M’Cheyne Bible Reading Plan

Da Wahine Dat Wen Fool Aroun

8 But Jesus wen go Olive Ridge. ² Nex day he go inside da Temple yard early. Everybody come wea he stay. Den he sit down dea fo teach dem. ³ Da guys dat teach Godʼs Rules an da Pharisee guys wen find one wahine fooling aroun wit one guy dat not her husban. So dey bring her in front Jesus an all da peopo. ⁴ Dey tell him, “Teacha, we wen find dis wahine fooling aroun wit anodda guy dat not her husban! ⁵ Now, Moses wen tell us in da Rules, ‘Whoeva fool aroun behind da oddaʼs back, gotta throw big kine stones at um fo kill um.’ But you, wat you say?” ⁶ Dey say dat fo see wat he goin say, cuz dey like catch him fo bus him.

But Jesus wen bend ova an write someting wit his finga on top da dirt. ⁷ So wen dey stay aks him ova an ova, he stand up strait an tell um, “If get one a you guys dat neva do bad kine stuff, he can throw da first stone at her.” ⁸ Den he bend ova one mo time, an write some mo on top da dirt.

⁹ Wen dey hear dat, dey wen come shame cuz dey know dey do bad kine stuff too. So dey all go way, one afta da odda, da older guys first, an den da younga guys. Den get ony Jesus an da wahine standing dea. ¹⁰ Jesus stand up again an say, “Sista, wea everybody stay? No mo nobody hea fo say you gotta mahke?”

¹¹ She say, “No mo, Mista.”

Jesus say, “You can go now, cuz I no say you gotta mahke. But no go do da bad kine stuff no moa.”]

Jesus Jalike da Light fo da Peopo All Ova da World

¹² Jesus wen talk to dem one mo time. He say, “I jalike da light fo da peopo inside da world. Whoeva come by me an be my guy, dey no goin go aroun inside da dark. Dey goin get da light dat make dem live fo real kine.”

¹³ Da Pharisee guys tell him, “Eh! You saying dis fo yoaself. No mo odda guy say um fo you. So dat not nuff fo make proof dat wat you say stay true.”

¹⁴ Jesus tell dem, “No matta I talk fo myself, wat I say stay true. I know wea I wen come from, an wea I going. But you guys, you donno wea I wen come from, o wea I going. ¹⁵ You guys figga how one guy stay from looking at him on da outside. I no tink lidat. ¹⁶ No matta if I say one guy good o bad, I wen tell da trut, cuz I no do um by myself. I get my Fadda fo help me, cuz he da One wen send me hea. ¹⁷ Yoa own Rules say dat wen two peopo tell da same ting, den wat dey say stay true. ¹⁸ Kay den. I tell bout myself, an my Fadda who wen send me hea, he tell da same ting bout me.”

¹⁹ Dey tell, “Yeah? Yoa fadda, wea he stay?”

Jesus say, “You guys donno me o my Fadda. If you guys wen know me, den you guys wen know my Fadda too.”

²⁰ Jesus wen say all dat wen he wen teach inside da Temple, near da place wea dey bring da money. An nobody bus him, cuz not time yet fo dat.

“Da Place I Going, You Guys No Can Go Dea”

²¹ Jesus tell dem again, “I going away, an you guys goin look fo me. Da place I going, you guys no can go dea. But you guys goin mahke wit all da bad kine stuff you guys stay doing.”

²² So da Jewish leada guys say, “Wat he talking bout? He goin kill himself, o wat? Cuz he say, ‘Da place I going, you guys no can go dea.’ ”

²³ Jesus tell dem, “You guys come from down hea, I come from up dea. You guys come from dis world, I no come from dis world. ²⁴ Dass why I wen say dat you guys goin mahke wit all da bad kine stuff you guys stay doing. Cuz if you guys no believe dat I da Spesho Guy, den you guys goin mahke wit all yoa bad kine stuff.”

²⁵ So dey aks him, “Eh, who you?”

Jesus say, “I da same guy, jalike I wen tell you guys from da start. ²⁶ Get plenny bad kine stuff I can tell bout you guys, but I no goin tell um. Da One who wen send me hea, he everytime tell da trut. I ony tell da peopo inside da world da stuff I wen hear from him.” ²⁷ (He mean his Fadda. But dem guys, dey no undastan.)

²⁸ Jesus tell dem, “Bumbye you guys goin put me, da Guy Dass Fo Real, up high. Den you guys goin know dat I da Spesho Guy, an dat I no do notting by myself. I ony teach da stuff my Fadda wen teach me. ²⁹ Da One who wen send me hea, he stay wit me. He no leave me by myself. I everytime do da kine stuff dat he like.”

³⁰ Wen he wen say all dat, plenny peopo wen trus him.

“You Guys Goin Know Wat Stay True”

³¹ Den Jesus tell da Jewish peopo dat wen trus him, “If you guys stick wit me an da stuff I teaching you, den you goin be my guys fo real kine, an you guys goin learn mo plenny stuff from me. ³² You guys goin know da true stuff, an den you guys no need be slave guys no moa.”

