Old/New Testament

मूसा इस्राएल क मनईयन क गनत ह

1 यहोवा मूसा क संग मिलापवाला तम्बू मँ बात किहस। इ बात सीनै रेगिस्तान मँ भइ। इस्राएल क मनइयन जब मिस्र तजि दिहन ओकरे पाछे इ बात दूसर बरिस क दूसर महीना क पहिले दिन क रही। यहोवा मूसा स कहेस, ² “इस्राएल क सब मनइयन क गना। हर मनई क सूची ओकर परिवार अउ ओकर परिवार-समूह क संग बनावा। ³ तू अउ हारून इस्राएल क सबहिं मनइयन क गनब्या। ओन मनसेधुअन क गना जउन बीस बरिस या ओसे जिआदा उमर क अहइँ। (इ सबइ उ पचे अहइँ जउन इस्राएल क फउज मँ सेवा करत हीं।) एनकइ सूची ऍनके समूह प बनी तइयार करा। ⁴ हर परिवार दल स एक मनई तोहार मदद करी। उ मनई आपन परिवार दल क अगुआ होइ। ⁵ तोहरे साथे रहइ अउ तोहार मदद करइ वाला मनइयन क नाउँ इ अहइँ:

¹⁶ इ सब मनइयन आपन लोगन क जरिए आपन परिवार समूह क अगुआ चुना गएन। इ पचे आपन मनइयन क जरिए परिवार समूह क नेता चुना गएन। इ सबइ आपन परिवार समूह क नेता अहइँ। ^17-18 ऐ बरे मूसा अउर हारून उ मनइयन क लिहस जे नाउँ दुआरा चुना गएस अउ एह बरे दूसर महीना क पहिले दिन रहा। मूसा अउ हारून इ मनइयन अउ इस्राएल क लोगन क एक संग बोलाएस। तब मनइयन क सूची ओन कई परिवार अउ परिवार समूह क मुताबिक बनी। बीस बरिस या ओसे जिआदा उमर क सबहिं मनइयन क सूची बनी। ¹⁹ मूसा ठीक वइसा ही किहेस जइसा यहोवा क हुकुम रहा। मूसा मनइयन क तब गनेस जब उ पचे सीनै क रेगिस्तान मँ रहेन।

⁴⁴ मूसा, हारून अउ इस्राएल क बारह नेता लोग इ सब मनसेधुअन क गनेन। (हर परिवार समूह स एक ठु नेता रहा।) ⁴⁵ इस्राएल क हर एक मनसेधू जउन बीस बरिस या ओसे जिआदा उमर अउ फउज मँ सेवा करइ जोग्ग रहा, गना गवा। इ मनसेधुअन क सूची ओनके परिवार क संग बनी। ⁴⁶ मनसेधुअन क सब गनती 6,03,550 रही।

