M’Cheyne Bible Reading Plan

Прашања за саботата

(Матеј 12:1-8; Марко 2:23-28) 6 Една сабота, кога Исус минуваше низ нивите, Неговите ученици кинеа клавчиња, ги триеја со раце и ги јадеа. ² Некои од фарисеите ги прекорија, велејќи им: „Зошто го правите тоа што не е дозволено да се прави во сабота?“ ³ На ова, Исус им одговори: „Зар не сте читале што направија Давид и неговите придружници кога огладнеа, ⁴ и како тој влезе во Божјиот Дом, па тој и неговите луѓе јадеа од посветениот леб^[a], од кој само свештениците смееја да јадат? ⁵ Јас, Синот Човечки^[b], Сум Господар и над саботата“ - заклучи Исус.

Исус исцелува во сабота

(Матеј 12:9-14; Марко 3:1-6) ⁶ Една друга сабота, Исус влезе да поучува во синагогата^[c]. Таму имаше еден човек со парализирана десна рака. ⁷ Вероучителите и фарисеите^[d] Го набљудуваа со намера да Го обвинат, доколку изврши исцелување во сабота. ⁸ А Исус, знаејќи им ги мислите, му се обрати на човекот со парализираната рака: „Стани и застани пред сите!“ Тој стана и застана. ⁹ Тогаш Исус им рече: „Да ве прашам: што е дозволено да се прави во сабота: добро или лошо? Да се спасуваат животи, или да се уништуваат?“ ¹⁰ Потоа прошета со погледот од човек до човек и му се обрати на болниот: „Испружи ја раката!“ Тој го стори тоа и раката веднаш му оздраве. ¹¹ А противниците збеснаа и почнаа да се договараат што да Му направат на Исус.

Исус ги назначува Своите дванаесет апостоли

(Матеј 10:1-4; Марко 3:13-19) ¹² Во тоа време Исус отиде на блиската гора да се моли. Цела ноќ Му се молеше на Бог. ¹³ На разденување ги повика кај Себе сите Свои ученици, одбра дванаесет од нив и ги наименува за Свои апостоли^[e]. ¹⁴ Тоа се: Симон, кого Тој го нарече Петар, и неговиот брат Андреј; Јаков и Јован; Филип и Бартоломеј; ¹⁵ Матеј и Тома; Јаков Алфеев и Симон, наречен ,Патриот^[f]‘, ¹⁶ Јуда - братот на Јаков и Јуда Искариот, кој подоцна стана предавник.

¹⁷ На слегување од гората, Исус и Неговите ученици застанаа на една висорамнина. Присутни беа голем број Негови ученици, и многуброен народ од цела Јудеја, од Ерусалим, па дури и од северните приморски предели околу градовите Тир и Сидон, ¹⁸ кои беа дошле да Го слушаат и да бидат исцелени од своите болести. Исус исцелуваше и луѓе кои страдаа од демонски духови. ¹⁹ Сиот народ настојуваше да Го допре Исуса, зашто од Него излегуваше сила која ги исцелуваше сите.

Говорот за блаженствата

(Матеј 5:1-12) ²⁰ Со поглед насочен кон Своите ученици, Исус рече:

„Благословени сте вие што сте сиромашни^[g], зашто вам ви припаѓа Божјото царство!

²¹ Благословени сте вие што сте гладни^[h] сега, зашто вие ќе се наситите!

Благословени сте вие што сега плачете, зашто ќе дојде време кога вие ќе се смеете!

²² Благословени сте кога луѓето ќе ве мразат, ќе ве отфрлат, ќе ве навредуваат и ќе ви извадат лошо име, поради тоа што сте следбеници на Синот Човечки^[i]. ²³ Радувајте се кога ќе ви се случува тоа и бидете весели, зашто голема награда ве очекува на небото! Нивните предци им го правеа тоа на пророците.

²⁴ Но тешко вам кои сега сте богати -

вашата утеха е само на овој свет!

²⁵ Тешко вам кои сега сте сити -

вие ќе гладувате!

Тешко вам кои сега се смеете -

вие ќе тагувате и ќе плачете!

²⁶ Тешко вам кои толпите ве фалат -

така и нивните предци ги фалеа лажните пророци!“

Љубов и спрема непријателите

(Матеј 5:38-48; 7:12а) ²⁷ „Но вам, што Ме слушате, ви велам: покажувајте љубов спрема своите непријатели! Правете им добро на оние што ве мразат! ²⁸ Благословувајте ги оние што ве проколнуваат! Молете се за оние што ве навредуваат. ²⁹ На оној што ќе те удри по едниот образ, заврти му го и другиот! На оној што сака да ти го земе палтото, дај му ја и кошулата! ³⁰ На оној што бара нешто од тебе - дај му. Од оној што зел нешто твое - не барај да ти го врати! ³¹ Постапувајте со луѓето онака, како што сакате тие да постапуваат со вас!