³³ Dey tell him, “Ho! Us guys come from Abraham! We neva was slave guys eva! Wat you mean, ‘No need be slave guys no moa’?”

³⁴ Jesus tell dem, “Dass right, wat I wen tell you! An I tell you guys dis too: Whoeva stay do da bad kine stuff, dey jalike one slave, cuz dey gotta do da bad kine stuff. ³⁵ You know, one slave guy no stay wit da boss foeva. Ony da bossʼs boy, he stay wit him foeva. ³⁶ So, I Godʼs Boy, an if I hemo da shame fo da bad kine stuff you guys wen do, an let you guys go, den you guys no need be slave guys foeva. Fo shua you guys no need do da bad kine stuff!

³⁷ “I know dat you guys come from Abraham. But still yet, you guys trying fo kill me, cuz you guys no like take da stuff I stay teaching. ³⁸ I tell bout da stuff I wen see, dat my Fadda wen show me, an you guys do da stuff you wen hear bout from you guys fadda.”

Da Devil, He You Guys Fadda

³⁹ Dey tell him, “Us guys, eh, Abraham our fadda!”

Jesus tell dem, “If you guys was Abrahamʼs kids, den you guys suppose to do da kine stuff Abraham wen do. ⁴⁰ But now you guys stay trying fo kill me, no matta I everytime tell you guys da trut, jalike I wen hear um from my Fadda. Abraham, he neva make like you guys! ⁴¹ You guys do da kine stuff dat come from yoa fadda.”

Dey tell him, “Eh, us guys ony get one fadda, an he God! No mo odda guy our fadda!”

⁴² Jesus tell dem, “If God was you guys fadda, den you guys wen get love an aloha fo me, cuz I wen come from God, an now I stay hea. I neva come by myself, but God wen send me hea. ⁴³ How come you guys no can undastan da stuff I telling you? Cuz you guys no like listen, dass why!

⁴⁴ “You guys come from yoa fadda, da Devil! You guys like do da kine stuff he like do. From da start, he wen like kill da peopo. He no like da trut, cuz no mo notting true inside him. He everytime bulai, cuz dass wat he like do. He da first guy eva wen bulai, cuz dass how he stay. ⁴⁵ I stay telling you guys da trut, but you guys no trus me. ⁴⁶ You guys no can show proof dat I wen do da bad kine stuff, yeah? So, if I stay telling da trut, how come you guys no trus me?

⁴⁷ “Whoeva come from God, dey listen to wat God say. Dass why you guys no like listen to me, cuz you guys no come from God.”

“Befo Abraham Stay, I Stay Awready”

⁴⁸ Da Jewish leada guys tell him, “Az right wat we saying! You one Samaria guy, not one real Jew, an you get one bad kine spirit in charge a you!”

⁴⁹ Jesus tell dem, “I no mo bad kine spirit in charge a me. I show respeck fo my Fadda. But you guys no mo respeck fo me. ⁵⁰ I no try fo make peopo tink I awesome. Get anodda One dat show peopo how awesome I stay, an he da judge.

⁵¹ “If you guys undastan dat, den I like tell you guys dis too: Whoeva listen to wat I say, dat guy no goin mahke, eva!”

⁵² Den da Jewish leada guys tell him, “Ho! Now we stay shua dat you get one bad kine spirit in charge a you. Abraham wen mahke, an da guys dat wen talk fo God long time ago, dey wen mahke too. But you still say, ‘Whoeva listen to wat I say, dey no goin mahke, eva.’ ⁵³ You tink you mo importan den our fadda Abraham? He wen mahke awready. An da guys dat wen talk fo God, dey wen mahke too. Who you tink you, hah?”

⁵⁴ Jesus say, “If I try make da peopo tink I awesome, dat no good. My Fadda, he da One dat show dem how awesome I stay. An you guys say dat he yoa God. ⁵⁵ But you guys neva know him. I know him. If I wen say dat I donno him, den I bulai, jalike you guys. But I know him, an I do wat he say. ⁵⁶ Abraham, dass you guys fadda. He wen stay real good inside wen he tink dat I goin come hea. He wen see dat, an he feel good inside.”

⁵⁷ Da Jewish leada guys tell him, “Eh! you no make fifty years yet! Wat you mean, you wen see Abraham?”

⁵⁸ Jesus tell dem, “Dass right! An I tell you guys dis too: Befo Abraham wen born, I wen stay awready.”

⁵⁹ Den dem guys wen go get rocks fo throw at Jesus. But he wen hide an wen go outside from da temple yard.

