M’Cheyne Bible Reading Plan
9 Aus hee delengd jinkj sach hee en Maun dee blint jebuare wea.
2 Siene Jinja fruage am: Meista, waea haft jesindicht, dis Maun oda siene Elre daut hee blint jebuare es?
3 Jesus auntwuad: "Dis Maun is nich blint doawaegen daut hee oda siene Elre jesindicht habe, oba daut Gott siene Woakje enn am muchte ferndach kome.
4 Wie motte daem siene Woakje ferechte dee mie jeschekjt haft wielet noch Dach es; Nacht kjemt wan kjeena oabeide kaun.
5 Soo lang aus ekj en dise Welt sie, sie ekj daut Licht fa dise Welt."
6 Aus hee dit jesajcht haud, speach hee oppe Ead en muak en Schmaeasel doarut, en laed daut opp daem Maun siene Uage,
7 en saed to am: "Go wausch die em Puddel waut Sielooha heet:" [fedolmatscht meent daut jeschekjt]. En hee jinkj en wossch, en kaum seenent trig.
8 Donn saede siene Nobasch en dee, dee am ferhaea haude seene prachre: "Es dit nich dee, dee hia saut en prachad?"
9 Walkje saede: "Dit es hee!" Aundre saede: "Nae, daem sitet blos soo." Hee saed: "Ekj sie dee."
10 Donn saede see to am: "Woo sent diene Uage opjegone?"
11 Hee auntwuad: "Dee Maun waut Jesus heet muak en Schmaeasel en laed daut opp miene Uage en saed to mie: Go no Sielooha en wausch. Ekj jinkj en wossch en kaun seene."
12 See saede to am: "Wua es hee?" He saed: "Ekj weet nich."
13 Donn brochte see daem, dee eascht blint wea no de Farisaea.
14 Nu wea daut aum Saubat daut Jesus daut Schmaeasel muak en daem Blinge de Uage op muak.
15 Donn fruage de Farisaea am wada woo daut kjeem doat hee seene kunn. Hee saed to an: "Hee laed mie Leem oppe Uuge, ekj wossch mie, en ekj kaun seene."
16 Eenje fonn dee Farisaea saede donn: "Dis Maun es nich fonn Gott wiel hee daen Saubat nich helt." Oba aundre saede: "Woo kaun en sindje Maun soone Wunndateakjen doone?" En doaderch wea ne Spoolinj unja an.
17 Donn saede see noch emol to daen blinge Maun: "Waut sajchst du fonn am, wiel hee diene Uage op jemoakt haft?" Hee saed: "Daut es en Profeet."
18 Oba dee Jude jleewde daut noch nich daut dit dee wea waut doa wea Blint jewast bott see siene Elre roopte,
19 en fruage an: "Es dit jun Saen fonn daem jie saje daut hee blint jebuare wea? En woo kjemt daut daut hee nu seene kaun?"
20 Dee Elre auntwuade an en saede: "Wie weete daut dit onns Saen es en daut hee blint jebuare wea;
21 Oba woo daut kjemt daut hee nu seene kaun weet wie nich, oda waea am de Uage haft opjemoakt, weet wie nich; hee es oolt jenuach, froagt am, hee woat fe sikj selfst raede."
22 Dit saede siene Elre wiel see sikj engste deede fa de Jude; wiel dee Jude weare sikj aul eenich jeworde daut wan irjendwaea bekjanne wudd daut Jesus dee Christus wea, dee wudd ute Sienagoog rut jestopt woare.
23 Doaweajen saede siene Elre: "Hee is oolt jenuach, froacht am."
24 Donn roopte see tom tweede mol daem Maun dee Blint wea jewast, en saede to am: "Jeff Gott de Ea! Wie weete daut dis Maun en Sinda es."
25 Donn auntwuad hee: Auf hee en Sinda es oda nich, weet ekj nich: oba eent weet ekj; ekj wea Blint, nu kaun ekj seene."
26 Donn saede see wada to am: "Waut deed hee to die? Woo muak hee diene Uage op?
27 Hee auntwuad an: "Ekj ha ju daut aul jesajcht, en jie horchte nich! Wuaromm wel jie daut wada heare? Wel jie uk siene Jinja woare?"
