M’Cheyne Bible Reading Plan

Сатаната го искушува Исуса

(Матеј 4:1-11; Марко 1:12-13) 4 Исус се врати од реката Јордан исполнет со Светиот Дух. Духот Го одведе во пустината, ² каде што Ѓаволот Го искушуваше четириесет дена. За сето тоа време Тој не јадеше ништо и на крајот многу огладне. ³ Тогаш Ѓаволот Му рече: „Ако си Ти навистина Божјиот Син, нареди им на камењава да се претворат во лебови!“ ⁴ Но Исус му одговори: „Светото Писмо вели^[a]: ,Човекот не живее само од леб!‘“

⁵ Тогаш Ѓаволот Го крена на високо место и за миг Му ги покажа сите царства на Земјата, ⁶ па Му рече: „Ќе Ти дадам власт над сите нив и сиот нивни раскош, зашто тие мене ми се дадени и јас можам да ги давам кому што сакам! ⁷ Значи, сево ова ќе Ти припадне Тебе, ако ми се поклониш.“ ⁸ Исус му одговори: „Светото Писмо вели^[b]: ,Поклонувај Му се на Господ, твојот Бог, и само Нему служи Му!‘“

⁹ Потоа Ѓаволот Го одведе во Ерусалим, Го постави на врвот од Божјиот храм и Му рече: „Ако си Ти Божјиот Син, фрли се долу, ¹⁰ зашто во Светото Писмо пишува^[c]: ,Бог ќе им заповеда на Своите ангели да Те чуваат‘, ¹¹ и дека тие ќе Те понесат на своите дланки, за да не си ја сопнеш ногата на камен.“ ¹² Исус му одговори: „Но, го пишува^[d] и следново: ,Не искушувај Го Господ, својот Бог!‘“ ¹³ Исцрпувајќи ги сите можни искушенија, Ѓаволот Го остави, очекувајќи друг погоден момент.

Почеток на Христовата служба

(Матеј 4:12-17; Марко 1:14-15) ¹⁴ Тогаш Исус се врати во Галилеја, исполнет со силата на Светиот Дух. Набргу Тој стана познат по целиот крај. ¹⁵ Тој поучуваше по синагогите^[e] и сите Го фалеа.

¹⁶ Потоа Исус се врати во Назарет, каде што беше пораснал и, како што имаше обичај, во саботата дојде во синагогата. Таму стана да чита од Светото Писмо. ¹⁷ Му ја подадоа книгата на пророкот Исаија, а Тој ја отвори на местото каде што е напишано^[f] следново:

¹⁸ „Врз Мене почива Духот на Господ,

зашто Тој Ме назначи^[g] да им ја донесам

Радосната вест на бедните,

¹⁹ да им навестам ослободување на заробените,

да им го вратам видот на слепите,

да ги ослободам угнетените,

да го прогласам времето на Господовата благонаклоност.“

²⁰ Потоа ја затвори книгата, му ја врати на служителот и седна. Погледите на сите присутни во синагогата беа вперени во Него, ²¹ па Тој им се обрати: „Делот од Светото Писмо што го чувте, се исполни денес.“

²² Тој остави силен впечаток кај сите и тие се восхитуваа на љубезните зборови што излегуваа од Неговата уста, па се прашуваа: „Зар Овој не е синот на Јосиф?“ ²³ Тој им рече: „Вие сигурно би ми ја цитирале поговорката: ,Докторе, исцели се самиот себе!‘, а потоа би барале од Мене да го направам и овде, каде што пораснав, она што сте слушнале дека го направив во Кафарнаум. ²⁴ Но вистина е дека ниту еден пророк не добива признание во своето место на живеење.

²⁵ Еве ја вистината: иако имаше многу гладни вдовици во Израел, во времето на пророкот Илија, кога три и пол години владееше суша по целата земја, ²⁶ сепак, Илија не беше испратен кај ниедна од Израел, туку кај една вдовица во Царфат^[h], во Сидонската земја. ²⁷ Имаше и многу лепрозни во Израел, во времето на пророкот Елиша, но ниту еден од нив не беше исцелен, туку само Нааман, кој беше од Сирија.“

²⁸ Кога присутните во синагогата го слушнаа тоа, многу се разлутија; ²⁹ па станаа и Го исфрлија Исуса од градот и Го однесоа на врвот од ридот на кој се наоѓаше градот, со намера да Го турнат во бездна. ³⁰ Но Тој успеа да се спровре низ толпата народ и си отиде.

Исусовите дела во Кафарнаум - Истерувањето на демони

(Марко 1:21-28) ³¹ Потоа Исус замина за Кафарнаум, град во Галилеја, каде што во саботите го поучуваше народот. ³² Луѓето беа одушевени од Неговите поуки, зашто Тој зборуваше со авторитет.

