Old/New Testament

मिरियन मरत ह

20 इस्राएल क मनई सीन रेगिस्तान मँ पहिले महीना मँ पहोंचेन। लोग कादेस मँ रुकि गएन। मिरियम क मउत भइ अउ उ हुवाँ दफनाई गइ।

मूसा क गलती

² उ जगह प मनइयन बरे पानी जियादा नाहीं रहा। एह बरे लोग मूसा अउ हारून क खिलाफ सिकाइत करइ बटुर गएन। ³ मनइयन मूसा स बहस किहेन। उ सबइ केहन, “इ नीक होत कि हम आपन भइयन क तरह यहोवा क समन्वा मर गए होतेन। ⁴ तू यहोवा क मनइयन क इ रेगिस्तान मँ काहे लियाया? का तू चाहत ह कि हम अउ हमार गोरु हिआँ मरि जाइँ? ⁵ तू हम पचन क मिस्र स काहे लिआया? तू हम पचन क बुरे ठउर प काहे लिआया ह? हिआँ कउनो अनाज नाहीं अहइ, कउनो अंजीर, अंगूर या अनार नाही अहइ। अउर हिआँ पिअइ बरे पानी नाहीं अहइ।”

⁶ एह बरे मूसा अउ हारून उ मनइयन क तजि दिहन अउ उ पचे मिलापवाला तम्बू क दुआरे पहोंचेन। उ पचे हुआँ पैलगी किहेन। यहोवा क मोजूदगी क तेज ओन पइ परगट भवा।

⁷ यहोवा मूसा स बात किहेस। उ कहेस, ⁸ “आपन भाई हारून अउ मनइयन क भीड़ क संग ल्या अउ उ चट्टान तलक जा। आपन टहरइ वाली कुबरी क ल्या। मनइयन क समन्वा चट्टान स बात करा। तबहिं चट्टान स पानी बही। अउर तू उ पानी आपन मनइयन अउ जानवरन क दइ सकत ह।”

⁹ टहरइ वाली कुबरी यहोवा क समन्वा पवित्तर तम्बू मँ रही। जइसा यहोवा कहे रहा, मूसा टहरइवाली कुबरी लिहस। ¹⁰ मूसा अउ हारून मनइयन स चट्टाने क समन्वा मिलइ क कहेन। तब मूसा कहेस, “तू लोग सदा बिद्रोह करत ह। अब मोरउ सुना। का हम इ चट्टाने स पानी बहाउब?” ¹¹ मूसा आपन भुजा उठाएस अउ दुइ दाईं चट्टानें प चोट किहेस। चट्टान स पानी बहइ लाग। मनइयन अउ गोरुअन पानी पिएन।

¹² मुला यहोवा मूसा अउ हारून स कहेस, “इस्राएल क सबहिं मनइयन चारिहुँ कइँती बटुरा रहेन। मुला तू पचे मोका उ लोगन क समन्वा पवित्तर नाहीं ठहराया। तू पचे मनइयन क नाहीं बताएस कि मइँ चट्टान स पानी कइसा बहाएस ह। तू सबइ मनइयन क नाहीं बताया कि तू सबइ मोहे प पतियाना ह। मइँ ओन मनइयन क उ देस देब जेका देइ क मइँ बचन दिहेउँ ह। मुला तू सबइ उ देस मँ ओनका पहोंचावइ वाला न रहब्या।”

¹³ इ ठउर क नाउँ मरीबा क पानी कहा जात रहा। इ उहइ ठउर अहइ जहाँ इस्राएल क मनइयन यहोवा स वाद-विवाद किहन। अउर इ उहइ ठउर रहा जहाँ यहोवा इ देखँए रहा कि उ पवित्तर रहा।

एदोम इस्राएल क पार नाहीं होइ दिहस

¹⁴ जब मूसा कादेस मँ रहा, उ कउनो मनइयन क एदोम क राजा क लगे एक संदेसा क संग पठएस। संदेसा इ रहा:

