M’Cheyne Bible Reading Plan
Jesus Make One Guy See Dat Wen Born Blind
9 Afta dat Jesus was walking, an he spock one guy dat wen born blind. 2 Da guys Jesus stay teaching wen aks him, “Eh, Teacha! Who wen do bad kine stuff, dis guy o his mudda an fadda? Az why he wen born lidat, yeah?”
3 Jesus tell dem, “Not even him o his fadda o mudda. Az not why he wen born blind. He wen born lidat so dat everybody can see da awesome stuff God goin do fo da guy. 4 God wen send me hea. We gotta do da kine stuff he tell us fo do now wen still get light. Bumbye nite time come, an den nobody can work. 5 I stay inside da world now, an I jalike da light fo da peopo all ova da world.”
6 Afta Jesus say dat, he wen spit on top da dirt, an make some mud. Den he take some a dat an put um on top da guyʼs eyes. 7 Den Jesus tell him, “Go, wash yoa face inside da Siloam water place.” Now, Siloam mean, “Dey Send Water Dea.” So da guy go ova dea an wash his face, an wen he go home, he can see!
8 So da peopo dat stay live near da guy, an da oddas dat wen see him beg befo, dey say, “Eh, dis da guy dat wen sit an beg befo, yeah?”
9 Some peopo say, “Yeah, he da guy!” Odda peopo say, “Nah! He ony look like him.”
But da guy say, “Yeah! I da guy!”
10 So dey aks him, “How come you can see now?”
11 He tell dem, “Da guy Jesus wen make mud, an put um on top my eyes, an tell me, ‘Go da Siloam water place an wash.’ So I wen go an wash, an den I can see!”
12 Dey aks him, “Wea he stay?”
He say, “I donno.”
Da Pharisee Guys Check Out Da Guy Dat Was Blind
13 Den dey take da guy dat was blind to da Pharisee guys. 14 Now, dat was da Rest Day wen Jesus wen make da mud an make da guy see. 15 So da Pharisee guys wen aks him, “Eh, how come you can see?”
Da guy tell dem, “He wen put mud on top my eyes, an I wen wash, an den I can see!”
16 Den some a da Pharisee guys say, “Dis guy no can come from God, cuz he do stuff he not suppose to do on da Rest Day.” But odda Pharisee guys say, “Nah! How can one bad kine guy do da kine awesome stuff dat show who him?” An dey wen argue wit each odda.
17 So dey aks da guy dat was blind one mo time, “Eh, wat you say bout da guy dat wen make you see?”
Da guy say, “He one talka fo God.”
18 Da Jewish leada guys neva believe dat da guy wen stay blind befo he wen see. So dey wen send guys fo bring his mudda an fadda. 19 Dey aks da mudda an fadda, “Dis yoa boy? You say he wen born blind? How come he can see now?”
20 Da mudda an fadda say, “Yeah, dis our boy. An he wen born blind. 21 But we donno how come he can see now, o who da guy wen make him see. Go aks him. He old nuff. He can talk fo himself.” 22 His mudda an fadda guys wen talk lidat, cuz dey scared da Jewish leada guys. Cuz dem guys wen awready talk togedda, an say, “If anybody say dat Jesus da Christ, da Spesho Guy from God, we goin throw him outa da Jewish church.” 23 Dass why his mudda an fadda guys wen say, “He old nuff. Go aks him.”
24 So dey tell da guy dat was blind fo come back one mo time. Dey say, “Eh! Tell da trut in front God! Us guys know fo shua dat dis bugga Jesus, he one bad guy.”
25 Da guy tell dem, “I donno if he one bad guy o wat. But I know one ting: befo I no can see -- now I can see!”
26 Dey aks him, “Wat he wen do to you? How he wen open yoa eyes?”
27 He tell dem, “I wen tell you guys awready, but you guys neva listen. How come you guys like hear um again? You guys like come his guys so he can teach you guys too?”
28 Den dey talk bad to him, an say, “You his guy, an you listen to him. Us guys, we Moses guys, an we ony listen to Moses. 29 We know dat God wen talk to Moses. But dis bugga, we donno wea he come from.”
30 Da guy tell dem, “Wat! Dis blow my mind! You guys donno wea he wen come from, but still yet he wen make me see.” 31 An da guy say, “Now, we know dat God no listen to da bad kine guys. But he listen to da guys dat get respeck fo him an do wat he like.” 32 An da guy say, “Listen! From da time wen God wen make da world till now, nobody eva wen hear dat somebody wen make one guy see dat wen born blind.” 33 An da guy say, “If dis guy neva come from God, den he no can do notting.”
34 Dey tell him, “Eh, you ony do da bad kine stuff from da time you wen born! How come you tink you can teach us guys someting?” Den dey wen throw him outa da Jewish church.
Blind Inside
35 Jesus wen hear dat dey wen throw da guy outa da Jewish church, so he go find da guy, an tell him, “You trus da Guy Dass Fo Real?”