⁴⁷ लेवी क परिवार समूह स परिवारे क सूची इस्राएल क दूसर मनसेधुअन क संग नाहीं बनी। ⁴⁸ यहोवा मूसा स कहे रहा: ⁴⁹ “लेवी क परिवार समूह क मनइयन क जिन गना। उ क गन्ती इस्राएल क बचा भवा लोगन क संग जिन करा। ⁵⁰ लेवी क मनइयन स कहा कि उ पचे करार क पवित्तर तम्बू क जिम्मेदार अहइँ। उ पचे ओकर अउर ओहमाँ स जउन चीजन अहइँ, ओनका देखा-भाला। उ पचे पवित्तर तम्बू मँ अउ ओकर सबहिं चीजन लइके चलिहीं। उ पचे आपन सिबिर ओकरे चारिहुँ कइँती डइहीं अउ ओकर देख भाल करिहीं। ⁵¹ जब कबहुँ भी पवित्तर तम्बू क जात्रा पइ लइ जावइ जाइ तउ लेवी क मनइयन क ही तम्बू क निचे उतारइ चाही। जब कबहुँ पवित्तर तम्बू कउनो ठउरे प लगाइ जाइ तउ लेवी क मनसेधुअन क ही तम्बू क लगाइ चाही। उ पचे अइसा ही लोगन अहइँ जउन पवित्तर तम्बू क देख-रेख करत हीं। जदि कउनो अइसा दूसर मनई जउन कि लेवी नाहीं अहइ, पवित्तर तम्बू क निअरे ओका देख-रेख करइ बरे आवत ह तउ उ मारि डावा जाइ चाही। ⁵² इस्राएल क मनइयन आपन तम्बू आपन समूहन क अनुसार लगइहीं। हर एक मनई क अनुसार आपन सिबिर आपन परिवार समूह क झण्डा क लगे लगावइ चाही। ⁵³ मुला लेवी क मनइयन क आपन सिबिर पवित्तर तम्बू क चारिहुँ कइँती डावइ चाही। लेवी क मनई करार क पवित्तर तम्बू क रच्छा करिहीं। उ पचे पवित्तर तम्बू क रच्छा करिहीं उ पचे पवित्तर तम्बू क रच्छा करिहीं जेसे इस्राएल क मनइयन क कछू बुरा न होइ।”

⁵⁴ एह बरे इस्राएल क मनइयन ओन सबहिं बांतन क किहेन जेकर हुकुम यहोवा मूसा क दिहन

सिबिर क सरंजाम

2 यहोवा मूसा अउ हारून स कहेस, ² “इस्राएल क मनइयन क मिलापवाला तम्बू क चारिहु कइँती आपन तम्बू लगावइ चाही। हरेक दल क आपन झण्डा होइ अउ हरेक मनई क आपन समूह क झण्डा क लगे आपन तम्बू लगावइ चाही।

³ “यहूदा क सिबिर झण्डा क पूरब मँ होइ जेहर सूरज निकरत ह। यहूदा क मनई हुवँइ सिबिर लगइहीं। यहूदा क मनइयन क अगुआ अम्मीनादाब क पूत नहसोन अहइ। ⁴ इ दल मँ 74,600 मनसेधू रहेन।

⁵ “इस्साकार क परिवार समूह यहूदा क मनइयन क ठीक पाछे होइ। इस्साकार क मनइयन क नेता सूआर क पूत नतनेल अहइ। ⁶ इ दल मँ 54,400 मनसेधू रहेन।

⁷ “जबूलून क परिवार समूह भी यहूदा क परिवार समूह स ठीक आगे आपन सिबिर लगाइ। जबूलून क मनइयन क नेता हेलोन क पूत एलीआब अहइ। ⁸ इ दल मँ 57,400 मनसेधू रहेन।

⁹ “यहूदा क सिबिर मँ 1,86,400 मनसेधू रहेन। इ सबइ आपन अलग-अलग परिवार समूहन मँ बँटा भवा रहेन। यहूदा पहिला समूह होइ जउन उ टेमॅ अगवा चली। जब लोग एक ठउर स दूसर ठउर क जात्रा करिहीं।

¹⁰ “रूबेन क झण्डा पवित्तर तम्बू क दक्खिन मँ होइ। हरके समूह आपन झण्डा क लगे आपन सिबिर लगाइ। रूबेन क लोगन क प्रधान सदेऊर क पूत एलीसूर बाटइ। ¹¹ इ दले मँ 46,500 मनसेधू रहेन।

¹² “सिमोन क परिवार समूह क रूबेन क परिवार समूह क ठीक पाछे आपन सिबिर लगाइ। सिमोन क मनइयन क अगुआ सूरीसद्दल क पूत सलूमीएल अहइ। ¹³ इ दले मँ 59,300 मनसेधू रहेन।

¹⁴ “गद क परिवार समूह भी रूबेन क मनइयन क ठीक पाछे आपन सिबिर लगाइ। गाद क लोगन क प्रधान रूएल क पूत एल्यासाप अहइ। ¹⁵ इ दले मँ 45,650 लोगन रहेन।

