M’Cheyne Bible Reading Plan

Исус ги повикува првите ученици

(Матеј 4:18-22; Марко 1:16-20) 5 Еднаш, Исус стоеше на брегот на Генисаретското Езеро^[a], а луѓето се туркаа кон Него за да ја слушаат Божјата порака. ² Тој здогледа две бротчиња извлечени на брегот. Рибарите беа излегле да ги чистат своите мрежи. ³ Исус влезе во едно од бротчињата, кое му припаѓаше на Симон^[b], и го замоли малку да го оттурне од брегот. Потоа Исус седна на бротчето и започна да го поучува народот.

⁴ Кога заврши со говорот, Исус му рече на Симон: „Одвеслај понатаму, во подлабока вода, и фрлете ги мрежите.“ ⁵ Но Симон Му одговори: „Господару, цела ноќ се трудевме и ништо не уловивме; но штом Ти заповедаш, ќе ги фрлиме мрежите.“ ⁶ Кога ги спуштија мрежите уловија толку многу риби, што речиси им се искинаа мрежите. ⁷ Ги повикаа другарите од другото бротче да дојдат да им помогнат. Тие дојдоа и ги наполнија двете бротчиња со толку риби, што бротчињата речиси потонаа. ⁸ Гледајќи го ова, Симон Петар падна пред Исуса на колена и рече: „Оди си од мене, Господе; јас сум грешен човек!“ ⁹ Зашто, голем страв ги беше зафатил и него и оние што беа со него, поради случката со уловените риби. ¹⁰ Истото важеше и за другарите на Симон: Јаков и Јован - синови на Завдај. Исус му одговори на Симона: „Не плаши се! Отсега ќе одиш по луѓе, а не по риби.“ ¹¹ Тогаш тие ги извлекоа бротчињата на копното, оставија сe и станаа Исусови следбеници.

Исцелување на еден лепрозен човек

(Матеј 8:1-4; Марко 1:40-45) ¹² Еднаш, Исус беше во еден град, кога одненадеж Му пријде еден човек заболен од лепра. Кога Го забележа Исуса, тој падна ничкум пред Него и почна да Го моли: „Господине, ако сакаш, Ти можеш да ме исчистиш^[c]!“ ¹³ Исус ја испружи Својата рака и го допре, велејќи: „Сакам! Биди чист!“ И лепрата веднаш исчезна од него. ¹⁴ Исус му нареди никому да не кажува, туку да оди право кај свештеникот за да биде прегледан, а потоа да принесе жртва согласно со Мојсеевиот Закон, како сведоштво за другите. ¹⁵ Но вестите за Исус сe повеќе се ширеа и многуброен народ доаѓаше да Го слуша и да биде исцелен од своите болести. ¹⁶ Тој, пак, честопати се повлекуваше на пусти места, каде што во осаменост се молеше.

Исус исцелува парализиран човек

(Матеј 9:1-8; Марко 2:1-12) ¹⁷ Еден ден, додека Исус поучуваше, меѓу слушателите седеа и некои фарисеи и вероучители^[d], дојдени од сите градови на Галилеја и на Јудеја, како и од Ерусалим. Силата Господова Го поттикнуваше Исуса да исцелува болни. ¹⁸ И ете, некои луѓе носеа парализиран човек на носила; тие се обидуваа да го внесат човекот внатре, кај Исус. ¹⁹ Кога поради големата толпа не успеаја да го внесат внатре, тие се искачија на куќата и преку покривот го спуштија сосе носилата сред народот, пред Исус. ²⁰ Кога Исус виде со колкава вера го прават тоа, му се обрати на парализираниот: „Човеку, гревовите ти се простуваат!“

Кој е овластен да простува гревови?

²¹ Вероучителите и фарисеите почнаа да си шепотат меѓу себе: „Овој човек е богохулник! Само Бог може да простува гревови и никој друг!“

²² Знаејќи им ги мислите, Исус им рече: „Зошто ви доаѓаат такви зли мисли? ²³ Полесно ли е да се каже: ,Гревовите ти се простуваат!‘, или ,Стани и оди!‘? ²⁴ Но ќе ви докажам дека Јас, Синот Човечки^[e], имам власт овде на Земјава да простувам гревови!“ Потоа му се обрати на парализираниот: „Ти наредувам: стани, земи си ја постелата и оди си здрав дома!“ ²⁵ Пред очите на сите, човекот веднаш оздраве, па стана, си ја зеде постелата на којашто лежеше и си отиде дома, славејќи Го Бога. ²⁶ Сите останаа вчудовидени и Го славеа Бога со страхопочит, велејќи: „Чудесни работи видовме денес!“

Повикувањето на Левиј (Матеј)

(Матеј 9:9-13; Марко 2:13-17) ²⁷ Потоа Исус излезе и здогледа еден собирач на данок^[f], по име Левиј, кој седеше на даночна тезга, па му рече: „Дојди и биди Мој следбеник!“ ²⁸ Левиј стана и оставајќи сe тргна по Исус.

