys jalike we wen come alive togedda wit Christ. God wen give us our own place, an he goin make us guys come kings bumbye wit Jesus up dea inside da sky, cuz we stay tight wit his Spesho Guy Jesus Christ. ⁷ God wen do all dat fo show proof, even afta dis world pau, dat he wen go all out fo do plenny good stuff fo kokua us, cuz a wat Jesus Christ wen do.

⁸ God like do plenny fo you guys, cuz dass how he stay. He like hemo you guys from da bad kine stuff you guys stay in, if you guys trus God strait out. No mo notting you guys can do by yoaself. God make lidis fo you guys. Dass jalike one spesho present God get fo you guys. ⁹ Da tings you do by yoaself, eh, no talk big, cuz no worth notting. ¹⁰ God da One wen make us guys how we stay now. He wen make us stay tight wit Jesus Christ, so now us guys can do good kine stuff. Even befo he wen make us, he wen make ready all da plans fo us guys fo do all dose good tings.

We Stay Tight Wit Christ

¹¹ So den, you guys dat no mo Jewish blood, rememba how you was befo time. Wen you guys wen born, you guys neva was Godʼs peopo. Da Jewish guys, dey get da cut skin mark dat peopo give um from small baby time, dat fo show dat dey Godʼs peopo, an dey da ones dat call you guys “da guys dat no mo da mark.” ¹² Dat time Christ was notting to you guys. You guys no mo da right fo be one Israel citizen dat time. Wen God wen make one promise dat he goin make one deal fo his peopo bumbye, dat deal no was fo you guys. Same time you guys stay hea inside da world, but you guys neva know God. Az why you guys neva stay shua dat someting good goin happen to you guys bumbye. ¹³ Dat time you guys no stay close wit God. But now, you guys stay tight wit Jesus Christ. Jesus wen go bleed an mahke fo you guys, fo make you guys come tight wit him. Az why you guys stay close wit God.

¹⁴ Befo time, jalike us Jewish peopo an da odda peopo wen build one wall dat neva let us guys go close to each odda. But Christ, wen he wen go mahke on top da cross, dass jalike he wen bus down dat wall. Christ da guy wen go make everyting good fo all us guys, so da Jewish peopo an da odda peopo no need go agains each odda no moa. He wen go make dem jalike ony one peopo. ¹⁵ Wen Christ wen mahke, he wen wipe out da power from da Jewish Rules dat tell da peopo wat dey gotta do. Now, he make da Jewish peopo an da odda peopo come tight wit him togedda. Dey come jalike one new peopo, an dey make good wit each odda. ¹⁶ Christ wen like do dis: he like make da Jewish peopo an da odda peopo jalike dey one peopo, an bring um back da same side wit God. Wen Christ wen mahke on top da cross, he wen wipe out everyting dat wen make da peopo go agains each odda. ¹⁷ Christ wen go by you guys dat no stay close to God befo time, an by da peopo dat stay close to him. An he wen tell all you guys dis Good Kine Stuff From God. He say, “Now you guys can make good wit each odda!” ¹⁸ Cuz a wat Christ wen do, both you guys an us Jewish guys get da same Spirit. Dass why all us guys get da right fo go talk to our Fadda.

You Guys, One Spesho Temple Fo Da Boss

¹⁹ So! You guys dat not born Jewish, you guys wen stay outside, but now no stay lidat. Now you guys stay spesho fo God too, an you guys inside Godʼs ohana. ²⁰ Jalike God wen build one house. Da guys he wen send all ova fo tell peopo da Good Stuff bout him, an da guys dat wen go talk fo him, dey jalike da foundation. An you guys, jalike he build you guys togedda on top um. An Jesus Christ, he jalike da corner block. ²¹ Da whole house line up real good cuz a Christ. An dat house coming one temple dat stay spesho fo da Good Boss. ²² Plus, you guys stay tight wit Christ, So jalike God wen build you guys togedda fo come one house wea Godʼs Spirit stay inside.