M’Cheyne Bible Reading Plan
Da Police Guys Grab Jesus
18 Wen Jesus wen pau pray, he wen go ova da Kidron Stream wit da guys he teaching, an dey wen go inside one garden wit trees. 2 Judas, da guy who wen set Jesus up fo mahke, wen know da place, cuz Jesus wen go ova dea plenny times befo wit his guys. 3 Da main priest guys an da Pharisee guys wen let Judas take dea army guys an police guys wit him. So Judas dem go to da garden, an dey all wen go dea togedda, wit lanterns an torches an swords.
4 Jesus wen know all da stuff dat going happen to him, so he wen go by dem an aks dem, “Who you guys looking fo?”
5 Dey tell him, “Jesus, da guy from Nazaret.”
He tell dem, “I da guy.” Judas, da guy who wen set him up fo mahke, was right dea wit dem. 6 An you know wat? Wen Jesus wen tell dem, “I da guy,” dey wen back up an wen fall down on top da groun.
7 He wen aks dem again, “Who you looking fo?”
Dey tell, “Jesus, da guy from Nazaret.”
8 Jesus tell um, “I wen tell you, I da guy. If I da guy you looking fo, den let dese odda guys go.” 9 He wen say dat fo make wat he wen say befo come true, “Fadda, Da guys you wen give me, I neva lose dem, not even one guy.”
10 Simon Peter, he get one sword. He pull um out an wack one guy dat work fo da Head Priest, an cut off his right ear. Da worka guyʼs name was Malkus. 11 Jesus tell Peter, “Put back yoa sword! My Fadda say I suppose to suffa all dis kine stuff, an dass wat I goin do! Jalike he give me one cup full wit da bitta kine stuff fo drink, an I goin drink da whole ting.”
Jesus an da Head Priest Guy
12 Den da captain, da army guys, an da police guys from da Jewish leada guys wen take Jesus an tie him up. 13 Dey wen bring Jesus by Annas first. He Kaiafas fadda-in-law. Kaiafas, he da Head Priest guy dat year. 14 Kaiafas da guy wen tell da Jewish leada guys befo, “Mo betta fo you guys if one guy mahke fo all da peopo.”
Peter Tell, “I Donno Jesus”
15 Simon Peter wen go wit Jesus. An anodda guy Jesus wen teach go too -- dass me. Now, da Head Priest guy know me. Dass how I wen go inside da Head Priest guyʼs yard togedda wit Jesus. 16 But Peter, he stay outside by da gate. Den me, cuz I Jesus odda guy dat was dea, an da Head Priest guy know me, I wen go outside, talk to da girl dat watch da gate, an bring Peter inside. 17 Den da girl dat watch da gate wen tell Peter, “You one a da guys dat bugga wen teach, yeah?”
Peter say, “No way! I not!”
18 Had odda worka guys an police guys standing dea by one charcoal fire dey wen make, cuz was cold, an dey like come mo warm. An Peter, he wen stand dea too wit da odda guys, fo come warm.
Da Head Priest Guy Aks Jesus Plenny Stuff
19 Den da Head Priest guy aks Jesus bout da guys he wen teach, an wat he teaching dem.
20 Jesus tell him, “I wen talk wea everybody can hear me. Everytime I teach inside da Jewish churches an inside da temple yard. I neva say notting secret. 21 How come you aksing me? Aks da peopo who wen hear me, wat I wen tell dem. Fo shua, dey know wat I wen say.”
22 Afta dat, one police guy who was standing dea wen slap Jesus an say, “Eh! You not suppose to talk lidat to da Head Priest!”
23 Jesus tell him, “If I wen talk bad, tell me wat I wen say was bad. But if was good, how come you wen go slap me?” 24 Den Annas wen send him, all tie up, to da Head Priest guy, Kaiafas.
Peter Say He Donno Jesus One Mo Time
25 Simon Peter, he still yet stay standing by da fire fo come warm. Da odda guys standing dea tell him, “Eh! You one a da guys Jesus wen teach, yeah?”