³³ Во синагогата^[i] имаше еден човек обземен од демон, кој викаше на сиот глас: ³⁴ „Што сакаш од нас, Исусе од Назарет? Зар Си дошол да нe уништиш? Знам Кој си Ти: Ти си Божјиот Светец, испратен од Бог!“ ³⁵ Исус му заповеда: „Замолкни и излези од него!“ Демонскиот дух го кутна човекот наземи пред очите на сите и излезе од човекот, не повредувајќи го. ³⁶ Луѓето беа стаписани и си говореа еден со друг: „Какви моќни зборови, полни со власт и сила да им се заповеда на демони и тие да излегуваат!“ ³⁷ По ова, веста за Исус се разнесе низ сите околни места.

Исус ја исцелува тештата на Петар и други

(Матеј 8:14-17; Марко 1:29-34) ³⁸ Исус си замина од синагогата и дојде во куќата на Својот ученик Симон Петар, каде што неговата тешта лежеше болна и имаше голема треска. Исус беше замолен да ја исцели, а ³⁹ Тој се наведна над неа и со заповед ја ослободи од треската. Жената веднаш стана и почна да ги послужува.

⁴⁰ На зајдисонце сите што имаа болни од некаква болест ги носеа кај Исус и Тој ги положуваше Своите раце врз нив и сите тие оздравуваа. ⁴¹ Од мнозина излегуваа демони, извикувајќи: „Ти си Божјиот Син!“, а Тој им забрануваше да зборуваат, зашто тие знаеја дека Тој е Месијата.

Исус проповеда по цела Јудеја

(Марко 1:35-39) ⁴² Следниот ден, во мугрите, Исус стана и отиде сам на едно пусто место. Луѓето почнаа да Го бараат и кога Го најдоа Го задржуваа да не си оди, ⁴³ но Тој им рече: „Треба да ја проповедам Радосната вест за Божјото царство и во другите градови, зашто сум испратен за таа цел.“ ⁴⁴ И проповедаше по синагогите низ цела Јудеја.

За неморалот на некои „христијани“

5 Јавено ми е дека кај вас има некој човек што живее во блуд, и тоа таков блуд каков што нема ни меѓу паганите: блудство со својата маќеа^[a]! ² А вие, наместо да жалите - се гордеете! Треба да го отстраните од вашата средина тој што прави такво нешто!

³ Иако јас сум физички отсутен, со духот^[b] сум меѓу вас. Јас веќе пресудив за тој што направил такво нешто, исто како да сум присутен. ⁴ Треба да се соберете во името на нашиот Господ Исус Христос, а со вас ќе биде и мојот дух, па со силата на нашиот Господ Исус Христос, ⁵ да го исклучите тој човек од црквата, препуштајќи го во рацете на Сатаната! Така тој телесно ќе биде казнет^[c], за да биде спасен неговиот дух на Денот кога Господ ќе се врати.

⁶ Не е добро што се фалите колку сте духовни, а дозволувате во вашата средина да се случуваат вакви работи! Зар не знаете дека е доволно само малку квасец, за да го скисне целото тесто^[d]? Така е и со гревот. ⁷ Исчистете се од стариот квасец, односно, од гревот! Тогаш ќе бидете ново тесто, замесено без квасец. Вие сте токму тоа, бидејќи нашето пасхално Јагне, Христос, беше веќе жртвувано за нас. ⁸ Немојте да го славите празникот Пасха со ,стариот квас‘, односно, така што ќе продолжите да бидете лоши и расипани, туку со ,бесквасен леб‘, односно, со искреност и духовна чистота. Бидете чисти и искрени, па прославете го со ,леб без квасец‘.

⁹ Во моето претходно писмо ви напишав да се држите настрана од луѓе што се впуштаат во блуд. ¹⁰ Притоа не мислев на луѓе кои се уште не се христијани, а живеат во блуд. Кога би требало да се држите настрана од сите што во овој свет се неморални, алчни, лажговци и што им се поклонуваат на разни идоли, би требало сосема да го напуштите овој свет! ¹¹ Мислев на луѓето што се нарекуваат христијани, а сепак прават блуд, или се алчни, или им се поклонуваат на идоли, или ги навредуваат другите, или се опиваат или мамат. Со такви немојте дури заедно ни да јадете!

¹² Зар е моја работа да судам за оние што се надвор од црквата? Не треба ли и вие најнапред да се грижите какви се оние што се внатре во црквата? ¹³ На оние што се надвор, Бог ќе им суди, а нам Светото Писмо ни порачува:

„Отстранете го од вашите редови секој што е зол^[e]!“