Old/New Testament

फसह त्यौहार

9 यहोवा मूसा स सीनै रेगिस्तान मँ कहेस। उ टेमॅ दूसर बरिस क पहिला महीना रहा। जब इस्राएल क मनइयन मिस्र स निकरा रहेन। यहोवा मूसा स कहेस, ² “लोगन क तय कीन्ह गवा टेमॅ पइ फसह क दावत जरूर मनावइ चाही। ³ उ तय कीन्ह गवा समइ इ महीना क चउदहवाँ दिन अहइ। ओनका गोधूरि क टेमॅ फसह क भोजन खाइ चाही। ओका इ सबइ कानून अउ नेम क पालन करइ चाही जेका त्यौहार मँ कीन्ह जात ह।”

⁴ एह बरे मोसा इस्राएल क लोगन क फसह क त्यौहार मनावई बरे कहेस। ⁵ अउर लोग पहिला महीन क चउदहवाँ दिन वइसा ही किहेन। इस्राएल क मनइयन हर एक काम वइसन किहेन जइसा यहोवा मूसा क हुकुम दिहे रहेन।

⁶ मुला कछू लोग फसह त्यौहार क भोज उ दिन नाहीं खाइ सकेन। उ पचे एक ल्हास क कारण सुद्ध नाहीं रहेन। एह बरे उ दिन उ पचे मूसा अउ हारून क लगे गएन। ⁷ उ पचे मूसा स कहेन, “हम पचे एक ल्हासे क छुअइ क कारण असुद्ध भवा अहेन। याजकन लोग तय कीन्ह ग टेमॅ प हमेका यहोवा क चढ़ावा देइ स रोक दिहस। तउ हम पचे इस्राएल क दूसर मनइयन क संग फसह त्यौहार नाहीं मनाइ सकित। हमका का करइ चाही?”

⁸ मूसा ओनसे कहेस, “मइँ यहोवा स पूछब कि उ एकरे बारे मँ का कहत ह।”

⁹ तब यहोवा मूसा स कहेस, ¹⁰ “इस्राएल क लोगन स इ बातन कहा: इ विधि तोहार अउर तोहारे सन्तानन बरे होब्या। इ होइ सकत ह कि तू ठीक टेमॅ प फसह त्यौहार न मनाइ सका काहे की तू या तोहरे सन्तानन क कउनो मनई ल्हास क छुइ जाइ क कारण असुद्ध होइ या होइ सकत ह कि उ कउनो लम्बी जात्रा प गवा भवा अहा।” ¹¹ उ फसह त्यौहार दूसर महीना क चउदहवाँ दिन गोधूरि क समइ मनावइ। उ मेमना, बे खमीरे क रोटी अउ करुआ सागपात खाइ। ¹² दूसर दिन क भिन्सारे तलक ओका ओहमाँ स कउनो भी भोजन नाहीं तजइ चाही। ओका भेड़ी क कउनो हाड़ क भी नाहीं तोड़इ चाही। उ मनई क फसह क नेमॅ क मानइ चाही। ¹³ कउनो भी व्यक्ति जउन पवित्तर अहइ अउर लम्बी जात्रा पइ नाहीं अहइ तउ फसह त्यौहार ठीक समइ पइ ही मनावइ चाही। जदि उ मनई फसह त्यौहार ठीक समइ पइ नाहीं मनावत ह तउ ओका आपन मनइयन स अलगइ पठइ दीन्ह जाइ। उ अपराधी बा काहे की उ यहोवा क ठीक टेमॅ प भेंट नाहीं चढ़ाएस। तउ ओका जरुर सजा दीन्ह जाइ चाही।

¹⁴ “तू सबइ क बीच बसइया गेर इस्राएली फसह त्यौहार मँ आवइ चाहइ तउ तोहरे संग हींसा लइ सकत ह। इ कनून मँ अहइ मुला उ मनई क फसह क सब नेमॅ मानइ चाही। उहइ नेमॅ सब बरे अहइँ।”

