M’Cheyne Bible Reading Plan

Jesus Feed Five Tousand Peopo

6 Afta dat Jesus dem wen go da odda side Galilee Lake. (Da peopo call um Tiberias Lake too.) ² Plenny peopo wen go wit him, cuz dey wen see all da awesome stuff he wen do fo show who him, wen he wen make plenny sick peopo come good. Now, almos time fo da Jewish Passova. Jesus wen go sit down on top one hill wit da guys he was teaching.

⁵ Jesus look up an see plenny peopo coming by him. He tell Philip, “Eh, wea we can buy food fo feed all dese peopo?” ⁶ You know, Jesus wen say dat jus fo check out Philip, cuz Jesus awready know wat he goin do.

⁷ Philip tell him, “Somebody gotta work mo den two hundred days fo get nuff money fo buy bread fo give all dese peopo even litto bit.”

⁸ Andrew, he Simon Peterʼs brudda. Andrew one a da guys Jesus stay teaching. He tell Jesus, ⁹ “You know, get one boy hea dat get five small barley kine bread an two small fish. But how dat goin feed so plenny peopo? No can!”

¹⁰ Had plenny grass dea. Jesus tell his guys, “Make da peopo sit down.” So dey sit um down. Had bout five tousand guys dea.

¹¹ Den Jesus take da breads, an tell God, “Mahalo plenny.” He give um to his guys, an dey give um to da peopo dat was sitting dea. Same ting wit da fish. An everybody eat how plenny dey like.

¹² Wen everybody get nuff fo eat, Jesus tell his guys, “Go get all da lefovas. No good waste um.” ¹³ So dey go get da lefovas, an fill twelve big baskets wit da bread da peopo neva eat.

¹⁴ Afta da peopo see dis awesome ting Jesus wen do fo show who him, dey say, “Fo shua dis da Guy who goin come inside da world fo talk fo God.” ¹⁵ Jesus wen know dat da peopo goin come fo grab him fo make him come king. So he wen go way, an go up on top one hill wea nobody stay.

Jesus Walk On Top Da Water

¹⁶ Befo dark time come, Jesus guys wen go down to da lake. ¹⁷ Dey go inside one boat, an start fo go da odda side da lake, Capernaum side. Now, dark time wen come awready, but still yet Jesus neva come by dem. ¹⁸ Den one strong wind wen start fo blow, an da waves was coming mo big. ¹⁹ Jesus guys wen row da boat three o four miles, an den dey spock Jesus walking on top da water. He was coming near da boat. An dey was real scared.

²⁰ But Jesus tell dem, “Dis me! No scared!” ²¹ Den dey let him come inside da boat. Right den an dea dey wen come to da place wea dey was going.

Da Peopo Stay Looking Fo Jesus

²² Da nex day, da peopo dat stay back dea, da odda side da lake, dey know dat had ony one boat dea befo. An dey know Jesus guys wen go way inside dat boat, but Jesus neva go wit dem. ²³ Dey know too dat odda boats from Tiberias side wen come land dat side, near da place wea da Boss Jesus wen tell God “Mahalo plenny” an dey wen eat da bread. ²⁴ So, wen da peopo wen see dat Jesus an his guys no stay, dey wen go inside da odda boats, an go Capernaum fo look fo him.

Da Bread Dat Make Us Come Alive

²⁵ Dey find Jesus on da odda side da lake, an dey aks him, “Eh, Teacha! Wen you wen come ova hea?”

²⁶ Jesus tell dem, “Dass good you guys stay looking fo me. But I like tell you guys dis: You guys do um cuz I wen give you guys bread, an you guys wen come full. You guys no stay looking fo me cuz I wen do awesome stuff fo show who me. ²⁷ No go work ony fo da kine food dat bumbye come no good. Work fo da kine food dat stay long time an can make you guys live to da max foeva. I da Guy Dass Fo Real, an I can give you guys dat kine, cuz God da Fadda wen give me da right fo do dat.”

