Chronological

⁸ “‘તમે એવું શી રીતે કહી શકો કે, “અમે શાણા છીએ, અમારી પાસે યહોવાનુ નિયમશાસ્ત્ર છે.”
    શાસ્ત્રીઓએ જૂઠી કલમો દ્વારા નિયમશાસ્ત્રમાં જૂઠ દાખલ કર્યું છે!
⁹ “શાણા માણસો” લજ્જિત થશે, તેઓ ડરી જશે
    અને તેમના કામો ઉઘાડા પડી જશે.
નોંધી રાખજો, આ યહોવાના શબ્દો તેમણે નકાર્યા હતા.
    તેમની પાસે કેવું શાણપણ હોઇ શકે?
¹⁰ હું તેમની પર દુકાળ, તરવાર
    અને બીમારી મોકલી દઇશ.
હું તેમની પર ત્યાં સુધી હુમલો કરીશ જ્યા સુધી તે મરી નહિ જાય,
    ત્યારે તેઓ આ ભૂમિ પર સદાને માટે નહી રહે.
    જે મેં તેમને અને તેમના પિતૃઓને આપી હતી.
¹¹ તેઓ મારા લોકોના ઘા નો સામાન્ય ઉઝરડા હોય
    એમ ઉપચાર કરે છે.
તેઓ કહે છે કે, “બરાબર છે, બધું બરાબર છે.”
    પણ લગારે બરાબર નથી.
¹² મૂર્તિઓની પૂજા કરવાને લીધે, શું તેઓને શરમ લાગે છે?
    ના, તેઓને સહેજે શરમ લાગતી નથી;
વળી શરમ શું છે તે પણ તેઓ જાણતા નથી!
    તે કારણે હું જોઇશ કે આથી બીજાની જેમ તેમનું પણ પતન થશે.
હું જ્યારે તેમને સજા કરીશ ત્યારે તેઓ ભોંયભેગા થઇ જશે.’”
    આ યહોવાના વચન છે.

¹³ યહોવા કહે છે કે, “‘હું તેઓનો સંપૂર્ણ નાશ કરીશ;
    વળી દ્રાક્ષાવેલા પર કઇં દ્રાક્ષો થશે નહિ,
ને અંજીરીને અંજીર લાગશે નહિ,
    ને પાંદડા ચીમળાશે;
મેં તેઓને જે કઇં આપ્યું છે તે તેઓની પાસેથી જતું રહેશે.’”
આ યહોવાના વચન છે.

¹⁴ પછી યહોવાના લોકો કહેશે, “‘અહીં આપણે મરણ પામવાની પ્રતિક્ષા શા માટે કરીએ?
    આવો, આપણે કિલ્લેબંધ નગરોમાં જઇએ
અને ત્યાં મૃત્યુ પામીએ,
    કારણ કે આપણા દેવ યહોવાએ આપણું મૃત્યુ જાહેર કર્યું છે
અને આપણા સર્વ પાપોને
    કારણે દેવે આપણને ઝેરનો પ્યાલો પીવાને આપ્યો છે.
¹⁵ આપણે શાંતિની અપેક્ષા રાખી હતી,
    પરંતુ કઇં શાંતિ થઇ નહિ,
આપણે કુશળ સમયની રાહ જોઇ હતી,
    પરંતુ તેના બદલે ભય આવી પડ્યો.
¹⁶ ઉત્તર દિશાની સરહદ ઉપરથી યુદ્ધના ભણકારા સંભળાઇ રહ્યા છે.
    દુશ્મનો દાનના કુળસમૂહોના શહેર સુધી આવી પહોંચ્યા છે;
    ત્યાંથી તેમના ઘોડાઓના હણહણાટ સંભળાય છે,
તેમના હણહણાટથી આખો દેશ ધ્રુજી ઊઠે છે,
    એ લોકો આખો પ્રદેશ
અને એમનું સર્વસ્વ,
    શહેરો અને તેના વતનીઓને ભરખી જવા આવે છે.’”

¹⁷ યહોવા કહે છે, “સાવધાન! હવે હું તમારા પર સર્પો
    અને નાગો મોકલું છું,
એવા કે જેને કોઇ મંત્રથી વશ ન કરી શકે,
    તે તમને કરડશે.”

¹⁸ દેવ મારું હૃદય થાકી ગયું છે, શોક મને ઘેરી વળે છે.
¹⁹ સાંભળ! દુર સુધી દેશમાં
    મારા લોકોની ચીસ સંભળાય છે,
તેઓ કહે છે, “યહોવા હવે સિયોનમાં નથી?
    સિયોનના રાજાઓનો રાજા એમાં વસતો નથી?”