बादर अउ आगी

¹⁵ जउने दिन पवित्तर तम्बू अउ करार क तम्बू लगावा गवा। यहोवा क बादर ऍका घेरि लिहस। रात मँ, उ बादर आगी क नाईं देखाइ देत रहा। ¹⁶ बादर पवित्तर तम्बू प बराबर थमा रहा। अउर राति मँ बादर आगी क तरह देखाँत रहा। ¹⁷ जब बादर पवित्तर तम्बू प आपन ठउर स तम्बू प ठहरत रहा, इस्राएलियन ऍकर पाछा करत रहेन। जब बादर थमि जात रहा तब इस्राएल क लोग हुवँइ सिबिर डावत रहेन। ¹⁸ इहइ ढर्रा रहा कि यहोवा मनइयन क देखाएस कि कब जात्रा करइँ, कब रुकि जाइँ अउ कब सिबिर डावइँ। अउ जबहिं तबहिं बादर पवित्तर तम्बू क ऊपर ठहरि जात, लोग उहइ ठउर प सिबिर दसाए रहतेन। ¹⁹ कबहुँ कबहुँ बादर बहोत दिन तलक पवित्तर तम्बू प जमा रहत। इस्राएलियन यहोवा क हुकुम मनतेन अउ जात्रा नाहीं करत रहेन। ²⁰ कबहुँ कबहुँ बादर पवित्तर तम्बू प कछू दिन बरे ठहरत रहत रहा यहोवा क हुकुम क अनुसार उ ठहरत अउ यहोवा क हुकुम क अनुसार उ चलत। ²¹ कबहुँ कबहुँ बादर रात मँ ठहरि जात अउ दूसर दिन भिन्सारे चलि पड़त। तउ मनइयन आपन चीजन क बटोरतेन अउ एकर पाछा करतेन। या अगर बादर एक दिन अउ एक रात ठहरत अउर तब इ चलि सुरू करत तउ मनइयन ओकर साथ चलि रहत। ²² जदि बादर तम्बू क ऊपर दुइ दिन, या एक महीना या एक बरिस ठउरत तउ लोग यहोवा क हुकुम मनतेन। उ पचे उहइ सिबिर मँ ठउरतेन अउ तब ताई न चलतेन जब तलक बादर न चलत। जब बादर आपन ठउर स उठत अउ चलत रहत तबहिं लोग चलतेन। ²³ इ तरह लोग यहोवा क हुकुम क मनतेन। उ पचे हुवइँ सिबिर जमउतेन जहाँ यहोवा बतावत। उ पचे तब चलतेन जब यहोवा ओनका अइसा बतावत। लोग धियान स निहरतेन अउ यहोवा क हुकुम मूसा क जरिए मनतेन।

चाँदी क तुरहियन

10 यहोवा मूसा स कहेस, ² “तुरहियन बनवइ बरे चाँदी क प्रयोग करा। चाँदी क पतरी बनाइके ओसे दुइ तुरहियन बनावा। इ सबइ तुरहियन क उपयोग मनइयन क एक संग बोलावइ अउ इ बतावइ बरे कि सिबिर क लइक कब चलइ चाही। ³ जब तू इ तुरहियन क बजउब्या, तउ सबहिं मनइयन क मिलापवाला तम्बू क प्रवेस दुआर प बटुर जाइ चाही। ⁴ अगर तू एक ही तुरही दर तलक बजउब्या तब सिरिफ नेता लोग अइहीं। (इस्राएल क बारहु परिवारे क मुखिया तोहरे समन्वा बटुर जइहीं।)

