Old/New Testament
यहोवा परमान देत हीं कि हारून महा याजक अहइ
17 यहोवा मूसा स कहेस, 2 “इस्राएल क मनइयन स कहा। आपन लोगन स बारह लकड़ी क कुबरी लइ लेइँ। बारहु परिवार समूहन मँ स हर एक नेता स एक कुबरी ल्या। हर एक मनई क कुबरी प नाउँ लिखि द्या। 3 अउ लेवी क कुबरी प हारून क नाउँ लिखि द्या। बारह परिवार समूहन क हर एक मुखिया क कुबरी होइ चाही। 4 इ टहरइ वाली कुबरियन क मिलापवाला तम्बू मँ करार क सन्दूख क अगवा धइ द्या। इ उहइ ठउर अहइ जहाँ मइ तोहसे भेंटत अहउँ। 5 मइँ एक मनई क सच्चा होइवाला याजक चुनब। तू जानि लेब्या कि कउने मनई क मइँ चुनेउँ ह। काहे की उ कुबरी मँ नई पाती निकरब सुरु होइ। इ तरह मइँ मनइयन क आपन अउ तोहरे खिलाफ सदा ओराहना देइ स रोकब।”
6 तउ मूसा इस्राएली मनइयन स बात किहस। प्रधान मँ स हर एक ओका एक ठु कुबरी दिहस। सब कुबरियन क गनती बारह रही। हर ए परिवार दल क नेता क एक कुबरी ओहमाँ रही। हारून क कुबरी ओहमाँ रही। 7 मूसा करार क मिलापवाला तम्बू मँ यहोवा क समन्वा कुबरियन क धइ दिहस।
8 अगला दिन मूसा तम्बू मँ घुसा। उ लखेस कि हारून क उ कुबरी, जउन लेवी बंस क रही, सिरिफ एक अइसी रही कि जेहसे नई पाती निकरब सुरु भई रहिन। उ कुबरी मँ डारि फूटि आइन अउ ओहमा बदाम लग गए रहेन। 9 एह बरे मूसा यहोवा क ठउर स सबहिं कुबरियन क लइ आवा। मूसा इस्राएल क मनइयन क कुबरियन देखँएस अउ हर एक मनई आपन कुबरी वापिस लइ लिहस।
10 तब यहोवा मूसा स कहेस, “हारून क कुबरी क करार वाला सन्दूखे क समन्वा रख द्या। इ ओनँ मनइयन क चिताउनी होइ जउन हमेसा मोरे खिलाफ जात हीं। इ ओनकइ मोरे खिलाफ सिकाइत क रोकी। इ तरह उ पचे मरिहीं नाहीं।” 11 तउ मूसा ओन हुकुमन क मानेस जउन यहोवा दिहे रहा।
12 इस्राएल क मनइयन मूसा स कहेस, “हम पचे जानित ह कि हम सबइ मरि जाब। हम विनास होइ गए। हम सबहिं विनास होइ गवा। 13 कउनो मनई जउन यहोवा क पवित्तर ठउर क निअरे आवत ह मरि जाइ। का इ फुरइ बा कि हम सबइ मरि गएन?”
