M’Cheyne Bible Reading Plan

Jesus an His Bruddas

7 Afta dat, Jesus go aroun inside Galilee. He neva like go aroun inside Judea, cuz da Jewish leada guys ova dea stay looking fo him, fo kill him. ² Now, almos time fo da spesho religious time, wen da Jewish peopo rememba da time dea ancesta guys wen walk all ova da boonies, an stay inside shacks, long time befo. ³ Den Jesus bruddas tell him, “Go way from hea, an go Judea side, so da peopo you wen teach can see da kine stuff you stay doing. ⁴ If one guy like everybody know bout him, he no goin do stuff wea nobody can see him, yeah? You stay doing all dis kine stuff, so, let everybody all ova da place see you doing um!” ⁵ You know, even Jesus bruddas neva trus him.

⁶ Jesus tell dem, “Az not time fo me fo go yet. You guys can go any time. ⁷ Da peopo inside da world, dey no goin hate you guys. But dey hate me, cuz I tell um dat da kine stuff dey stay doing, dass bad kine stuff. ⁸ You guys go Jerusalem fo da spesho religious time. I no going yet, cuz not time fo me fo go.” ⁹ Afta he wen say dat, den he wen stay Galilee side.

Jesus Go Da Spesho Religious Time

¹⁰ But afta Jesus bruddas wen go da spesho religious time, den he wen go too. But nobody know he wen come. ¹¹ Den da Jewish leada guys, dey stay looking fo him at da spesho religious time. Dey wen aks da peopo, “Wea dat bugga stay?”

¹² All da peopo stay talking bout him to each odda. Some peopo say, “He one good guy, you know.” Odda peopo say, “Nah! He bulai da peopo.” ¹³ But nobody talk loud bout him, cuz dey scared da Jewish leada guys.

¹⁴ In da middle a da spesho religious time awready Jesus go inside da temple yard an start fo teach. ¹⁵ Da Jewish leada guys, wen blow dea minds. Dey say, “How come dis bugga know all dis stuff? He neva study wit da odda teachas, you know.”

¹⁶ Jesus tell dem, “Da stuff I teach, no come from me. Come from da One who wen send me. ¹⁷ If anybody like do wat God like um fo do, dey goin know if da stuff I teaching come from God, o if ony come from my own head. ¹⁸ Da guy dat tell stuff dat come from his own head, he ony like make peopo tink he awesome. But if one guy like peopo fo tink dat da one who wen send him stay awesome, dat guy stay telling da trut. He no notting wrong. ¹⁹ Moses wen give you guys Godʼs Rules, but no mo nobody from you guys do wat Godʼs Rules say. So, how come you guys trying fo kill me?”

²⁰ All da peopo say, “Wassa matta you? You get one bad kine spirit in charge a you, o wat? Wat you mean, somebody trying fo kill you?”

²¹ Jesus tell dem, “I wen do one awesome ting, an dat wen blow all you guys minds. ²² Moses wen give you guys da Rule fo cut skin on day numba eight afta one baby boy wen born, an you guys do um fo one baby boy, no matta da Rest Day. (You know, our ancesta guys wen do dat long time befo Moses. No was Moses dat wen give um da Rule first time.) ²³ Now, if you guys can cut skin on one guy on da Rest Day fo no broke Moses Rules, how come you guys come huhu wit me cuz I wen make one sick guy come good on da Rest Day? ²⁴ No ack like one judge wen you guys can see ony da outside stuff. If you guys goin ack like one judge, gotta figga um da right way.”

Dis Godʼs Spesho Guy?

²⁵ Den some peopo from Jerusalem wen say, “Eh! Dis da guy dey stay looking fo, cuz dey like kill him, yeah? ²⁶ But, wow! He stay talking hea in front everybody, an nobody tell him fo shut his mout. Wat you guys tink? You tink da leada guys wen figga dat dis guy, he da Spesho Guy God Goin Send, fo real kine, o wat? ²⁷ But us guys, we know wea dis guy wen come from. Wen God send his Spesho Guy Christ, nobody goin know wea he wen come from.”

²⁸ Jesus stay teaching inside da temple yard. Wen he hear dem guys say dat, he talk real strong an say, “You guys tink you know me, an wea I wen come from? I neva come hea by myself, fo do wat I like. Da One who wen send me, he fo real. But you guys donno him. ²⁹ But I know him, cuz I wen come from him, an he wen send me hea.”

³⁰ Den dey wen try fo take him, but nobody wen grab him, cuz not time yet. ³¹ But plenny peopo dat stay dea wen trus him. Dey say, “Wen Christ, Godʼs Spesho Guy come, you tink he goin do mo awesome stuff fo show who him den dis guy? Nah!”