⁵ “जब तू तुरहियन क चेताउनी क रूप मँ बजाउब इ मनइयन क सिबिर क लेकइ चलइ चाही। जब तू पहिली दाईं तू तुरहियन क चेताउनी क रूप मँ बजउब्या, तउ मिलापवाला तम्बू क पूरब कइँती क परिवार दलन क चलब सुरू करइ चाही। ⁶ दूसरी दाई जब तू तुरहियन क चेताउनी क रूप मँ बजउब्या, मिलापवाला तम्बू क ढक्खिन कइँती क परिवार दलन क सिबिर जमाए भए मनइयन क आगे चलब सुरू करइ क होइ। ⁷ जब तू कउनो खास सभा बरे मनइयन क बटोरइ चाहा, तउ तुरहियन क दूसरे ढंग स लम्बी थिरान अवाजे मँ बजावा। ⁸ सिरिफ हारून क याजक बेटवन ही तुरहियन बजाइ सकत हीं। इ तू सब पचन बरे नेमॅ अहइ जउन हमेसा अगवा क पीढ़ी दर पीढ़ी चलत रही।

⁹ “जदि तू आपन देस मँ दुस्मन स लड़त रहा हवा तउ ओनसे लड़इ स पहिले तुरहियन क चेताउनी क रूप म बजावा। तब यहोवा तोहार परमेस्सर तोहार बात सुनी अउ तू सबन क दुस्मनन स बचाइ। ¹⁰ तू सबन क आपन खास बइठक, नवा चन्द्रमा क दिना पइ अउ खुसी क टेमॅ प तुरहियन बजावइ चाही। जब तू पचे होमबलि अउ मेलबलि द्या, तउ तुरहियन बजावा। इ यहोवा तोहार परमेस्सर बरे तोहका याद रखइ बरे खास तरीका होइ।”

इस्राएल क लोग सिबिर लइ जात हीं

¹¹ जब इस्राएल क मनइयन मिस्र छोड़ी दिहेन ओकरे पाछे दूसर बरिस क दूसर महीना क बीसवाँ दिन करार क तम्बू क ऊपर स बादर उठा। ¹² एह बरे इस्राएल क मनइयन आपन जात्रा सुरु किहेन। उ सबइ सीनै क रेगिस्तान तजि दिहेन अउ तब तलक जात्रा करत रहेन जब ताई बादर पारान क रेगिस्तान मँ नाहीं थमा। ¹³ इ पहिली दाईं रही जब मनइयन सिबिर लइ गएन। जइसा यहोवा मूसा क हुकुम दिहेस वइसा सिबिर क चलाएन।

¹⁴ सबसे पहिले यहूदा क सिबिर स तीन दल गएन। उ पचे झण्डा लइके जात्रा किहेन। पहिला समूह यहूदा क परिवार समूह क रहा। अम्मीनादाब क पूत नहसोन उ दल क नेता रहा। ¹⁵ ओकरे पाछे इस्साकार क परिवार समूह आवा। सूआर क पूत नतनेल उ समूह क नेता रहा। ¹⁶ अउर तब जबूलून क परिवार समूह आवा। हेलोन क पूत एलीआब उ समूह क नेता रहा।

¹⁷ तब पवित्तर तम्बू उतारा गवा। गेर्सोन अउ मरारी परिवार क मनइयन पवित्तर तम्बू क लइके चलेन। एह बरे इ परिवारे क लोग कतार मँ ठीक पाछे रहेन।

¹⁸ तब रूबेन क सिबिर स तीन दल आएन। उ पचे आपन निसान लइके जात्र किहेन। पहिला समूह रूबेन परिवार क रहा। सदेऊर क पूत एलीआज़ार इ समूह क नेता रहा। ¹⁹ ओकरे पाछे सिमोन क परिवार समूह आवा। सूरीसद्दै क पूत सलूमीएल उ समूह क नेता रहा। ²⁰ अउर तब गाद क परिवार समूह आवा। दूएल क पूत एलिअसफ इ समूह क नेता रहा। ²¹ तब कोहात परिवार क लोग आएन। उ पचे ओन परित्र चीजन क ढोएन जउन पवित्तर ठउर मँ धरी रहिन। अब पवित्तर तम्बू क इ समूहन क नवा सिबिर मँ पहुँचइ क पहिले लगाइ द्या।