Peter say, “No way! I not!”
26 Had one nodda guy dea dat work fo da Head Priest an was ohana to da guy dat Peter wen cut off his ear. Da guy tell, “Eh! Dat was you inside da garden wit him, yeah?”
27 One mo time Peter wen say, “No way! Not me!” Right den an dea, da roosta wen make noise.
Jesus an Pilate
28 Den da guys dat work fo da Head Priest take Jesus away from Kaiafas place to da Rome army headquarters. Was early in da morning. But dey neva go inside da Rome guys place, cuz if dey do dat, bumbye dey no can eat da spesho food fo da Passova cuz jalike dey pilau. 29 Den Governa Pilate wen go outside wea da Jews stay. He aks dem, “Wat you guys get agains dis guy?”
30 Dey tell him, “If da bugga no was one crook, us guys no goin turn him ova to you.”
31 Den Pilate tell dem, “Take him den an judge him jalike how yoa Rules say you gotta do.”
Da priest guys tell Pilate, “Us guys no can do dat, cuz us guys no mo da right fo kill nobody da Rome way, on top one cross.” 32 Wen dey say dat, da ting Jesus wen say befo wen come true. He wen tell his guys awready dat he goin mahke da Rome way on top one cross.
33 Den Pilate go back inside da army headquarters, an he tell Jesus fo come inside, an tell him, “Eh, you! You da King fo da Jews, o wat?”
34 Jesus tell him, “Dass wat you figga yoaself? O odda peopo wen tell you dat bout me?”
35 Pilate tell, “Me? You tink I one Jew? Dass was yoa own peopo an da main priest guys wen bring you to me. Wat you wen do?”
36 Jesus tell, “I not da kine king from dis world. If I was dat kine king, den my guys goin fight so da Jews no can take me. I one king, but no mo nobody hea inside dis world wen make me one king.”
37 Pilate aks him, “So, you one king den?”
Jesus tell him, “You wen say I one king. Az why I wen born, an az why I wen come hea inside da world -- so I can tell everyting dat I know bout da true stuff. Everybody dat stick wit da trut, dey listen to me.”
38 Pilate aks him, “Wat da trut?”
Dey Say, Jesus Gotta Mahke
Wen Pilate wen say dat, he wen go back outside to da Jews, an he tell dem, “I no find notting wrong wit dis guy. 39 But you guys get dis ting wea I suppose to let one guy go at da Passova time. So, you guys like me let go da King fo da Jews, o wat?”
40 Dey all yell an say, “Not dis guy! We like Barabbas!” Now, Barabbas, he was one mean crook guy.
Get Da Same Kine Heart An Head
2 You know, cuz us guys stay tight wit Godʼs Spesho Guy Christ, he give us plenny good kine words. He show love an aloha fo us guys, so we no need stay sore inside. Godʼs Spirit help us all come togedda. An we all feel aloha an pity fo each odda deep inside. 2 Dass how stay, yeah? So! You know how you guys can make me feel real good inside? All you guys, try tink bout tings da same way. Try get da same kine love an aloha fo each odda, an da same kine heart an head. 3 No go do stuff cuz you tink you mo betta den da odda guys, o cuz you like make big show. Mo betta, figga peopo lidis: da odda peopo get tings dey can do mo betta den you. No get big head. 4 No good you ony tink bout da tings you tink stay importan -- make shua you tink bout da tings da odda peopo tink dat stay importan too.
One Song Bout Christ
5 All you guys, tink lidis, jalike Jesus Christ.
6 Jesus, he everytime stay jalike God.
But no matta,
he neva tink he gotta go hang on to dat.
7 He let um all go,
so he can make himself one poor worka guy,
an come jalike peopo.
Wen da peopo see him,
dey figga he jus one guy.
8 He wen make himself jalike he no stay importan.
He wen do everyting God say,
even if he gotta go mahke.
An not jus regula kine mahke, you know.
Was mo worse, on top one cross.
9 Dass why God make Jesus da main Guy.
He wen give him one spesho name,
Fo tell wat kine guy him.