याजकन अउ लेवी बंसी लोगन क कारज
18 यहोवा हारून स कहेस, “तू, तोहार पूतन, अउ तोहरे पिता क परिवारे क सब मनई कउनो पाप जउन पवित्तर ठउरे क सम्बंधित कीन्ह ग अहइ क जिम्मेदार अहइँ। तू अउ तोहार पूत याजकिये स सम्बन्धि कउनो भी बरे जिम्मेदार होइहीं।[a] 2 दूसर लेवी मनइयन क आपन साथ देइ बरे आपन परिवार समूह स लइ आवा। उ सबइ तोहार अउ तोहरे पूतन क मदद साच्छी क तम्बू क काम करइ मँ करिहीं। 3 लेवी परिवार क उ सबइ मनई तोहरे मातहत अहइँ। उ पचे उ सबहिं कामे क करिहीं जेनका तम्बू मँ किया जाब अहइ। मुला उ पचेन क वेदी या पवित्तर ठउर क बर्तनन क लगे न जाइ चाही। जदि उ पचे अइसा करिहीं तउ उ सबइ मरि जइहीं अउ तू भी मरि जाब्या। 4 उ पचे तोहरे संग होइहीं अउ तोहरे संग काम करिहीं। उ पचे मिलापवाला तम्बू क देखइ रेखइ क जिम्मेदार होइहीं। सब कारज, जेका तम्बू मँ कीन्ह जाइ चाही, उ पचे करिहीं। दूसर कउनो भी उ ठउर क नगिचे न आइ जहाँ तू अहा।
5 “पवित्तर ठउर अउ वेदी क देख-रेख करइ क जिम्मेदार तू अहा। मइँ इस्राएल क मनइयन प फुन कोहाइ नाहीं चाहत हउँ। 6 मइँ खुद तोहरे मनइयन यानी लेवी बंस क लोगन क खुद इस्राएल क सबहिं मनइयन मँ स चुनेउँ ह। उ पचे यहोवा क दीन्ह गवा उपहार अहइ अउर उ पचन्क परमेस्सर क सेवा करइ अउर मिलापवाला तम्बू क काम करइ बरे आपिर्त कीन्ह गवा अहइ। 7 मुला सिरिफ तू अउ तोहार पूत याजकन क रूप मँ सेवा कइ सकत हीं। अकेले तू ही वेदी क लगे जाइ सकत ह। तू अकेले महापवित्तर ठउर क पर्दा क भितरे जाइ सकत ह। याजक क रूप मँ तोहार सेवा एक ठु उपहार जेका मइँ तोहका देत हउँ। कउनो भी दूसर, जउन पवित्तर ठउर क लगे आइ, मारि डावा जाइ।”
8 तब यहोवा हारून स कहेस, “मइँ खुद तोहका मनइयन जउन खास भेंट चढ़ाएन ह जिम्मेदारी दिहेउँ ह। इस्राएल क लोग जउन सारी भेंट मोका देइहीं उ मइँ तोहका देत अहउँ। तू अउ तोहार पूत इ पवित्तर भेंटन क आपुस मँ बाटि सकत ह। इ हमेसा तोहार होइ। 9 इ ओन सबहिं पवित्तर भेंटन मँ इ तोहार आपन हींसा होइ जेका जलावा नाहीं गवा ह। हरेक भेंटन, हरेक अन्नबलि, हरेक पापबलि अउ हरेक दोखबलि जउन उ मोरे लगे लइ आवत हीं, इ सबइ तोहर अउ तोहरे पूतन बरे बहोत पवित्तर भेंटन होइ हीं। 10 उ सबन चीजन क महापवित्तर ठउरे मँ खा। तोहरे परिवार क हर मरद मनसेधू ऍका खाइ सकत ह मुला तोहका सुमिरइ चाही कि उ सबइ भेंट पवित्तर अहइँ।
11 “अउर उ सबहिं चीजिन जेका इस्राएली उत्तोलन बलि क रूप मँ देइहीं, तोहरइ होइहीं। मइँ ऍका तोहका, तोहार पूतन अउ तोहार बिटियन क देत हउँ। इ तोहार हींसा अहइ। तोहरे परिवार क हर एक मनई जउन सुद्ध होई, ऍका खाइ सकी।
12 “अउर मइँ सारा बढ़िया जइतून क तेल अउ सबन त बढ़िया नीक नई दाखरस अउ अनाज तोहका देत अहउँ। इ सबइ उहइ चीजन बाटिन जेका इस्राएल क लोग मोका यानी आपन यहोवा क देत हीं। इ सबइ उ चीजियन बाटिन जेका उ पचे आपन फसिल पाक जाए प बटोरत हीं। 13 सबइ चीज जउन तोहार भूइँया स आवत ही क पहिला फल परमेस्सर क अहइ। एह बरे इ चीजन क मइँ तोहका देब। अउर हर एक मनई जउन परिवार मँ सुद्ध होई ऍका खाइ सकी।