યહોવાએ પ્રત્યુત્તર આપ્યો,
“તમારી કોતરેલી મૂર્તિઓની પૂજા કરીને
    અને તમારા વિદેશી દેવો દ્વારા શા
    માટે મને ક્રોધિત કર્યો છે?”
²⁰ લોકો કહે છે,
    “કાપણી પૂરી થઇ છે,
ઉનાળો વિતી ગયો છે,
    પણ આપણું તારણ ન થયું.”

²¹ મારા લોકોના ઘા જોઇને મારું હૈયું ઘવાય છે,
    હું શોક કરું છું; અને હું વિશાદથી દિગ્મૂઢ થઇ ગયો છું.
²² શું હવે ગિલયાદમાં દવા નથી?
    ત્યાં કોઇ વૈદ્ય નથી?
    તો પછી મારા લોકોના ઘા રુઝાતા કેમ નથી?

9 મારું માથું જળાશય હોય તો કેવું સારું!
    મારી આંખો આંસુના ઝરણાં હોય તો કેવું સારું! હું સદાકાળ ચિંતા કર્યા કરું;
    મારા લોકોની હત્યાઓ માટે હું રાત-દિવસ કલ્પાંત કર્યા કરું!

² અરે, હું તેઓથી દૂર ચાલ્યો જાઉં
    અને તેઓને વીસરી જાઉં
અને અરણ્યમાં મને રહેવા માટે કોઇ ઝૂંપડી મળી જાય ને,
    તો હું મારા લોકોને છોડીને ત્યાં ચાલ્યો જાઉં!
એ બધા બેવફા લોકો છે,
    દગાબાજોની ટોળકી છે.

³ યહોવા કહે છે, “તેઓ ધનુષ્યની માફક
    પોતાની જીભ વાળીને પોતાનાં અસત્યના બાણો ફેંકે છે.
તેઓ સત્યની પરવા કરતા નથી
    અને તેઓ વધુ ને વધુ દુષ્ટ બનતા જાય છે;
    તેઓ મારી પણ પરવા કરતા નથી.”

⁴ “પ્રત્યેક જણ પોતાના મિત્રથી સાવધ રહેજો,
    ભાઇનો પણ વિશ્વાસ ન કરતા,
કારણ, એકેએક ભાઇ
    યાકૂબ જેવો દગાબાજ છે.
⁵ અને એકેએક મિત્ર પોતાના મિત્રની
    નિંદાત્મક જૂઠી વાતો ફેલાવે છે.
દરેક જણ પોતાના મિત્રને છેતરે છે,
    કોઇ સાચું બોલતું નથી,
તેમની જીભ જૂઠું
    બોલવા ટેવાઇ ગઇ છે.
⁶ તેઓ ખોટે માર્ગે ચડી ગયા છે,
    પાછા ફરી શકે એમ નથી,
અન્યાય પર અન્યાય અને છેતરપિંડી
    ઉપર છેતરપિંડી કર્યા જ જાય છે!
મારી પાસે આવવાનો સંપૂર્ણ ઇન્કાર કરે છે.”
    આ યહોવાના વચન છે.

⁷ તેથી સૈન્યોનો દેવ યહોવા કહે છે,
“હું તેઓને દુ:ખરૂપી કુલડીમાં ઓગાળીશ.
    હું તેઓને શુદ્ધ કરીશ અને ધાતુની જેમ
હું તેઓની પરીક્ષા કરીશ,
    આ સિવાય તેઓને માટે હું બીજું શું કરું?
⁸ તેમની જીભ જીવલેણ બાણ જેવી છે,
    તેઓ જૂઠાણું જ ઉચ્ચારે છે.
બધા મોઢે મીઠું બોલે છે,
    પણ મનમાં એકબીજાને ફસાવવાના ઘાટ ઘડે છે.”
⁹ યહોવા પૂછે છે, “આ બધા માટે
    મારે તેમને શું સજા ન કરવી?
આવી પ્રજા પર શું
    મારો આત્મા વૈર નહિ લે?”

¹⁰ હું તેઓના પર્વતો અને ઘાસચારાના બીડો માટે વિલાપ
    અને રૂદન કરતાં કરતાં તેમની તરફ નજર કરું છું;
    તેઓ ઉજ્જડ થઇ ગયા છે,
તેમાં કોઇ જીવતું રહ્યું નથી.
    ઢોરનો અવાજ સંભળાતો નથી
અને પક્ષીઓ તથા જંગલી પ્રાણીઓ પણ ત્યાં નથી;
    સર્વ નાસી ગયા છે.

