Old/New Testament

पवित्तर तम्बू क समर्पण

7 जउने दिन मूसा पवित्तर तम्बू क लगाउब समापन किहेस, उ ऍका यहोवा क अर्पण किहस। मूसा तम्बू अउ एहमाँ प्रयोग मँ आवइवाली चीजन, अउर वेदी अउ एहमाँ प्रयोग आवइवाली चीजन अउर वेदी अउ एहमाँ प्रयोग आवइवाली चिजियन प खास तेल डाएस इ ओन सबइ चीजन क पवित्तर किहेस।

² तब इस्राएल क नेता लोग भेंट चढ़ाएन। इ पचे आपन-आपन परिवारे क मुखिया रहे रहेन जउन आपन परिवार समूहन क नेता रहेन। इ नेता लोग मनइयन क गनेन। ³ इ सबइ नेता यहोवा बरे भेंट लइ आएन। उ पचे चारिहुँ ओर स ढँकी छ: ठु गाड़ी अउ बारह ठु बर्धा क लइ आएन। (हर एक नेता क जरिये एक ठु बर्धा दीन्ह गइ रही। अउर दुइ नेता क जरिये एक ठू गाड़ी दीन्ह गइ रही) नेता लोग पवित्तर तम्बू मँ यहोवा क इ चीजन क दिहेन।

⁴ यहोवा मूसा स कहेस, ⁵ “नेता लोग क इ चीजन क अंगीकार करा। इ चीजन क लेवि-बंस क मनइयन क द्या। इ ओनका मिलापवाला तम्बू प काम करइ मँ सहायक होइ।”

⁶ एह बरे मूसा चारिहुँ कइँती स ढकी भइ गाड़ियन अउ गइयन क लिहस। उ इ चीजन क लेवी-बंस क लोगन क दिहस। ⁷ उ दुइ गाड़ी अउ चार ठु गाइ गेर्सोन बंसी लोगन क दिहेस। ओनका आपन काम बरे ओन गाड़ियन अउ गइयन क जरुरत रही। ⁸ तब मूसा चार ठु गाड़ी अउ आठ ठु गइया मरारी बंस क मनइयन क दिहस। ओनका आपन काम बरे गाड़ी अउ गइयन क जरूरत रही। याजक हारून क पूत ईतामार इ सबहिं मनइयन क काम बरे जिम्मेदार रहा। ⁹ मूसा कोहात बंसी मनइयन क कउनो गाइ या कउनो गाड़ी नाहीं दिहस। इ मनइयन क पवित्तर चीजन आपन कॉधे प ढोउब रहा इहइ कारज ओनका करइ बरे सौंपा ग रहा।

¹⁰ जउन दिन मूसा वेदी प तेल डाएस, उहइ दिन नेता लोग वेदी क अर्पण बरे आपन भेंट चढ़ावइ बरे लइ आएन। उ पचे आपन भेंट वेदी क समन्वा यहोवा क भेंट किहन। ¹¹ यहोवा पहिले स ही मूसा स कहे रहा, “हर दिन एक एक नेता वेदी प भेंट चढ़ावइ लइ जाइ।”

^12-83 [a] बारहु-नेतन मँ स हर एक नेता आपन-आपन भेंट लइ आवा।

उ सबइ भेंट इ अहइँ: हर एक नेता चाँदी क एक ठु थाली लइ आवा जेकर वजन एक सौ तीस सेकेल अउर एक चाँदी क खोरा जेकर वजन सत्तर सेकेल रहा। इ दुइनउँ उपहार क पवित्तर स्थान क सेकेल क अनुसार भवा बटखरा स तउला गवा रहा। हर खोरा अउ हर थाली मँ तेल महीन आटा भरा रहा। इ अन्नबलि क रूप मँ प्रयोग मँ लइ जात रहा। हर नेता सोना क एक बड़का कलछुला भी लइ आवा जेकर वजन दस सेकेल रहा। इ कलछुला मँ धूप भरी रही।

हर नेता एक ठु बछवा, एक भेड़ा अउ एक बरिस क नर मेमना भी लइ आवा। इ गोरुअन होमबलि बरे रहेन। हर नेता पापबलि क रूप मँ बइपरइ बरे एक बोकरा भी लावा। हर नेता दुइ गाइ, पाँच भेड़ा, पाँच बोकरा अउ एक-एक बरिस क पाँच मेमना लिआवा। इ सबन क एक मलेबलि बरे बलि दीन्ह गइ।