“तोहरे भाई लोग तोहसे इ कहत हीं: तू जानत ह कि हम पचे केतॅनी तकलीफ उठावा ह। ¹⁵ बहोत बहोतइ बरिस पहिले हमार पुरखन मिस्र चला ग रहेन। अउर हम पचे हुवाँ देर बरिस रहेन। मिस्र क मनई हम सबन बरे निर्दयी रहेन। ¹⁶ मुला हम पचे यहोवा क मदद क बिनती कीन्ह। अउर उ हम सबन क मदद बरे एक सरगदूत पठाएस। यहोवा हम पचन क मिस्र स बाहेर लइ आएन ह।

“अब हम पचे कादेस मँ अही जहाँ स तोहार पहँटा सुरु होत ह। ¹⁷ कृपा कइके आपन देस स हम पचन क जात्रा करइ देइँ। हम पचे कउनो खेत या अंगूरे क बाग स जात्रा नाहीं करब। हम पचे तोहरे कउनो इनारा स पानी नाहीं पिअब। हम पचे सिरिफ राजपथ स जात्रा करब। हम पचे राजपथ क तनिके दाहिन बाऍ नाहीं बढ़ब। हम पचे तब तलक राजपथ प ठहरब जब तलक तोहरे धरती क पार नाहीं कइ जाइत।”

¹⁸ मुला एदोम क राजा उत्तर दिहस, “तू हमरे देस स होइके जात्रा नाहीं कइ सकत्या। जदि तू हमरे देस स जात्रा करइ क कोसिस करत ह तउ हम पचे आउब अउ तोहसे तरवारे स लड़ब।”

¹⁹ इस्राएल क मनइयन जवाब दिहन, “हम पचे बड़की सड़क स जात्रा करब। जदि हम या हमार गोरु तोहार कछू पानी पीहीं तउ हम पचे ओकरे दाम क भुगतान करब। हम सबइ तोहरे देस स सिरिफ चलिके पार जाइ चाहित ह। हम सबइ ऍका आपन बरे लेइ नाहीं चाहित।”

²⁰ मुला एदोम फिन जवाब दिहस, “हम पचे आपन देस स होइके तोहका जाइ नाहीं देब।”

तब एदोम क राजा एक ठु बहोत बड़वार अउ ताकतवर फउज बटोरेस अउ इस्राएल क मनइयन स लड़इ बरे निकर पड़ा। ²¹ एदोम क राजा इस्राएल क मनइयन क अपने देस स जात्रा करइ बरे मना कइ दिहस। अउर इस्राएल क लोग मुड़ गए अउर दूसरे राहे स चल पड़ेन।

हारून मरि जात ह

²² इस्राएल क सब मनइयन कादेस स होर पहाड़े तलक जात्रा किहन। ²³ होर पहाड़ एदोम क चौहद्दी प रहा। यहोवा मूसा अउ हारून स कहेस, ²⁴ “अब हारून क मरि क समइ अउर आपन पुरखन क लगे जा मिलइ क समइ आ गवा ह। इ उ पहॅटा मँ न जाइ जेका देइ क मइँ इस्राएल क मनइयन क बचन दिहेउँ ह। मूसा, मइँ इ तोहसे कहत हउँ काहेकि मरीबा क पानी क बारे मँ तू अउ हारून मोरे दीन्ह ग हुकुम क खिलाफ बिद्रोह किहस।

²⁵ “हारून अउ ओकरे पूत एलीआज़ार क हॉर पहाड़े प लिआवा। ²⁶ हारून क खास ओढ़ना क ओसे ल्या अउ ओन ओढ़नन क ओकर पूत एलीआज़ार क पहिरावा। हारून हुवाँ पहाड़े प मरी। अउर उ आपन पुरखन क संग होइ जाइ।”

²⁷ मूसा यहोवा क हुकुम क मानेस। मूसा, हारून अउ एलीआज़ार हॉर पहाड़े प गएन। इस्राएल क सब मनइयन ओका जात लखेन। ²⁸ मूसा हारून क ओढ़ना उतार लिहस अउ ओन ओढ़ना क हारून क पूत एलीआज़ार क पहिराएस। तब हारून पहाड़े क चोटी प मरि गवा। मूसा अउ एलीआज़ार पहाड़े स उतरि आएन। ²⁹ तबहिं इस्राएल क सब मनइयन जान लिहन कि हारून गुजर गवा। एह बरे इस्राएल क हर मनई तीस दिना तलक हारून बरे गमी मनाएस।