²⁹ Набргу потоа Левиј приготви голема гозба во својот дом, во чест на Исус, а меѓу гостите, покрај другите луѓе, имаше и многу собирачи на данок. ³⁰ А фарисеите и вероучителите од нивната група почнаа да негодуваат и им рекоа на Исусовите ученици: „Зошто јадете и пиете со собирачи на данок и со други отпадници?“ ³¹ На ова, Исус им одговори: „Не им треба лекар на здравите, туку на болните! ³² Јас не дојдов да повикувам праведници на покајание, туку грешници.“

Прашањето за постот

(Матеј 9:14-17; Марко 2:18-22) ³³ Тогаш верските претставници Му рекоа на Исус: „Учениците на Јован Крстител редовно постат и се молат, како што прават и учениците на фарисеите, а Твоите ученици јадат и пијат!“ ³⁴ Исус им одговори: „Зар треба да се тераат сватовите да постат, додека младоженецот^[g] е со нив? ³⁵ Но еден ден, младоженецот ќе се оддели од нив; тогаш тие ќе постат.“

³⁶ Потоа им ја кажа оваа споредба: „Никој не кине парчиња од нова облека за да закрпи стара облека; зашто, така би се раскинала новата облека, а и новата крпа не би прилегала врз старата облека. ³⁷ И никој не полни ново вино во стари кожни мешини, зашто мешините ќе пукнат^[h] од новото вино и виното ќе истече, а и мешините ќе пропаднат. ³⁸ Затоа, ново вино треба да се става во нови мешини. ³⁹ Но никој што пие старо вино не посакува ново вино, туку ќе рече дека старото вино е подобро.“

За споровите меѓу христијаните

6 Кога меѓу двајца христијани има некој спор, им прилега ли случајот да го изнесуваат пред световен суд, наместо да побараат помош од други христијани? ² Зар не знаете дека еден ден, ние, христијаните, ќе му судиме на овој свет? Ако вие треба да му судите на целиот свет, зарем не сте способни да разрешите дури и најситен меѓусебен спор? ³ Зар не знаете дека ние, христијаните, ќе им судиме дури и на ангелите? Тогаш, колку полесно треба да ги разрешуваме овоземните несогласувања! ⁴ Кога спорите за најобични, секојдневни работи, зошто одите да се судите пред луѓе кои црквата воопшто не ги цени!? ⁵ Треба да се засрамите што сум принуден да ви го кажувам ова! Нема ли меѓу вас христијаните барем еден мудар човек кој би можел да пресудува во вашите меѓусебни спорови? ⁶ Туку дозволувате еден христијанин да се суди со друг христијанин, и тоа пред суд на неверници!

⁷ Самото тоа што вие воопшто се тужите еден со друг, несомнено претставува пораз за вас. Зошто не истрпите, макар и да сте онеправдани? Зошто не ја прежалите штетата што евентуално ви е нанесена? ⁸ Наместо тоа, вие самите правите неправди и им нанесувате штета на своите сохристијани!

За чист христијански живот

⁹ Зар не знаете дека неправедниците нема да бидат меѓу наследниците на Божјото царство? Немојте да се залажувате! Ни блудниците, ни идолопоклониците, ни прељубниците, ни полово изопачените, ни хомосексуалците, ¹⁰ ни крадците, ни алчните, ни пијаниците, ни клеветниците, ни измамниците нема да бидат меѓу наследниците на Божјото царство! ¹¹ И некои од вас бевте такви, но сега сте исчистени^[a], станавте свети и оправдани пред Бог преку делото на Господ Исус Христос и Духот на нашиот Бог.

¹² Некои од вас велат: „Имам слобода да правам што сакам!“ Да, но не е се полезно! Иако имам слобода да правам што сакам, нема да дозволам да робувам на нешто. ¹³ Велите: „Храната е наменета за стомакот, а стомакот за храната!“ Да, но еден ден Бог ќе ги уништи и стомакот и храната. Телото не постои со него да правиме блуд. Нашите тела Му припаѓаат на Господ, зашто Господ ги создал. ¹⁴ Бог ќе ги воскресне и нашите тела со истата моќ со која Го воскресна и нашиот Господ.

¹⁵ Зар не сфаќате дека вашите тела се органи на Христовото тело? Треба ли сега јас да земам нешто што е Христово и да го соединам со проститутка? Никако! ¹⁶ Или не ви е јасно дека оној што се соединува со проститутка станува едно со неа? Светото Писмо вели: „Двајцата ќе станат едно тело^[b].“ ¹⁷ На сличен начин, Кој се соединува со Господ, станува еден дух со Него.

¹⁸ Бегајте од блудот! Секој друг грев што човек може да го направи е надвор од неговото тело, но со блудот греши против сопственото тело. ¹⁹ Зар не знаете дека вашето тело е храм на Светиот Дух, Кој ви е подарен од Бог за да живее во вас? Вие не сте ваша сопственост. ²⁰ Откупени сте со скапа откупнина! Затоа, користете ги вашите тела со нужната почит спрема Бог.