36 Da guy say, “Who him, Mista? Tell me, so I can trus him.”
37 Jesus tell him, “You wen see him awready. Dass me, da guy talking to you.”
38 Da guy say, “Boss, I trus you!” An he go down on his knees in front Jesus.
39 Jesus tell him, “I wen come inside dis world fo show who do da bad kine stuff. Bumbye da guys dat no can see, goin see, an da guys dat can see goin come blind.”
40 Had some Pharisee guys dea dat wen hear dat. Dey aks Jesus, “Eh! You tink we no can see too?”
41 Jesus tell dem,“If you guys no can see, den nobody can poin finga you guys. But you guys say dat you guys can see. Dass why God poin finga you guys.”
Christ Wen Let Us Go
5 Christ wen let us go, so we no gotta do wat da Rules say fo get um right wit God. So den, hang in dea an be strong. No let dem buggas pile up all kine rules on top you guys again.
2 Listen! Dis me Paul, talking to you guys. If you guys let dem cut skin an make you guys come Jews, cuz dey tell you guys dat you can get um right wit God lidat, den Christ no goin help you guys, notting. 3 Now I goin tell everybody one mo time: Whoeva cut skin so dey get um right wit God, dey gotta do everyting da Rules say fo come good. 4 You guys dat like do wat da Rules say fo try get um right wit God, you guys wen split from Christ, an make yoaself so you no can get all da good stuff he like do fo you guys. 5 Us guys, not like you guys. We trus God, dass why we wait fo him fo make us get um right wit him, cuz we know dat Godʼs Spirit goin help us. 6 Wen we stay tight wit Jesus Christ, no matta cut skin o no cut skin, main ting, we gotta trus God, an show plenny love an aloha fo God an da peopo.
7 You guys was doing real good. Who wen mess you guys up so you no listen to da trut? 8 Dat kine stuff you guys listen to now, dat no come from da Boss, who wen tell you guys fo come by him an be his guys. 9 Dat kine stuff dey teach, dat start small an den come big an mess up you guys, jalike litto bit yeast inside da bread dough make da whole bread come big. 10 Cuz I trus da Boss, I shua dat you guys no goin tink anodda way. But da bugga dat stay bodda you guys, God goin punish him, no matta who him.
11 Eh, bruddas an sistas, if I still yet wen teach dat we gotta cut skin, den no goin bodda nobody, cuz den Jesus neva need mahke on top da cross. So if I wen teach lidat, den how come dem buggas make me suffa? Cuz I stay teach dat Jesus wen mahke so peopo can come right wit God. An dat bodda dem buggas. 12 Dem buggas dat stay bodda you guys fo go cut skin, why dey no go chop um all off?!
13 Eh, bruddas an sistas, God wen let you guys go, but dat no mean you can make any kine how you like. Mo betta, kokua each odda, cuz you guys get plenny love an aloha fo each odda. 14 Da Bible say, “Get love an aloha fo da odda guy, jalike you get love fo yoaself.” If you guys do dat, den you goin do everyting Godʼs Rules say. 15 But if you guys go beef wit each odda, an eat up each odda jalike wild animals, den watch out, cuz you guys goin wipe out each odda.
Wat da Spirit Do, an Wat da Body Do
16 But I like tell you guys dis: Stay tight wit Godʼs Spirit, an you guys no goin do da kine stuff you like do jus cuz you peopo. 17 Cuz Godʼs Spirit no can take da kine stuff yoa body like do, an da body no can take da kine stuff Godʼs Spirit like do. Dey stay agains each odda. So den, you guys no can do da kine stuff you like do. 18 So, if you guys listen to Godʼs Spirit, den you guys no gotta do wat da Rules say fo get um right wit God. 19 Da bad kine stuff dey like do jus cuz dey peopo stay clear: dey like fool aroun anybody, even anodda guyʼs wife o husban, an do any kine pilau stuff. Dey no shame. 20 Dey go down an pray in front da idol kine gods. Dey put kahuna on top odda peopo. Dey hate odda peopo. Dey like make argue. Dey no like if da odda guy mo importan den dem. Dey get huhu. Dey ony tink bout demself. Dey everytime tink diffren an like split up da bruddas an sistas. 21 Dey like get da odda guyʼs stuffs. Dey everytime get drunk an party up, an all dat kine stuff. I telling you guys, jalike I wen tell you befo time, da peopo dat make lidat, dey no goin get God fo be dea King.
22 But if we stay tight wit Godʼs Spirit, he give us plenny love an aloha fo everybody. He make us guys stay good inside. He make our hearts rest inside. He help us wait fo da odda guy an stay cool. He help us tink good bout da odda peopo, an like do good kine stuff fo dem. He help us do wat we promise. 23 He help us make nice to peopo an do um wit good kine heart. He help us stay in charge a ourself. No mo rules dat say you no can do all dat kine stuff. 24 Everybody who Jesus Christʼs guy, dey no goin do all da kine bad stuff dey like do jus cuz dey peopo. Jalike dey wen put all dat kine stuff on top da cross wit Jesus Christ, an dat stuff no mo power ova dem. 25 If we stay tight wit Godʼs Spirit, den we everytime gotta let him stay in charge a us. 26 No get big head. No try make da odda guy beef. No try be mo betta den da odda guy.
Copyright © 2000 by Wycliffe Bible Translators International. All rights reserved