¹⁶ “रूबेन क सिबिर मँ सब दलन क 1,51,450 मनसेधू रहेन। रूबेन क सिबिर दूसर समूह होइ जउन उ समइ चली। जब मनई एक ठउर स दूसर ठउर क जात्रा करिहीं।

¹⁷ “जब मनई जात्रा करिहीं तउ लेवी क सिबिर ठीक ओकरे, पाछे चली। मिलापवाला तम्बू दूसर सिबिरन क बीचउ बीच ओनके संग रही। मनइयन आपन सिबिर उहइ सिलसिला मँ लगइहीं जउने क्रम मँ उ पचे चलिहीं। हरेक मनई आपन परिवार क झण्डा क संग रही।

¹⁸ “एप्रैम क झण्डा पच्छिम कइँती रही। एप्रैम क परिवार-दलन हुवँइ सिबिर लगइहीं। एप्रैम क लोगन क प्रधान अम्मीहूद क पूत एलीसामा अहइ। ¹⁹ इ दल मँ 40,500 लोगन रहेन।

²⁰ “मनस्से क परिवार समूह एप्रैम क परिवार क ठीक पाछे आपन सिबिर लगाइ। मनस्से क मनइयन क नेता पदासूर क पूत गम्लीएल अहइ। ²¹ इ दल मँ 32,200 मनसेधू रहेन।

²² “बिन्यामीन क परिवार समूह भी एप्रैम क परिवार क ठीक आगे आपन सिबिर लगाइ। बिन्यामीन क लोगन क नेता गिदोनी क पूत अबीदान अहइ। ²³ इ दले मँ 35,400 मनसेधू रहेन।

²⁴ “एप्रैम क सिबिर मँ 1,08,100 मनसेधू रहेन। इ तीसर परिवार होइ जउन तब चली जब मनईं एक ठउर स दूसर ठउर क जात्रा करिहीं।

²⁵ “दान क सिबिर क निसान उत्तर कइँती होइ। दान क परिवार दलन हुवँइ सिबिर जमाई। दान क मनइयन क प्रधान अम्मीसद्दै क पूत अहीएजेर अहइ। ²⁶ इ दले मँ 62,700 मनसेधू रहेन।

²⁷ “आसेर क परिवार समूह दान क परिवार समूह क ठीक पाछे आपन सिबिर डाइ। आसेर क मनइयन क नेता ओक्रान क पूत पगीएल बाटइ। ²⁸ इ दले मँ 41,500 मनसेधू रहेन।

²⁹ “नप्ताली क परिवार समूह दान क परिवार समूह क ठीक पाछे आपन सिबिर लगाइ। नप्ताली क मनइयन क प्रधान एनान क पूत अहीरा अहइ। ³⁰ इ दले मँ 53,400 मनसेधू रहेन।

³¹ “दान क सिबिर मँ 1,57,600 मनसेधू रहेन। जब मनइयन एक ठउर स दूसर ठउर क जात्रा करिहीं तउ इ काफिला आखिरी परिवार समूह होइ। हर एक मनई आपन झण्डा क अनुसार आपन परिवार क संग होइ।”

³² सबहिं डेरन मँ अलग-अलग दलन क सब परिवारन क मनसेधुअन क समूचइ गिनती रही 6,03,550। ³³ मूसा इस्राएल क दूसर मनइयन मँ लेवी क मनइयन क नाहीं गनेस। इ यहोवा क हुकुम रहा।

³⁴ यहोवा मूसा क जउन कछू करइ क कहेस उ सब क इस्राएलियन मान लिहेन। इस्सर क कहइ क मुताबिक इस्राएल क मनइयन आपन झण्डा तरे आपन सिबिर लगाएन। यहोवा क कहे क मुताबिक इस्राएल क मनइयन जात्रा किहन। हरेक मनई आपन परिवार अउ आपन परिवार समूह क संग रहा।

