M’Cheyne Bible Reading Plan

За дарежливоста

(Мт. 6:6,18; 23:5; 2Кор. 9:9) 6 „Пазете се од искажување побожност и добрина со цел да се покажете пред луѓето, зашто тогаш не ќе имате награда од вашиот небесен Татко.

² А кога давате милостини, не трубете насекаде, како што тоа го прават лицемерите по синагогите^[a] и по улиците. Тие го прават тоа за да бидат пофалени од луѓето. Ве уверувам дека друга награда за нив ќе нема! ³ А ти, кога ќе даваш милостини, твојата лева рака да не знае што дала десната; ⁴ нека бидат дискретни твоите милостини, а твојот небесен Татко, Кој го гледа и тоа што е тајно, ќе те награди јавно.“

За молитвата

⁵ „А кога се молите, не постапувајте како лицемерите, кои сакаат да бидат забележани од другите кога се молат по синагогите^[b] и по плоштадите. Ве уверувам дека друга награда за нив ќе нема! ⁶ А ти, кога ќе се молиш, влези во својата соба, затвори ја вратата и помоли Му се на твојот невидлив небесен Татко, Кој го гледа тоа што е тајно и ќе те награди јавно.

⁷ Кога се молите, не редете празни зборови, како што тоа го прават оние што не Го познаваат Бога, мислејќи дека ќе бидат услишани поради својата речовитост. ⁸ Не бидете како нив, зашто вашиот небесен Татко ги знае вашите потреби уште пред да Го молите за нив. ⁹ Затоа, молете се вака:

,Татко наш, Кој си на небесата: нека се почитува Твоето Име!

¹⁰ Нека дојде Твоето царство, нека се извршува Твојата волја овде на Земјата, како што се извршува на небото.

¹¹ Дај ни ја неопходната храна за денешниот ден.

¹² Прости ни ги нашите гревови, како што и ние веќе им простивме на оние што нам ни згрешија.

¹³ Не оставај да им потклекнеме на искушенијата, но избави не од Лукавиот‘. (Зашто Тебе Ти припаѓаат и Царството, и силата, и славата, за вечни векови, амин^[c].) ¹⁴ Зашто, доколку вие им ги простувате гревовите на другите, ќе ви ги прости и вам вашиот небесен Татко. ¹⁵ Но, ако вие не им простувате на луѓето, ни вашиот небесен Татко нема вам да ви ги прости вашите гревови.“

За постот

(Иса. 58:5-12) ¹⁶ „И кога постите, не бидете намуртени како лицемерите; тие си го изобличуваат лицето за да забележат луѓето дека постат. Ве уверувам дека друга награда за нив ќе нема! ¹⁷ А ти, кога постиш, дотерај си ја косата и разведри си го лицето, ¹⁸ за да не те познаат луѓето дека постиш; доволно е што знае твојот небесен Татко, Кој го гледа тоа што е тајно, за што ќе те награди јавно. “

За богатството на Земјата и на небото

(Лк. 12:22-36; 16:13; Мт. 19:21; По 23:4-5) ¹⁹ „Не напластувајте си богатство овде на Земјава, каде што молци и ’рѓа го уништуваат и крадци провалуваат и го крадат, ²⁰ туку напластувајте си богатство на небото, каде што ни молци ни ’рѓа го уништуваат, ниту пак крадци провалуваат и крадат. ²¹ Зашто, каде што ви е богатството, таму ќе ви биде и срцето.

Споредба со окото

²² Очите се светилка за телото; ако ти се здрави очите, целото тело ќе ти биде осветлено; ²³ ако, пак, очите не ти се добри, целото тело ќе ти биде затемнето. Значи, ако тоа што во тебе треба да е светлина, всушност е темнина, колку ли е црна темнината!?

Или Бог или материјалното

²⁴ Никој не може да им служи на двајца господари: или едниот ќе го сака, а другиот ќе го мрази, или пак едниот ќе го почитува, а другиот ќе го презира. Не можете да им служите и на Бога и на парите^[d].