¹¹ યહોવાએ કહ્યું, “યરૂશાલેમને હું ખંડેરોનો ઢગલો બનાવી દઇશ,
    શિયાળોની બોડ બનાવી દઇશ,
અને હું યહૂદિયાના શહેરોને નિર્જન
    વગડામાં ફેરવી નાખીશ.”

¹² મેં પૂછયું, “યહોવા, કોણ એવો શાણો છે જે આ સર્વ સમજી શકે? તે સમજાવનાર યહોવાનો સંદેશાવાહક ક્યાં છે? વળી આ દેશ શા માટે અરણ્ય જેવો થઇ ગયો છે કે તેમાં થઇને મુસાફરી કરવાની કોઇ હિંમત કરતું નથી?”

¹³ યહોવાએ કહ્યું,
“એનું કારણ એ છે કે લોકોએ એમને માટે મેં રજૂ કરેલી નિયમસંહિતાનો ત્યાગ કર્યો છે.
તેમણે નથી મારું કહ્યું સાંભળ્યું કે
    નથી તેનું પાલન કર્યું.
¹⁴ તેના બદલે તેઓએ પોતાને ગમ્યું તે કર્યું છે.
    અને તેઓના પિતૃઓએ શીખવ્યા પ્રમાણે બઆલની મૂર્તિઓની પૂજા કરી છે.”

¹⁵ આથી હું, ઇસ્રાએલનો દેવ, સૈન્યોનો દેવ યહોવા કહું છું કે,
“હવે હું આ લોકોને ખાવા માટે કડવી વેલ
    અને પીવા માટે ઝેર આપવાનો છું.
¹⁶ હું તેમને સમગ્ર વિશ્વમાં વિખેરી નાખીશ,
તેઓ દૂરના દેશોમાં વિદેશીઓ જેવા થશે;
    ત્યાં પણ વિનાશકારી તરવાર તેઓનો પીછો કરશે.
આમ તેઓનો સંપૂર્ણ નાશ થશે.”

¹⁷ સૈન્યોનો દેવ યહોવા કહે છે,
    “પરિસ્થિતિઓનો વિચાર કરીને દુ:ખનાં ગીતો ગાનારીઓને બોલાવો.
દુ:ખનાં ગીતો ગાવામાં જે
    પારંગત હોય તેને બોલાવો;
¹⁸ જલદી કરો, તેમને કહો કે
‘આપણે માટે જલ્દી દુ:ખનાં ગીતો ગાય,
જેથી આપણી આંખોમાં ચોધાર આંસુ વહે
    અને આપણી પાંપણો ભીંજાઇ જાય.’

¹⁹ “સિયોનમાં વિલાપના સ્વર સંભળાય છે:
‘આપણો વિનાશ કેટલો ભયંકર છે!
    આપણે કેવા શરમિંદા થવું પડ્યું?
આપણને આપણી ભૂમિ છોડવાની ફરજ પડી,
    કારણ કે તેઓએ આપણા
    ઘરોને તોડી પાડયા છે.’”

²⁰ પરંતુ હે વિલાપ કરનારી સ્ત્રીઓ,
    દેવનો સંદેશો સાંભળો.
તે શું કહે છે તે ધ્યાનથી સાંભળો;
    “તમારી પુત્રીઓને અને તમારી પડોશણોને મરશિયા ગાતાં શીખવો.
²¹ ‘મૃત્યુ આપણી બારીઓમાં થઇને આપણી હવેલીઓમાં અંદર ઊતર્યું છે.
    અને આપણા બાળકોને વધેરી નાખ્યા છે.
તેઓ હવે રસ્તા પર રહ્યાં નથી,
    અને તરુણો જાહેર ચોકમાં રહ્યાં નથી.’”

²² યહોવા કહે છે: “તેઓને આ પ્રમાણે કહો,
‘ખેતરમાં ખાતરની માફક
    તથા કાપણી કરનારની પાછળ કલ્લા પડે છે
તેની માફક મૃત શરીરો ખેતરોમાં વિખરાયેલા હશે.
    અને તેઓને દફનાવનાર કોઇ હશે નહિ.’”

²³ યહોવા કહે છે,
“જ્ઞાનીએ પોતાના જ્ઞાનની કે બળવાને
    પોતાના બળની કે ધનવાને
    પોતાના ધનની બડાશ મારી અભિમાન કરવું જોઇએ નહિ.
²⁴ પરંતુ તેઓ ફકત
    આ એક બાબતમાં અભિમાન કરે
કે તેઓ મને સાચે જ ઓળખે છે અને સમજે છે
    કે હું નિષ્પક્ષ અને ન્યાયી યહોવા છું
અને મારી પ્રીતિ અવિચળ છે
    કારણ કે આ જ મને પસંદ છે.”
આ યહોવાના વચન છે.