New Testament in a Year

СТРАДАЊАТА И СМРТТА НА ИСУС

Заговор против Исус

(Матеј 26:1-5; Марко 14:10:11) 22 Се приближуваше празникот на бесквасни лебови, познат како Пасха. ² Свештеничките поглавари и вероучителите настојуваа да најдат начин да Го убијат Исуса, но се плашеа од бунт меѓу народот.

Јуда се согласува да Го предаде Исуса

(Матеј 26:14-16; Марко 14:10-11) ³ Тогаш Сатаната влезе во Јуда наречен Искариот, кој беше еден од дванаесеттемина Исусови ученици. ⁴ Тој отиде кај свештеничките поглавари и кај управителите на храмот да се договори како да им Го предаде Исуса. ⁵ Тие се израдуваа и му ветија дека ќе му платат за тоа. ⁶ Јуда се согласи и почна да бара погоден момент да им го предаде кога нема да има народ наоколу.

Подготовка на Пасхалната вечера

(Матеј 26:17-25; Марко 14:12-21; Јован 13:21-30) ⁷ Дојде денот на празникот Бесквасни лебови, кога за пасхалната вечера се колеа јагниња. ⁸ Исус ги испрати Петар и Јован со следниве упатства: „Одете и подгответе ја за нас пасхалната вечера.“ ⁹ А тие Го прашаа, каде сака да ја подготват вечерата? ¹⁰ Тој им одговори: „Кога ќе влезете во Ерусалим, ќе сретнете еден човек како носи стомна со вода. Следете го до куќата во која тој ќе влезе, ¹¹ и кажете му на сопственикот на куќата: ,Учителот прашува каде е собата во која Тој со Своите ученици ќе ја прослави пасхалната вечера?‘ ¹² Тој ќе ви покаже веќе наместена голема соба, на горниот кат; тука подгответе ја вечерата.“ ¹³ Тие отидоа и навистина најдоа сe како што им беше рекол Исус и ја приготвија пасхалната вечера.

Последната вечера

(Матеј 26:26-30; Марко 14:22-26; Коринќаните 11:23-25) ¹⁴ Кога дојде времето, Исус седна на трпезата со Своите апостоли, ¹⁵ и им рече:

„Имав голема желба да ја јадам со вас оваа празнична вечера, пред да почнат Моите страдања; ¹⁶ зашто, еве, ви кажувам, дека повеќе нема да ја прославувам пасхалната вечера, сe додека во целост не се исполни нејзиното значење во Божјото царство!“

¹⁷ Потоа Исус ја крена чашата, Му заблагодари на Бог и им рече на Своите апостоли: „Земете го ова вино и поделете го меѓу себе. ¹⁸ А, еве, ви кажувам дека по ова Јас повеќе нема да пијам вино^[a] сe додека не се воспостави Божјото царство.“

¹⁹ Потоа Исус зеде леб, Му заблагодари на Бог, го раскрши на парчиња и им го раздели, велејќи им: „Ова го претставува Моето тело, кое се дава за вас. Правете го ова како спомен на Мене.“

²⁰ Исто така, по вечерата им ја подаде чашата и им рече: „Оваа чаша со вино го претставува Божјиот нов завет, што ќе биде заверен со Мојата крв, која се пролева за вас. ²¹ Но еве ја веќе раката на Мојот предавник, кој вечерва седи со Мене на трпезава! ²² Да, Јас, Синот Човечки, ќе умрам како што Ми е определено, но тешко на оној што Ме предава!“ ²³ Тогаш апостолите почнаа меѓу себе да се прашуваат, кој може меѓу нив да биде тој што ќе Го предаде?

Кој е најголем во Божјите очи?

²⁴ Меѓу учениците на Исус настана расправија околу тоа кој од нив ќе биде на највисока позиција. ²⁵ А Исус им рече: „Царевите на другите народи владеат над своите народи и сакаат да бидат нарекувани ,Народни добротвори.‘ ²⁶ Но меѓу вас не смее да биде така! Напротив, најголемиот меѓу вас треба да се потчини како да е најмлад; водачот треба да ви служи. ²⁷ Кој е поголем: оној што седи или оној што послужува? Зар не е оној што седи? А еве, Јас Сум меѓу вас како слуга.

²⁸ Вие останавте со Мене во текот на сите Мои искушенија. ²⁹ И, еве, Јас ви давам царска чест, како што и небесниот Татко ми ја даде Мене. ³⁰ Вие ќе јадете и ќе пиете на Мојата трпеза, во Царството Мое, ќе седите на престоли и ќе им судите на дванаесетте израелски племиња.“