कनानीयन स जुद्ध

21 एक कनानी अराद क राजा रहा। उ नेगेव रेगिस्तान मँ रहत रहा। अराद क राजा सुनेस कि इस्राएल क मनइयन अथारीम कइँती जाइवाली सड़क स आवत अहइँ। एह बरे राजा बाहेर निकरा अउ इस्राएल क मनइयन प हमला किहस। उ ओहमाँ स कछू क धइ लिहस अउ ओनका बंदी बनाएस। ² तब इस्राएल क मनइयन यहोवा क इ बचन दिहन, “हे यहोवा! इ मनइयन क हरावइ मँ हमार मदद करा। ऍनका हमरे मातहत कइ द्या। जदि तू अइसा करब्या तउ हम पचे ओनके सहरन क पूरी तरह बरबाद कइ देब।”

³ यहोवा इस्राएल क मनइयन क बिनती सुनेस। अउर यहोवा इस्राएल क लोगन स कनानी मनइयन क हरवाइ दिहस। इस्राएल क मनइयन कनानी लोगन अउ ओनके सहरन क पूरी तरह नास कइ दिहन। एह बरे उ ठउरे क नाउँ होरगा पड़ा।

काँसा क साँप

⁴ इस्राएल क मनइयन होर पहाड़े क तजेन अउ लाल सागर क जाइवाली सड़क स जात्रा प गएन। उ पचे अइसा एदोम क देस क चारिहुँ कइँती जाइ बरे किहेन। मुला मनइयन क धीरा नाहीं रहा। ⁵ उ सबइ परमेस्सर अउ मूसा क खिलाफ ओराहना सुरु किहन। मनइयन कहेन, “तू हम सबन क मिस्र स बाहेर काहे लिआया ह? हम पचे हिआँ रेगिस्तान मँ मरि जाब! हिआँ रोटी नाहीं मिलत! हिआँ पानी नाहीं! अउर हम पचे इ सड़ाइंध खइया स घिना करित ह।”

⁶ एह बरे यहोवा मनइयन क बीच बिखैला साँपन पठाएस। साँपन ओन मनइयन क डस लिहस अउ बहोत स लोग मरि गएन। ⁷ लोग मूसा क लगे आएन अउ ओसे कहेन, “हम पचे जानित ह कि जब हम पचे यहोवा अउ तोहरे खिलाफ बोलइ क पाप किहे अहउँ। यहोवा स पराथना करा अउ ओसे कहा कि इ साँपन क दूर करइ।” एह बरे मूसा लोगन बरे पराथना किहस।

⁸ यहोवा मूसा स कहेस, “एक ठु काँसा क साँप बनावा अउ ओका एक ठु खम्बा प धरा। अगर कउनो मनई क साँप डसइ तउ उ मनई क खम्बा क ऊपर काँसा क साँप लखइ चाही। तब इ तरह उ मनई मरी नाहीं।” ⁹ एह बरे मूसा यहोवा क हुकुम मानेस अउ एक काँसा क साँप बनाएस अउ ओका एक खम्बा प धरेस। तब जब कबहुँ कउनो मनई क साँप डसत रहा तउ ओका खम्बा पइ काँसा क साँप क लखइ क होइ रहा। अउ जिअत रहत रहा।

होर पहाड़े स मोआब क घाटी तलक क जात्रा

¹⁰ इस्राएल क लोग उ जगह क तजि दिहेन अउ ओबोत नाउँ क जहग प सिबिर डाएन। ¹¹ तब मनइयन ओबोत स इये अबारीम तलक क जात्रा किहन। अउर हुआँ सिबिर डाएन। इ मोअब क पूरब रेगिस्तान मँ रहा। ¹² तब मनइयन उ ठउर क छोड़ दिहन अउर जेरेद घाटी क जात्रा किहन। उ पचे हुवाँ सिबिर डाएन। ¹³ तब उ पचे चलेन अउ रेगिस्तान क अर्नोन नदी क ओह पार सिबिर डाएन। इ नदी एमोरियन क चउहद्दी स सुरु होत रही। घाटी मोआब क चउहद्दी अउ एमोरी क बीचउ बीच रही। ¹⁴ इहइ कारन अहइ कि यहोवा क जुद्ध किताबे मँ नीचे लिखा भवा हाल मिलत ह।