पहिले दिन अम्मीनादाब क पूत नहसोन, जउन यहूदा क परिवार समूह स रहा, आपन भेंट लिआवा।

दूसर दिन सूआर क बेटवा नतनेल जउन इस्साकार क नेता रहा, आपन भेंट लिआवा।

तीसरे दिन हेलोन क बेटवा एलीआब जउन जबूलून क नेता रहा, आपन भेंट लिआवा।

चउथे दिन सदेऊर क पूत एलीसूर जउन रूबेनियन क नेता रहा, आपन भेंट लिआवा।

पँचए दिन सूरीसद्दै क पूत सलुनीएल जउन सिमोनियन क नेता रहा, आपन भेंट लिआवा।

छठऍ दिन दूएल क बेटा एल्यासाप जउन गादियन क नेता रहा, आपन भेंट लिआवा।

सतऍ दिन अम्मीहूद क बेटवा एलीसामा जउन एप्रैम क नेता रहा, आपन भेंट लिआवा।

अठऍ दिन पदासूर क पूत गम्लीएल जउन मनस्से क मनइयन क नेता रहा, आपन भेंट लिआवा।

नवें दिन गिदोनी क पूत अबीदान जउन बिन्यामीन क मनइयन क नेता रहा, आपन भेंट लिआवा।

दसऍ दिन अम्मीसद्दै क बेटवा अहीयाजर जउन दान क लोगन क नेता रहा, आपन भेंट लिआवा।

ग्यारहवें दिन ओक्रान क बेटवा पजीएल जउन आसेर क लोगन क नेता रहा, आपन भेंट लिआवा।

अउर फिन बारहवें दिन एनान क बेटवा अहीरा जउन नप्ताली मनइयन क नेता रहा, आपन भेंट लइके आवा।

⁸⁴ इ तरह इ सबहिं चीजन इस्राएली मनइयन क नेता लोगन क भेंट रही। इ चीजन तब लाइ गइन जब मूसा खास तेल वेदी प एका अर्पण बरे डाएस। उ पचे बारह चाँदी क तस्तरी, बारह चाँदी क खोरा अउ बारह सोना क चम्मच लाएन। ⁸⁵ चाँदी क हर तस्तरी क वजन लग भग एक सौ सेकेल रहा। अउर हरेक खोरा क चाँदी क वजन लगभग सत्तर सेकेल रहा। चाँदी क तस्तरियन अउ चाँदी क खोरन क कुल माना गवा वजन^[b] दुइ हजार चार सौ सेकेल रहा। ⁸⁶ धूप स लबालब सोना क चम्मच मँ स हर एक क माना गवा वजन चार औसं रहा। बारह सोने क चम्मचन क कुल वजन करीब करीब उ पौडं रहा।

⁸⁷ होमबलि बरे गोरुअन क कुल गनती बारह बर्धा, बारह भेड़ा अउ बारह एक बरिस क भेड़ी क नर बच्चा रहेन। हुवाँ अन्नबलि भी रहा। यहोवा क पापबलि क रूप मँ प्रयोग मँ आवइ वाला कुल बारह बोकरा भी रहेन। ⁸⁸ नेता लोग मेलबलि क रूप मँ प्रयोग अउ मारा जाइ बरे गोरुअन क दिहन। इ सबइ गोरुअन क एक साथ गनती चौबीस बर्धा, साठ भेड़ा, साठ बोकरा अउ साठ एक बरिस क भेड़ी क नर बच्चा भी रहेन। इ तरह उ पचे वेदी क इ चीजन अर्पण कई बरे भेंट किहेन। इ मूसा वेदी प खास तेल डाइ क पाछे भवा।

⁸⁹ मूसा मिलापवाला तम्बू मँ यहोवा स बात करइ गवा। उ टेमॅ उ आपन स बात करत भइ यहोवा क वाणी सुनेस। उ वाणी करार क सन्दूखे क ऊपर क बिसेख ढकना क दुइनउँ करूब सरगदूतन क बगल स आवत रही। इ तरह परमेस्सर मूसा स बात किहस।

