Old/New Testament

Ang tubig na makapagpapagaling.

47 At ibinalik niya ako sa ^(A)pintuan ng bahay; at, narito, ang ^(B)tubig ay lumalabas sa ilalim ng pasukan sa bahay sa dakong silanganan (sapagka't ang harapan ng bahay ay sa dakong silanganan); at ang tubig ay umaagos sa ilalim, mula sa dakong kanan ng bahay, sa timugan ng dambana.

² Nang magkagayo'y inilabas niya ako sa daan ^(C)ng pintuang-daang hilagaan, at pinatnubayan niya ako sa palibot ng daan ^(D)sa labas, sa lalong labas ng pintuang-daan, sa daan ng pintuang-daan na nakaharap sa dakong silanganan; at, narito, doo'y lumalabas ang tubig sa dakong kanan.

³ Nang ang lalake ay lumabas sa dakong silanganan na may ^(E)pising panukat sa kaniyang kamay, siya'y sumukat ng isang libong siko, at pinaraan niya ako sa tubig, sa tubig na hanggang bukongbukong.

⁴ Muling sumukat siya ng isang libo, at pinaraan niya ako sa tubig, sa tubig na hanggang mga tuhod. Muli siyang sumukat ng isang libo, at pinaraan niya ako sa tubig, sa tubig na hanggang sa mga balakang.

⁵ Pagkatapos ay sumukat siya ng isang libo; at isang ilog na hindi ko naraanan; sapagka't ang tubig ay sumasampa, tubig upang languyan, ilog na hindi mararaanan.

⁶ At sinabi niya sa akin, Anak ng tao, nakita mo baga ito? Nang magkagayo'y dinala niya ako, at pinabalik niya ako sa pangpang ng ilog.

⁷ Nang ako nga'y makabalik, narito, sa pangpang ng ilog, ay may totoong maraming puno ng kahoy sa magkabilang dako.

⁸ Nang magkagayo'y sinabi niya sa akin, Ang tubig na ito ay lumalabas sa dakong silanganang lupain, at bababa sa Araba; at huhugos sa ^(F)dagat; sa dagat ay huhugos ang tubig na pinalabas; at ang tubig ay mapagagaling.

⁹ At mangyayari, na bawa't likhang may buhay na dumadami, saan mang dako umaagos ang tubig, ay mabubuhay; at magkakaroon ng totoong napakaraming isda; sapagka't ang tubig na ito ay dumarating diyan at ang tubig ng dagat ay mapagagaling, at bawa't may buhay ay mabubuhay saan man dumating ang ilog.

¹⁰ At mangyayari, na ang mga mangingisda ay magsisitayo sa tabi niyaon: mula sa ^(G)En-gedi hanggang sa ^(H)En-eglaim ay magiging dako na ladlaran ng mga lambat; ang mga isda ng mga yaon ay magiging ayon sa pagkakaisda ng mga yaon, gaya ng isda sa malaking dagat, na totoong marami.

¹¹ Nguni't ang kaniyang mga dakong maburak, at ang mga lumbak niyaon, ay hindi mapapagaling; magiging asinan nga.

¹² At sa pangpang ng ilog sa tabi niyaon, sa dakong ito at sa dakong yaon, tutubo ang sarisaring punong kahoy na pinakapagkain, ^(I)na ang dahon ay hindi matutuyo, ni magkukulang man ang bunga niyaon: magbubunga ng bago buwan-buwan, sapagka't ang tubig niyaon ay lumalabas sa santuario; at ang bunga niyaon ay magiging pagkain at ang dahon niyaon ay pangpagaling.

Mga hangganan ng pagbabahagihan ng mga lupain.

¹³ Ganito ang sabi ng Panginoong Dios: Ito ang magiging hangganan, na inyong pagbabahagihan ng lupain na pinakamana ayon sa labing dalawang lipi ng Israel: ^(J)ang Jose ay magkakaroon ng dalawang bahagi.

¹⁴ At inyong mamanahin, ng isa na gaya ng iba; sapagka't aking isinumpa na ibigay ito sa inyong mga magulang: at ang lupaing ito ay mahuhulog sa inyo na pinakamana.

¹⁵ At ito ang magiging hangganan ng lupain: Sa dakong hilagaan, ^(K)mula sa malaking dagat, sa daang Hethlon, hanggang sa pasukan sa Sedad;

¹⁶ Hamath, Berotha, Sibrahim, na nasa pagitan ng hangganan ng Damasco at ng hangganan ng Hamath; Haser-hatticon na nasa tabi ng hangganan ng Hauran.

¹⁷ At ang hangganang mula sa dagat ay magiging ang Hazar-enon sa hangganan ng Damasco, at nasa hilagaan na dakong hilagaan ang hangganan ng Hamath. Ito ang dakong hilagaan.