Повик на вера во Божјата грижа за нас

²⁵ Затоа, ви велам, да не ве мачат грижи за неопходната храна и облека кои ви се потребни за живот; зар животот не е повеќе од храна и облека за телото? ²⁶ Погледнете ги птиците во небесниот свод: тие ни сеат, ни жнеат, ниту пак резерви си напластуваат; па сепак, вашиот небесен Татко ги храни. Та зар за Бог вие не сте повредни од нив!? ²⁷ Можат ли сите ваши грижи, макар и за педа да ви го продолжат животот^[e]?

²⁸ И зошто се грижите за облекувањето? Погледнете како растат полските цвеќиња: тие не се трудат, ниту предат, ²⁹ па сепак, ви велам дека ни царот Соломон во својата најголема слава не беше накитен како еден полски цвет! ³⁰ А, кога Бог така ја облекува полската трева, која денес ја има, а веќе утре в оган се фрла, зар Тој нема и вас да ве облече? Колку мала вера имате! ³¹ Затоа, да не ве мачат грижи за тоа што ќе јадете, што ќе пиете и во што ќе се облечете; ³² тоа им е својствено на оние што не Го познаваат Бога, кои се јадосуваат поради овие работи. А вашиот небесен Татко знае дека тие работи ви се неопходни. ³³ Вие, пак, грижете се најнапред за Божјото царство и Неговата праведност, а се друго што ви е потребно, ќе ви биде дадено. ³⁴ Значи, не грижете се за утрешниот ден - тој ќе се погрижи за себе. Доволно грижи има за денешниот ден!“

Назначување на седум помошници

6 Во тоа време, откако бројот на христијаните се зголеми, Елините^[a] се побунија против Евреите, зашто нивните вдовици беа занемарувани при секојдневното делење на храна. ² Тогаш дванаесетте апостоли ги свикаа сите христијани и им рекоа: „Не е добро ние, апостолите, да го запоставуваме проповедањето на Божјата порака и да служиме околу трпезите. ³ Затоа, браќа, одберете меѓу себе седуммина чесни мажи, со добар углед, исполнети со Светиот Дух и со мудрост, на кои ќе им го предадеме ова задолжение, ⁴ а ние целосно ќе се посветиме на молитва и на проповедање на Божјата порака.“

⁵ Ова им се допадна на присутните и ги одбраа: Стефан, човек исполнет со вера и со Светиот Дух, Филип, Прохор, Никанор, Тимон, Пармен и Никола, новообратен прозелит од Антиохија. ⁶ Ги доведоа пред апостолите, кои со положени раце над нив се помолија за нив.

⁷ Божјата порака се пошироко се прифаќаше и бројот на христијаните во Ерусалим бргу се зголемуваше, па и голем број еврејски свештеници ја прифаќаа христијанската вера.

Апсењето на Стефан

⁸ Бог беше благонаклонет спрема Стефан и му даде сила, па тој правеше големи чуда и изнесуваше докази меѓу луѓето. ⁹ Но еден ден, неколку припадници на синагогата наречена ‚Синагога на ослободените‘ почнаа да се расправаат со него. Тие беа Евреи од Киринеја, Александрија, Киликија и од областа Азија. ¹⁰ Не можејќи да им се противстават на мудроста и на Духот со кои Стефан зборуваше, ¹¹ тие тајно наговорија неколку луѓе лажно да го обвинат, велејќи: „Го слушнавме како зборува многу навредливи работи против Мојсеј и против Бог!“

¹² Така успеаја да ги кренат на нозе народот, старешините и вероучителите, кои дојдоа кај Стефан, го фатија и го изведоа пред Врховното собрание^[b]. ¹³ Истапија лажните сведоци и рекоа: „Овој човек не престанува да зборува против овој храм^[c] и против Мојсеевиот Закон. ¹⁴ Го слушнавме како зборува дека Исус од Назарет ќе го уништи храмот и ќе ги измени обичаите што ни се предадени од Мојсеј.“

¹⁵ Тогаш сите што седеа во собранието се загледаа во Стефан, забележувајќи дека лицето му стана како лице на ангел.