डीबट

8 यहोवा मूसा स कहेस, ² “हारून स बात करा अउ ओसे कहा, ‘उ ठउरन प सात दिया धरा जेका मइँ तोहका देखाँएउँ ह। उ सबइ दियन डीबट क समन्वा क डेबरा क रोसन करिहीं।’”

³ हारून इ किहेस। हारून ओनॅ दियन क ठीक ठउर प धरेस अउ ओनकइ मुँह अइसा कइ दिहस कि ओसे डीबट क समन्वा क पहँटा उजियर होइ सकइ। उ मूसा क दीन्ह गवा यहोवा क हुकुम क मानेस। ⁴ डीबट सोने क पाटी स बना रहा। सोना क उपयोग पावा स लइ क उपर डीबट क सोना क फूल तलक कीन्ह गवा रहा। इ सब उहइ तरह बना रहा जइसा यहोवा मूसा क देखॉए रहा।

लेवी बंस क मनइयन क समर्पण

⁵ यहोवा मूसा स कहेस, ⁶ “लेवी बंस क मनइयन क इस्राएल क दूसर मनइयन स अलग लइ जा। ओनॅ लेवी बंसी मनइयन क सुद्ध करा। ⁷ इ तोहका सुद्ध बनावइ बरे करइ क होइ। पापबलि स खास पानी^[c] ओन प छिरका। इ पानी ओनका सुद्ध करी। तब उ पचे पूरा सरीर स बार उस्तरा स कटवइहीं अउ आपन ओढ़ना क धोइहीं। इ ओनके सरीर क सुद्ध करी।

⁸ “तब उ पचे एक नवा बर्धा अउ ओकरे संग प्रयोग मँ आवइवाली अन्नबलि लेइहीं। इ अन्नबलि तेले स साना भवा आटा होइ। तब दूसर बर्धा क पाप बरे भेंट क रूप मँ ल्या। ⁹ लेवी बंस क मनइयन क मिलापवाला तम्बू क समन्वा पहँटा मँ लिआवा। तब इस्राएल क सबहिं मनइयन क चारिहुँ कइँती स बटोरा। ¹⁰ तब तोहका लेवी बंस क मनइयन क यहोवा क समन्वा लइ आवा। अउ इस्राएल क लोग आपन हाथ ओन प धरीहीं। ¹¹ तब हारून लेवी बंस क लोगन क यहोवा क समन्वा लाइ। उ पचे यहोवा बरे उत्तोलनबलि क रूप मँ होइहीं। इ ढंग स लेवी बंस क लोग यहोवा क विसेस काम करइ बरे तइयार होइहीं।

¹² “लेवी बंस क लोगन स कहा कि उ पचे आपन हाथ बर्धा क मूँड़े प धरिहीं। एक बर्धा यहोवा क पापबलि क रूप मँ होइ। दूसर बर्धा यहोवा क होमबलि क रूप मँ काम आइ। इ भेंट लेवी-बंस क मनइयन क पाप बरे प्रायस्चित करी। ¹³ लवि बंस क मनइयन स कहा कि उ पचे हारून अउ ओकरे पूतन क अगवा खड़ा होइ। तब यहोवा क समन्वा लेवी बंस क मनइयन क उत्तोनबलि क रूप मँ अर्पण करा। ¹⁴ इ तरीका स लेवी बंस क लोग खास होइहीं। उ पचे इस्राएल क दूसर मनइयन स अलग होइहीं। अउर लेवी बंस क लोग हमार होइहीं।