²² ऍकरे पाछे एप्रैम क सिबिर क तीन समूह आएन। उ पचे आपन झण्डा लइके जात्रा किहेन। पहिला समूह एप्रैम क परिवार समूह रहा। अम्मीहूद क पूत एलीसामा उ समूह क नेता रहा। ²³ ओकरे पाछे मनस्से क परिवार समूह आवा। पदासूर क पूत गम्लीएल उ दले क नेता रहा। ²⁴ तब बिन्यामीन क परिवार समूह आवा। गिदौनी क पूत अबीदान उ दले क नेता रहा।

²⁵ कतार मँ आखिरी तीन ठु परिवार समूह दूसर सबहिं परिवार समूह बरे पीछ रच्छक रहेन। इ सब समूह दान क सिबिर स रहेन। उ पचे आपन निसान क संग जात्रा किहन। पहिला समूह दान क परिवार समूह क रहा। अम्मीसद्दै क पूत अहीएजेर उ समूह क नेता रहा। ²⁶ ओकरे ठीक पाछे आसेर क परिवार समूह आवा। ओक्रान क पूत पजीएल उ समूह क नेता रहा। ²⁷ तब नप्ताली क परिवार समूह आवा। एनान क पूत अहीरा उ समूहे क नेता रहा। ²⁸ इहइ तरह इस्राएल एक जगह स दूसर जगह पइ आपन समूहन क साथ, जब कबहुँ भी उ सिबिर लइ जाइ जात्रा करत रहेन।

²⁹ रुएल क पूत होबाब मिद्यानी रहा। (रुएल मूसा क ससुर रहा।) मूसा होबाब स कहेस, “हम पचे उ देस क जात्रा करत अही जेका यहोवा हम पचन क देइ क बचन दिहे अहइ। एह बरे हम लोगन क संग आवा। हम पचे तोहरे संग नीक बेउहार करब। यहोवा इस्राएल बरे नीक चीज देइ क बचन दिहे अहइ।”

³⁰ मुला होबाब जवाब दिहेस, “नाही; मइँ तोहरे संग न जाब। मइँ आपन देस अउ मनइयन क लगे जाब।”

³¹ तब मूसा कहेस, “मेहरबानी कइके हमका जिन तजा। तू जानत अहा कि रेगिस्तान मँ हम पचन्क कइसा सिबिर लगाइ क होइ। तू हमार राह क देखइया होब्या। ³² अगर तू हमरे संग आवत ह्या तउ यहोवा जउन कछू नीक चीज देइहीं, हम तोहर संग हींसा बाँटब।”

³³ उ सबइ यहोवा क पहाड़े स जात्रा सुरू किहेन। याजक लोग करार क सन्दूख लिहन अउ मनइयन क अगवा चलेन। उ पचे सिबिर डावइ बरे उचित ठउर क निहारत निहारत तीन दिना तलक लोगन क आगे-आगे सन्दूख लइ चलत रहेन। ³⁴ यहोवा क बदरा ओनके ऊपर मँड़रात रहा। अउर हर एक भिन्सारे जब उ पचे आपन सिबिर क तजि देत रहेन तउ ओनका राह देखाँवइ बरे बदरा हुवाँ रहत रहा।

³⁵ जब पवित्तर सन्दूख सिबिर स बाहर कइ जात रहा। मूसा हमेसा कहत रहा:

