M’Cheyne Bible Reading Plan

Jesus Talk to Nicodemus

3 Had one Pharisee guy. His name Nicodemus, an he was one leada fo da Jewish peopo. ² One nite he wen go by Jesus an tell him, “Teacha, we know dat you one teacha who come from God, cuz nobody can show us da kine awesome stuff dat you doing, if God no stay wit him.”

³ Jesus tell him, “Dass right! An I tell you dis too: Whoeva not born again Godʼs new way, dey no goin get God fo dea King.”

⁴ Nicodemus tell him, “How one old guy can get born again? No way he can go inside his mudda one mo time an get born!”

⁵ Jesus tell him, “Dass right! An I tell you dis too: Whoeva not born again from water an from Godʼs Spirit, dey no can get God fo dea King. ⁶ Peopo born from peopo, an peopoʼs spirit born again from Godʼs Spirit. ⁷ Eh, no let um blow yoa mind, jus cuz I tell you, ‘You guys gotta born again Godʼs new way.’ ⁸ Da wind blow hea an dea. You can hear um, but you donno wea da wind wen come from o wea going. Dass jalike everybody dat born again from Godʼs Spirit.”

⁹ Nicodemus go aks him, “How can be?”

¹⁰ Jesus tell him, “You da main teacha fo da Israel peopo, an you no undastan dis stuff? ¹¹ Fo shua, I tell you dis too: I know wat I talking bout. I wen see da stuff I telling. But you guys, you still no like trus wat I tell you. ¹² Wen I tell you guys bout stuff down hea inside dis world, you guys no believe me. Den how you guys goin believe me if I tell you guys bout da stuff up dea wea God stay inside da sky? ¹³ Nobody wen eva go up inside da sky. Ony me, da Guy Dass Fo Real, I wen come down from da sky.

¹⁴ “You know, long time ago inside da boonies, Moses wen put one snake on top one stick so everybody can see um an come good. Da same ting gotta happen to me, da Guy Dass Fo Real. Dey goin put me on top one cross, ¹⁵ so dat everybody who stay trus me, can get da real kine life dat stay to da max foeva.

¹⁶ “God wen get so plenny love an aloha fo da peopo inside da world, dat he wen send me, his one an ony Boy, so dat everybody dat trus me no get cut off from God, but get da real kine life dat stay to da max foeva. ¹⁷ You know, God neva send me, his Boy, inside da world fo punish da peopo. He wen send me fo take da peopo outa da bad kine stuff dey doing. ¹⁸ Whoeva stay trus me, God no goin punish dem. But whoeva no trus me, garans God goin punish dem, cuz dey neva trus me, Godʼs ony Boy.

¹⁹ “God wen send da light inside da world. Da light show everybody how dey stay inside. But da peopo like stick wit da dark an dey hate da light, cuz dey stay do bad kine stuff. Dass why God goin punish da peopo. ²⁰ Everybody dat stay do bad kine stuff hate da light, an no like let da light shine on top dem, cuz dey no like nobody know bout da bad kine stuff dey doing. ²¹ But whoeva stay do wat da true stuff say fo do, dass jalike dey like let da light shine on top dem, fo show everybody dat everyting dey do, dass wat God say fo do.”

Jesus an John Da Baptiza Guy

²² Afta dat, Jesus an da guys he teaching wen go Judea side. He wen stay wit dem ova dea an wen baptize peopo. ²³ Da same time John stay baptize da peopo Enon side, near Salim, cuz had plenny water ova dea. Da peopo stay come by John an he stay baptize dem. ²⁴ You know, dis wen happen befo dey throw John inside da jail.

²⁵ Now, had one Jewish guy wen make argue wit da guys John stay teaching. Dey make argue bout how dey gotta wash demself befo dey can pray. ²⁶ So dey go by John an tell um, “Teacha, you know da guy dat wen stay by you ova dea, da odda side da Jordan River, an you wen tell us bout him? Look! Everybody going ova dea, an he stay baptizing um.”

²⁷ John tell um, “Nobody can get anyting, ony wat God in da sky give um. ²⁸ You guys, you wen hear me say, ‘I not da Christ, da Spesho Guy God Goin Send, but God wen send me first, befo him.’

²⁹ “Da groom, he da guy dat get da bride. Da bes man, he standing dea, an he stay real good inside wen he hear da groom talking. I jalike da bes man, an Jesus, jalike da groom. Dass why I stay real good inside. ³⁰ He gotta come mo importan den me, cuz I not dat importan.”

Da Guy From Up Dea Come Down

³¹ Da One who come from up dea wea God stay inside da sky, he mo importan den anybody. Da guy who come from down hea on top da earth, he jalike all da peopo hea on top da earth, an he talk bout da kine stuff from down hea. Da guy from up dea wea God stay inside da sky, fo shua he mo importan den all da peopo. ³² He tell wat he wen see an hear, but nobody trus wat he say. ³³ But whoeva take wat da One from up dea say, dat guy show dat God tell da trut. ³⁴ Da guy dat God wen send tell wat God say, cuz God no hold back wen God give him his Spirit. ³⁵ Da Fadda get plenny love an aloha fo his Boy. He wen give him da power ova everyting. ³⁶ Whoeva stay trus Godʼs Boy, dey get da real kine life dat stay to da max foeva. But whoeva no trus Godʼs Boy, an no do wat he say, dey no goin get dat kine life, cuz God no take wat dey do.