14 “अउर हर एक इस्राएल मँ जउन यहोवा क दीन्ह जात हीं, तोहार बा।
15 “कउनो भी परिवारे मँ पहिलौटी क पूत या गोरु परमेस्सर क भेंट होइ। उ तोहार होइ। मुला तोहका हर एक पहिलौटी लरिका अउ पहिला पइदा भवा असुद्ध गोरु क फुन स वापिस लइ लेइ चाही। तब पहिला पइदा बच्चा फुन उ परिवार क होइ जाइ। 16 जब लरिका बच्चा एक महीना क होइ जाइँ तब्बइ तोहका ओकर बरे दाम लइ लेइ चाही। ओका मुक्त करावइ क मूल्य पाँच सेकेल चाँदी पवित्तर स्थान क अधिकारिक माप अनुसार होइ चाहीं। एक सेकेल बीस गेरा क बराबर होत ह।
17 “मुला तोहका पहिलौटी क गइया या भेड़ी या बोकरा क दाम नाहीं लेइ चाही। उ सबइ गोरु तउ पवित्तर बाटेन। ओनकइ रकत वेदी प छिछकारा अउर ओनकइ चर्बी बारा। इ भेंट आगी क जरिए दीन्ह जात ह। इ भेंट क महकब मोरे बरे यानी यहोवा बरे सोहइवाली गंध होइ। 18 मुला इ गोरुअन क गोस तोहार होइ जइसे कि उत्तोलन बलि क छाती तोहार होइ अउर भेंटन क दहिनी जाँघन तोहार होइ। 19 कउनो भी चीज, जेका लोग पवित्तर भेंट क रूप मँ मोका चढ़ावत ही, मइँ यहोवा ओका तोहका देत हउँ। इ तोहार हींसा अहइ। मइँ ऍका तोहका, तोहार बेटहनन अउ तोहार बिटिहिनियन क देत अहउँ। इ यहोवा क संग किया गवा करार अहइ जउन हमेसा बना रही। मइँ इ बचन तोहका अउ तोहरे सन्तानन क देत अहउँ।”
20 यहोवा हारून स इ भी कहेस, “तू कउनो भी भुइयाँ न पउब्या। अउर अइसी कउनो भी चीज नाहीं रखब्या जइसी दूसर लोग राखत हीं। मइँ तोहार अंस अउ मइँ इस्राएल क लोगन क बीच तोहार उत्तरधिकार अहइ।
21 “इस्राएल क लोग जउन कछू ओनके लगे होइ ओकर दसवाँ हींसा देइहीं। इ तरह मइँ लेवी बंस क सन्तानन क दसवाँ हींसा देत अहउँ। इ ओनके उ काम क मजूरी अहइ जउन उ पचे मिलापवाला तम्बू मँ सेवा करत भए करत रहत हीं। 22 मूला इस्राएल क दूसर लोगन क मिलापवाला तम्बू क निअरे कबहुँ नाहीं जाइ चाही। जदि उ पचे अइसा करत हीं तउ ओनका अपने आप मरइ क होइ। 23 जउन लेवी बंसी मिलापवाला तम्बू मँ काम करत अहइँ उ पचे ऍकरे खिलाफ पाप क जिम्मेदार होइहीं। इ कनून हमेसा बरे होइ। लेवीबंसी उ भुइँया क न लेइहीं जेका मइँ इस्राएल क दूसर लोगन क बचन दिहेउँ ह। 24 मुला इस्राएल क लोगन क लगे जउन कछू होइ ओकर दसवाँ हींसा मोका देइहीं। इ तरह मइँ लेवी बंसी मनइयन क दसवाँ हींसा देब। इहइ कारण अहइ कि मइँ लेवीबंसी मनइयन बरे कहेउँ ह: उ पचे उ भुइँया क न पइहीं जेका मइँ इस्राएल क मनइयन क देइ क वचन दिहेउँ ह।”
25 यहोवा मूसा स कहेस, 26 “लेवी बंसी मनइयन स बात करा अउ ओनसे कहा, ‘इस्राएल क लोग हर एक चीज क दसवाँ हीसां यहोवा क देइहीं। उ दसवाँ हींसा लेवी बंसी मनइयन क होइ। मुला ओकर दसवाँ हींसा यहोवा क ओनकी भेंट क रूप मँ देइ चाही। 27 अउर उ दसवाँ हींसा क इ समुझा जाब कि तू खरिहान स अनाज या दाखरस क कोलहू स दाखरस भेंट किहे रहा। 28 इ तरह तू यहोवा क वइसेन ही भेंट देब्या जइसे इस्राएल क दूसर लोग देत हीं। तू इस्राएल क मनइयन क दीन्ह गवा दसवाँ हीसां पउब्या। अउर तू ओकर दसवाँ हीसां याजक हारून क देब्या। 29 जब इस्राएल क लोग आपन हर एक चीज क दसवाँ हींसा देइँ तउ तोहका ओहमाँ स सबन त जियादा पवित्तर हींसा चुनइ चाही। उहइ दसवाँ हींसा अहइ जेका तोहका यहोवा क देइ चाही।’