³⁶ अउर जब पवित्तर सन्दूख आपन ठउर प धरा जात रहा, तब मूसा सदा कहत रहा,

लोग फुन सिकाइत करत हीं

11 मनइयन आपन कस्ट क सिकाइत करब सुरु किहेन। यहोवा ओनकइ सिकाइत सुनेस। जब यहोवा इ बातन सुनेस तउ कोहाइ गवा। यहोवा क तरफ स आगी लोगन क बीच लग गइ। आगी सिबिर क कोना क कछू बाहरी भाग क भस्म कइ दिहस। ² एह बरे लोग मूसा क मदद बरे पुकारेन। मूसा यहोवा स बिनती किहेस अउ आगी क बरब बन्द होइग। ³ एह बरे उ ठउर क नाउँ तबेरा पड़ि गवा। मनइयन उ ठउर क इहइ नाम दिहन काहे की यहोवा ओनके बीच आगी बारे रहा।

सत्तर पुरनिया नेतन

⁴ गरीब लोगन क भीड़ अउर इस्राएलियन क बीच आम जन-समूह दूसर खाइ बरे इच्छा जाहिर किहेन। हाली ही इस्राएल क मनइयन फुन सिकाइत करब सुरु किहेन। मनइयन कहेन, “हम पचे गोस खाइ चाहित ह। ⁵ हम पचे मछरी क याद करित ह जउन हम मिस्र मँ खावा ह। उ मछरियन क कउनो दाम नाहीं देइ क पड़त रहा। हम पचन क लगे ढेर क भाजी रहिन जइसे ककरियन, खरबूजा, चीव (एक किसिम क पियाज), पियाज अउ लहसुन। ⁶ मुला अब हम ताकत खोइ चुका अही। इ मन्ना क छोड़िके खाइ बरे हम कछू नाहीं लखइ सकत ह।” ⁷ (मन्ना धन्ना बिया क नाई रहा अउ पेड़ क गोदं क नाई देखात रहा। ⁸ लोग ऍका बटोरत रहेन अउ तब एक पीसिके आटा बनवत रहेन। या उ पचे ऍका खूँदइ बरे चक्की बइपरतेन, ऍका बासन मँ पकउतेन या ऍकर केक बनावत रहेन। “केक” क स्वाद जैतून क तेल स पकी भइ रोटी क तरह रहा। ⁹ हर रात क भुइँया ओस स गीली होइ जात तउ मन्ना जमीने प टपकत रहा।)

¹⁰ मूसा हर एक परिवार क मनइयन क आपन-आपन तम्बू क दुआरे प खड़ा भएन सिकाइत करत सुनेस। यहोवा बहोत कोहाइ गवा। ऍहसे मूसा बहोत हलाकान भवा। ¹¹ मूसा यहोवा स पूछेस, “यहोवा! आप आपन सेवक लोगन प इ मुसीबत काहे डाया ह। मइँ का गलती किहेउँ ह? मइँ तोहका नाखुस करइ का किहे उँ ह? तू मोहे प इ सबहिं मनइयन क जिम्मेदारी काहे ओढ़ाया ह? ¹² तू जानत ह कि मइँ इ सबहिं मनइयन क बाप नाहीं अहउँ। तू जानत ह कि मइँ ऍनका नाहीं पइदा किहेउँ ह। मुला मोका ऍनकइ फिकिर करइ चाही जइसे धाई गदेला क कोरा मँ लइ चलत ह। तू हमका अइसा करइ क काहे मजबूर करत ह? तू मोका काहे जबरियावत ह कि मइँ ऍनका उ देस क लइ चलउँ जेका देइ क बचन ओनके पुरखन क तू दिहा ह। ¹³ मोरे लगे इ मनइयन बरे जियादा गोस नाहीं अहइ। मुला उ पचे लगातार मोसे सिकाइत करत अहइँ। उ सबइ कहत हीं, ‘हमका खाइके गोस द्या।’ ¹⁴ मइँ अकेल्ला इ सब मनइयन क देख-भाल नाहीं कइ सक्ति। इ मोरे बरे भारी बोझा अहइ। ¹⁵ जदि आप ओनके कस्ट क मोका देइ क काम चलावत रहइ चाहत हीं तउ आप मोका अबहिं मारि डावइँ। जदि आप मोका सेवक मानत हीं तउ अबहिं मोका मरि जाइ देइँ। तब मोर सबहिं कस्ट खतम होइ जइहीं।”