²⁸ Dey tell him, “Kay den! Wat us guys gotta do, fo do da kine stuff dat God like?”

²⁹ Jesus tell dem, “Dis wat God like you guys fo do: Trus me, cuz I da Guy God wen send.”

³⁰ Dey say, “Wat kine awesome ting you goin do fo show us who you, so us guys can trus you? Wat you goin do? ³¹ Our ancesta guys wen eat da spesho manna kine bread inside da boonies, jalike da Bible say, ‘He wen give dem bread from da sky fo eat.’ ”

³² Jesus tell dem, “Dass right! An I tell you guys dis too: No was Moses dat wen give yoa ancesta guys da bread from da sky. Was my Fadda, an he da One dat give you guys da real kine bread from da sky still yet. ³³ Cuz da bread from God, dass me, da Guy dat come down from da sky. I make da peopo inside da world come alive fo real kine.”

³⁴ Dey tell him, “Mista, give us dis kine bread, an no stop eva!”

³⁵ Jesus tell dem, “I jalike da bread. I da One dat can make da peopo come alive fo real kine. Anybody come by me fo be my guy, dey no goin come hungry eva! Anybody trus me, dey no goin come thirsty eva!

³⁶ “Jalike I wen tell you guys awready, you guys wen see me, but you guys still yet no trus me. ³⁷ Everybody da Fadda pick fo be my guys, dey goin come by me. No way I eva goin throw out da peopo dat come by me! ³⁸ I wen come down from da sky. I neva come fo do any kine how I like, but fo do wat my Fadda like. He da One who wen send me. ³⁹ Dis wat da Fadda like me fo do: Everybody he pick fo be my guys, he like me fo get dem all, an no leave nobody. An den, I goin make dem come back alive wen da world goin pau. ⁴⁰ Jalike I wen say: dis wat my Fadda like, da One who wen send me: Everybody dat see me his Boy, an trus me, dey goin get da real kine life dat stay to da max foeva. An I goin make dem come back alive wen da world goin pau.”

⁴¹ Dass why da Jewish guys wen start fo grumble bout him, cuz he wen say, “I jalike da bread dat can make da peopo live. I wen come down from da sky.”

⁴² Dey tell each odda, “Eh, dis guy, he Jesus, yeah? He Josephʼs boy! We know his fadda an mudda, yeah? So, how come he say now, ‘I wen come down from da sky?’ ”

⁴³ Jesus tell dem, “Eh! Stop grumbling to each odda! ⁴⁴ My Fadda wen send me hea. No mo nobody can come by me, if my Fadda no bring um. An I goin make dem guys come back alive from mahke wen da world goin pau. ⁴⁵ Da guys who wen talk fo God long time ago, dey wen write, ‘God goin teach all da peopo.’ Everybody who wen listen to da Fadda, an learn da good kine stuff from him, dey goin come by me an be my guys. ⁴⁶ I Da guy dat come from God, an I da ony guy dat eva see da Fadda. No mo any odda guy who wen eva see him.

⁴⁷ “Dass right! An I like tell you guys dis too: Whoeva trus me, dey goin live to da max foeva. ⁴⁸ I jalike da bread, an I can make da peopo live to da max foeva. ⁴⁹ Yoa ancesta guys wen eat da manna kine bread in da boonies, but no matta, lata dey wen mahke die dead. ⁵⁰ But dis kine bread from me, dat come down from da sky, anybody can eat dis bread. Dat mean dey can trus me, an den, dey no goin stay cut off from God. ⁵¹ I da real bread. I da one dat can make peopo come alive fo real kine. I wen come down from da sky. Anybody take dis bread, dey goin live to da max foeva. Dis da bread I goin give wen I mahke, my body. An dis goin make you live to da max foeva.”

⁵² Den da Jewish guys wen start fo argue mo hard wit each odda. Dey say, “Eh, wat dis guy talking bout? How he can give us his body fo eat?”