30 “मूसा, लेवी लोगन स इ कहा, ‘लोग जउन कछू तोहका देत ह ओका सबन त अच्छा हींसा जब तू भेंट करब। तउ इ अइसा होइ जइसा तू एका खरिहान स आनाज या दाखरस क कोलहू स दाखरस भेंट किहे रहा। 31 जउन बाकी बची ओका तू अउ तोहार परिवार ऍका कउनो जगह खाइ सकत ह। इ तू मनइयन क उ काम बरे मजूरी अहइ जउन तू पचे मिलापवाला तम्बू मँ करत बाट्या। 32 अउर अगर तू ऍकर सब स बढ़िया हीसां यहोवा क देत रहब्या तउ तू कबहुँ दोखी न होब्या। तू इस्राएल क मनइयन क पवित्तर भेंट क बरे दूसित न करब्या अउर तू मरब्या नाहीं।’”
लाल गइया क राखी
19 यहोवा मूसा अउ हारून स बात किहेस अउ कहेस, 2 “इ सबइ कनून अउर नेमॅ अहइँ जेका यहोवा इस्राएल क मनइयन क दिहे अहइ। ओनका बिना दोखे क एक लाल गइया तोहार लगे लिआवइ। उ गइया क कउनो खोचा भी नाही लागी रहइ चाही। अउर न ही कबहुँ ओका काँधे पइ कउनो जुआ धर दीन्ह गवा ह। 3 इ गइया क याजक एलीआज़ार क द्या। एलीआज़ार गइया क सिबिर स बाहेर लइ जाइ अउ हुवाँ गइया क मारी। 4 तब याजक एलीआज़ार ऍकर कछू रकत आपन अँगुरी प लगाइ। तब ओका कछू रकत पवित्तर तम्बू क ओर छिछकारइ चाही। ओका इ सात दाई करइ चाही। 5 तब पूरी गइया क उ समइ जलाइ चाही जब उ लखत ह। चाम गोस, रकत अउ गोबर सबन क फूँकि देइ चाही। 6 तब याजक एक ठु देवदारु क लकड़ी, हिस्सप क डार अउ एक लाल तॉत लेइ चाही। याजक क इ चीजन क उ आगी मँ नावइ चाही जेहमाँ गइया बरत होइ। 7 तब याजक क अपने क अउ अपने ओढ़ना क धोवइ चाही। तब ओका सिबिर मँ लउटइ चाही। याजक साँझ तलक असुद्ध रही। 8 जउन मनई गइया क फूँकि ओका आपन क आपन ओढ़ना क पानी स धोवइ चाही। उ साँझ तलक असुद्ध रही।
9 “तब एक मनई जउन सुद्ध होइ, गइया क राखी बटोरी। उ इ राखी क सिबिर क बाहेर एक सुद्ध ठउरे प राखी। इ राख ओनका असुद्धता क सुद्धीकरण क उपयोग क लइ इस्रएलियन दुआरा रखइ जाब्या।
10 “उ मनई जउन गइया क राखी बटोरेस, आपन ओढ़ना धोइ। उ साँझ तलक असुद्ध रही।
“इ नेमॅ सदा चलतइ रही। इ नेमॅ इस्राएल क नागरिक लोगन बरे अहइ अउर ओन बिदेसी मनइयन बरे भी बाटइ जउन तोहरे बीच रहत हीं। 11 जदि एक मनई कउनो मरे मनई क छुअत ह तउ उ सात दिन बरे असुद्ध होइ जाइ। 12 ओका आपन क तीसरे दिन अउ फुन सतऍ दिन पानी स धोवइ चाही। जदि उ अइसा नाहीं करत तउ उ सुद्ध नाहीं होइ। 13 जदि कउनो मनई ल्हास क छुअत ह तउ उ मनई जउन असुद्ध अहइ। जदि उ मनई जउन असुद्ध अहइ पवित्तर तम्बू क जात ह तउ पवित्तर तम्बू अपवित्तर होइ जात ह। एह बरे उ मनई क इस्राएलियन स निकारइ दीन्ह जाइ। जदि सुद्धीकरण क जल उ असुद्ध मनई प नाहीं छिरकइ जात ह, उ असुद्ध ही रहब्या।
