M’Cheyne Bible Reading Plan

3 Во тоа време, во јудејската пустина започна да проповеда Јован Крстител. Неговата порака беше: ² „Покајте се, зашто небесното царство се приближува!“ ³ Тој е човекот што беше претскажан од пророкот Исаија со зборовите:

„Глас одекнува низ пустината, кој вели:

,Пригответе пат за доаѓањето на Господ,

исправете го патот за Него^[a]!‘“

⁴ Јован носеше облека исплетена од камилски влакна, а околу појасот носеше кожен ремен; се хранеше со скакулци и див мед. ⁵ Кај него доаѓаа луѓе од Ерусалим, од цела Јудеја и од сите предели по долината на реката Јордан. ⁶ Тие ги исповедаа своите гревови, а тој ги крштаваше^[b] во реката Јордан.

⁷ Но кога Јован виде дека кај него доаѓаат да се крстат и голем број фарисеи и садукеи^[c], им рече: „Змиски рожби! Кој ве предупреди, та бегате од Божјиот гнев што доаѓа!? ⁸ Докажете^[d] на дело дека навистина сте се покајале! ⁹ Не залажувајте се со тоа што сте потомци на Авраам, зашто, ви велам, Бог може и од овие камења да направи Авраамови потомци! ¹⁰ Божјата секира е веќе замавната и в корен ќе го пресече и в оган ќе го фрли секое дрво што не раѓа добар плод. ¹¹ Јас ве крштавам во вода, врз основа на вашето покајание, но Оној што иде по мене е многу поголем од мене и јас не сум достоен ни сандалите да Му ги одврзам; Тој ќе ве крсти^[e] со Светиот Дух и со оган. ¹² Тој има лопата в раце и ќе го исчисти Своето гумно: житото ќе го собере во житните складови, а плевелот ќе го гори во вечен оган.“

Крштавањето на Исус

(Мк.1:9-11; Лк.3:21-22) ¹³ Во тоа време, од Галилеја дојде Исус да се крсти кај Јован, во реката Јордан. ¹⁴ А Јован го одвраќаше, велејќи Му: „Ти треба да ме крстиш мене, а не јас Тебе!“ ¹⁵ Но Исус му рече: „Така треба да биде сега, зашто ние треба да исполнуваме се што е правилно.“ Тогаш Јован се согласи и Го крсти.

¹⁶ И тукушто се крсти Исус и излегуваше од водата, наеднаш небото се отвори и Јован го виде Божјиот Дух, во облик на гулаб, како слегува и се спушти над Исус. ¹⁷ Се чу и глас од небото, кој рече: „Ова е Мојот Син - Мојот Љубимец, со Кого наполно Сум задоволен!“

Петар исцелува сакат питач

3 Еден ден, Петар и Јован се упатија кон храмот. Беше три часот попладне - време за молитва. ² Токму тогаш донесоа еден човек, сакат во нозете од раѓање, што секојдневно го носеа и го оставаа пред познатата ‚Красна порта‘, за да проси милостина од луѓето што доаѓаа во храмот. ³ Кога виде дека Петар и Јован ќе влегуваат во храмот, запроси да му дадат нешто. ⁴ Петар и Јован го погледнаа и му рекоа: „Погледни не!“ ⁵ Сакатиот молежливо ги гледаше, очекувајќи милостина.

⁶ Тогаш Петар му рече: „Немам ни сребреници, ни златници, но тоа што го имам, ти го давам: Во името на Исус Христос од Назарет, стани и ќе проодиш!“

⁷ Потоа го фати за десната рака и го исправи. Во истиот миг му зацврснаа стапалата и глуждовите! ⁸ Скокна, застана на своите нозе и почна да оди! Заедно со нив влезе во храмот, скокајќи и славејќи Го Бога.

⁹ Целиот народ го виде како оди и Го слави Бога. ¹⁰ Тие знаеја дека тоа беше истиот човек што седеше и просеше пред Красната порта на храмот и од восхит не можеа да се изначудат на она што се случи.

Петар проповеда во храмот

¹¹ Сиот народ се насобра околу нив, под Соломоновиот трем. Човекот не се одвојуваше од Петар и Јован. Луѓето стоеја, стаписани од тоа што се случи.

¹² Кога Петар виде дека луѓето се чудат, им рече: „Луѓе, Израелци, зошто се чудите на ова? Зошто зјапате во нас, небаре ние со своја сила или побожност направивме овој човек да прооди!? ¹³ Преку ова дело, Богот на Авраам, на Исак, на Јаков и на сите наши предци, Го прослави Својот Слуга Исус. Вие Го предадовте и се откажавте од Него пред Пилат, кога тој беше решил да Го ослободи. ¹⁴ Се откажавте од Светиот и Праведниот, а побаравте да биде пуштен на слобода еден убиец! ¹⁵ Зачетникот на животот Го убивте! Но Бог Го воскресна од мртвите - ние сме живи сведоци за тоа. ¹⁶ Овој човек, кого вие добро го познавате, се исцели врз основа на верата во Неговото име. Верата во Исусовото име го оздраве пред вашите очи.

¹⁷ Браќа, знам дека вие и вашите водачи го направивте тоа од незнаење, ¹⁸ но Бог на тој начин го исполни она што го беше претскажал преку сите пророци: дека Месијата^[a] испратен од Него ќе мора да помине низ овие страдања. ¹⁹ Затоа покајте се и свртете се кон Бога, за да ви бидат избришани гревовите. ²⁰ Тогаш, присуството на Господ во вашите животи ќе ви донесе освежување и Бог ќе ви Го испрати Месијата Исус, Кој од порано ви беше претскажан. ²¹ Исус треба да остане на небото, се додека не дојде време Бог да обнови се, како што ни вети уште одамна преку Своите свети пророци. ²² Уште Мојсеј беше претскажал: ,Господ, вашиот Бог, ќе ви издигне од вашиот народ Пророк, како што сум јас. Се што ќе ви каже Тој - слушајте Го!^{[b] 23} Секој што нема да Го послуша Тој Пророк, ќе биде истребен од Божјиот народ^[c].‘

²⁴ А и сите пророци, од Самоил и неговите наследници, па наваму, зборуваа токму за ова време. ²⁵ Вие сте потомци на пророците, вие сте тие за кои Бог на вашите предци им даде завет, ветувајќи му на Авраам: ,Преку твоето потомство ќе бидат благословени сите народи на Земјата^[d].‘ ²⁶ Штом Бог Го издигна Својот Слуга, Го испрати прво кај нас, за да ве благослови со тоа што секого од вас ќе го одврати од вашите грешни патишта.“