Paul See Someting Jalike One Dream

12 I gotta talk big, no matta talking big goin poho. I goin tell bout da stuff I wen see dass jalike one dream, an wat da Boss wen show me. ² I know one guy dat stay tight wit Christ. Fourteen years ago somebody wen bring him up inside da mos high part a da sky. I donno if he wen stay inside his body o outside his body, but God know. ³ I know dat guy, no matta he inside o outside his body, ⁴ somebody wen take him up dea inside Godʼs Beautiful Place. He wen hear stuff dass too awesome fo talk bout, stuff dat nobody can talk bout. ⁵ I goin talk big bout dat kine guy, but I no goin talk big bout me. Ony da kine stuff I no can handle, I goin talk big bout dat. ⁶ Even wen I like talk big, dat not stupid you know, cuz I ony tell da trut. But I no goin talk big, so dat nobody goin tink I mo betta den how dey see me ack o hear wat I say, ⁷ o hear all da awesome stuff God wen show me. But so dat I no get big head, I get one ting dat stay jalike one messenja from da Devil, jalike one sharp thorn inside my body. Dat ting make me suffa plenny. ⁸ Three times awready I wen beg God da Boss fo take dis ting away from me. ⁹ But he wen tell me, “I do plenny good tings fo you, an dass all you need. My power mo strong inside you wen you no can handle trouble yoa own self.” Dass why I goin talk big even moa, cuz get plenny stuff I no can handle. Dass how Christʼs power goin stay wit me. ¹⁰ So den, no bodda me. I still feel good inside, wen I no can handle, an wen dey try make me shame, an wen I get hard time, an wen dey make me suffa, an wen I get plenny presha. All dis cuz I Christʼs guy. Wen I no can handle, den I get da power fo come mo strong an den I can handle, cuz a him.

Paul Tink Bout Da Bruddas An Sistas Inside Corint

¹¹ You guys wen ack jalike God neva send me. Dass why I wen talk jalike one lolo head guy. But den, mo betta you guys talk good bout me. No matta I notting, dese unreal guys dat say God wen send dem, dey not mo betta den me. ¹² Everytime God send one guy fo tell peopo bout him, da guy do awesome an unreal stuff wit power, fo show proof God wen send um. Kay den, I wen do all dat wen I wen stay wit you guys, an I wen hang in dea fo you guys. ¹³ Ony one ting I neva let you guys do dat da church guys from odda places wen do: I neva bodda you guys fo let you kokua me. So no stay mad at me if dass wrong.

¹⁴ Eh, dis da numba three time I stay ready fo go by you guys. I no need you guys fo kokua me. I no like da stuffs you guys get, but I ony like you guys. You know, da kids not suppose to stash stuffs fo dea mudda an fadda guys, but da mudda an fadda guys suppose to stash stuffs fo dea kids. So I no need you guys stash stuffs fo me, cuz you guys jalike my kids! ¹⁵ An you know, I like give wateva I can fo you guys, an I like give myself so you guys can live too. If I get plenny love an aloha fo you guys, dat mean you goin get ony litto bit love an aloha fo me, o wat? ¹⁶ But you guys know dis: I neva bodda you guys wit notting. But den you guys wen tink, I one sly bugga, an wen bulai you guys! ¹⁷ You tink I wen send da odda guys fo rip you guys off, o wat? ¹⁸ I wen tell Titus fo go by you guys, an I wen send da odda brudda wit him. An den, you tink Titus wen rip you guys off? Not even! Me an Titus, we do da same kine tings cuz we tink da same way, you know.

¹⁹ Eh, you guys was tinking long time we ony talking fo ourself, yeah? Everyting us guys say, God know, cuz we no can hide notting from him, an we stay tight wit Christ. We get plenny love an aloha fo you guys. Az why everyting we stay doing, we do um fo make you guys mo strong inside. ²⁰ I scared dat wen I come ova dea, maybe I goin see dat you guys no stay how I like. I scared you guys stay squawk at each odda, you guys stay jealous, you guys stay huhu, you guys ony tink bout yoa own self, you guys talk any kine bout each odda, you guys talk stink bout da odda guy, you guys get big head, an everyting goin be all jam up. An maybe you guys goin see dat I no stay how you guys like. ²¹ I scared dat wen I come ova dea, God goin make me get plenny shame in front you guys, an I goin make plenny peopo stay real sad inside, cuz get plenny guys dat wen do da bad kine stuff befo, an still yet dey not sorry, an dey neva like change demself notting. Dey stay pilau inside. Dey fool aroun. Dey like make any kine to anybody an no mo shame.