¹⁵ “एह बरे लेवी बंस क मनइयन क सुद्ध करा। अउर ओनका यहोवा क समन्वा उत्तोलन बलि क रूप मँ हाजिर करा। जब इ पूरा हो जाइ तब उ पचे आइ सकत हीं अउर मिलापवाला तम्बू मँ आपन काम कइ सकत हीं। ¹⁶ इ सबइ लेवी बंसी इस्राएल क लोग अहीं जउन मोका दीन्ह ग अहइँ। मइँ ओनका आपन लोग क रूप मँ अंगीकार किएउँ ह। बीते भए जमाना मँ हर एक इस्राएली परिवार मँ पहिलौटी क पइदा लरिका मोका दीन्ह जात रहा मुला मइँ लेवी बंस क मनइयन क इस्राएल क दूसर परिवारन क पहिलौटी क बेटवन क जगह प अंगीकार किहेउँ ह। ¹⁷ इस्राएल क हर मनई जउन हर एक परिवार मँ पहिले पइदा भवा ह, मोर अहइ। जदि उ मनई या गोरु अहइ तउ भी मोर अहइ। मइँ मिस्र मँ सबहिं पहिला पइदा गदेलन अउ जनावर क मारि डाएउँ रहा। एह बरे मइँ पहिला पइदा पूतन क अलग किहेउँ जेहँसे उ पचे मोर होइ सकइँ। ¹⁸ अब मइँ लेवी बंस क मनइयन क लइ लिहेउँ ह। मइँ इस्राएल क दूसर लोगन क परिवारन मँ पहिला पइदा भएन गदेलन क ठउर प ऍनका अंगीकार किहेउँ ह। ¹⁹ मइँ इस्राएल क सबहिं लोगन स लेवी बंस क मनइयन क चुनेउँ ह। मइँ ओनका हारून अउ ओकरे पूतन क ऍनका उपहार क रूप मँ दिहेउँ ह। मइँ चाहत हउँ कि उ पचे मिलापवाला तम्बू मँ काम करइँ। उ पचे इस्राएल क सबहिं मनइयन बरे सेवा करिहीं। अउर उ पचे ओन बलिदानन क देइ मँ मदद करिहीं जउन इस्राएल क लोगन क पापन क प्रायस्चित करिहीं। तब कउनो बड़ा रोग या कष्ट इस्राएल क लोगन क नाहीं होइ जब उ पचे पवित्तर ठउर क लगे अइहीं।”

²⁰ एह बरे मूसा, हारून अउ इस्राएल क सबहिं लोगन यहोवा क हुकुम मानेन। उ पचे लेवी बंस क खातिर वइसा ही किहेन, जइसा यहोवा ओनके बरे मूसा क हुकुम दिहे रहा। ²¹ लेवी लोग आपन क फर्छा किहेन अउ आपन ओढ़ना क धोएन। तब हारून ओनका यहोवा क समन्वा उत्तोलन बलि क रूप मँ हाजिर किहेस। हारून उ भेंटन क भी चढ़ाएस जेका ओनकर पापन क प्रायस्चित करइ बरे चढ़ावा गवा रहा जउन ओनका पवित्तर कइ दिहे रहा। ²² ओकरे पाछे लेवी बंस क लोग आपन काम करइ बरे मिलापवाला तम्बू क आएन। हारून अउ ओकर पूतन ओनकइ देखरेख किहेन। उ पचे लेवी बंस क मनइयन क काम बरे जिम्मेदार रहेन। हारून अउ ओकर पूतन ओन आदेसन क मानेन जेका यहोवा मूसा क दिहे रहेन।

²³ यहोवा मूसा स कहेस, ²⁴ “लेवी बंस क मनइयन बरे इ विसेस आदेस अहइ: हर एक लेवी बंस क मनसेधू क, जउन पचीस बरिस या ओसे जिआदा उमर क अहइ, जरुर आवइ चाही अउ मिलापवाला तम्बू मँ क काम मँ हाथ बटावइ चाही। ²⁵ जब कउनो मनई पचास साल क होइ जाइ तउ ओका रोजाना क कामे स छुट्टी लेइ चाही। ओका फुन काम करइ क जरुरत नाहीं अहइ। ²⁶ पचास साल या ओसे जियादा उमर क लोग मिलापवाला तम्बू मँ आपन भाइयन क ओनके काम मँ मदद दइ सकत हीं। मुला उ पचे खुद काम नाहीं करिहीं। तोहका इ सब करइ चाही जब तू लेवि मनइयन क ओनका काम करइ क द्या।”

जउन तोहरे पास अहइ ओका बइपरा

(लूका 8:16-18)

