M’Cheyne Bible Reading Plan

Jesus Pray Fo His Guys

17 Afta Jesus wen say dat, he wen look up to da sky an say, “Fadda, time awready. Now, show da peopo how awesome I stay cuz I yoa Boy, so den I like show dem how awesome you stay. ² Cuz you wen make me in charge a da peopo all ova da world, I goin make everybody you wen give me come alive fo real kine foeva. ³ Dis wat da kine life mean dat stay fo real kine foeva: dat da peopo dat get dat kine life know you, da ony God dass fo real, an dat dey know me too, Jesus Christ, da Spesho Guy You Wen Send. ⁴ I wen show da peopo hea inside da world how awesome you stay. I wen pau do all da stuff dat you wen tell me fo do. ⁵ Fadda, wen I wen stay by you, from befo da time wen we wen make da world, I wen stay awesome jalike you. Now I going back by you, an I like you make me awesome, same kine jalike befo time. ⁶ “Da guys you wen give me from inside da world fo be my guys, I wen teach dem bout you, so dat dey can know you. Dey was yoa guys, an you wen give dem to me. Dey do wat you say. ⁷ Now dey know dat everyting you teach me, wen come from you. ⁸ Cuz I wen teach dem all da stuff dat you wen tell me, an dey wen take um. Dey know fo shua dat I wen come from you, cuz dey believe dat you wen send me hea. ⁹ “I like pray fo dem. I no pray fo all da peopo inside da world, but ony fo da peopo dat you wen give me, cuz dey yoa guys. ¹⁰ Everyting I get, dass yoas. An everyting you get, dass mines. My peopo stay showing how awesome I stay awready. ¹¹ I no goin stay inside da world no moa, cuz I coming to you. But dese guys, dey stay inside da world. Fadda, you stay spesho an good. Take care dem wit yoa power, cuz dey yoa guys, an dey get yoa name, jalike me. So den, dey goin stay tight wit each odda, jalike me an you stay tight wit each odda. ¹² All da time I wen stay wit dem inside da world, I wen take care dem wit yoa power. I yoa guy, an I wen help dem stay tight wit you. Nobody wen wipe out. Ony da one guy Judas, da guy dat like mess up, he wen wipe out, jalike da Bible wen say long time ago. ¹³ “Now I goin come by you. I say dis tings hea inside da world so my peopo can stay good inside to da max, jalike me. ¹⁴ I wen tell dem wat you wen say. Da peopo hea inside dis world hate dem, cuz dey no do same ting jalike da odda guys inside dis world, jalike I no do same ting jalike da odda guys inside dis world. ¹⁵ I no aks you fo take dem outa da world, but fo you help dem stay away from da Bad Guy, da Devil. ¹⁶ Dey no do same ting jalike da odda guys inside dis world, jalike I no do same ting jalike da odda guys inside dis world. ¹⁷ “Make dem good an spesho fo you, cuz dey know wat you say, an you everytime tell da trut. ¹⁸ Jalike you wen send me to da peopo inside da world, same ting, I wen send my guys to da peopo inside da world. ¹⁹ Dass why I stay good an spesho fo you, so dem guys can be good an spesho fo you too. Da true stuff you say, dass wat goin make dem go all out fo you. ²⁰ “I no pray ony fo dem guys, but fo all da odda peopo dat goin trus me cuz a wat dem guys tell um. ²¹ So dat everybody goin stay tight wit each odda, jalike you stay tight wit me, Fadda, an I stay tight wit you. I like dem stay tight wit us, so da peopo inside da world goin believe dat you da One dat wen send me hea. ²² Jalike you wen show peopo how awesome I stay, I wen make dem come awesome jalike me, so dey goin stay tight wit each odda, jalike we stay tight wit each odda. ²³ I stay tight wit dem, an you stay tight wit me. Den dey goin stick togedda to da max. Cuz dey stick togedda, da peopo inside da world goin know dat you da One dat wen send me hea, an dat you get love an aloha fo dem guys jalike you get love an aloha fo me. ²⁴ “Fadda, I like everybody dat you wen give me be wit me wea I goin stay, cuz I like dem see how awesome I stay. Cuz you wen get love an aloha fo me, an you wen make me awesome befo we wen make da world. ²⁵ Fadda, you everytime do da right ting. But da peopo hea inside da world donno you. I know you, an my peopo, dey know dat you da One wen send me hea. ²⁶ I wen tell dem wat kine guy you, an I goin stay telling dem, cuz I like dem get da same kine love an aloha dat you get fo me, an I can stay tight wit dem.”

“Aloha!”

1 Dis letta from Paul an Timoty. Us guys work fo da Spesho Guy God Wen Send, Jesus Christ. We writing to all you peopo Philippi side dat stay all out fo God cuz you guys stay tight wit Jesus Christ. Dis letta fo everybody, da leada guys an da helpa guys, an all da odda bruddas an sistas. ² God, he our Fadda, an Jesus Christ, he da Good Boss Up Dea Inside Da Sky. We like dem do plenny good kine stuff fo you guys, an make yoa hearts rest inside.

