Revised Common Lectionary (Semicontinuous)

¹¹ “परंतु माझ्या लोकांनी माझे ऐकले नाही.
    इस्राएलने माझी आज्ञा पाळली नाही.
¹² म्हणून मी त्यांना जे करायची इच्छा होती ते करु दिले.
    इस्राएलने सुध्दा त्याला हवे ते केले.
¹³ जर माझ्या लोकांनी माझे ऐकले,
    जर इस्राएल माझ्या इच्छे प्रमाणे राहिला,
¹⁴ तर मी त्यांच्या शत्रूंचा पराभव करीन.
    जे लोक इस्राएलवर संकटे आणतात त्यांना मी शिक्षा करीन.
¹⁵ परमेश्वराचे शत्रू भीतीने थरथर कापतील.
    त्यांना कायमची शिक्षा होईल.
¹⁶ देव त्याच्या माणसांना सगळ्यात चांगला गहू देईल.
    देव त्याच्या माणसांना त्यांचे समाधान होईपर्यंत मध देईल.”

“‘तुमचे राष्ट्र तरुण होते त्या वेळी तुम्ही माझ्याशी निष्ठावंत होता.
    नववधूप्रमाणे तुम्ही मला अनुसरलात.
    तुम्ही वाळवंटातून आणि पडिक जमिनीतून माझ्या मागे आलात.
³ इस्राएलचे लोक म्हणजे परमेश्वराला मिळालेली पवित्र देणगी होती.
    परमेश्वराने तोडलेले ते पहिले फळ होते.
त्यांना दुखविण्याचा प्रयत्न करणाऱ्या प्रत्येकाला अपराधी ठरविले गेले.
    त्या पापी लोकांचे वाईट झाले.’”
हा परमेश्वराकडून आलेला संदेश होता.

¹⁴ “इस्राएलचे लोक गुलाम झाले आहेत का?
    गुलाम म्हणूनच जन्माला आलेल्या माणसाप्रमाणे ते आहेत का?
    इस्राएलची संपत्ती लोकांनी का लुटली?
¹⁵ तरुण सिंह (शत्रू) इस्राएलकडे बघून डरकाळ्या फोडतात व गुरगुरतात.
    त्यांनी इस्राएलचा नाश केला.
इस्राएलमधील शहरे जाळली गेली आहेत.
    तेथे कोणीही मागे उरले नाही.
¹⁶ नोफ (मंमेफिस) आणि तहपन्हेस
    येथील लोकांनी तुमचा माथा फोडला आहे.
¹⁷ तुमच्याच चुकीने हे संकट आले आहे.
    परमेश्वर तुमचा देव तुम्हाला योग्य मार्गाने नेत होता.
    पण तुम्हीच उलटे फिरलात.
¹⁸ यहूदातील लोकांनो, पुढील गोष्टींचा विचार करा.
    मिसरला जाण्याने काही फायदा झाला का?
    शिहोराचे (नील नदीचे) पाणी पिण्याने काही लाभ झाला का?
    नाही. अश्शूरला जाण्याने आणि मोठ्या नदीचे (फरात नदीचे) पाणी पिण्याने काही मदत झाली का? नाही.
¹⁹ तुम्ही दुष्कृत्ये केली.
    त्यामुळे तुम्हाला फक्त शिक्षा मिळेल.
तुमच्यावर संकट येईल.
    मग तुम्हाला समजेल की देवापासून दूर जाणे कीती वाईट आहे!
मला न घाबरणे व
    मान न देणे हे चूक आहे.”
माझ्या प्रभूचा, सर्वशक्तिमान परमेश्वराचा, हा संदेश होता.
²⁰ “यहूदा, फार वर्षांपूर्वी तू तुझे जोखड दूर फेकलेस.
    मी तुझ्यावर नियंत्रण ठेवत होतो ती बंधने तोडलीस.
    तू मला म्हणालीस, ‘मी तुझी सेवा करणार नाही.’
प्रत्येक उंच टेकडीवरील अथवा प्रत्येक हिरव्या
    झाडाखालील वारांगनेप्रमाणे तू झालीस.
²¹ यहूदा, मी खास वेल म्हणून तुला लावले.
    तुम्ही सर्वजण उत्तम बीजाप्रमाणे होता.
मग वाईट फळे देणाऱ्या वेलीत तुझे रुपांतर कसे झाले?
²² जरी तू स्वतःला खारान धुतलेस,
    खूप साबण लावलास,
    तरी मला तुझ्या अपराधाचा डाग दिसू शकेल.”
हा परमेश्वर देवाकडून आलेला संदेश होता.