¹⁶ यहोवा मूसा स कहेस, “मोरे लगे इस्राएल क सत्तर बुजुर्गन लइ आवा जउन मनइयन क अफसर अउ पुरनिया होइँ। ऍनका मिलापवाला तम्बू मँ लिआवा। हुवाँ ओनाका आपन संग खड़ा करा। ¹⁷ तब मइँ आउब अउ तोहसे बात करब। अब तोह प आतिमा आइ बा। मुला मइँ ओनका भी उ आतिमा देब। तब उ पचे मनइयन क देख भाल करइ मँ मदद करिहीं। इ तरह तोहका इ मनइयन बरे अकेले बोझा नाहीं उठाइ क होइ।

¹⁸ “मनइयन स कहा, भियान खातिर आपन क तइयार करा। भियान तू पचे गोस खाब्या। यहोवा सुनेस ह जबहिं तू सबइ रोया अउ चीख्या ह। यहोवा तू पचन क बातन सुनेस ह जब तू मनइयन स कहया, ‘हमका खाइ बरे गोस द्या। हम पचन क इ मिस्र मँ नीक रहा।’ तउ यहोवा अब तू पचन क गोस देइ। अउर तू पचे ओका खाब्या। ¹⁹ तू पचे सिरिफ ओका एक दिन नाहीं, दुइ, पाँच, दस या बीस दिन भी खाइ सकब्या। ²⁰ तू पचे उ माँस महीना भर खाब्या। तू पचे उ गोस तब तलक खाब्या जब तलक ओसे ऊब न जाब्या। इ होइ, काहे की तू पचे यहोवा क खिलाफ सिकाइत किहा ह। यहोवा तू मनइयन मँ घूमत ह अउ तोहार जरुरत क समझत ह। मुला तू पचे ओकरे अगवा रोया, चिचियाया अउ ओराहना दिहा। तू मनइयन स कहा, ‘हम पचे आखिर मिस्र काहे छोड़ि दीन्ह?’”

²¹ मूसा कहेस, “यहोवा! हिआँ 6,00,000 मनसेधू साथ चलत अहइँ। अउर तू कहत ह, ‘मइँ ओनका पूरा महीना भइ खाइके गोस देब।’ ²² जदि हमका सबहिं भेड़ी अउ गोरु मारइ क होइ तउ भी ऍतने बड़े तादाद मँ मनइयन क महीना भर खाइके भरपूर न होइ। अउर जदि हम समुद्दर क सारी मछरियन क धइ लेइ तउ भी ओनके बरे पूर्ति न होइ।”

²³ मुला यहोवा मूसा स कहेस, “यहोवा क सकती क जिन समेटा। तू देखब्या कि जदि मइँ कहत हउँ कि मइँ कछू करब तउ मइँ ओका कइ सकत हउँ।”

²⁴ एह बरे मूसा मनइयन स बैतयाइ बाहेर गवा। मूसा ओनका उहइ बताएस जउन यहोवा कहे रहा। तब मूसा सत्तर बुजुर्ग क बटोरेस। मूसा ओनसे पवित्तर तम्बू क चारिहुँ कइँती खड़ा होइके कहेस। ²⁵ तब यहोवा एक बादर मँ उतरा अउ उ मूसा स बांत किहेस। आतिमा मूसा प सवार रही। यहोवा उहइ आरौतमा क सत्तर बुजुर्गन लोगन प डाल दिहस। जब ओन सबन मँ आतिमा आइ तउ उ पचे भविस्सबाणी करइ लागेन। मुला ओकर बाद उ पचे अइसा अउर कभी नाहीं किहस।

