M’Cheyne Bible Reading Plan
18 Aus Jesus dit jesajcht haud jinkj hee met siene Jinja aewarem Kjiedroontol; doa wea en Goade wua hee met siene Jinja ennen jinkj.
2 En Judas, dee am ferod wist uk dee Staed, wiel Jesus fesaummeld sikj doa foaken met siene Jinja.
3 En Judas haud ne kjleene Grupp Soldote en Tempelwajchta fonn dee Huugepriesta en Farisaea jekjraeje, en dise aule kjeeme doa han met Latoarns, en Fachel, en Jewaeare.
4 Jesus wist je aules waut opp am kome sul, en jinkj daen entjaejen en saed to an: "Waem seakj Jie?"
5 Sie auntwuade: "Jesus, dee Natsareena." Hee saed to an: "Ekj sie dee!" Judas, dee am ferode deed, stunt doa uk met an.
6 Aus hee to an jesajcht haud, "Ekj sie dee!" trocke see sikj trigj en folle oppe Ead.
7 Donn fruach hee an wada: "Waem seakj jie?" En see saede: "Jesus, dee Natsareena."
8 Jesus auntwuad: "Ekj saed ju daut ekj dee sie. Seakj jie dan mie, dan lot dise gone!"
9 daut daut Wuat mucht erfelt woare waut hee saed: "Fonn dee, dee du mie jejaeft hast, hab ekj kjeent felore."
10 Siemoon Peeta haud en Schweat, trock daut rut, en heiwd opp daen Huugepriesta sien Sklow en schneet am daut rachte Ua auf. Daem Sklow sien Nome wea Malchus.
11 Donn saed Jesus to Peeta: "Staeakj daut Schweat trigj enne Schajcht! Sul ekj dan nich daut Kuffel drinkje daut de Foda mie jejaeft haft?"
12 Donn kjeeme de Soldote, en dee waut aewe an wea, en dee Tempelwajchta en neeme Jesus faust en bunge am,
13 en leide am eascht no Anas, Kaifas sien Schweafoda, dee daut Joa Huagapriesta wea.
14 Nu Kaifas wea dee waut de Juda daen Rot jejaeft haud dautet goot wea, daut een Maun fa daut Folkj stoawe sul.
15 Siemoon Peeta en noch een Jinja foljde Jesus hinjaraun. Dee Huagapriesta kjand daen aundre Jinja, en dee jinkj met Jesus enn daem Huagpriesta siene Paulaust Faealeew enenn.
16 Oba Peeta stunNT bute fere Daea. Donn jinkj dee aundra Jinja, daen dee Huagapriesta kjand, en raed met de Daearewajchtarin, en brocht Peeta enenn.
17 Donn saed dee Daearawajchtarin to Peeta: "Best du nich uk eena fonn dis Maun siene Jinja?" Hee saed: "Nae, ekj sie nich."
18 Dee Sklowe en Tempelwajchta haude sikj en Kolefia jemoakt en woamde sikj, wielet kollt wea, en Peeta stunnt doa uk bie an en woamd sikj.
19 Dee Huagapriesta fruach Jesus donn no siene Jinja, en uk no siene Lea.
20 Jesus auntwuad am: "Ekj hab gauns kloa en em opne en dise Welt jeraet; ekj hab enne Sienegooge en emm Tempel jeleat, wua de Jude toopkome, en enn Jeheemnes hab ekj nusscht jeraet.
21 Wuaromm frachst du mie? Froag daen, dee mie jeheat habe waut ekj jesajcht hab; Kjikj! dee weete waut ekj jesajcht hab."
22 Aus Jesus dit saed, schluach am eena fonn dee Offitseare dee doa biestunde en saed: "Soo auntwuatst du daem Huugepriesta?"
23 Jesus auntwuad am: "Wan ekj waut onnrajchtet jesajcht hab, dan zeij waut daut onnrajchtet es. Oba wan ekj rajcht jeraet hab, wuaromm schleist du mie?"