²¹ फिन ईसू ओनसे कहेस, “का कहुँ दिया एह बरे लियाइ जात ह कि एक खोरा या बिछउना क नीचे धरा जाइ? का ऍका डिवटे प धरइ बरे नाहीं लिआइ जात? ²² अइसे अइसा कछू नाहीं गुप्त अहइ जेका छिपाइ क धरा जाइ अइसा कउनो रहस्य नाहीं जउन खुलि न सकइ। हर छिपाइ गइ बात खुलि के समन्नवा आई। ²³ तोहरे पास जेकरे कान होइ तउ उ सुन लेइ। ²⁴ धिआन द्या जउन तू सुनत अहा। जउन नपना तू दूसर बरे बइपरत अहा, तउन नपना स तू नापा जाब्या। लेकिन तोहरे बरे कछू अउ जोरि दीन्ह जाइ। ²⁵ जेकरे पास अहइ ओका अउर दीन्ह जाई अउर जे धरे नाहीं, जउनहुँ कछू धरे होइ ओसे उहइ लइ लीन्ह जाई।”

बिया क दिस्टान्त

²⁶ फिन ईसू कहेस, “परमेस्सर क राज्य अइसा अहइ कउनो मनई खेतन मँ बिया छितरावइ। ²⁷ रतिया मँ सोवइ अउर दिनवा मँ जागइ। बिया अँखुवाइ, इ सबइ बाढ़ई। उ जानत नाहीं, इ कइसे होत अहइ। ²⁸ भुइँया खुदइ दाना उ पजाइ देत ह। पहिले अँखुवा, तब बाले फि बाले मँ समुचइ दाना। ²⁹ जब दनवा पकि जात ह, तबहिं फउरन हसुआ काटइ बरे धरत ह। एह बरे कि फसल काटइ क अहइ।”

रइया क दनवा क दिस्टान्त

(मत्ती 13:31-32,34-35; लूका 13:18-19)

³⁰ फिन ईसू कहेस, “मइँ कउने तरह बताई कि परमेस्सर क राज्य अइसे अहइ? मइँ ओका समझावइ क बरे कउन स दिस्टान्त बइपरी? ³¹ उ सरसों क दाना क नाईं अइसा अहइ। इ सबते छोट अहइ जब तू भुइँया मँ बोवत ह। ³² जबहिं तू ऍका रोपि देत ह, इ बाढ़ छोड़िके बगिया क पउधन मँ सब ते बड़वार होइ जात ह। ऍहमाँ बड़ी बड़ी डारि आवत हीं। ऍसे चिरिया आपन घोंसला छाया मँ बइठइ बरे बनावत हीं।”

³³ एकरे तरह ढेर ठु दिस्टान्त स उ उपदेस दिहेस, जेतना उ पचे समझि सकत रहेन। ³⁴ ईसू उनसे बगइर दिस्टान्त क कछू नाहीं कहेस। मुला जब उ अकेल्ला मँ आपन चेलन क संग अकेल्ला होत, उ सब बातन ओनसे खोलिके समुझाएस।

ईसू बौंड़र क रोक देत ह

(मत्ती 8:23-27; लूका 8:22-25)

³⁵ उ दिन जब सांझ भइ, ईसू ओनसे कहेस, “मोरे साथ झिलिया क ओह पार आवा।” ³⁶ जइसेन ईसू अउर ओकर चेलन भिरिया क छोड़ि दिहन अउर जउनी हालत मँ ईसू रहा, बइसेन ओहका चेलन नाउ मँ लइ चलेन। हुवाँ दूसर नाउन ओकरे संग रहीं। ³⁷ एक ठु भारी बौंड़र आवा अउर लहरन नाउन क धकियावत अउर नाउ क भीतर आवत रहीं। ऍसे ओहमाँ पानी भरि जाइवाला रहा। ³⁸ लेकिन ईसू नाउ क पाछे भाग मँ तकिया लगाइ क सोवत रहा। चेलन ओका जगाइन अउर ओसे कहेन, “हे गुरु, का तोहका धियान नाहीं बा कि हम पचे बूड़त अही।”

³⁹ तबहिं ईसू जागा अउर हवा क फटकारेस अउर लहरन स कहेस, “सान्त! थमि जा!” तइसे बौंड़र पटाइ गवा अउर खूबइ सान्ति आइ गइ।

⁴⁰ फिन ईसू ओनसे कहेस, “तू काहे डेरात बाट्या? का अब तलक तोहका बिसवास नाहीं भवा?”

⁴¹ मुला उ पचे बहोतइ डराइ गएन अउर उ पचे आपस मँ एक दूसर स कहइ लागेन, “आखिर इ अहइ कउन बा कि आँधि अउर पानी ओकर हुकुम मानत हीं।”