M’Cheyne Bible Reading Plan

Евангелието според

Лука

1 Драги Теофиле,

Мнозина почнаа да пишуваат за настаните што се случија кај нас. ² Пишуваат за она што ни го пренесоа Христовите ученици, кои од самиот почеток беа очевидци и проповедници на она што Бог го направи преку Своето Слово. ³ И јас решив да ти напишам еден извештај, почитуван Теофиле, точно според редоследот на случките, откако претходно темелно ги проучив сите нив, од самиот нивни почеток, ⁴ за да се увериш во сигурната основа на учењето што си го примил.

Навестување за раѓањето на Јован Крстител

⁵ Во времето кога Ирод царуваше над покраината Јудеја, живееше еден свештеник по име Захарија, по потекло од свештеничкиот ред на Авијах^[a]. Неговата жена се викаше Елисавета^[b] и беше потомка на свештеникот Арон. ⁶ Обајцата беа праведни пред Бога и целосно ги почитуваа сите Господови заповеди и правила. ⁷ Тие немаа деца, зашто Елисавета беше неротка, а веќе беа и во поодминати години.

⁸ Еден ден, кога му беше редот на Захарија да ја извршува свештеничката служба во Божјиот храм, ⁹ тој беше избран со жрепка - според вообичаената практика меѓу свештениците - да влезе во храмот и да изврши кадење на жртвеникот. ¹⁰ За време на кадењето, народот беше надвор и се молеше.

¹¹ Наеднаш, пред Захарија се појави ангел Господов и застана од десната страна на олтарот за кадење. ¹² Кога Захарија го забележа, се стаписа и страв го обзеде. ¹³ Но, ангелот му рече: „Не плаши се, Захарија! Молитвата ти е услишена! Твојата жена Елисавета ќе ти роди син и ќе му дадеш име Јован. ¹⁴ Ќе се радуваш и ќе се веселиш, а и многу други ќе му се радуваат на неговото раѓање. ¹⁵ Тој ќе биде голем во очите на Господ и нема да пие ни вино ни жесток пијалак, туку ќе се исполни со Светиот Дух уште во утробата на мајка си. ¹⁶ Ќе поттикне многу Израелци да Му се вратат на нивниот Господ Бог. ¹⁷ Тој ќе Му биде претходник на Господ Исус со духот и со силата на пророкот Илија, за повторно да ги зближи татковците со децата, да ги врати непослушните кон мудроста на праведните и да ги подготви за Господ оние што Му се наклонети^[c].“

¹⁸ Тогаш Захарија го праша ангелот: „По што ќе знам дека ова навистина ќе се случи? Јас сум веќе стар, а и жената ми е во поодминати години.“ ¹⁹ Ангелот му одговори: „Јас сум Гаврил^[d] и престојувам пред самиот Бог; Тој ме испрати да зборувам со тебе и да ти ја донесам оваа Радосна вест. ²⁰ Но ти не им поверува на моите зборови, кои сепак ќе се исполнат кога за тоа ќе дојде време; затоа сега ти ќе онемиш и не ќе можеш да зборуваш сe до оној ден кога ќе се исполни ова што ти го кажав!“

²¹ Во меѓувреме, народот чекаше Захарија да излезе и се чудеше зошто толку долго се задржа во храмот. ²² Кога излезе, не можеше да зборува, но според неговите движења заклучија дека имал некое видение во храмот. Тој им објаснуваше со знаци, без да проговори ниту еден збор.

²³ Кога му истече времето за служење во храмот, Захарија се врати дома. ²⁴ По извесно време неговата жена Елисавета забремени, но бременоста ја прикриваше цели пет месеци и велеше: ²⁵ „Најпосле ја добив Господовата благонаклоност, кога реши да се смилува и да го симне срамот од мене!“

²⁶ По шест месеци, Бог го испрати ангелот Гаврил во галилејскиот град Назарет, ²⁷ кај една девица по име Марија^[e] која му беше свршеница на Јосиф, потомок на царот Давид. ²⁸ Доаѓајќи кај неа, ангелот и рече: „Радувај се, зашто си преблагословена и Господ е со тебе!“ ²⁹ Марија се исплаши кога ги чу овие зборови и почна да размислува за значењето на необичниот поздрав. ³⁰ Ангелот и рече: „Не плаши се, Марија, Бог ти е благонаклонет! ³¹ Ти ќе забремениш, ќе родиш Син и ќе Му дадеш име Исус. ³² Тој ќе биде велик и ќе биде наречен Син на Севишниот^[f]. Господ Бог ќе Му го даде Нему престолот од Неговиот предок, царот Давид. ³³ Тој вечно ќе владее меѓу потомците на Јаков^[g] и Неговото царство ќе нема крај.“

³⁴ Тогаш Марија му рече на ангелот: „Како ќе родам дете, кога јас сум девица!?“ ³⁵ Ангелот и одговори: „Преку Светиот Дух, Кој ќе слезе, ќе те исполни и силата на Севишниот ќе се спушти^[h] врз тебе. Затоа и Детето што ќе го родиш ќе биде свето и ќе биде наречено Божји Син. ³⁶ Еве, и твојата роднина Елисавета забремени, иако е веќе во поодминати години. Ја нарекуваа неротка, а еве, таа е сега во шестиот месец на бременост, ³⁷ зашто, за Бог нема невозможни нешта! ³⁸ Тогаш Марија му рече: „Јас Му стојам на услуга на Господ; нека се исполни со мене она што го кажа ти.“ По ова, ангелот си замина.