Dey Send Da Police Fo Bus Jesus

³² Da Pharisee guys wen hear all da peopo saying dat stuff bout Jesus. So dem guys an da main priest guys wen send da police guys from da temple fo bus him.

³³ Den Jesus say, “I ony goin stay wit you guys litto bit mo time, an den I goin go back to da One who wen send me hea. ³⁴ You guys goin look fo me, but you no goin find me, cuz wea I going, you guys no can go ova dea.”

³⁵ Den da Jewish leada guys tell each odda, “Wea dis bugga going, an we no can find him? You tink he going by da Jewish peopo inside da Greek towns far away, fo teach da peopo dat talk da Greek language, o wat? ³⁶ Wat he mean wen he say, ‘You guys goin look fo me, but you no goin find me,’ an ‘Da place I goin stay, you guys no can go dea’?”

Da Water Dat Make da Peopo Live

³⁷ On da last day a da spesho religious time, dass da main day, Jesus wen stand up, an talk real loud. He say, “Whoeva stay thirsty, let um come by me fo drink. ³⁸ Jalike da Bible say, ‘Whoeva trus me, dey come alive inside dem. An dey goin help make da odda peopo come alive too, jalike one river dat get plenny water inside um give da kine water fo help da peopo live.’ ” ³⁹ Jesus say dat bout Godʼs Spirit, cuz bumbye da peopo who trus Jesus goin get Godʼs Spirit. Dat time Jesus wen say dat, dey neva get da Spirit yet, cuz God neva make Jesus come awesome yet.

Da Peopo Split in Half

⁴⁰ Plenny peopo wen hear him say dat. An dey say, “Fo shua, dis da Spesho Guy dat goin come fo talk fo God!”

⁴¹ Da odda guys say, “Dis da Christ guy, da Spesho Guy God Wen Send!”

But da odda guys say, “You tink Godʼs Spesho Guy goin come from Galilee? Nah! ⁴² Da Bible say dat da Christ guy goin come from King David ancesta guys, an goin come from Betlehem, wea King David wen live, yeah?” ⁴³ So da peopo wen split in half cuz a Jesus. ⁴⁴ Some guys wen like grab him an bus him, but nobody wen touch him.

Da Jewish Leada Guys No Trus Jesus

⁴⁵ Da police guys wen go back by da main priest guys an da Pharisee guys. An da priest guys wen aks da police guys, “Eh! How come you guys neva bring him hea?” ⁴⁶ Dey say, “Wow! Nobody eva talk like dat guy Jesus!”

⁴⁷ Da Pharisee guys say, “Wat! He wen bulai you guys too? ⁴⁸ You know, no mo leada guys o Pharisee guys dat trus him. ⁴⁹ But dis peopo, dey donno Godʼs Rules, an God goin punish dem!”

⁵⁰ Nicodemus, he one a da Pharisee guys. He da guy wen come fo talk to Jesus one nite befo time. He say, ⁵¹ “Our Rules say, we gotta listen to da guy first, an find out wat he wen do. Den we can figga if he wen do good o bad.”

⁵² Dey tell him, “Wot! You no come from Galilee jalike him! Go check out da Bible. You goin find out dat nobody dat eva talk fo God come from Galilee!”

⁵³ [Den everybody wen go home dea own place.

Do Wat Da Rules Say, O Trus God?

3 You guys from Galatia, yoa head all jam up! Befo time we wen tell you guys strait out da Good Stuff bout how odda guys wen kill Jesus Christ on top da cross an he wen mahke fo us. But now you guys no listen to da true stuff. Somebody wen put kahuna on top you guys, o wat? ² Ony one ting I like you guys tell me: How you guys wen get Godʼs Spirit? Cuz you guys wen do wat da Rules say? O cuz you guys wen trus da Good Stuff From God dat you guys wen hear? Fo shua, cuz you guys wen trus da Good Stuff From God! ³ You guys not tinking, o wat? You guys wen trus Godʼs Spirit in da beginning. But now in da end you guys goin try fo do everyting wit yoa own power? ⁴ All da stuff dat wen happen to you guys -- fo notting? O good fo someting? ⁵ God stay give you guys his Spirit, an he do awesome stuff fo you guys wit his power. You tink he do um cuz you guys do wat da Rules say, o cuz you guys trus da stuff you guys wen hear? ⁶ Jalike Abraham. He wen trus God. Az why God wen say Abraham get um right wit him.