⁵³ Jesus tell dem, “Eh, you guys get um! An I like tell you guys dis too: I da Guy Dass Fo Real. If you guys no take wat I telling you guys bout why I goin mahke, no way you guys goin come alive fo real kine. If you guys take um, dass jalike you guys eat my body an drink my blood. ⁵⁴ Jalike I wen say: Whoeva eat my body an drink my blood, dey goin live to da max foeva, an I goin bring um back alive wen da world goin pau. ⁵⁵ Cuz my body, dass food fo real kine. An my blood, dass drink fo real kine. ⁵⁶ Whoeva eat my body an drink my blood lidat, dey stay tight wit me, an I stay tight wit dem. ⁵⁷ Da Fadda stay live fo real kine, an he wen send me hea. I stay live too, cuz he make me live fo real kine. Whoeva take me, same ting, dey goin live, cuz I goin make dem live fo real kine. ⁵⁸ Dis not jalike da manna kine bread dat yoa ancesta guys wen eat, an bumbye dey wen mahke. Dis da kine bread dat wen come from God in da sky. Whoeva eat dis kine bread goin live fo real kine.”

⁵⁹ Jesus say all dat wen he stay teaching inside da Jewish church, Capernaum side.

Da Good Kine Stuff from God Make Peopo Come Alive Foeva

⁶⁰ Den plenny guys dat go wit Jesus, wen dey wen hear all dat stuff, dey say, “Wow! Dis stuff too hard fo believe!” ⁶¹ But Jesus wen know dat his guys stay squawking lidat. So he aks um, “Wat! Dis bodda you guys? ⁶² Eh, wat if bumbye you guys see me, da Guy Dass Fo Real, going back up dea, to da place wea I wen stay befo? Den wat?

⁶³ “Godʼs Spirit, dass who make da peopo live fo real kine. Da body no can. Wat I stay telling you guys, dass from Godʼs Spirit, an dass wat make peopo live fo real kine. ⁶⁴ But get some a you guys dat no trus me.” Jesus wen say dat cuz he wen know from da start who no trus him, an who goin set up him. ⁶⁵ An he say, “Dass why I wen tell you guys, no mo nobody can come by me an be my guy. Ony if da Fadda like help um, den dey can come.”

⁶⁶ From dat time had plenny guys dat he wen teach befo, but some a dem wen go back, an neva like go wit him no moa. ⁶⁷ So Jesus aks his twelve guys, “Eh, you guys goin go way too, o wat?”

⁶⁸ Den Simon Peter tell him, “Boss, wea we goin go? No mo nobody can tell us how fo live to da max foeva. You da ony one. ⁶⁹ An us guys trus you, cuz we know dat you da Good An Spesho One from God.”

⁷⁰ Jesus tell um, “I wen pick all twelve a you guys, yeah? But still yet, one a you guys, he jalike one devil!” ⁷¹ He mean Judas, Simon Iscariotʼs boy. He one a da twelve guys, but latas Judas goin set up Jesus.

Paul an da Odda Guys God Send All Ova

2 Den fourteen years lata I wen go Jerusalem one mo time wit Barnabas. An I wen take Titus wit me too. ² I wen go Jerusalem cuz God wen tell me fo go. I tell da church guys ova dea da Good Kine Stuff From God dat I stay telling all da diffren peopos dat not Jews. But da church guys ova dea dat look like dey da leadas, I ony wen talk to dem guys by demself, so dey can check um out. I no like teach da wrong kine stuff, cuz den all my hard work no goin count.

³ Titus stay wit me. He not one Jew, he one Greek guy. But no matta, dey neva make him cut skin fo come one Jew. ⁴ Had some odda guys ova dea dat make like dey our bruddas, but dey not. Dem guys wen make like dey Godʼs peopo so dey can find out how we ack now dat Jesus Christ wen let us go cuz we stay tight wit him, so we no gotta do wat da Rules say fo get um right wit God. Dey do dat cuz dey like make us so we gotta stick wit da Rules again. ⁵ But we neva let dem get dea way, not even litto bit, cuz we like da Good An True Stuff Bout Christ stay good fo you guys.