14 “इ नेमॅ ओन लोगन स जुड़ा बाटइ जउन तम्बू मँ मरि जात हीं। जदि कउनो व्यक्ति तम्बू मँ मरि जात ह तउ तम्बू क हर एक मनई अउर हर एक चीज असुद्ध होइ जाइ। उ सबइ सात दिना तलक असुद्ध रइहीं। 15 अउर हर बे ढकना क कूँड़ा या बासन असुद्ध होइ जात ह। 16 जदि कउनो ल्हास क छुअत ह तउ उ मनई सात दिना तलक असुद्ध रही। इ तब भी लागू होइ जब ल्हास खुला मैदान मँ या जुद्ध क मइदान मँ मरा होइ। जदि कउनो मनई मरा भवा मनई क हाड़ या कबर क छुअत ह तउ उ मनई सात दिना तलक असुद्ध रहब्या।
17 “एह बरे तोहका बारी भइ गइया क राखी क प्रयोग उ मनई क फुन सुद्ध करइ बरे करइ चाही। बहता भवा जल गगरी मँ धरी राखी प डावा। 18 सुद्ध मनई क एक हिस्सप डार लेइ चाही अउ ऍका पानी मँ बोरइ चाही। तब ओका तम्बू, घारी अउ तम्बू मँ जउन मनइयन होइँ ओन पइ इ पानी छिरकइ चाही। तोहका ओन मनइयन क संग इहइ करइ चाही जउन ल्हासे क छुअइँ। तोहका इ ओकरे संग भी करइ चाही जउन लराइ मँ मारे मनइयन क ल्हासे क छुअत ह। या उ कउनो क संग भी जउन कउनो मरे मनई क हाड़े क या कबर क छुअत ह।
19 “तउ कउनो सुद्ध मनई इ जल क असुद्ध मनई प तीसरे दिन अउ फुन सतऍ दिन छिरकइ। सतऍ दिन उ मनई सुद्ध होइ जात ह। ओका आपन ओढ़ना क पानी मँ धोवइ चाही। उ साँझ तलक पवित्तर होइ जात ह।”
20 “जदि कउनो मनई असुद्ध होइ जात ह अउ सुद्ध नाहीं होत तउ ओका इस्राएल क मनइयन स निकारइ दीन्ह जाइ। उ मनई प सुद्धीकरण क जल नाहीं छिरका गवा। उ सुद्ध नाहीं भवा। एह बरे उ पवित्तर तम्बू क असुद्ध कइ सकत ह। 21 इ नेमॅ तोहरे बरे सदा होइ। जउन मनई इ सुद्धीकरण क जल क छिरकत ह ओका भी आपन ओढ़ना जरुर धोइ लेइ चाही। जउन मनई इ सुद्धीकरण क जल क छुइ उ साँझ तलक असुद्ध रही। 22 जदि कउनो असुद्ध मनई कउनो दूसर क छुअइ तउ भी असुद्ध होइ जाइ। उ मनई साँझ तलक असुद्ध रही।”
ईसू पाँच हजार स जिआदा मनई क खियाएस
(मत्ती 14:13-21; लूका 9:10-17; यूहन्ना 6:1-14)
30 ईसू क चारिहुँ कइँती सुसमाचार क प्रचार करइवाले प्रेरितन ईसू क पास जमा भएन। जउन उ पचे किहेन अउर सिखाएन सब कछू बताएन। 31 तब ईसू ओनसे कहेस, “तू पचे खुदइ मोरे संग एकांत जगहिया मँ आवा अउर तनिक आराम करा।” फिन हुवाँ बहोत मनई क आउब जाब लाग रहा। ऍसे उ सब खाइ क समइ नाहीं पाएन।
32 एह बरे उ सब मिलिके खुदइ नाउ स एकांत जगहिया मँ गएन। 33 मुला बहोत जने ओनका जात भवा देखेन अउर पहिचानेन कि उ सब कउन रहेन। इ कारण उ लोग सबहिं सहरन स हुवाँ धरतिया प धावत गएन अउर उ पचे ओनसे पहिले पहुँचेन। 34 जबहिं ईसू नाउ स उतरा, उ एक भारी भीर देखेस। तबहिं उ ओनके बरे दुःखी भवा, इ कारण कि उ सबइ बिना गड़रिया क भेड़ नाहीं रहेन। अइसे उ बहोत बातन सिखावइ लाग।
35 तब तलक साँझ होइ गइ। एह बरे ओकर चेलन ओकरे नगिचे आएन अउर बोलेन, “इ एकांत जगह अहइ अउर दिनवा ढरि ग अहइ। 36 मनइयन क पठवा, जइसे उ पचे नगिचे खेतन अउर गाउँन मँ जाइ सकइँ अउ आपन बरे कछू खाइके बेसहि लेइँ।”
37 मुला जवाबे मँ ईसू ओनसे कहेस, “तू ओनका कछू खाइके द्या।”
उ सब ओहसे कहेन, “का हम पचे जाई अउर दुई सौ दीनार[a] क बराबर रोटी बेसही अउर ओनके खाइ क बाँटी?”