4 Dis wat I mean. Da fadda like give his boy everyting da fadda get wen he mahke, but da boy no can get um right den an dea if he still yet one small kid. Jalike da slave guy no own his bossʼs stuffs, da kid still yet no own his faddaʼs stuffs, no matta he goin get um lata on. ² Da boy get peopo his fadda wen pick fo take care him an his stuffs. He gotta do wat dey tell um till da time come dat his fadda wen pick. ³ Same ting wit us guys. Befo Jesus Christ wen come we jalike small kids. We gotta do wat da main spirits dat stay in charge a da world wen tell us. ⁴ But wen da right time wen come, God wen send his Boy. One wahine wen born him, an he gotta do wat da Rules say. ⁵ Befo time we gotta do everyting da Rules say fo get um right wit God. But God wen send his Boy Christ so he can mahke fo pay da price fo let us go, so we no gotta stick wit da Rules, an so he can make us jalike his hanai kids.

⁶ So den, cuz you guys his kids, God wen put his own Boyʼs Spirit inside our hearts, so now we can tell God, “Papa, you my Fadda!” ⁷ Dass why you guys not jalike slaves no moa dat gotta do wat da Rules say. Now you guys Godʼs kids! An God goin give you guys everyting he goin give his kids.

Paul Tink Plenny Bout da Galatia Bruddas an Sistas

⁸ Befo time you guys neva know God. Dat time you guys gotta do everyting da odda spirits say, no matta dey not real kine gods. ⁹ But now, you guys know God. Mo betta, God know you guys. So how come you guys go back an like stick wit da spirits dat stay junk an not strong? Dey like make you guys jalike dea slaves one mo time. ¹⁰ How come you guys try do everyting dey say you suppose to do fo da spesho religious days, an weeks, an months, an years? ¹¹ I scared fo you guys, dat I wen work hard fo you guys fo notting. I ony wase time.

¹² Eh, bruddas an sistas, I beg you guys fo come jalike me, an no stick wit da Rules fo try get um right wit God. I like you guys come jalike me, cuz I wen come jalike you guys. Dat time I was wit you guys, you guys neva do notting fo hurt me. ¹³ You guys wen know I was real sick. Dass why I wen get da chance fo tell you guys da Good Stuff From God da first time. ¹⁴ No matta my sick wen give you guys hard time, you guys neva hate me o throw me out. But you guys wen take me in jalike I one angel guy from God, o jalike I Jesus, Godʼs Spesho Guy. ¹⁵ Wat wen happen to you guys? Dat time you guys wen stay so good inside bout me, I like tell everybody dat you guys wen even like pull out yoa own eyes an give um to me, if can. ¹⁶ You guys tink I hate you, cuz I tell you guys da trut, o wat?

¹⁷ But dem buggas, dey go all out fo get you guys, cuz dey like cut you guys off from us, so dat you guys goin go all out fo dem. But dass not good. ¹⁸ Now, good if dey go all out everytime, if dey do good kine stuff, no matta I stay wit you guys o I no stay. ¹⁹ You guys jalike my kids. Jalike wen one wahine born one baby, I suffa fo you guys again, till you guys come jalike Christ inside yoa hearts. ²⁰ I like come ova dea wit you guys now, an talk diffren kine. But right now I not shua bout you guys.

Da Story Bout Hagar an Sarah

²¹ Eh, you guys dat like stick wit da Rules fo get um right wit God, how come you guys no listen to wat da Rules say? ²² Da Bible tell dat Abraham had two boys, one boy from da slave wahine Hagar an da odda boy from his own wife Sarah dat not one slave. ²³ Da boy from da slave wahine Hagar, he wen born cuz Abraham wen like get one boy. But da boy from da wife Sarah who not one slave, he wen born cuz God wen promise um.

²⁴ Da two wahines jalike one picha. Dey show da two diffren kine deals dat God wen make wit his peopo. Hagar, da slave wahine, she wen born one slave boy. Now, Hagar, she jalike one picha fo show da deal God wen make wit Moses on top Mount Sinai, wen God wen give Moses da Rules ova dea befo time. ²⁵ Da wahine Hagar, she jalike Mount Sinai, Arabia side, da Rules place. Dass jalike Jerusalem stay nowdays, cuz da Jerusalem peopo all jalike slaves. Jalike slaves gotta do wat somebody tell um, da Jerusalem peopo gotta do wat da Rules say. ²⁶ But get anodda Jerusalem inside da sky, dat come from God fo da peopo dat not slaves. Dass jalike our mudda Sarah, who not one slave. ²⁷ You know, da Bible say,

²⁸ Eh, bruddas an sistas, you guys all Godʼs kids too, jalike Isaac, Sarahʼs boy, cuz God wen promise Abraham dat he goin get da boy Isaac an plenny mo kids too. ²⁹ Dat time da boy who wen born cuz da fadda Abraham like, wen make any kine to da boy Isaac who wen born cuz Godʼs Spirit like. Same ting today. ³⁰ Wat da Bible say? “Throw out da slave wahine an her boy, cuz her boy no goin get da good stuff da fadda like give his wifeʼs boy.” ³¹ So den, bruddas an sistas, we not da slave wahineʼs kids, we da kids from da wife dat not slave. We no gotta stick wit da Rules fo get um right wit God.