Revised Common Lectionary (Complementary)

Dee 19 Psalm

To dän haupt Musikaunt, en Psalm fonn Doft.

¹ Dee Himels behaupte Gott siene Harlijchkjeit, un dee Weltaul behaupt sien Hauntwoakj.

² Dach enn un Dach ut räde dee, Nacht no Nacht brinjt Wissenschoft fäa.

³ Doa es kjeene Räd, un doa sent kjeene Wead wua dän äare Stem nijch to heare es.

⁴ Daen äare Motlien es derjch dee gaunse Welt jegone, un äare Wead bott dee Enje fonne Ead. Enn dän haft hee ne Woninj oppjestalt fa dee Sonn,

⁵ Dee oppkjemt soo aus en Briegaum fonn sien Schorm. Hee freit sikj soo aus en Helt dän Speltstriet to ranne;

⁶ En kjemt fäa fonn daut Enj fonn dee Himels, un sien Krauns es bott daut aundre Enj; un doa es nuscht daut fonn siene Hett festoake es.

⁷ Däm Herr Gott sien Jesats es follkome, un deit dee Seel rade. Däm Herr Gott sien Zeijchnes es Ajcht, un moakt dee Eefeltje Weis.

⁸ Däm Herr Gott siene Fäaschrefte sent rajcht, un moake daut Hoat Froo. Däm Herr Gott siene Aunkommendearunje sent Kloa, dee jäwe Lijcht to dee Uage.

⁹ Däm Herr Gott siene Forjcht es rein, un blift fa emma en emma; däm Herr Gott siene Jerejchte sent Woa, dee sent gaunsentgoa Jerjacht.

¹⁰ Dee ha meeha Weat aus Golt, soogoa ajchtet Golt, un seeta aus Honnijch, un Dreppe fonn Honnijchkorf.

¹¹ Derjch dän es dien Deena jewoarnt; un enn dän jehuarsaum senne es doa grootet Loon.

¹² Wäa kaun aul siene Fäla unjascheede? Rad mie fonn jeheemne Fäla.

¹³ Hool mie uk wajch fonn fäadrenjlijche Sind; lot dän nijch Macht habe äwa mie; dan woa ekj Opprajcht senne, un woa onnschuldijch senne fonn daut grootet Äweträde.

¹⁴ Lot dee Wead ut mien Mul, en daut Bedenkje fonn mien Hoat aunjenäm senne enn dien Aunseene, O Herr Gott, mien Groota Steen un mien Rada.

¹⁸ Dan fa daen dee feloare gone es daut praedje fom Kjriets ne Noarheit; oba fa onns dee wie seelich woare, es daut ne Gotteskrauft.

¹⁹ Dan daut steit jeschraewe: "Ekj woa dee Weise aeare Weisheit fenichte, en dee Festaendje aea Festaunt auntsied sate".

²⁰ Wua es dee kluake Maun? Wua es dee Schreftjeleada? Wua es dee, dee enn dise Tiet striede deit? Haft Gott nich de Welt aeare Weisheit to Noarheit jemoakt?

²¹ Wiel dee Welt enn aeare Weisheit, Gott enn siene Weisheit nich kjand, jefoll Gott daut derch Praedje, waut de Welt docht ne Dommheit wea, daen to rade dee jleewde.

²² Dan de Jude seakje en Teakjen, enn de Jrieche seakje Weisheit,

²³ oba wie praedje Jesus Christus jekjrietsicht, fa dee Jude en aunstoos, en fa dee Heide ne Noarheit,

²⁴ oba fa daen dee beroope sent, beides Jude en Jrieche, Christus - Gott sien Krauft, en Gott siene Weisheit.

²⁵ Dan Gott sien Onnsenn es weisa aus Mensche; en Gott siene Schwakheit es stoaka aus Mensche.

¹³ En dee Jude aea Pasafast wea dichtbie, en Jesus jinkj no Jerusalem.

¹⁴ Doa funk hee emm Tempel dee, dee Osse en Shop en Duwe fekoffte, uk dee Jeltwakjsle sette.

¹⁵ He muak sikj ne Pitsch fonn Strenj en juach daen aule utem Tempel rut, met de Osse en Schop; en sched de Jeltwakjsla aea Jelt ut, en schmeet aeare Desche omm.

¹⁶ En saed to de Duwehaundla: "Naemt dise Dinje hia wach; moakt ut mien Foda sien Hus nich en Haundelsplauts!"

¹⁷ Donn dochta de Jinga doaraun daut jeschraewe stunnt: "Dee Iewa omm dien Hus haft mie fetaeat!"

¹⁸ De Jude jeewe am auntwuat en saede to am: "Waut jefst du onns fa en Teakjen daut du daut Racht hast dit to doone?"

¹⁹ Jesus auntwuad an en saed: "Braekjt dis Temple dol, en ekj woa daen enn dree Doag wada uppbuhe."

²⁰ Donn saede de Jude: "Daut neem sasefeatich Joa dis Tempel to buhe, en du west daem enn dree Doag upbuhe?"

²¹ He raed oba fonn sien Lief aus en Tempel.

²² Aus hee donn nohaea fomm Doot oppjestone wea, dochte siene Jinja doaraun, daut hee dit to an jesajcht haud, en see jleewde dee Schreft, en daut Wuat waut Jesus an jesajcht haud.