“अउर सूपा मँ बाहेब, अनोर्न क घाटी। ¹⁵ अउर अर क बस्ती तलक पहोंचावइ वाली घाटी क किनारे क पहाड़ी। इ ठउर मोआब क चउहद्दी प अहइँ।”

¹⁶ इस्राएल क मनइयन उ ठउर क तजेन अउर उ पचे बीर क जात्रा किहन। इ ठउर प एक ठु इनार रहा। यहोवा मूसा स कहेस, “हिआँ सबहिं मनइयन क बटोरा अउर मइँ ओनका पानी देब।” ¹⁷ तब इस्राएल क मनइयन गीत गाएन:

(तउ मनइयन ऍका “मत्ताना” नाउँ क इनारा कहेन।)

¹⁹ तब मनइयन मत्ताना स नहलीएल क जात्रा किहेन। फुन उ पचे नहलीएल स बामोत क जात्रा किहन। ²⁰ मनइयन बामोत स मोआब मँ घाटी तलक क जात्रा किहन। इ ठउरे प पिसगा पहड़ क चोटी रेगिस्तान क ऊपर देखाँइ पड़त ह।

सिहोन अउ ओगँ

²¹ इस्राएल क मनइयन कछू मनइयन क एमोरी लोगन क राजा सीहोन क लगे पठाएस। इ मनइयन राजा स कहेन,

²² “आपन देस स होइ के हमका जात्रा करइ द्या। हम पचे कउनो खेत या अंगूरे क बगिया स होइके न जाब। हम पचे तोहरे कउनो इनारा क पानी न पिअब। हम सबइ सिरिफ राज-पथ स होइके जात्रा करब। हम सबइ तब तलक उ सड़क प ठहरब जब तलक हम पचे तोहरे देसे स होइके जात्रा पूरी नाहीं कइ लेइत।”

²³ मुला राजा सीहोन इस्राएल क लोगन क आपन देस स होइके जात्रा करइ क रजामन्दी नाहीं दिहस। राजा आपन फउज बटोरेस अउ रेगिस्ताने कइँती चल पड़ा। उ इस्राएल क खिलाफ हमला करत रहा। यहज नाउँ क एक ठउरे प राजा क फउज इस्राएल क लोगन क संग लड़ाई लड़ेस।

²⁴ मुला इस्राएल क लोगन राजा क मारि डाएन। तब उ पचे अनोर्न घाटी स लइके यब्बाक इलाका तलक ओकरे पहँटा प कब्जा कइ लिहेन। इस्राएल क मनइयन अम्मोनी लोगन क हद तक क पहँटा प कब्जा किहन। उ पचे अउर जियादा इलाका प कब्जा नाहीं किहन काहे की उ हद अम्मोनी लोगन क जरिए सुरच्छित रही। ²⁵ मुला इस्राएल अम्मोनी लोगन क सबहिं सहरन प कब्जा कइ लिहन। उ पचे हेसबोन नगर तलक अउ ओकरे चारिहुँ कइँती क छोटके सहरन क भी हराइ दिहन। ²⁶ हेसबोन उ सहर रहा जेहमा राजा सीहोन रहत रहा। ऍकरे पहिले सीहोन मोआब क राजा क हराए रहा अउ सीहोन अनोर्न घाटी ताईं सब पहँटन प कब्जा कइ लिहे रहा। ²⁷ इहइ कारण अहइ कि गवइया इ गीत गावत हीं:

³¹ एह बरे इस्राएल क मनइयन एमोरियन लोगन क देस मँ रहेन।

³² मूसा कछू खुफिया लोगन क याजेर प नजर धरइ बरे पठाएस। मूसा क अइसा करइ क पाछे इस्राएल क मनइयन उ सहर प कब्जा कइ लिहन। उ पचे ओकरे चारिहुँ कइॅती क छोटके सहरन प भी कब्जा कइ लिहन। इस्राएल क मनइयन उ ठउरे प बसइया एमोरी लोगन क उ ठउर तजि देइ क मजबूर किहन।