28 Donn schempte see am ut en saede: "Du best daem Maun sien Jinja; wie sent Mooses siene Jinja!
29 Wie weete daut Gott to Mooses jeraet haft; oba disa - wie weeta nich wua hee haea kjemt."
30 Dee Maun auntwuad en saed to an: "Na, hia es en besondret Dinkj, daut jie nich weete wua hee haea kjemt!
31 Wie weete daut Gott nich no Sinda horcht. Hee horcht no soone dee gottesferchtich sent en sien Wele doone.
32 Seit de Welt aunfung haft noch niemols eena jeheat daut en Blintjebuarne de Uage sent opjemoakt worde.
33 Wan dis Maun nich fonn Gott wea, kunn hee nuscht doone."
34 See auntwuade en saede to am: "Du best gauns enn Sinde jebuare, en west onns unjarechte?" En see schmeete am erut.
35 Jesus head daut see am erut jeschmaete haude, en funk am en saed: "Jleewst du aun daen Gottes Saen?"
36 Dee auntwuad en saed: "Herr, en waea es hee, daut ekj aun am jleewe kaun?"
37 Jesus saed to am: "Du hast am jeseene, en daut es dee waut nu met die raet."
38 Hee saed: "Ekj jleew, Herr;" en baed am aun.
39 En Jesus saed: "Tom rechte sie ekj en dise Welt jekome, daut dee Blinje seene muchte, en dee waut seene, muchte Blint woare."
40 Eenje fonn dee Farisaea dee bie am weare heade dee Wead, en saede to am: "Se wie uk Blint?"
41 Jesus saed to an: "Wan jie blint weare, wudd jie nich Sind habe, oba nu saj jie, "Wie seene," doaromm blift june Sind.
6 Mien Sän, wan du sejchaheit best fa dien Frint, wan du diene Haunt jejäft hast to en Framda,
2 Dan best du jeschlenjt met dee Wead ut dien Mul; du best faust jenome met dee Wead ut dien eajnet Mul.
3 Mien Sän, dan doo dit, un rad die selfst wan du diene Haunt jejäft hast to dien Frint; go, doo die deemootje un sie Brow to dien Frint.
4 Äwajef diene Uage nijch to Schlop, oda leijchta Schlop to diene Uagelette.
5 Rad die selfst soo aus en Hersch fonn däm Jäaja siene Haunt, un soo aus en Foagel fonn däm Jäaja siene Haunt.
6 Go no dee Eemskje, du fula Maun; bedenkj äare Wäaj un sie Weis,
7 wan dee uk kjeen Leida, oda Äwasejchta oda Harscha ha,
8 doch saumle see äare Arnt enn dän Eifst.
9 Woo lang woascht du die dol laje, O fula Mensch, en kjleen bät Schlop, en bät leijchta Schlop, en bät Henj toop laje dol to laje;
11 soo woat diene Oamoot kome aus eena däm jejäajat woat, un diene Noot soo aus en Maun reed tom Kjrijch.
12 En nutsloosa Mensch, en beesa Mensch wankt romm met en fedreidet Mul.
13 Hee plinkjt met siene Uage; hee schropt met siene Feet; hee wiest met siene Finjasch;
14 fedreide Dinje sent enn sien Hoat; hee deit eegol Beeset plone, hee schekjt Striet rut.
15 Doaromm woat sien Fenijchte haustijch kome; hee es schwind entwei jebroake un doa es kjeen heele.
16 Dee Herr Gott deit sas Dinje hausse; jo, säwen sent siene Seel jäajenaun:
17 stolltet Kjikje, ne Tunj dee leajcht, un Henj dee onnschuldjet Bloot fejeete;
18 en Hoat daut met beese Plona oabeide deit, Feet dee pienijch ranne to Schowanack;
19 en faulscha Zeij dee Läajes fäa brinjt; un soone dee Striet aunreede deit tweschen Breeda.
20 Mien Sän, hool dien Foda siene Jeboote; un felot nijch daut Jesats daut diene Mutta die jeef.
21 Binj dee aun dien Hoat fa emma; binj dee romm dien Jnekj.
22 Wan du jeist, dan woare dee die leide; wan du schlapst, woare dee wajchte äwa die; un wan du oppwakjst, dan woare dee met die räde.
23 Dan daut Aunkommendeare es ne Laump; un daut Jesats en Lijcht; un Dodle fonn ennleare sent en läwes Wajch;
24 die fonn dee beese Fru wajch to hoole, fonn daut Schmeijchle fonn dee framde Fru äare Tunj.
25 Lot die nijch enn dien Hoat losste no äa Straumet; un lot die nijch enn name met äare Uagelette.
26 Dan wäajen ne Fru, ne Hua, kjemt en Mensch bott daut latste biet Broot, un en aundra Maun siene Fru woat jäajre fa dee kjestlijche Seel.