24 Donn schekjt Anas am jebunge no Kaifas daen Huugepriesta.
25 Peeta oba stunnt en woamd sikj. Doaromm saede see to am: "Best du nich uk eena fonn siene Jinja?" Hee feluach daut en saed: "Ekj sie nich."
26 Eena fonn daem Huugepriesta siene Sklowe, en Fewaunta aun daem, daen Peeta daut Ua haud aufjeschnaede, saed to am: "Sajch ekj die nich met am doa em Goade?"
27 Peeta feluach daut wada; en platslich kjreid de Hon.
28 Donn leide see Jesus fonn Kaifas nom Rechthus. Daut wea Tiedich. See selfst jinje nich en daut Rechthus enenn omm daut see sikj nich wudde feonnreinje, daut see daut Pasafast aete kunne.
29 Donn jinkj Pielatus rut no an en saed: "Met waut doo jie dis Maun beschuldje?"
30 See auntwuade en saede: "Wan disa nich beeset jedone haud, wudd wie daem nich no die jebrocht habe."
31 Pielatus saed oba to an: "Naemt jie am, en doot am rechte no jun Jesats." De Jude saede to am: "Daut es jaeajen daut Jesats fa onns waem doot to moake,"
32 daut daut Wuat waut Jesus jesajcht haud wudd so rom kome, waut fonn Doot hee stoawe wudd.
33 Pielatus jinkj donn wada em Rechthus enenn, roopt Jesus enenn en saed to am: "Best du de Jude aea Kjeenich?"
34 Jesus auntwuad: "Sajchst du dit ut die selfst, oda ha aundre die fonn mie fetalt?"
35 Pielatus auntwuad: "Sie ekj en Jud? Diene eajne Natsjoon en de Huagapriesta ha die no mie jebrocht. Waut hast du jedone?"
36 Jesus auntwuad: "Mien Kjeenichrikj es nich fonn dise Welt. Wan mien Kjeenichrikj fonn dise Welt wea, dan wudde miene Deena kjampfe daut de Jude mie nich faustnaeme kunne. Oba nu eset soo, mien Kjennichrikj es nich fonn hea."
37 Pielatus saed donn to am: "Best du dan werkjlich en Kjeenich?" Jesus auntwuad: "Du sajchts rajcht, ekj sie en Kjeenich. Doato sie ekj jebuare en enn dise Welt jekome, daut ekj fa de Woarheit zeije sull. En jieda dee fonn dee Woarheit es, heat miene Stem."
38 Pielatus saed to am: "Waut es Woarheit?" Aus hee daut jesajcht haud, jinkj hee wada rut no de Jude, en saed to an: "Ekj finj kjeene Schullt aun am.