³³ तब इस्राएल क लोग बासान कइँती जाइवाली सड़क प जात्रा किहन। बासान क राजा ओग आपन फउज लिहस अउ इस्राएल क लोगन क मुकाबाला करइ निकरा। उ एद्रेइ नाउँ क पहँटा मँ ओनके खिलाफ लड़ा।

³⁴ मुला यहोवा मूसा स कहेस, “उ राजा स जिन सिबिरअ। मइँ तोहका ओका हरावइ देब। तू ओकर पूरी फउज अउ पहॅटा क पउब्या। तू ओकरे संग उहइ करा जउन तू एमोरी लोगन क राजा सिहोन क संग किहा ह।”

³⁵ एह बरे इस्राएल क लोगन ओग अउ ओकर फउज क हाराया। उ सबइ ओका, ओकर बेटवन अउ ओकर सारी फउज क हराएन। तब इस्राएल क मनइयन ओकरे पूरे देस क कउनो क बिना जिउत छोड़इ क कब्जा कइ लिहन।

बिलाम अउ मोअब क राजा

22 तब इस्राएल क मनइयन मोआब क समतल स होइ के यरदन नदी क पार यरीहो तलक जात्रा किहेन। ^2-3 सिप्पोर क पूत बालाक उ सब लखेस जेका इस्राएल क मनइयन एमोरी मनइयन क संग किहे रहेन। मोआब बहोतइ जियादा डेराइ ग रहा काहे की हुवाँ इस्राएल क बहोत मनई रहेन। मोआब इस्राएल क लोगन स बहोत ससान रहा।

⁴ मोआब क राजा मिद्यान क नेता लोगन स कहेस, “मनइयन क इ बड़का झुण्ड हमरे चारिहुँ कइँती क सब चीज क वइसे ही बरबाद कइ देइ जइसे कउनो गइया खेते क घास चरि जात ह।”

इ टेमॅ सिपोर क पूत बालाक मोआब क राजा रहा। ⁵ उ कछू मनइयन क बोर क पूत बिलाम क बोलावइ बरे पठाएस। बिलाम फरात नदी क निअरे पतोर नाउँ क पहँटा मँ रहा। बालाक कहेस,

“मनइयन क एक नवा रास्ट्र मिस्र स आवा ह। उ पचे ऍतना जियादा अहइँ कि समूचइ प्रदेस मँ संचर सकत हीं। उ पचे ठीक हमरे निअरे सिबिर डाए अहइँ। ⁶ आवा अउ इ मनइयन क संग भिड़इ मँ मोर मदद करा। उ पचे मोर ताकत स जियादा बरिआर ताकत वाला अहइँ। इ होइ सकत ह कि तब मइँ ऍनका हराइ सकउँ। तब मइँ ओनका आपन देस छोड़इ क मजबूर कइ सकउँ। मइँ जानत अहउँ कि तू बड़की ताकत धरत ह। अगर तू कउनो मनई क आसीर्बाद देइ तउ उ आसीसित होइ, अगर तू कउनो मनई क सराप देइ तउ उ मनई सापित होइ।^[a] एह बरे आवा अउ इ मनइयन क सराप देइ।”

⁷ मोआब अउ मिद्यान क नेतन बालाम स मिलइ बरे गएन अउर आपन संग जादूइ सेवा क फीस भी लइ गएन। तब उ पचे, बालाक जउन कछू कहे रहा, ओसे कहेन।

⁸ बिलाम ओनसे कहेस, “हिआँ रात भइ ठहरा। मइँ यहोवा स बात करब अउर जउन जवाब, उ पचे मोका देइहीं, उ तोहसे कहब।” एह बरे उ रात मोआबियन क नेता ओनके संग ठहरेन।

⁹ परमेस्सर बिलाम क लगे आवा अउ उ पूछेस, “तोहरे संग इ सबइ कउन लोग अहइँ?”

