Revised Common Lectionary (Complementary)

Dee Psalme V

Dee 107 Psalm

¹ Jäft däm Herr Gott Dank, dan Hee es Goot, dan sien Erboarme es duarhauft fa emma.

² Lot däm Herr Gott siene Jerade soo saje; dän Hee jerat haft fonn däm Fient siene Henj;

³ un dän toop jesaumelt haft fonn dee Lenda, fomm Ooste un fomm Waste; fom Nuade un fomm Siede.

¹⁷ Eenje sent Noare jeworde derch äare Jäajenaun Wäaj, un Tualeide erfoare wäajen äare Sinde;

¹⁸ äare Seel deit aulet Äte hausse; un see kome dicht bie dee Doodes Puate;

¹⁹ dan schriehe see to däm Herr Gott enn äa Älend, un Hee deit an rade ut äare Noot;

²⁰ Hee schekjt sien Wuat, un deit an heele; un Hee deit an rade fon aul äare Schluchte.

²¹ Lot an däm Herr Gott Dank jäwe fa sien Erboarme, un siene Wundasch to dee Mensche Säns.

²² Un lot an dee Dankopfa opfre; un siene Woakje fetale met Freid.

2 En jie weare enn jun Aewatraede en enn june Sind doot,

² enn woone jie donn waundelde no dise Welt Sitte, no daem Harscha aewe dee Lofft Follmacht, dee Jeist dee nu enn daen wirkjt dee onnjehuarsaum sent.

³ Unja daen haud wie uk to eene Tiet onns Ommgank no dee Fleeschliche Losst, en laewde so aus daut Fleesch en Jedanke wulle, en weare fonn Natua Oajeness Kinja, jrod so aus dee aundre.

⁴ Oba Gott, dee rikj es aun Jnod, omm siene groote Leew haulwe met dee hee onns leef haud,

⁵ sogoa aus wie enne Sind Doot weare, haft onns met Christus tom Laewe jebrocht; - derch jnod sent wie jerat -

⁶ en haft onns toop oppjerecht, en toop hanjesat met Christus Jesus en dee Himlische Welte,

⁷ soo daut hee enn dee komende Tiede mucht siene aewatraflich groote, rikje Jnod enn siene Leeftolichkjet onns jaeajenaewe bewiese enn Christus Jesus.

⁸ Dan derch Jnod sent jie seelich jeworde derch daen Gloowe; en daut nich ut junt selfst, daut es ne Gow fonn Gott;

⁹ nich derch Woakje, daut kjeena sikj puche wudd kjenne.

¹⁰ Dan wie sent sien Jeschaft, enn Christus Jesus erschaufe to goode Woakje, dee Gott ferhaea reed jemoakt haud, so daut wie doarenn waundle sulle.

¹⁴ En soo aus Moses dee Schlang enne Wiltnes nehecht hoof, jrod soo mott de Menschesaen uk nehecht jehowa woare.

¹⁵ Daut aul dee, dee aun am jleewe, daut eewje laewe habe.

¹⁶ Dan Gott haft dise Welt so Leef jehaut, daut hee sien eentsje Saen jeef, daut aula, dee aun am jleewe, nich feloare gone, oba daut eewje Laewe habe.

¹⁷ Dan Gott schekjt sien Saen nich enn dise Welt enenn omm dee to rechte, oba daut dee Welt derch am kunn seelich woare.

¹⁸ Waea aun am jleeft es nich jerecht; waea oba nich jleeft es aul jerecht, wiel hee nich aun daen eenstje Gottes Saen sien Nome jleeft.

¹⁹ En dit es daut Rechta-uadeel: daut Licht es en dise Welt ennen gekome, oba de Mensche leewda Diestennes leewa es daut Licht, wiel aeare Woakje bees weare.

²⁰ Dan waea sikj enn beese Woakje eeft, haust daut Licht en kjemt nich tom Licht, daut siene Woakje nich saele ferndach kome.

²¹ Oba dee waut Woarheit deit, kjemt tom Licht, daut siene Woakje ferndach kome, daut dee fonn Gott jedone sent."