³² Зашто, ако ги сакате само оние што вас ве сакаат, зошто би очекувале некаква пофалба за тоа? Па, и грешниците ги сакаат оние што нив ги сакаат! ³³ И ако им правите добро само на оние што вам ви прават добро, зошто би очекувале некаква пофалба за тоа? Па, и грешниците го прават тоа! ³⁴ И ако им позајмувате само на оние кои можат да ви вратат, зошто би очекувале некаква пофалба за тоа? Па, и грешниците им позајмуваат на други грешници, за да им го вратат истото! ³⁵ Но вие, покажувајте љубов спрема своите непријатели, правете добро и давајте без да очекувате да ви се врати! Само така ќе добиете голема награда и ќе се однесувате како деца на Севишниот, зашто Тој им прави добро и на неблагодарните и на лошите. ³⁶ Бидете милосрдни, како што е милосрден вашиот небесен Татко.“

Бидете добри и самокритични

(Матеј 7:1-5) ³⁷ „Не судете и нема да ви биде судено! Не осудувајте, и нема да бидете осудувани! Простувајте и ќе ви биде простено! ³⁸ Давајте и ќе ви биде давано со преполна мера, набиена, протресена, истурена во вашите скутови! Зашто со каква мера им мерите на другите, со таква и вам ќе ви биде мерено.“

³⁹ Потоа Исус им ја кажа оваа споредба: „Може ли слеп човек да води друг слепец? Нема ли обајцата да паднат в јама?

⁴⁰ Ниеден ученик не е над својот учител. Но, кога ученикот ќе се усоврши, тогаш ќе биде како неговиот учител.

⁴¹ Зошто ја гледаш раската во окото на својот ближен, а не ја гледаш гредата во сопственото око!? ⁴² Како можеш да му кажеш на својот ближен: ,Брате, дозволи ми да ти ја извадам раската од окото!‘, кога ти не ја гледаш гредата во сопственото око!? Тоа е лицемерие! Извади си ја најнапред гредата од сопственото око, па ќе можеш добро да гледаш за да ја отстраниш раската од окото на својот ближен!“

Според дрвото

- и плодовите! (Матеј 7:16-20; 12:33-35) ⁴³ „Нема питомо дрво што раѓа диви плодови, ниту диво дрво што раѓа питоми плодови. ⁴⁴ Секое дрво се познава според своите плодови. Не се берат смокви од трн, ниту грозје од чичка. ⁴⁵ Од благороден човек произлегуваат благородни работи што се напластени во неговото срце, а од лош човек произлегуваат лоши работи што се напластени во неговото срце. Секоја уста го зборува она што е напластено во срцето.“

Дела, а не само зборови

(Матеј 7:24-27) ⁴⁶ „Зошто Ми се обраќате со ,Господе, Господе!‘, а не го вршите тоа што ви го зборувам? ⁴⁷ Ќе ви кажам со што може да се спореди човек што доаѓа кај Мене, за да ги слуша и извршува Моите зборови: ⁴⁸ Тој може да се спореди со ѕидар што гради куќа, копа длабоко и ги поставува темелите врз камена подлога. Кога ќе надојде поплава и реката силно ќе нагрвали врз куќата, не ќе може да ја поткопа, зашто куќата е добро изградена. ⁴⁹ А оној што ги слуша Моите зборови, а не ги извршува, може да се спореди со ѕидар што си подига куќа врз земја, без темели. Кога реката ќе нагрвали врз куќата - таа наеднаш ќе падне, со стравотен тресок!“

ОДГОВОРИ НА НЕКОЛКУ ПРАШАЊА

1) За бракот и брачните односи

7 А сега да ви одговорам на прашањата што ми ги поставивте во вашето писмо. Прво: Да, добро е човек да не се жени^[a]. ² Но, поради опасност од блудства, секој маж треба да има своја жена и секоја жена свој маж.

³ Мажот нека ги исполнува брачните должности спрема својата сопруга, а исто така и жената спрема својот сопруг. ⁴ Телото на жената не е само нејзино, туку му припаѓа и на нејзиниот сопруг. Исто така и телото на мажот не е само негово, туку и на неговата сопруга. ⁵ Затоа, не лишувајте се еден од друг, освен, по исклучок, ако така заедно се договорите, и тоа нека биде само за извесно време и со цел да се посветите на молитва. Потоа вратете се на нормалниот интимен живот, за да не ве наведе на искушение Сатаната, користејќи ја вашата невоздржливост.

⁶ Ова ви го кажувам како нешто што е дозволено, а не како заповед. ⁷ Би сакал секој човек да биде самостоен, како што сум јас. Но не сме сите исти. Бог некого дарувал да живее во брак, а друг да живее како самец.

⁸ На неженетите и на оние чиј брачен другар починал, им препорачувам: да останат самостојни, како што сум и јас. ⁹ Но, ако не можат да издржат, нека стапат во брак, зашто подобро е да се во брак, отколку страста постојано да гори во нив.

