M’Cheyne Bible Reading Plan
4 Aus donn de Herr daut eascht wist daut dee Farisaea jeheat haude daut Jesus meeha Jinga kjreajch en deept aus Jehaun,
2 Wan Jesus selfst uk nich deept, dee Jinja deede,
3 feleet hee Judaea en jinjk wada no Galilaea.
4 Hee musst oba derch Samaria reise.
5 Donn kjeem hee no ne Staut enn Samaria dee heet Siekar, dichtbie daut biet Launt waut Joakopp sien Saen Joosaf jejaeft haud.
6 Doa wea dee Joakoppsborm. Jesus wea meed fonn de Reis, en saut doa biem Borm, wiel daut wea Medach.
7 Donn kjeem doa ne Fru fonn Samaria Wota to hole. Jesus saed to aea: "Jeff me to drinkje."
8 Siene Jinga oba weare no dee Staut jegone Aete to kjeepe.
9 Dee Samarietische Fru saed donn to am: "Wu kjemt daut, daut du, en Jud, mie, ne samarietische Fru, no en Drunk Wota frajchst?" Dan de Jude habe nuscht met de Samarieta to doone.
10 Jesus auntwuad en saed to aea: "Wan du de Gottesgow kjansd, en waea dit es dee die frajcht: 'jef mie to drinkje!' dan wusscht du am jefroagt habe, en hee wudd die laewendjet Wota jejaeft habe".
11 Dee Fru saed to am: "Herr, du hast hea nuscht wuamet du schappe kaunst, en dee Borm es deep; fonn wua hast du daut laewendje Wota?
12 Du best doch nich jrata, best du, aus uns Foda Joakopp de onns dis Borm jeef, ut daen he selfst, uk siene Saens en sien Fee jedrunke ha?"
13 Jesus auntwuad en saed to aea: "Waea fonn dit Wota drinkjt, daem woat wada darschte;
14 Oba waea fonn daut Wota drinkjt waut ekj jaewe woa, woat niemols wada darschte; oba daut Wota waut ekj jaeawe woa, woat en daem ne aewaranende Kjwal, waut nehecht kjwalt enn daut eewjet Laewe."
15 Dee Fru saed to am: "Herr, jef mie daut Wota, daut mie nich meeha darschte woat, en ekj nich meeha bruck kome en schape!"
16 Jesus saed to aea: "Go roop dien Maun, en komm haea."
17 De Fru saed to am: "Ekj hab kjeen Maun." Jesus saed to aea: "Daut hast du Rajcht wan du sajchst, Ekj hab kjeen Maun.
18 Dan du hast fief Manne jehaut, en daen du nu hast es nich dien Maun. En daem hast du de Woarheit jeraet."
19 De Fru saed to am: "Herr, ekj woa enn daut du en Profeet best.
20 Onnse Fodasch habe up disen Boajch aunjebaet, en jie saje daut enn Jerusalem es de Staed wua Mensche sulle aunbaede."
21 Jesus saed to aea: "Fru, jleew mie, de Tiet woat kome wan jie nich opp disen Boajch, uk nich enn Jerusalem daem Foda woare aunbaede.
22 Jie weete nich waut jie aunbaede; wie weete waut wie aunbaede, dan daut Heil kjemt fonne Jude.
23 Oba doa woat ne Stund kome, en es nu aul, wan dee woarhauftje Aunbaeda daem Foda em Jeist en enne Woarheit woare aunbaede; dan de Foda seakjt no soone Aunbaeda.
24 Gott es Jeist, en dee am aunbaede, motte aunbaede em Jeist en enne Woarhiet."
25 De Fru saed to am: "Ekj weet daut dee Mesias kjemt, dee doa Christus heet. Wan dee kome woat, dee woat onns aules dietlich moake."
26 Jesus saed to aea: "Ekj, dee met die raed, sie dee Mesias."
27 En doaraewe kjeeme siene Jinja en fewunndade sikj daut he met de Fru raed, oba kjeena saed, "Waut seakjst du? oda: woaromm raetst du met aea?"
28 Dee Fru leet aeare Wotakruck stone en jinjk aea Wajch enne Staut ennen en saed to de Maunslied:
29 "Komt, seet en Maun dee mie aules jesajcht haft waut ekj jemols jedone hab! Kunn dit dee Christus senne?"
30 Donn jinje see ute Staut erut en kjeeme no am.
31 Enntwesche saede siene Jinja to am: "Meista, at doch!."
32 Oba hee saed to an: "Ekj hab aete to aete wua jie nusscht fonn weete."
33 Dee Jinja saede eena tom aundra: "Haft irjentwaea am waut to aete jebrocht?"
34 Jesus saed to an: "Mien Aete es daem sien Wele to doone dee mie jeschekjt haft, en sien Woakj foadich to moake.
35 Saj jie nich doa sent noch feeha Moonat en dann kjemt de Eifst? Oba ekj saj ju: Kjikjt emol, en seet de Arnt, dee es aul Riep en reed toom arnte.
