Revised Common Lectionary (Complementary)

Dee 84 Psalm

To dän Haupt Musikaunt opp Jittit. En Psalm fa dee Kora Säns

¹ Woo harlijch sent diene Woninj, O Aulmajchtja Herr Gott!

² Miene Seel sänt sikj un deit soogoa feschmachte fa däm Herr Gott siene Fäaleew; mien Hoat un mien Fleesch schriehe fa däm läwendja Gott.

³ Soogoa dee Spoalinkj haft en Hus jefunje; un dee Schwaulm en Nast fa sikj selfst wua see äare Junja kaun han laje, opp diene Aultoare, O Almajchtja Herr Gott, mien Kjeenijch un mien Gott.

⁴ Jesäajent sent dee, dee enn Dien Hus wone; dee woare Die emma preise. Selah.

⁵ Jesäajent es dee Maun däm siene Macht enn Die es; dee Huachwäaj sent enn äare Hoate.

⁶ Wan see derjch dän Tol fonn Hiele derjch gone, moake see daut ne Wotakjwal; jo, dee Räajen deit bekjleede met Säajens.

⁷ Dee gone fonn eene Karuft no dee Näakjste, un kome enn Zion fer Gott.

⁸ O Aulmajchtja Herr Gott, hea mien Jebäd; horjch, O Joakopp sien Gott. Selah.

⁹ See, O Gott onns Schilt, un kjikj opp dien Ennjesaulwda sien Jesejcht.

¹⁰ Dan een Dach enn diene Fäaleew es bäta aus Dusent; ekj ha jewält bie dee Däa fonn mien Gott sien Hus to stone, aus enn dee Gottloose äare Tselte to wone.

¹¹ Dan dee Herr Gott es en Sonn un en Schilt; dee Herr Gott woat Jnod un Harlijchkjeit jäwe; Hee woat nuscht Goodet trigj hoole fonn dän dee opprajchtijch waundle.

¹² O Aulmajchtja Herr Gott, jesäajent es dee Maun dee enn die fetruehe deit!

¹⁰ No Gott siene Jnod dee mie jejaeft es, ha ekj daen Grunt jelajcht soo aus en weisa Bumeista, oba en aundra but doanopp. Oba lot en jieda eena faeasechtich senne woo hee doa bowe but.

¹¹ Dan en aundra Grunt kaun kjeena laje buta daen dee aul jelajcht es, en daut es Jesus Christus.

¹² Nu, wan irjenwaea opp dis Grunt but met Gollt, Selwa, kjestliche Steena, Hollt, Hei, Stoppel;

¹³ en jiedrem siene Oabiet woat jeoppenboat woare; dan dee Dach woat daut derch Fia oppenboa moake, en daut Fia woat en jiedrem siene Oabeit bewiese, wautet es.

¹⁴ Wan daut waut hee opp daen Grunt jebut haft bestone woat, dan woat hee beloont woare.

¹⁵ Wan irjenwaem sien woakj febrenne woat, woat hee Schode liede, oba hee selfst woat seelich woare, doch soo aus derch Fia.

¹⁶ Weet jie nich daut jie Gott sien Tempel sent, en daut Gott en ju wont?

¹⁷ Wan waea Gott sien Tempel to schaunde moakt, daem woat Gott to schaunde moake, dan Gott sien Tempel es heilich, en daut sent jie.

¹⁸ Lot kjeenem sikj selfst aunschmaeare. Wan irjentwaea mank ju denkt daut hee weis es enn dise Welt, lot am to en Noa woare, so daut hee Weis woare kaun.

¹⁹ Dan dise Welt Weisheit es Noarheit bie Gott, dan daut steit jeschraewe: "Hee bejript dee Weise enn aeare eajne Polluckichkjeit".

²⁰ En wada: "De Herr kjant dee Weise aeare Jedanke, daut dee fejaefs sent..

²¹ Aulsoo lot kjeena sikj enn Mensche puche. Dan aules jeheat junt;

²² Auf daut Paul es, oda Apollos, oda Seefas, oda de Welt, oda Laewe, oda de Doot, oda waut jaeajenwoat es, oda waut enne Tookunft es;

²³ En jie jeheare Christus aun, en Christus jeheat Gott aun.