38 ईसू ओनसे कहेस, “केतॅनी रोटी तोहरे पास अहइ? जा अउर देखा।”
जब उ पचे पता पाएन, उ पचे कहेन, “हमरे पाँच ठु रोटी अउर दुइ मछरी अहइँ।”
39 फिन ईसू चेलन क हुकुम देहेस, “हर एक क हरिअर घसिया प पंगत मँ बइठइ बरे कहा।” 40 तबहिं उ सब सउ सउ अउर पचास पचास क पंगत मँ बइठ गएन।
41 तइसेन ईसू पाँच रोटिन्यक अउर दुइ मछरिन्क उठाइ के सरग क ओर निहारत भवा धन्यबाद दिहेस अउर रोटिन्क तोड़ेस। उ आपन चेलन क ओनका बाँटइ बरे दिहस।
42 उ सबइ भरपेट खाएन अउर उ सबइ अघाइ गएन। 43 ओकरे बाद उ सब रोटी अउर मछरी क बचा भवा बाहर टुकरन क झउआ मँ उठाएन। 44 पुरुसन क गनती जउन खइया क खाएन पाँच हजार रही।
ईसू क पानी प चलब
(मत्ती 14:22-33; यूहन्ना 6:16-21)
45 फिन तुरंत ईसू आपन चेलन नाउ मँ बइठाएस जेहसे उ सबइ जब भिरिया क बिदाई पहिले झील क ओह पार बैतसैदा चला जाइँ। 46 ईसू भीर क बिदाई क बाद पहाड़ी प पराथना बरे गवा।
47 जब सांझ भइ, नाउ झिलिया क मँझधर मँ रही अउर उ भुइयाँ प अकेल्ले रहा। 48 उ ओनका नाउ खेवत क मुसीबते मँ देखेस, काहेकि हवा ओनके खिलाफ बहत रही। लगभग तीन स छ बजे क समइ भिंसारेउ ओनके निअरे झिलिया प चलत आवा। जइसे हि ओनके निअरे स जाइ क भवा, 49 उ पचे ओका पानी प चलत भवा निहारेन। उ सब अंजाद लगाएन कि कउनो बड़वार दुस्ट आतिमा अहइ। ऍसे उ पचे डेरात भए चिचिआनेन। 50 मुला उ पचे ओका निहारेन अउर उ सब ससाइ गएन। तुरंतहि उ ओनसे बोला, “हिम्मत रखा। इ मइँ हउँ जिन डेराअ।” 51 फिन उ ओनके संग नाउ प चढ़ि गवा, तब आँधी पटाइ गइ। ऍसे उ सबइ अचरज मँ पड़ि गएन। 52 उ पचे रोटियन क अद्भुत कारज क बारे मँ समझ पाएन नाहीं। ओनके दिमाग कठोर होइ गवा।
ईसू बहुतेन बेरमियन क नीक किहेस
(मत्ती 14:34-36)
53 जब उ सब झील पार कइ लिहन तउ गन्नेसरत क घाटे प आएन अउर नाउ क बाँध लिहन। 54 जबहिं उ पचे नाउ क छाँड़ि क उतर आएन, मनइयन ईसू क पहिचान लिहन। 55 उ पचे समूचे पहंटा मँ भागत फिरेन अउर बेरमियन क बिछउना प जहाँ कहूँ उ पचे सुनेन कि ईसू हुवाँ बा, लादि क लइ जाइ लागेन। 56 जहाँ कहूँ उ गाउँ मँ कस्बन मँ या खेतन मँ जात रहा, उ पचे आपन बेरमियन क हाटन मँ बइठाइ देतेन अउर उ पचे ईसू स बिनती करतेन कि उ आपन ओढ़ना क एक हींसा छुअइ दे। अउर सबइ जउन ऍका छुएन नीक होइ गएन।
Awadhi Bible: Easy-to-Read Version. Copyright © 2005 Bible League International.