36 en waea doa arnte deit, kjricht Loon, en saumelt Frucht fa daut eewjet Laewe, soo daut dee waut doa seit, en dee waut doa arnte deit, sikj beid toop freie kjenne.
37 Dan hia es dee Spruch woa: Eena seit, en sestwea arnt.
38 Ekj schekjt ju daut to arnte wuafaea jie nich jeoabeit haude; aundre ha jeoabeit en jie sent enn aeare Oabeit ennen jekome."
39 En fael fonn dee Samarieta en dee Staut jleewda aun am, wiel dee Fru to an jesajcht haud: "Hee saed mie aules waut ekj jedoone hab."
40 Aus dee Samarieta donn no am kjeeme, prachade see am daut hee bie an bliewe sull; en hee bleef doa twee Doag. En fael mea jleewde aun am weajen siene Wead,
42 en saede to de Fru: "Nu jleew wie nich meeha bloos waeajen diene raed, wie habe selfst jeheat, en weete daut dit werkjlich Christus, de Welt aea Heilaunt es."
43 Omm twee Doag jinkj he fonn doa no Galilaea,
44 Dann Jesus selfst saed, daut en Profeet haft enn sien eajen Launt kjeene Ea.
45 Aus he donn no Galilaea jekome wea, neeme de Galilaea am opp, wiel see haude aules jeseene waut hee enn Jerusalem jedone haud: see jinje uk no daut Fast.
46 Jesus kjeem donn wada no Kana enn Galilaea wua hee daut Wota to Wien jemoakt haud. En doa wea enn Rejearunks-be-aumte fonn Kapernaum, daem sien Saen wea Krank.
47 Aus dee head daut Jesus fonn Galilaea jekome wea, jinkj hee han en prachad am tom kome en sien Saen to heele, wiel dee wea doodes krank.
48 Donn saed Jesus to am: "Wan jie nich Teakjens en Wuunda seene, wel jie nich jleewe.
49 De Rejearungs-be-aumta saed to am: "Herr, komm eeha mien Kjint stoaft!"
50 Jesus saed to am: "Go dien Wajch, dien Saen laeft!" Dee Maun jleewd daut Wuat waut Jesus to am jesajcht haud, en jinkj sien Wajch.
51 En aus he oppem Trigwajch wea, kjeeme siene Deena en saede to am: "Dien Saen laeft!"
52 Donn fruach hee an omm woone Tiet daut met am wea baeta jeworde, en see saede: "Jistre, klok eent no Medach feleet am daut Feeba."
53 Donn wist dee Foda daut daut krakjt dee Teit wea aus Jesus to am jesajcht haud: "Dien Saen laeft." En hee selfst en siene gaunse Famielje jleewde.
54 Dit es nu daut tweede Teakjen daut Jesus deed aus hee fonn Judaea no Galilaea jekome wea.
1 Dee Sprejchwead fonn Salamo, Doft sien Sän, Kjeenijch enn Iesrael.
2 Weisheit un Unjarejchte to kjane; dee Wead fonn Festentnis to festone;
3 Unjarejchte to kjriehe enn Fäabedocht, Jerajcht, Jerejcht un Opprajchtijchkjeit;
4 En Senn to jäwe to dee Jugent, Wissenschoft un Fäasejcht to däm junja Maun.
5 – dee Weisa heat un nemt too enn Leare; un soone dee festone woare aunjeseene aus Weis –
6 En Sprejchwuat to festone un en onkloaret Weadabilt; dee Weise äare Wead, un dän äa Rotsel.
7 Däm Herr to ferjchte es dee Aunfank fonn Weisheit; Noare feachte Weisheit un Unjarejchte.
8 Mien Sän, horjch no dien Foda sien Unjarejchte; un doo nijch diene Mutta äa Ennleare felote;
9 dan dee woare en Utputsdinkj fonn Jnod senne romm dien Kopp, un Kjäde romm dien Jnekj.
10 Mien Sän, wan Sinda die locke, sie nijch wellijch.
11 Wan dee saje: "Komm met onns met, well wie heemlijch luare no Bloot; well wie heemlijch luare dee Onschuldje to jriepe oone Uasoak;
12 Well wie dän läwendijch oppschlucke soo aus daut Grauf, un dän dee rauf gone enne Kul,
13 Wie woare aulahaunt fa weatfolle Sache finje; wie woare onnse Hiesa felle met Raup;
14 Komm met onns met; wie woare aula toop eene Jeltausch ha."
15 Mien Sän, go nijch met an met enn äa Wajch! Hool dien Foot wajch fonn äa Stijch;
16 dan äare Feet ranne Beeset hinjaraun, un dee spoode sikj Bloot to fejeete.