27 Kaun en Maun Fia enn sien Bossem näme un siene Kjleede nijch febrennt woare?
28 Kaun en Maun opp jleajende Kola gone en nijch siene Feet febrenne?
29 Soo es hee dee no sien Noba siene Fru enenn jeit; jieda eena dee ar aunscheat woat nijch onnschuldijch senne.
30 Dee doone en Deef nijch feachte wan hee stäle deit siene Seel to befrädje wan am hungat.
31 Oba wan am utjefunge woat, dan saul hee säwenmol trigj tole; hee saul aul siene Sache ut sien Hus jäwe.
32 Wäa Eehebruch aunjeit met ne Fru haft kjeen Hoat; wäa soont deit, deit siene eajne Seel fenijchte.
33 Hee woat ne Wund un Onnea finge; un siene Schaund woat nijch wajch jewescht woare.
34 Dan Neit es en Maun sien Oaja, un hee woat nijch nolote enn dän Dach fonn sien Rach eewe.
35 Hee woat nijch en Betole name; un hee woat uk nijch enjäwe to Schmäajelt toolaje.
5 Christus haft onns frie jemoakt frie to senne; doaromm lot junt nich wada met en Slowejoch bewekle.
2 Kjikjt! ekj Paul saj junt, wan jie junt beschniede lote, dan helpt Christus junt nusscht.
3 En ekj bezeij wada to en jieda eenem dee sikj beschniede lat, daut hee schuldich es daut gaunse Jesats to hoole.
4 Jie sent fonn Christus loos jemoakt wan jie derch daut Jesats jerachtfoadicht sent; dan sent jie fonn dee Jnod aufjefolle.
5 Dan emm Jeist lua wie opp earenst derchem Gloowe fa dee Hopninj de Jerachtichkjeit.
6 Dan enn Christus Jesus talt beschnaede senne, oda onnbeschnaede senne nusscht, bloos Gloowe dee derch de Leew wirkjt.
7 Jie rande soo fein; waea haft junt jehingat daut jie nich sulle enne Woarheit beraet woare?
8 Dit beraede kjemt nich fonn daem, dee junt beroope haft.
9 En kjleen bestje Haew jeit derch daut gaunse Deach.
10 Ekj ha daut toofetruehe em Herr junt jaeajenaewa, daut jie nich woare aundasch jesennt senne; oba dee, dee junt Trubbelt, woat sien Uadeel selfst droage, waea emma hee mucht senne.
11 Oba Breeda, wan ekj dee Beschniedunk noch praedj, wuaromm woat mie dan noch emma fefolcht? Dan es daut Oajanes fom Kjriets to nusscht jemoakt.
12 Ekj mucht werklich daut dee, dee junt trubble, sikj selfst wudde fonn junt loos schniede.
13 Dan Breeda, jie sent to de Frieheit beroope; oba bruckt dee Frieheit nich aus en Jenotte fa daut Fleesch; leewa, deent eena daem aundra enn Leew.
14 Dan daut gaunse Jesats es toop jefot enn een Wuat, naemlich: "Du saust dien Noba jrod so leef ha aus die selfst".
15 Oba wan jie junt unjarenaunda biete en fefraete, dan seet junt faea daut jie junt nich unjarenaunda fenichte.
16 Nu saj ekj, waundelt em Jeist, dan woa jie daut nich doone waut dee Fleeschelosst felangt.
17 Dan daut Fleesch deit jaeajen daem Jeist iewre, en dee Jeist jaeajen daut Fleesch; dan dee sent sikj eena daem aundra jaeajenaewa, daut jie daut nich doone waut jie wele.
18 Oba wan jie fonn daem Heilje Jeist jeleit woare, dan se jie nich meeha unja daut Jesats.
19 Nu dee Woakje fom Fleesch sent oppenboa: daut sent Huararie, Onnreinheit, onnreine Raed,
20 Jetsedeenst, Tsauberie, Fientschofft, Striet, Aufgonst, Wutt, Tsank, Spoolerie, Onneenichkjeit, faulsche Lea,
21 Nosikj, Superie, Fraeterie, en soowaut meeha; waut ekj junt ferhaea jesajcht ha, en nu uk wada saj, daut dee, dee soowaut doone, woare Gott sien Rikj nich oawe.
22 Oba daem Jeist siene Frucht es Leew, Freid, Fraed, Jedult, Frintlichkjeit, Goots, Gloowe, Saunftmoot, Selfstbeharschunj; jaeajen soont es daut Jesats nich.
24 Nu dee, dee Christus aunjeheare, ha daut Fleesch met de Leidenschofft en Losst jekjrietsicht.
25 Wan wie em Jeist laewe, dan wel wie uk em Jeist waundle.
26 Wel wie onns nich puche met daut waut nusscht es, nich eena daem aundra enoagre, oda aufjenstich senne eena aewa daem aundra.
Copyright © 2001 by Elmer Reimer