39 Oba jie ha ne Mood daut ekj biem Pasafast junt eenem loos jaew. Wel jie daut ekj junt daen Jude Kjeenich loos jaew?"
40 Donn schrieeje see wada en saede: "Nich dis Maun, oba Barabas!" Barabas oba wea en Reiba.
15 Ne saunfte Auntwuat deit Oaja wajch driewe; oba en Wuat daut Weedoag brinjt, deit ennoajre.
2 Dee Weise äare Tung bruckt Wissenschoft rajcht; oba dee Noare poasche Noarheit ut äa Mul.
3 Däm Herr Gott siene Uage sent aulewäaje, un seene daut Beeset un daut Goodet.
4 Ne follkomne Tung es en Läwesboom; oba fekjeadet doarenn es en febroakna Jeist.
5 En Noa deit sien Foda sien ennleare feachte; oba wäa Ennleare aun nemt es feninftijch.
6 Doa es fäl Rikjdom enn dee Jerajchte äa Hus; oba dee Beese äa Toonäme es Trubbel.
7 Dee Jerajchte äare Leppe jäwe Wissenschoft; oba dee Noare äa Hoat es nijch Staunthauft.
8 Dee Herr Gott hausst dee Gottloose äa Opfa; oba dee Opprajchte äa Jebäd es sien Fejneaje.
9 Dee Herr Gott hausst dee Gottloose äa Wajch; oba Hee haft däm Leef dee Jerajchtijchkjeit eeft.
10 Trajcht halpe jeit schlajcht fa däm dee utem Wajch es; wäa Dodle hausst saul stoawe.
11 Dee Hal un Fenijchte sent fer däm Herr Gott; woo fäl meeha dee Mensche Säns äare Hoate.
12 En Spetta haft däm nijch leef dee am trajcht halpt; un hee woat uk nijch no dee Weise gone.
13 En froohet Hoat moakt fa en scheenet Jesejcht; oba derjch Hoat Trua es dee Jeist jeschloage.
14 Däm sien Hoat dee festone deit seakjt Wissenschoft; oba dee Noare äa Mul kjrijcht Noarinj derjch Dommheit.
15 Aul dän äare Doag dee Weedoag liede sent Bees; oba en Froohet Hoat haft en eegoljet Fast.
16 Daut es bäte weinijch to habe met däm Herr Gott siene Forjcht aus grootet Rikjdom un Opprua doamet.
17 Bäta es ne Moltiet fonn Jemies wua doa Leew es, aus en ne Staul foll Osse un Haus doamet.
18 En dolla Maun brinjt Tsanke fäa; oba wäa langsom es oajalijch to senne deit jachta stelle.
19 Däm Fula sien Wajch es soo aus ne Dorne Hakj; oba dee Jerajchte äa Stijch es jlei jemoakt.
20 En weisa Sän moakt sien Foda froo; oba en noarischa Maun deit siene Mutta feachte.
21 Noarheit es ne Freid to däm dee nijch Festentnis haft; oba en Maun met Festentnis wankt jlikj.
22 Oone Rot sent Tswakje jebroake; oba derjch gooda Rot woare dee fäa kome.
23 En Maun haft Freid derjch dee Auntwuat fonn sien Mul; un woo goot es en rajchtet Wuat to rajchte Tiet.
24 Dee läwes Wajch jeit nehejcht no dee Fäasejchtje, daut hee wajch dreihe kaun fonn rauf no dee Hal.
25 Dee Herr Gott woat däm Stolte sien Hus fenijchte; oba Hee woat dee Wätfru äare Jrens oppstale.
26 Gott hausst dee Gottloose äare Jedanke seeha; oba aunjenäme Jedanke sent rein.
27 Wäa jietsijch es fa meeha moakt Trubbel fa sien eajnet Hus; oba wäa Schmäajelt hausst saul läwe.
28 Dee Jerjachte aä Hoat bedenkjt sikj woo to auntwuate; oba dee Beese äa Mul deit Beeset ut poasche.
29 Dee Herr Gott es wiet auf fonn dee Gottloose; oba Hee heat dee Jerajchte äa Jebäd.
30 Daut Uage Lijcht moakt daut Hoat froo; en gooda berejcht moakt dee Knoakes fat.
31 Daut Ua daut Läwes Dodle heat saul mank dee Weise bliewe.
32 Wäa Unjarejchte aufsajcht deit siene eajne Seel feachte; oba wäa Dodle heat kjrijcht Festentnis.
33 Däm Herr Gott siene Forjcht es Unjarejchte enn Weisheit; un fer Ea kjemt Deemoot.
2 Doaromm, wann doa irjent waut fa Troost es enn Christus, irjent waut fa Jemeenschofft emm Jeist, irjent en Jaumahoat, irjent waut fa Metliet;
2 dan moakt miene Freid foll daut jie ju eenich sent, junt aula jlikje goot sent, aewareen denke, en aula toop een Ziel habe.