⁷ So den, you guys gotta undastan dis: Da peopo dat trus God, dey jalike Abrahamʼs kids. ⁸ God wen show inside da Bible dat he goin make all da diffren peopos get um right wit him, cuz dey trus God. So God wen tell Abraham da Good Stuff From God way befo time. He say: “Cuz a you, I goin do plenny good stuffs fo all da diffren peopos all ova da world.” ⁹ So den, God goin do plenny good stuffs fo da peopo who trus him, jalike he wen do fo Abraham, da guy who wen trus him.

¹⁰ Whoeva try do everyting da Rules say fo get um right wit God, dey get one kahuna on top dem. Cuz da Bible say, “Everybody who no stay do everyting dat Godʼs Rules say we gotta do, dey get one kahuna on top dem.” ¹¹ Stay clear dat no mo nobody dat do everyting da Rules say. Dass why nobody get um right wit God da way God see um. Cuz God wen say inside da Bible, “Da guy dat get um right wit me cuz he trus me, he da one dat goin live fo real kine.” ¹² You know, if you jus do wat da Rules say, dat no mean you trussing God. God wen say inside da Bible, “Whoeva do everyting da Rules say, dey goin live cuz dey stay do um.” But us guys, we no mo da power fo do everyting da Rules say.

¹³ Christ, he wen pay da price fo cut us guys loose, so we no gotta do everyting da Rules say fo get um right wit God. Dass why now, we no goin get kahuna on top us. Christ wen get our kahuna on top him, cuz da Bible wen say, “Everybody dat dey kill an hang on top one post, dey get kahuna on top dem.” ¹⁴ Christ wen mahke fo pay da price fo us guys, so dat all da diffren peopos all ova da world can get da good stuff God wen promise Abraham, an so us guys who stay tight wit Jesus can get Godʼs Spirit, jalike God wen promise.

Da Rules an Wat God Wen Promise

¹⁵ Eh, bruddas, I goin talk bout someting dat everybody can undastan. If one guy make one will an sign um in front odda peopo, den nobody can change um o make um no good. ¹⁶ So, God wen promise da good stuffs to Abraham an his boy. He neva say, “an fo yoa boys,” cuz dass plenny peopo. He ony say, “an fo yoa boy,” cuz dass ony one guy, Christ. ¹⁷ Dis wat I mean. God wen make da deal wit Abraham long time befo, bout Christ. Den, four hundred an thirty years afta dat, God wen give Moses da Rules. But da Rules no mo power fo make Godʼs promise no good. ¹⁸ If Godʼs kids can get dea share cuz dey work fo um wen dey do wat Godʼs Rules say, den no need God fo promise um dea share jalike one gif. Cuz nobody work fo one gif. But God wen give um to Abraham jalike one gif, jalike he wen promise.

¹⁹ How come get da Rules, den? God wen give um cuz everybody do bad kine stuff. Wen Godʼs Boy wen come, da One da promise talk bout, den fo get um right wit God, no need da Rules no moa. Angel messenja guys wen give Moses da Rules, an den Moses wen give um to da peopo. So Moses wen stay in da middle, fo talk to both God an da peopo. ²⁰ Need one guy in da middle fo talk to both guys, but no need um if get ony one guy. God stay ony one God, an he wen fix up everyting by himself.

Da Rules Teach Us Bout da Bad Kine Stuff

²¹ You tink Godʼs Rules stay working agains Godʼs promises? No way! If had rules dat get da power fo make peopo live foeva, den God wen make peopo get um right wit him wit dem rules. But neva had dat kine rules. ²² Da Bible wen say dat everybody stay do da bad kine stuff, an dey no can pau do um. An dass how come da Bible wen say dat, fo show dat peopo gotta go trus Jesus Christ, fo get da kine life God wen promise.

²³ But befo da time fo trus Christ wen come, we gotta do wat da Rules say, no matta we no mo power fo do um. Dass how wen stay till da time wen come fo God show us how fo trus him. ²⁴ Da Rules jalike one babysitter fo bring us to Christ, so dat we can trus him an get um right wit God. ²⁵ But now we can trus Christ, so no need one babysitter.

²⁶ All you guys Godʼs kids, cuz you wen trus Jesus, Godʼs Spesho Guy. ²⁷ All you guys who wen get baptize fo stay tight wit Christ an be his guys, now you goin come like him. ²⁸ Now, no matta Jew o not Jew, slave o not slave, guy o wahine, you guys all da same cuz you stay tight wit Christ. ²⁹ You guys Christʼs guys, so den you guys Abrahamʼs kids. An you guys goin get yoa share, jalike God wen promise all his kids.