Paul Pray Fo Da Philippi Peopo

³ Everytime I tink bout you guys, I tell my God, “Mahalo plenny! fo da Philippi peopo.” ⁴ An everytime I pray fo all you guys, I stay good inside. ⁵ Cuz from da first time you guys stay work togedda wit us guys fo tell peopo all da Good Kine Stuff From God, an you guys still yet stay doing um. ⁶ Dis fo shua: God, he wen start fo do someting real good inside you guys, an garans he goin finish everyting he wen start fo do, an he no goin stop doing um till Jesus Christ come back.

⁷ Eh, I stay shua lidat bout all you guys. An dass right, you know, cuz I tink plenny bout you guys everytime. All you guys stay tight wit me, no matta I one prisona. An even wen I try fo tell peopo how come I trus da Good Stuff From God, an wen I tell um how dey can know dat all da kine Good Stuff From God stay fo real, you guys stick wit me too. An everytime God do good kine stuff fo me, he do da same kine good stuff fo you guys too. ⁸ God know how plenny love an aloha I get fo you guys. I feel lidat cuz Jesus Christ feel lidat.

⁹ So den, dis how I pray: “God, help da Philippi peopo fo get mo an mo love an aloha. Den dey goin undastan plenny, an figga wass good an wass bad. ¹⁰ Den dey can pick da bestes kine stuff, an no take da junk kine stuff! Dey do dat, everybody can see dat dey fo real. Den nobody can poin finga dem, from now till wen Christ come back! ¹¹ Den dey goin everytime do da right kine stuff, cuz Jesus Christ help um. Wen dat happen, everybody goin know how awesome you stay, an dey goin all out fo tell all da good kine tings bout you!” Dass how I pray to God.

Plenny Good Stuff Stay Come Cuz I Stay In Jail

¹² Eh, bruddas an sistas! I like tell you guys someting. Everyting dat wen happen to me ova hea come okay, so mo plenny peopo can hear da Good Kine Stuff From God. ¹³ All da police guys hea inside da main headquarters, an all da odda peopo ova hea, dey know how come I stay in jail, cuz I stay tight wit Christ, az why. ¹⁴ An cuz I stay in jail, mos a da odda bruddas an sistas dat stay tight wit da Boss, dey coming mo an mo shua bout wat dey doing. Now dey get da guts fo tell peopo wat God say, an no need be scared.

¹⁵ Fo shua, yeah? get guys dat tell peopo bout Christ. But dey do dat cuz dey no can handle if da odda guy numba one, plus, dey like make argue an win everytime. But den, get odda guys dat tell peopo bout Christ cuz dey get good heart. ¹⁶ Dey do um wit love an aloha, an dey know dat I stay hea so I can tell peopo how come I know dat da Good Stuff From God stay fo real. ¹⁷ Now, da odda buggas! You know, dey ony like teach peopo bout Christ fo show dey mo betta den me! Dass not right, you know, da way dey tink. Dey figga prison awready bummas fo me. But still yet, dey like make me suffa even moa.

¹⁸ So, wat den? Get guys dat tell bout Christ fo make everybody tink dey hot stuff. Odda guys, dey do um fo real kine. But no matta dey fake o dey fo real, get guys telling peopo bout Christ, an dat make me stay good inside!

An you know, I jus goin stay good inside lidat, ¹⁹ cuz I know dis: bumbye God goin get me outa all dis stuff. An how he goin do dat? Cuz you guys pray, dass why, an cuz wateva I need, Jesus Christʼs Spirit goin help me plenny. ²⁰ I waiting real hard fo dat fo happen. I stay shua dat notting goin make me come shame. I goin be strong, an I no goin be scared. Everytime peopo see wat happen to me, jalike befo time, I like dem see how awesome Christ stay, jalike befo time, no matta I stay alive o I mahke.

²¹ Da way I see um, if I stay alive I stay tight wit Christ, an if I gotta mahke I stay live wit him, an dass even mo betta. ²² So den, if I stay alive hea in da world, I can do mo plenny still yet. Az why I not shua wat I like pick. ²³ I get presha dis way an dat way! Me, I like bag an go stay wit Christ awready! Dass mo betta, yeah? ²⁴ But if I stay hea inside da world, dat goin be mo betta fo you guys. ²⁵ Dass it! I know wat I goin do. I goin stay alive. I goin stay wit you guys. Dat goin make um mo betta fo you guys, so you guys can trus God mo plenny, an stay mo good inside. ²⁶ Bumbye, I goin go back by you guys one mo time. Den wen you guys see me, you guys goin feel good even mo bout Jesus Christ!

²⁷ Main ting, do everyting da right way, jalike da Good Kine Stuff Bout Christ say you suppose to. Den no matta I go see you guys, o I stay far away an ony goin hear wat you guys doing, I goin know dis: you guys stay solid, cuz you stay tight wit da one Spirit. You guys all get da same heart fo go all out an work togedda, so da odda peopo goin trus da Good Kine Stuff Bout Christ too. ²⁸ No scared da peopo dat hate you. Wen dey see dat you guys no scared, dat goin show dem dat dey da guys dat goin wipe out, not you guys. An dey goin know dat God da One who goin get you outa dat. ²⁹ God let you guys not ony trus Christ, but suffa fo him too. ³⁰ Yeah, you guys awready struggling. You guys wen see me struggling lidat, an you guys hear dat I struggling still yet.