¹⁰ बिलाम परमेस्सर स कहेस, “मोआब क राजा सिपोर क पूत बालाक एक संदेसा मोका देइ बरे ओनका पठए अहइ। ¹¹ सँदेसा इ अहइ: मनइयन क एक ठु नवा रास्ट्र मिस्र स आवा अहइ। उ पचे ऍतना जियादा अहइँ कि समूचइ देस मँ फइलि सकत हीं। एह बरे आवा अउ इ मनइयन क खिलाफ कछू कहा। इ होइ सकत ह ओनसे लड़इ मँ मइँ समर्थ होइ सकउँ अउ आपन देस तजि देइ क ओनका मजबूर कइ सकउँ।”

¹² मुला परमेस्सर बिलाम स कहेस, “ओनके संग जिन जा। तू ओनका सराप नाहीं देइ चाही, काहेकि उ आसीर्बाद पाएस ह।”

¹³ दूसर दिन बिलाम उठा अउ बालाक क नेता स कहेस, “अपने देस क लउटि जा। यहोवा मोका तोहरे संग नाहीं जाइ देइहीं।”

¹⁴ एह बरे मोआबी नेता बालाक क लगे लउटि गएन अउ ओसे इ बात किहेन। उ पचे कहेन, “बिलाम हम सबन क संग आवइ स मना कइ दिहे अहइ।”

¹⁵ एह बरे बालाक दूसर नेता लोगन क बिलाम क लगे पठाएस। इ दाई उ पहिली दाई क अपेच्छा बहोत ढेर क मनई पठाएस। अउर इ नेता लोग पहिली दाई क अपेच्छा जियादा सम्मान्न रहेन। ¹⁶ उ सबइ बिलाम क निअरे गएन अउ कहेन: “जिपोर क पूत बालाक तोहसे कहत ह: कृपा कइके आपन क हिआँ आवइ स कउनो क रोकइ जिन द्या। ¹⁷ जउन मइँ तोहसे माँगत अहउँ जदि तू उ करब्या तउ मइँ तोहका बहोत जियादा भुगतान करब। आवा अउ इ मनइयन क खिलाफ मोरे बरे कछू कहा।”

¹⁸ मुला बिलाम उ मनइयन क जवाब दिहस। उ कहेस, “मोका यहोवा मोरे परमेस्सर क आग्या मानइ चाही। मइँ ओकरे हुकुम क खिलाफ कछू नाहीं कइ सकत हउँ। मइँ बड़का-छोटका कछू भी तब तलक नाहीं कइ सकत जब तलक परमेस्सर नाहीं कहत कि मइँ ओका कइ सकत हउँ। अगर राजा बालाक आपन सोना चाँदी भी सुन्दर घर क भी दइ देइ तउ भी मइँ आपन परमेस्सर यहोवा क हुकुम क खिलाफ कछू नाहीं करब। ¹⁹ मुला तू भी ओन दूसर लोगन क तरह आज क रात हिआँ ठहर सकत ह। अउ रात मँ मइँ जान जाब कि यहोवा मोहसे क कहवावइ चाहत ह।”

²⁰ उ रात परमेस्सर बिलाम क लगे आवा। परमेस्सर कहेस, “इ लोग अपने संग लइ जाइ बरे कहइ खातिर फुन आवा अहइँ। एह बरे तू ओनके संग जाइ सकत ह मुला सिरिफ उहइ करा जउन मइँ तोहसे करइ क कहउँ।”

बिलाम अउ ओकर गदहा

²¹ दूसरे भिन्सारे बिलाम उठा अउ अपने गदहा प काठी धरेस। तब उ भी मोआबी नेता लोगन क संग गवा। ²² बिलाम आपन गदहा प सवार रहा। ओकरे नउकरन मँ स दुइ ठु ओकर संग रहेन। जब बिलाम जात्रा करत रहा तउ परमेस्सर ओन प कोहाइ गवा। एह बरे यहोवा क सरगदूत बिलाम क समन्वा सड़के प खड़ा होइ गवा। सरगदूत बिलाम क रोकइ जात रहा।