Прво писмо од апостол Павле до христијаните во

Коринт

Авторство и поздрави

1 Од Павле, повикан од Бог да Му биде апостол на Исус Христос, и од нашиот брат Состен.

² До Божјата црква во Коринт, до вас, кои Бог ве повика да бидете Негов свет народ и ве направи свети преку Исус Христос, и вас, и сите христијани насекаде, сите што го повикуваат името на Исус Христос, нивни и наш Господ.

³ Ви посакуваме благонаклоност и мир од Бог, нашиот Татко и од Господ Исус Христос.

Благодарност на Бог за благословите во коринтската црква

⁴ Постојано Му се заблагодарувам на мојот Бог за Неговата милосрдна благонаклоност што ви ја подари преку Исус Христос. ⁵ Тој во секој поглед ја збогати вашата црква со надареност за говорништво и со многу знаење. ⁶ Со тоа и проповедањето за Христос се зацврсти меѓу вас. ⁷ Сега, додека нестрпливо го чекате повторното доаѓање на нашиот Господ Исус Христос, не ви недостасува никаква духовна дарба. ⁸ Тој ќе продолжи да ве надградува докрај, за да бидете беспрекорни на денот кога ќе се врати нашиот Господ Исус Христос. ⁹ Во Бог можете да имате доверба! Тој ве повика да се здружите со Неговиот Син Исус Христос, нашиот Господ.

Неслога во коринтската црква

¹⁰ Сега, драги пријатели христијани, многу ве молам, во името на нашиот Господ Исус Христос, да изградувате слога меѓу вас, за да не дојде до раздор во црквата. Треба да ги усогласите вашите идеи и планови. ¹¹ Од семејството на Хлое ме известија дека меѓу вас, драги мои, има поделби. ¹² Едни сте викале: „Јас сум Павлов!“ други: „Јас сум Аполосов!“, трети: „Јас сум Петров^[a]!“, четврти: „Јас сум Христов!“

¹³ Зар Христос се раздели? Павле ли беше распнат за вас? Во името на Павле ли бевте крстени? ¹⁴ Благодарен сум Му на Бог што, освен Крисп и Гај, јас не крстив ниту еден од вас, ¹⁵ за да не рече некој дека е крстен во мое име. ¹⁶ (Да, ги крстив и членовите на семејството на Стефан, а не се сеќавам дали сум крстил уште некој.) ¹⁷ Христос не ме испрати да крштавам, туку да ја проповедам Радосната вест, и тоа не со мудри говори, за да не се омаловажи силата на делото што го изврши Христос на крстот.

Световна и Божја мудрост

¹⁸ Проповедањето за смртта на Исус на крстот им звучи бесмислено на луѓето што се на патот кон пропаста, но за нас што сме на патот на спасението тоа претставува Божја сила. ¹⁹ Во Светото Писмо, Бог вели:

„Ќе ја уништам човечката мудрост,

ќе ги отфрлам нивните најостроумни идеи^[b].“

²⁰ Зашто, ни филозофите, ни законодавците, ниту научниците на овој свет не не спасија! Бог ни покажа дека мудроста на овој свет е далеку од мудрост! ²¹ Кога мудриот Бог виде дека луѓето преку сопствената мудрост никогаш нема да дојдат до Него, реши да им обезбеди спасение на оние што ќе и поверуваат на оваа, навидум бесмислена порака што ние ја проповедаме^[c]. ²² И додека Евреите бараат знаци од небото, а Грците мудруваат, ²³ ние проповедаме за Христос Кој беше распнат за да не спаси. Тоа за Евреите е неприфатливо, а за другите народи - бесмислено! ²⁴ Но за оние што се повикани од Бог да се спасат, без разлика дали се Евреи или се од другите народи^[d], во Христос се покажа Божјата сила и Божјата мудрост. ²⁵ Овој навидум неразумен Божји план е многу помудар и од најмудрите човечки планови, и она што ни изгледа слабо од Бог е многу помоќно од сета човечка моќ.

²⁶ Погледнете се, драги мои, вие што сте од Бога одбрани: меѓу вас нема многумина што се мудри според човечки мерила, ни многу моќници или луѓе од благородничко потекло. ²⁷ Напротив, Бог ги одбра оние што овој свет ги смета за прости, за да ги посрамоти оние што се сметаат за мудри. Бог ги одбра оние што во овој свет се немоќни, за да ги посрамоти моќниците. ²⁸ Бог ги одбра оние што не се од благородничко потекло и оние што се презрени во овој свет, за да ги направи ништожни оние што овој свет ги смета за многу важни. ²⁹ Така ниеден човек не ќе може да се фали пред Бог.

³⁰ Бог ви овозможува и вам да се спасите преку Исус Христос, Кој стана наша мудрост од Бога, ни ја подари Својата праведност, не направи свети и ја плати цената за да не откупи. ³¹ Затоа, во Светото Писмо е напишано:

„Кој сака да се фали,

нека се фали само со она што го стори Господ^[e].“