ईसू सुखंडी हाथ क बेरमिया क चंगा किहेस

(मत्ती 12:9-14; लूका 6:6-11)

3 एक दाईं फिन ईसू आराधनालय मँ गवा। हुवाँ एक ठो मनई रहा जेकर हाथ सुखंडी होइ गवा रहा। ² कछू यहूदी अँखिया गड़ाइ के ईसू क निहारत रहेन कि का उ रोगी क सबित क दिन नीक करी। जदि गलती भए प ओका दोखी कहइँ। ³ ईसू सुखंडी हाथे क मनई स कहेस, “हिआँ खरा होइ जा जइसे सब जने तोहका निहारि सकइँ।”

⁴ तब ईसू ओनसे कहेस अउर लोगन पूछा, “सबित क दिन का करइ क नीक बाटइ? या भलाई करब या बुराई? का ई नीक बाटइ जीउ क बचाउब या मारब?” जबावे मँ ईसू स उ पचे कछू नाहीं कहेन।

⁵ उ गुस्सा मँ ओन पचन क देखेस। ओनके मन क कठोर भए स उ दुखी भवा। फिन उ मनई स कहेस, “आपन हथवा आगे कइँती फइलाव।” उ मनई हथवा ईसू कइँती फइलाएस अउर पहिले जइसा नीक होइ ग। ⁶ तबहिं सबहिं फरीसियन हुवाँ स चल दिहन, अउर तुरंतहि हेरोदियन स मिलि के ओकरे खिलाफ जाल बिछावइ लागेन कि कइसे ओका जान स मारि सकिहीं।

बहोत लोग ईसू क पाछे चलेइ लागेन

⁷ ईसू आपन चेलन क संग गलील छील गवा। गलील क बहुत स लोग ओके पाछे होइ लिहेन। ⁸ बहुत स लोग यहूदिया, यरूसलेम, इदूमिया अउर यरदन नदिया क पार क पहँटा सूर अउर सैदा स आएन। ई मनइयन एह बरे आएन कि ओकरे काम क बारे मँ सुनि लिहन जउन उ करत रहा।

⁹ भिड़िया क मारे उ आपन चेलन स कहेस, “ऍक छोटॅकी नाउ तइयार करा, जेह बरे भीड़ ओका कुचर न डावइ।” ¹⁰ उ बहोतन क नीक किहेस इ नाते उ सब जेनका बेरामी रही, ईसू क छुवइ क बरे भिड़िया क धाकियावत भए रस्ता बनवत चला आवत रहेन। ¹¹ कछू मनई आपन भीतर दुस्ट आतिमन धरे रहेन। जब कबहुँ दुस्ट आतिमन ओका निहारत रहीं, उ सबइ ओकरे सोझे दण्डवत करेन अउर चिचिआनिन, “तू परमेस्सर क पूत अहा!” ¹² मुला उ दुस्ट आतिमन क कर्री चिताउनी देत रहा, अइसा न बतावइ क उ कउन अहइ।

ईसू बारह प्रेरितन क चुनेस

(मत्ती 10:1-4; लूका 6:12-16)

¹³ फिन ईसू पहाड़ी प गवा अउर उ ओनहीं मनइयन क बोलाएस जेका उ चाहत रहा। उ सब ओकरे लगे गएन। ¹⁴ जेहमाँ स उ बारहु क चुनेस अउर ओनका प्रेरितन^[a] क ओहदा दिहेस। उ ओनका एह बरे चुनेस कि उ सब ओकरे संग रहइँ अउर उपदेस प्रचार बरे बाहेर पठइ सकइ। ¹⁵ अउर उ पचे दुस्ट आतिमन क खदेरइ क हक रक्खइँ। ¹⁶ एहि तरह बारहु मनइयन क उ चुनेस?