⁶ But da guys dat look like dey leadas, dey no big ting to me, cuz God no take peopo in cuz a how dey look. Dem guys neva have notting fo make wat I teach mo betta. ⁷ But dem guys find out dat God wen trus me fo tell da Good Stuff Bout Him to da peopo who not Jews, jalike Peter tell um to da Jews. ⁸ Cuz jalike God wen work inside Peter, fo send him fo tell da Jews his Good Stuff, he wen work inside me, fo send me by da peopo dat not Jews. ⁹ James, Peter, an John, dey da guys dat look like dey importan, da leadas fo da church peopo. Wen dey wen know dat God wen do plenny good stuff fo me, dey wen shake hands wit me an Barnabas, fo show dat we stay togedda. An we all wen say da same ting: dey goin go by da Jews, an we goin go by da peopo dat not Jews. ¹⁰ Ony one ting dey like us guys fo do: no foget fo kokua da poor peopo. You know, I awready go all out fo do um.

Paul Scold Peter

¹¹ But wen Peter wen come to Antiok, I wen stand up agains him, cuz he wen do wrong. ¹² Cuz befo da guys wen come dat work wit James, Peter wen eat wit da bruddas dat not Jews. But afta James guys come, he wen go back, an no eat wit da guys dat not Jews, cuz he scared da guys dat say dat all Jesus guys gotta stick wit da Jewish Rules, cut skin, an come Jews. ¹³ An da odda Jewish bruddas wen make like Peter, cuz dey say one ting an do anodda. Dey say Christ wen let um go, but den dey start fo stick wit da Jewish Rules again. An even Barnabas wen get suck in, an do da same ting, jalike dem. ¹⁴ But wen I see dat dem guys ack lidat, an no do wat Godʼs Good An True Stuff From God say, I tell Peter in front all dem guys, “You one Jew. God wen tell us we no gotta stick wit da Jewish Rules no moa fo get um right wit him. So you no ack like one Jew no moa, but like one guy dat not Jew. Den how come you like make da peopo dat not Jews ack like dey Jews?”

Da Jews An Da Odda Peopos All Gotta Trus Jesus

¹⁵ Us guys wen born Jews. We not like da odda peopos dat donno God an do bad kine stuff. ¹⁶ We know dat nobody can get um right wit God jus cuz he do wat da Rules say, but he get um right wit God cuz he trus Godʼs Spesho Guy Jesus Christ. Us guys trus Jesus Christ, so God say we get um right wit him. We no go do wat da Rules say so dat we can get um right wit God, cuz da Rules no make nobody get um right wit God.

¹⁷ Us guys stay trying fo stay tight wit Christ, fo get um right wit God. But if we still yet stay do bad kine stuff, you tink dat mean Christ stay make us do bad kine stuff? No way! ¹⁸ Cuz if I go trus da Rules fo make me get um right wit God, afta I wen teach dat da Rules no can make us get um right wit him, dat show dat I stay broke da Rules. ¹⁹ I wen try do wat da Rules say, but no can, cuz da Rules no mo power fo help me do um. Dass how come I no stick wit da Rules no mo fo get um right wit God, but I stay learning fo live fo God. ²⁰ Jalike I wen mahke wit Christ on top da cross. Now dass not me dat stay live no moa, but Christ stay live inside me. I get da real kine life dat stay to da max foeva inside my body now, cuz I stay trus Godʼs Boy. He get plenny love an aloha fo me, an he wen give himself fo mahke fo me. ²¹ I no goin make no good, all da good tings God wen do fo us. If we can get um right wit God cuz we do wat da Rules say, den Christ wen mahke fo notting.