²⁶ सत्तर बुजुर्गन मँ स दुइ ठु, एल्दाद अउ मेदाद तम्बू मँ स बाहेर नाहीं गएन। ओनकइ नाउँ बुजुर्गन क सूची मँ रहा मुला उ पचे सिबिर मँ रहेन। मुला परम आतिमा ओन पइ भी आइ अउ उ पचे सिबिर मँ भविस्सबानी करइ लागेन। ²⁷ एक ठु जवान दउड़ा अउ मूसा क सूचना दिहस। उ मनई कहेस, “एल्दाद अउ मेदाद सिबिर मँ भविस्सबाणी करत अहइँ।”

²⁸ नून क पूत यहोसू मूसा स कहेस, “मूसा, तोहका ओनका रोकइ चाही।” (यहोसू मूसा क सहायक तब स रहा जब उ किसोर रहा।)

²⁹ मुला मूसा जवाब दिहस, “का तू मोह बरे जलन करत अहइ? मइँ चाहत हउँ कि यहोवा क सब लोग भविस्सबाणी करइ क जोग्ग होइ जाइँ। मइँ चाहत हउँ कि यहोवा आपन आतिमा ओन सबहिं प पठवइ।” ³⁰ तब मूसा अउ इस्राएल क नेता सिबिर मँ लउटि गएन।

बटेरेन्‌ आइन

³¹ तबहिं यहोवा समुद्दर कइँती स आँधी चलाएस। आँधी उ पहँटा मँ बटेरन क पठाएस। बटेरन सिबिर क चारिहुँ कइँती उड़इ लागिन। हुआँ ऍतना बटेरन रहिन कि भुइँया ढँकि गइ। भुइँया प बटेरन क तीन फुट गहरी परत जमा होइ गइ। कउनो मनई एक दिन मँ ओतनी दूर जाइ सकत रहा जेतती दूर तलक चारिहुँ कइँती बटेर रहिन। ³² मनई अहदंकेन अउ बाहेर आएन। उ पचे सारा दिन अउ सारी रात बटेरन क बटोरेन। अउर फिन अगला दिन भी उ सबइ बटेरन क बटोरेन। हर मिला कम स कम साठ बुसल या ओसे जियादा बटेरन बटोरेस। तब मनइयन बटेरन क आपन सिबिर क चारिहुँ कइँती धूप मँ फइलाएन।

³³ मनइयन गोस खाब सुरु किहन, मुला यहोवा कोहाइ गवा। जब गोस ओनके मुँहना मँ रहा अउ ऍकरे पहिले कि मनइयन लील लेइँ यहोवा ओनका बहोत बेराम कइ दिहस। ढेर लोगन हुवँई मरि बिलाइ गएन अउर ओनका माटी दइ दीन्ह गइ। ³⁴ एह बरे मनइयन उ ठउरे क नाउँ किब्रोथ-हत्तावा राखेन। उ पचे उ ठउर क उहइ नाउँ दिहेन। इ उहइ जगह बाटइ जहाँ उ पचे मनइयन क माटी दिहेन जउ स्वाद क भोजन क गहरी इच्छा धरत रहेन।

³⁵ मनइयन किब्रोथ-हत्तावा स हंसेरोत क जात्रा किहेनन अउ हुवइँ ठहरि गएन।

ईसू मनई क दुस्ट आतिमा स छोड़ॉवत ह

(मत्ती 8:28-34; लूका 8:26-39)