²³ बिलाम क गदहा यहोवा क सरगदूत क सड़क प खड़ा देखेस। सरगदूत क हाथ मँ एक तरवार रही। एह बरे सड़क स मुड़ा अउ खेत मँ चला गवा। बिलाम सरगदूत क नाहीं लख सकत रहा। एह बरे उ गदहा प बहोत कोहान। उ गदहा क पीटेस अउ ओका सड़क प लउटइ क मजबूर किहस।

²⁴ पाछे यहोवा क सरगदूत अइसी जगह प खड़ा भवा जहाँ सड़क संकरी होइ गइ रही। इ दुइ अंगूर क बगियन क बीच क ठउर रहा। हुवाँ सड़क क दुइनउँ ओर देवार रहिन। ²⁵ गदहा यहोवा क सरगदूत क फुन निहारेस। एह बरे गदहा एक देवारे स चिपकिके निकरा। ऍहसे बिलाम क गोड़ देवारे स पिचक गवा। एह बरे आपन गदहा क फुन स पीटेस। ²⁶ ऍकरे पाछे यहोवा क सरगदूत दूसर ठउर प खड़ा भवा। इ दूसर जहग रही जहाँ सड़क सॅकराइ ग रही। हुवाँ कउनो अइसी जगह नाहीं रही जहाँ गदहा मुड़ सकइ। ²⁷ गदहा यहोवा क सरगदूत क लखेस। एह बरे गदहा बिलाम क आपन पीठ प लइके जमिन प बइठि गवा। बिलाम गदहा पर बहोतइ कोहान रहा। एह बरे उ ओका लाठी स पीटि डाएस।

²⁸ तब यहोवा गदहा क बोलइवाला बनाएस। गदहा बिलाम स कहेस, “तू मोहे प काहे कोहान अहा। मइँ तोहरे संग का किहउँ ह? तू मोका तीन दाई मार्या ह।”

²⁹ बिलाम गदहा क उत्तर दिहस, “तू मोर मज़ाक उड़ाएस ह, तू मोका गलत ठहराएस ह। जदि मोरे हाथे मँ अबहिं सिरिफ एक तरवार होत तउ मइँ अबहिं तोहका मारि डाइत।”

³⁰ मुला गदहा बिलाम स कहेस, “मइँ तोहार आपन गदहा अहउँ, जेह प तू आपन सारा जिन्नगी सवार भवा ह। अउर तू जानत ह कि मइँ अइसा ऍकरे पहिले कबहुँ नाहीं किहेउँ ह।”

“इ सही अहइ।” बिलाम कहेस।

³¹ तब यहोवा बिलाम क सड़क प खड़ा सरगदूत क लखइ दिहस। बिलाम सरगदूत अउ ओकर तरवारि निहारेस। तब बिलाम निहुरिके पैलगी किहस।

³² तब यहोवा क सरगदूत बिलाम स पूछेस, “तू आपन गदहा क तीन दाई काहे मार्या ह? मइँ तोहका रोकइ बरे हिआँ आवा अहउँ। काहेकि तोहार जात्रा मोर आदेस क खिलाफ अहइ। ³³ गधा मोका लखेस। अगर गदहा न मुड़ा होत तउ मइँ तोहका मारि डाए होतेउँ। मुला मोका तोहरे गदहा क नाहीं मारइ क रहा।”

³⁴ तब बिलाम यहोवा क सरगदूते स कहेस, “मइँ पाप किहेउँ ह। मइँ इ नाहीं जानत रहेउँ कि तू सड़क प खड़ा अहा। अगर मइँ बुरा करत अहउँ तउ मइँ घर लउटि जाब।”

³⁵ यहोवा क सरगदूत बिलाम स कहेस, “नाहीं, तू इ मनइयन क संग जाइ सकत ह। मुला होसियार रहा। सिरिफ उ बातन क कहा जउन मइँ तोहसे कहइ बरे कहुब।” एह बरे बिलाम बालाक क जरिये पठए गए नेता लोगन क संग गवा।

³⁶ बालाक सुनेस कि बिलाम आवत अहइ। एह बरे बालाक ओसे मिलइ बरे अर्नोन नदी क निअरे मोआबी सहर गवा। इ ओकरे देस क उत्तरी छोरे प रहा। ³⁷ जब बालाक बिलाम क लखेस तउ उ बिलाम स कहेस, “मइँ एकरे पहिले आप स आवइ क कहेउँ रहा अउर इ भी बताएउँ रहा कि इ बहोत जियादा महत्व स भरा बाटइ। आप हमरे लगे काहे नाहीं आएन? का मइँ तोहका धन देइ क जोग्य नाहीं अहइ?”