Cuz he mo importan den all da big name guys!
10 So everybody, wen dey find out wat kine guy Jesus,
dey goin go down on dea knees in front him.
Everybody up dea inside da sky,
An all ova da world,
An undaneat da groun!
11 Wit dea mout, everybody goin tell,
“Jesus Christ, da Spesho Guy God Wen Send,
He da Boss!”
Cuz a dat, peopo goin say,
“God da Fadda, he awesome fo shua!”
Us Guys Shine Jalike Da Stars, Hea Inside Da World
12 So den, my good friends, you guys everytime stay doing wat God wen tell you guys. Wen I wen stay wit you guys, you guys wen make lidat. An now, wen I no stay wit you guys, you guys stay doing um even mo plenny. Do everyting you guys gotta do, cuz God stay taking you guys outa da bad kine stuff, an do um jalike you guys stay scared an shaking in front God. 13 God, you know, he da One making you guys so you like do da tings dat he like, an helping you guys fo go do um.
14 Everyting you guys do, no grumble, no make argue. 15 Den nobody can poin finga you guys, cuz you guys ony do good kine stuff. Afta all, you guys Godʼs kids! Everybody all aroun you guys stay crooked an all mess up. But you guys, you diffren. You everytime do wass right, hea inside da world. Dass jalike da stars dat shine no matta stay dark all ova. 16 You guys tell everybody da tings God wen tell you, dat can make peopo come alive inside fo real kine. Dat goin make me so proud a you guys bumbye wen Jesus goin come back! Wen dat happen, den I goin know dat da hard work I wen do, no was fo notting! An da race I wen run, no was wase time! 17 Da way you guys trus God, he like. Dass jalike you making one spesho sacrifice fo him. Same ting wit me -- even if da odda peopo make me bleed an mahke, dass jalike pouring wine on top da sacrifice you guys stay making. I feel real good inside bout dat, an bout wass happening wit you guys too! 18 Same ting wit you guys. You guys can feel good bout wass happening to me.
Timoty
19 Pretty soon I like send Timoty by you guys, if dass wat da Boss Jesus like. I like find out how you guys stay, an wat you guys doing. Dat goin make me feel good inside. 20 Timoty, he da ony guy ova hea by me dat tink bout tings jalike me. Fo real kine, he goin tink plenny how fo kokua you guys. 21 You know, all da odda peopo ova hea, dey all figga dea own stuff mo importan -- dey no tink dat doing stuff fo Jesus Christ da mos importan. 22 An you guys know wat kine guy Timoty -- you know he get da stuff fo do da job. Him an me, we work togedda fo tell da Good Kine Stuff From God. Jalike he my boy, an I his fadda. 23 Dass why he da guy I like send. I goin send him right afta I find out wass goin happen to me. 24 I stay shua I goin go by you guys pretty soon, cuz dass wat da Boss like.
Epafroditus
25 I tink I gotta send Epafroditus back by you guys. He one brudda fo real kine, an he work an struggle wit me. You guys wen send him ova hea fo tell me how you guys stay, an fo kokua me wateva I need, cuz he stay working fo God. 26 He tink plenny bout all you guys. Bodda him plenny dat you guys wen hear he stay sick. 27 Da guy was sick fo shua -- he litto mo mahke. But God wen get pity fo him, an give him chance fo make um come good. An God wen get pity fo me too, so I no come all sore inside -- afta all, I stay plenny sore inside awready. 28 Dass why I really like send him back ova dea. Wen you guys see him again, you guys goin feel good inside, an den, I no need worry notting. 29 So, show him plenny aloha, an take him in, cuz you guys stay tight wit da Boss. You guys can feel good inside bout da guy. You guys gotta figga, anybody dat do wat Epafroditus wen do, gotta show um plenny respeck. 30 He wen go work fo Christ. Dass why he litto mo mahke. He wen do all da kine stuff dat you guys neva can do fo kokua me, an neva bodda him if he mahke. He wen chance um.
Copyright © 2000 by Wycliffe Bible Translators International. All rights reserved