5 फिन उ सब झिलिया क ओह पार गिरासेनियान क देसे मँ पहुँच गएन। ² जब ईसू नाउ स बाहेर आवा, तबहिं एक मनई जेहमाँ दुस्ट आतिमा रही, कब्रे मँ स ईसू स फउरन भेंटइ आइ। ³ इ मनई कब्रन मँ रहत रहा। अउर कउनो ओका बाँधि सकत नाहीं रहा, हियाँ तलक जंजीरउ नाहीं बाँधि सकेस। ⁴ जबहिं ओकर गोड़वा बेड़ी अउर जंजीर स बाँधा जात, उ जंजीरिया क तोरि डारत अउ बेड़ियन्क चकनाचूर। कउनो ओका काबू मँ नाहीं लिआइ पावा। ⁵ कब्रन मँ अउर पहाड़ियन एकदम्मइ दिन-रात हर समइ उ चीखत चिचिआत रहा अउर आपन क पाथर स पीटत रहा।

⁶ जब उ ईसू क दूर स देखेस, ओके निअरे धावा अउर ओकरे समन्वा दण्डवत करेस। ^7-8 फिन बड़ जोर स चिचिआन अउर कहेस, “तू मोसे का चाहत ह, सबन ते ईसू सर्वोच्च परमेस्सर क पूत? मोर बिनती अहइ तोहका परमेस्सर क सपथ कि तू मोका दंड न देइ।” ईसू ओसे कहत रहा, “अरी दुस्ट आतिमा, तू इ मनई स बाहेर आवा।”

⁹ तब ईसू ओसे पूछेस, “तोहार क नाउँ अहइ?”

फिन उ ईसू स कहेस, “मोर नाउँ सेना अहइ, काहेकि हम बहोत स अही।” ¹⁰ उ मनई बार बार ओसे बिनती करेस कि उ पचेनक उ पहँटा स जिन निकारा!

¹¹ हुवाँ पहाड़िया के पास सुअरन क झुंड चरत रहा। ¹² दुस्ट आतिमन ईसू स कहत बिनती करेन, “हमका सुअरिअन मँ पठइ द्या, जेहसे हम ओहमाँ घुसि जाई।” ¹³ तब उ ओनका हुकुम दिहेस। तबइ दुस्ट आतिमन मनई स बाहेर आइके सुअरिअन मँ गइँन। अउर उ झुंड जेहमाँ करीब दुइ हजार सुअर रहेन, ढलवाँ किनारे स नीचे कइँती लिढ़कत-पुदकत भागत परात झील मँ जाइ गिरा अउ बूड़ गएन।

¹⁴ जउन लोग सुअरिअन क रच्छा करत रहेन, पराय गएन उ पचे सहर अउर गाउँ मँ इ खबर फइलायन। अउर सब मनइयन देखइ आएन कि का भवा। ¹⁵ उ सब ईसू क नगिचे पहुँचेन। उ सब दुस्ट आतिमन क सवार भइ मनई प देखेन। उ कपरा पहिरे रहा अउर दिमागे स नीक होइ गवा। इ उहइ मनई रहा जेहमाँ बहुत स दुस्ट आतिमन क सवारी रही अउर उ सब डेराइ गएन। ¹⁶ जउन इ घटना क देखे रहेन उ मनइयन क नीके स समुझाइन कि जेहमाँ दुस्ट आतिमन क सवारी रही, अउर सुअरन क का भवा। ¹⁷ तब मनइयन ईसू स बिनती करइ लागेन कि उ ओनके पहँटा स चला जाइ।

¹⁸ जइसे उ नाउ मँ चढ़इ लाग, तबहिं जउने मनई मँ दुस्ट आतिमन आइ रहीं, ईसू स बिनती संग जाइ बरे किहेस। ¹⁹ ईसू आपन संग जाइ बरे हुकुम नाहीं दिहस, लेकिन कहेस, “आपन लोगन्क बीच घरे जा अउर ओनका इ सब बतावा जउन पर्भू तोहरे बरे किहेस ह। अउर ओनका इ ही बतावा कि दाया कइसे पर्भू करेस ह।”

²⁰ तउ उ मनई चला गवा अउर दिकापुलिस क मनइयन क कहइ लाग कि केतॅना ढेरि क ईसू ओकरे बरे किहस ह। एसे सब मनई अचरजे मँ पड़ि गएन।