¹⁰ На оние што се во брак им заповедам да не се разведуваат. Тоа не е заповед од мене, туку од Господ^[b]. Жената нека не се разведува од својот сопруг. ¹¹ Ако сепак се разведе, да не стапува во нов брак, или нека му се врати на својот маж. Истото важи и за мажите: да не се разведуваат од своите сопруги.

¹² На другите можам да им дадам мој совет. Тоа не е заповед од Господ, туку мој личен совет. Ако некој христијанин има сопруга што не е христијанка и таа сака да живее со него, нека не ја остава. ¹³ Така, и ако христијанка има сопруг што не е христијанин и тој сака да живее со неа, нека не го остава, ¹⁴ бидејќи жената христијанка му носи светост на својот брак, па со тоа и на мажот, иако тој не е христијанин. Така е и кога мажот е христијанин, а неговата сопруга не е; тој му носи светост на својот брак, а со тоа и на својата сопруга. Кога не би било така, вашите деца би биле нечисти, а сега тие се свети^[c].

¹⁵ Ако брачниот другар што не е христијанин сака да се разведе, нека си оди. Во таков случај, не сте должни да живеете во постојани расправии, зашто Бог сака Неговите деца да живеат во мир. ¹⁶ Впрочем, можете ли да бидете сигурни дека ќе успеете^[d] да го убедите вашиот брачен другар да стане христијанин и да се спаси?

¹⁷ Секој нека остане во ситуацијата во која Господ го избрал, кога Бог го повикал да поверува. Ова правило го кажувам по сите цркви. ¹⁸ На пример, ако некој, пред да биде повикан да поверува, веќе бил обрежан, нека не го крие тоа. Ако не бил обрежан, нека не се обрежува. ¹⁹ Дали човек е обрежан или не, воопшто не е важно. Важно е да живееме според Божјите заповеди.

²⁰ Секој нека остане во онаа состојба во која бил кога Бог го повикал. ²¹ Ако си бил роб кога Бог те повикал да поверуваш во Христос, и се уште си роб - не вознемирувај се! Но ако ти се укаже можност да станеш слободен, искористи ја. ²² А за Господ, оној што бил повикан како роб, е слободен, а оној што бил повикан како слободен човек, сега е роб на Христос. ²³ Скапо сте платени и сега и едните и другите сте „Христови робови“, и немојте на никој друг да му слугувате! ²⁴ Значи, драги пријатели, секој нека остане во ситуацијата во која ве затекнал Божјиот позив.

2) За девојките и за (не)стапување во брак

²⁵ За девојките немам посебна заповед од Господ, но можам да ви го кажам моето мислење и сметам дека можете да ми верувате како на човек спрема кого Господ покажал милостива благонаклоност. ²⁶ Сметам дека, поради тешкотиите низ кои сега минуваме, добро е човек да остане во состојбата во која е затекнат. ²⁷ Ако си во брак, не барај развод, а ако не си, не настојувај да стапиш во брак. ²⁸ Ако сепак стапиш во брак, тоа не е грев. Ако една девојка стапи во брак, тоа не е грев. Но, ќе помине низ многу овоземни неволи од кои се обидувам да ве поштедам.

²⁹ Она што сакам да ви го кажам, драги мои, е дека времето што ни преостанува е кратко: Господ брзо ќе дојде, па малку е важно дали сте во брак или не. ³⁰ Наскоро ќе биде неважно дали сте живееле во тага или во радост, дали сте имале имот или не, ³¹ дали сте добиле нешто од овој свет или не, бидејќи овој свет, во сегашниот облик, ќе го нема. ³² Би сакал да бидете ослободени од овоземните грижи. Неоженет човек може да му се посвети на Господовото дело, трудејќи се да Му угоди на Господ, ³³ а оној што е оженет се грижи и за овоземни работи, бидејќи сака да и угоди и на својата сопруга. ³⁴ Неговото внимание е поделено. На ист начин, и немажена жена или девојка можат да му се посветат на Господовото дело, па така ќе бидат свети и телесно и духовно. Мажената жена, пак, се грижи и за овоземни работи, за да може да му угоди на својот сопруг. ³⁵ Ова ви го пишувам за ваше добро, а не за да ве ограничувам. Само сакам да Му бидете приврзани на Господ со неподелено внимание.

³⁶ Ако некој има девојка^[e] во зрели години и смета дека не е убаво да ја остави немажена, нека постапи според своето убедување. Бракот не е грев! ³⁷ Но ако некој цврсто решил да не се жени, односно, не чувствува таква потреба и може да ги контролира сопствените страсти, тогаш нека не се жени, туку нека остане девственик^[f]. И во тој случај добро ќе направи. ³⁸ Значи, сосема е во ред ако некој реши да заснова брак, но уште подобро е ако човек може да остане самец.

³⁹ Секоја сопруга има обврска да остане со својот сопруг се додека е тој жив. Ако тој почине, таа е слободна да се омажи за кого што сака, но треба да ги следи правилата на Господ^[g]. ⁴⁰ Сепак, верувам дека таа ќе биде посреќна ако не се премажува и, кога го велам ова, сметам дека Божјиот Дух ви дава совет преку мене.