³⁸ मुला बिलाम उत्तर दिहस, “मइँ अब तोहरे लगे आवा अहउँ। मुला मइँ, जउन तू करइ क कहे रहा ओहमाँ स, साइद, कछू भी न कइ सकउँ। मइँ सिरिफ उहइ बातन तोहसे कइ सकत हउँ जउन यहोवा परमेस्सर मोसे कहइ क बताएस ह।”

³⁹ तब बिलाम बालाक क किर्यथूसोत गवा। ⁴⁰ बालाक कछू गोरु अउ कछू भेड़िन ओकरे भेंट क रूप मँ मारेस। उ कछू गोस बिलाम अउ कछू ओकरे संग क नेता लोगन क दिहस।

⁴¹ दूसरे भिन्सारे बालाक बिलाम क बमोत बाल नगर लइ गवा। उ सहर स उ पचे इस्राएली मनइयन क कछू सिबिर क लखि सकत रहेन।

परमेस्सर क व्यवस्था मनई क नियम ते बड़ा अहइ

(मत्ती 15:1-20)

7 तबहिं कछू फरीसियन अउर कछू धरमसास्तिरियन जउन यरूसलेम स आएन ओनके चारिहुँ कइँती एकट्ठा भएन। ² अउर उ सबइ ओनके कछू चेलन बिना साफ किए हथवा स खात देखेन। (बिना साफ किया स मतलब इ अहइ कि उ पचन फरीसियन क बताए भए तरीके स हथवा नाहीं धोवत रहेन।) ³ फरीसियन अउर दूसर यहूदियत खाइका नाहीं खातेन जब तलक उ सबइ आपन हथवा क पूर्वजन क रीति स न धोइ लेइँ। ⁴ इहइ तरह उ सब बजारे स खाइ क बरे लावा भवा कउनो चीज तब तक नाहीं खातेन, जब तलक ओहका खास तरीके स न धोइ लेइँ। इहइ तरह अउ बहोत स रितियन अहइँ, जेका उ सबइ करत आवत हइँ जइसे खोरा, गगरी, ताँवा क बासन अउर गद्देदार कुर्सी क धोउब।

⁵ एह बरे फरीसियन अउर धरम सास्तिरियन ओसे पूछेन, “काहे तोहार चेलन पूर्वजन क रीतिन्क करतेन नाहीं, मुला आपन मइले हाथन स खइया क खात हीं?”

⁶ ईसू ओनसे कहेस, “यसायाह तू जइसे कपटिन क बारे मँ पहिले भविस्सबाणी कइ दिहस, जइसा कि लिखा बाटइ:

⁸ तू पचे परमेस्सर क आदेस न उठाइ क एक कइँती धइ दिहा अउर मनई क रीतिन्क परिपाटी क सहारा लइके चलावत अहा।”

⁹ ईसू ओनसे कहेस, “तू आपन पचन क बहोत चलाक समझत अहा। तू परमेस्सर क आदेसन ऐहि बरे टारइ चाहत ह, जेहसे आपन रीतन्क चलाइ सका। ¹⁰ उदाहरण बरे जइसे मूसा कहेस, ‘आपन महतारी बाप क इज्जत द्या।’^(B) अउर ‘जउन मनई महतारी बाप क बुरा भला कहइ ओका मार डावा।’^{(C) 11} तू पचन सिखावत ह, ‘जदि कउनो मनई महतारी बाप स कहत ह कि मोरे जेहि चीज स तोहका फायदा मिल सकत ह, उ परमेस्सर क दइ दीन्ह।’ ¹² तउ तू ओनकर महतारी बाप बरे कछू करइ क मना करत ह। ¹³ इ नाई तू आपन रीति रिवाज स परमेस्सर क बचन क बेकार बनइ देत ह, अउर अइसी बहोत स बातन तू करत ह।”