3 Doot nusscht ut stollte ennbilness, oda ut Tsank, leewa enn Deemut acht eena daem aundra hecha aus sikj selfst.
4 Seet nich bloos ut no daut waut junt selfst intreseat, oba uk daut waut daem Naeakjsten intreseat.
5 Doot soo denke aus Jesus Christus docht;
6 dee fonn Natua ut Gott wea, oba Gott jlikj senne nich met Jewault musst faust jehoole woare;
7 leewa muak sikj selfst ohne Ea, neem Kjnachts Natua aun, en wort jebuare en aunjeseene so aus en jeweenlija Mensch,
8 en deemieticht sikj selfst, en wort jehuarsaum bott aum Doot, sogoa daen Doot aum Kjriets.
9 Doaromm haft Gott am tom aulahechste jestalt, en haft am en Nome jejaeft, dee aewa aule aundre Nomes steit;
10 so daut enn Jesus sien Nome aule Kjneehe sikj beaje sele, emm Himel, oppe Ead, en unjare Ead;
11 en daut jieda Tung bekjanne saul daut Jesus Christus de Herr es, to Gott daem Foda siene Ea.
12 Doaromm, miene leefste, soo aus jie emma sent jehuarsaum jewast, nich bloos aus ekj bie junt wea, oba sogoa nu leewa daut ekj fonn junt wajch sie, oabeit june Seelichkjeit ut met Forcht en Tsetre.
13 Wiel Gott es dee, dee enn ju oabeit beides daut Felange to ha, en uk sien Wele to doone soo aus am daut jefelt.
14 Doot aules oone brummsch oda wadaspanstich to senne,
15 soo daut jie rein en onnschuldich kjenne aus Gott siene Kjinja laewe, aun daen nusscht utosate es, unja en krommet en fedreidet Follkj enn dise Welt wua jie aus kloare Lichte schiene.
16 Hoolt daut Wuat huach daut Laewe brinjt, daut ekj mie aun Christus sien Dach doatoo freihe kaun daut ekj mie nich fejaefs aunjestrenjt ha, uk nich emsonst jeoabeit hab.
17 Oba wann ekj uk noch aus en Opfa aewa jun Deenst en jun Gloowe utjegote sie, frei ekj mie, en doo mie uk met junt aule freihe.
18 Soo sull jie uk froo sene en junt met mie toop freihe.
19 Ek felot mie uk doaropp emm Herr Jesus daut ekj boolt Timotaeus no junt woa schekje kjenne, daut ekj uk gooda Troost kaun ha wan ekj weet woo daut met junt steit.
20 Ekj ha sest kjeenem dee soo doaromm besorcht es, dee fonn hoate fa junt sorcht.
21 An es daut aula omm sikj selfst to doone, en nich omm Jesus Christus siene Sach.
22 Oba jie weete Timotaeus sien Karakta, daut, soo aus en Saen met sien Foda haft hee met mie toop jedeent em Evanjeelium.
23 Doaromm raeakjen ekj am boolt hantoschekje, so schwind aus ekj weet woo daut met mie gone woat.
24 En ekj ha daut Fetruehe em Herr daut ekj selfst uk em korte woa hankome.
25 Oba ekj docht daut wea needich daut ekj Epafrodietus, mien Brooda, mien Metoabeida, en mein Metkjamfa, en fa junt en Apostel, en Deena daem jie no mie jeschekjt haude fa mie to sorje, nu trig no junt schekjt;
26 Dan hee haud en Felange no ju, en wea besorcht, wiel jie jeheat haude daut hee krank wea.
27 En hee wea bestemt doodeskrank, oba Gott erboarmd sikj aewa am; en nich bloos aewa am, oba uk aewa mie, daut ekj nich een Trua oppem aundra haud.
28 Doawaeajen wea mie daut soo fael meeha doaromm to doone am hantoschekje, daut wan jie am wada sage, jie junt freihe kunne, en ekj omm weinja to sorje haud.
29 Naemt am aun em Herr met groote Freid, en eat soon Maun aus hee es,
30 wiel hee sad sien Laewe oppem Spel, en kjeem dicht aum Doot omm Christus siene Oabeit haulwe, omm fa mie daut to doone daut jie nich kunne.
Copyright © 2001 by Elmer Reimer