17 Dan daut Nat woat emm sonnst utjespreet wan jieda Foagel daut seene kaun.
18 Un dee luare emm Jeheeme fa äa eajnet Bloot; dee schlikje sikj romm jeheemlijch fa äare eajne Seele.
19 Soo sent aul dän äare Wäaj dee beeset Loon kjriehe; daut nemt däm Eajendeema siene Seel wajch.
20 Weisheit schrijcht lud enn dee Staut Wäaj; see es to heare enn dee Staut Gausse;
21 see roopt bie dee Städ wua dee Mensche sikj fesaumle, wua dee Puate opjemoakt woare; enn dee Grootstaut sent äare Wead to heare:
22 Woo lang woa jie daut leef ha eefeltijch to senne, jie Eefeltje? Un woo lang woare Spatte spotte, un Noare Wissenschoft hausse?
23 Drei trigj un nemm miene Woarninj aun; see, ekj woa mien Jeist opp die utjeete; ekj woa miene Wead bekaunt moake to die.
24 Wiels ekj jeroopt ha, un du daut aufjesajcht hast; ha ekj miene Haunt utjestrakjt, un kjeena haft daut aunjenome;
25 oba du hast mien Rot nijch acht jejäft; du wust miene Woarninj nijch;
26 Woa ekj uk lache wan dien Onjlekj kjemt, ekj woa spotte wan dien Angst kjemt;
27 wan dien Schrakj kjemt soo aus en Storm; un dien Onjlekj kjemt soo aus en willa Storm wan Älend un dien Trigjhoole opp die kjemt.
28 Dan woare see mie aunroope, un ekj woa nijch auntwuate; dee woare mie Tiedijch seakje, oba woare mie nijch finje.
29 Daut see Wissenschoft hausste, un wälde nijch däm Herr Gott siene Forjcht.
30 Dee wulle mien Rot nijch, dee deede mien dodle feachte;
31 un dee woare daut Frucht fonn äa eajna Wajch äte, un jefelt senne met äare eajne Losst.
32 Daut auntsied gone fonn dee Eefeltje woat am ommbrinje, un dee Noare äare Leijchtheit woat an fenijchte.
33 Oba wäa no Mie horjcht saul sejcha läwe; un woat enn Ru senne fonn daut Schrakj fonn Beeset.
13 Dit es nu daut dreddet Mol daut ekj no ju kom. Enn twee oda dree Zeij saul aules bestaedicht woare.
2 Ekj haud eare jesajcht, en saj nu em ferut soo aus ekj bie junt wea, en nu nich bie junt sie, to dee, dee ferhaea jesindicht ha, uk to aul dee aundre, daut wan ekj wada kom woa ekj nich spoare,
3 wiel jie Bewies wele ha daut ekj enn Christus raed, dee nich Schwak, oba Kjraftich es enn junt.
4 Am wort werklijch jekjrietsicht enn Schwakheit, oba hee laeft derch Gott siene Krauft. Wie sent uk Schwak enn am, oba woare met am laewe derch Gott siene Krauft junt jaeajenaewa.
5 Prooft junt selfst, auf jie em Gloowe sent, unjaseakjt junt selfst. Oda weet jie nich selfst daut Christus enn ju es? Buta wan jie fefaulscht sent.
6 Ekj hop daut jie weete daut wie nich fefaulscht sent.
7 Wie baede nu to Gott daut jie kjeen Onnrajcht doone, nich daut wie sulle bewoat woare, oba daut jie daut Goodet doone.
8 Dan wie kjenne nusscht jaeajen de Woarheit doone, bloos doafaea.
9 Dan wie freihe onns wan wie Schwak sent, jie oba Stoakj; en fa dit doo wie baede, daut jie muchte follkome senne.
10 Doaromm schriew ekj dit eeha ekj hankom, daut wan ekj kom, ekj nich woa bruke Shoap senne no dee Krauft dee de Herr mie jejaeft haft tom Oppbuehe, nich tom dolriete.
11 Fa daut aewrije, Breeda, freit junt, lot junt trajchthalpe, femont junt, denkjt aewareen, siet fraedlich, en dee Gott, dee Fraed en Leew es, woat met junt senne.
12 Jreest junt unjarenaunda met en heilje Kuss.
13 Aul dee Heilje jreese junt.
14 Mucht daem Herr Jesus siene Jnod, en Gott siene Leew, en daem Heilje Jeist siene Jemeenschofft met junt aula senne
Copyright © 2001 by Elmer Reimer