¹⁸ At ang dakong silanganan, ang pagitan ng Hauran at ng Damasco at ng Galaad, at ang lupain ng Israel, ay siyang magiging Jordan; mula sa hilagaang hangganan hanggang sa silanganang ^(L)dagat ay inyong susukatin. Ito ang dakong silanganan.

¹⁹ At ang timugang dako na gawing timugan ay magiging mula sa Tamar hanggang sa ^(M)tubig ng Meribot-cades, sa batis ng Egipto, hanggang sa malaking dagat. Ito ang timugang dako na gawing timugan.

²⁰ At ang dakong kalunuran ay magiging ang malaking dagat, mula sa hangganang timugan hanggang sa tapat ng pasukan sa Hamath. Ito ang dakong kalunuran.

²¹ Gayon ninyo hahatiin ang lupaing ito sa inyo ayon sa mga lipi ng Israel.

²² At mangyayari na inyong ^(N)hahatiin sa sapalaran na pinakamana sa inyo at sa mga taga ibang lupa na makikipamayan sa gitna ninyo, na magkakaanak sa gitna ninyo; at sila'y magiging sa inyo'y ^(O)gaya ng ipinanganak sa gitna ng mga anak ni Israel; sila'y magkakaroon ng mana na kasama ninyo sa gitna ng mga lipi ng Israel.

²³ At mangyayari, na kung saang lipi nakipamayan ang taga ibang lupa, doon ninyo bibigyan siya ng mana, sabi ng Panginoong Dios.

Ang mga bahagi ng pitong lipi.

48 Ang mga ito nga ang mga pangalan ng ^(P)mga lipi: Mula sa dulong hilagaan, sa tabi ng daan ng Hethlon hanggang sa pasukan sa Hamath, Hasar-enan, sa hangganan ng Damasco, na dakong hilagaan sa gawing yaon ng Hamath; (at mga magkakaroon ng mga dakong silanganan at kalunuran), ang ^(Q)Dan, isang bahagi.

² At sa tabi ng hangganan ng Dan, mula sa dakong silanganan hanggang sa dakong kalunuran, ang Aser, isang bahagi.

³ At sa tabi ng hangganan ng Aser, mula sa dakong silanganan hanggang sa dakong kalunuran, ang Nephtali, isang bahagi.

⁴ At sa tabi ng hangganan ng Nephtali, mula sa dakong silanganan hanggang sa dakong kalunuran, ^(R)ang Manases, isang bahagi.

⁵ At sa tabi ng hangganan ng Manases, mula sa dakong silanganan hanggang sa dakong kalunuran, ang Ephraim, isang bahagi.

⁶ At sa tabi ng hangganan ng Ephraim, mula sa dakong silanganan hanggang sa dakong kalunuran, ang Ruben, isang bahagi.

⁷ At sa tabi ng hangganan ng Ruben, mula sa dakong silanganan hanggang sa dakong kalunuran, ang Juda, isang bahagi.

Ang bahagi ng mga saserdote.

⁸ At sa tabi ng hangganan ng Juda, mula sa dakong silanganan hanggang sa dakong kalunuran, ^(S)malalagay ang alay na inyong ihahandog, dalawang pu't limang libong tambo ang luwang, at ang haba ay gaya ng isa sa mga bahagi, mula sa dakong silanganan hanggang sa dakong kalunuran; at ang santuario ay malalagay sa gitna niyaon.

⁹ Ang alay na inyong ihahandog sa Panginoon ay magiging dalawang pu't limang libong tambo ang haba, at sangpung libo ang luwang.

¹⁰ At magiging sa mga ito, sa makatuwid baga'y sa mga saserdote, ang banal na alay; sa dakong hilagaan ay dalawang pu't limang libo ang haba, at sa dakong kalunuran ay sangpung libo ang luwang, at sa dakong silanganan ay sangpung libo ang luwang, at sa dakong timugan ay dalawang pu't limang libo ang haba: at ang santuario ng Panginoon ay maglalagay sa gitna niyaon.

¹¹ Ito'y magiging sa mga saserdote na mga pinapaging banal ^(T)sa mga anak ni Sadoc, ^(U)na nagsisiganap ng katungkulan sa akin na hindi nangagpakaligaw nang mangagpakaligaw ang mga anak ni Israel, na gaya ^(V)ng mga Levita na nangagpakaligaw.

¹² At sa kanila'y magiging alay na mula sa alay ng lupain, bagay na kabanalbanalan sa tabi ng hangganan ng mga Levita.

Ang bahagi ng mga Levita.

^13 (W)At ayon sa hangganan ng mga saserdote, ang mga Levita ay mangagkakaroon ng dalawang pu't limang libo ang haba, at sangpung libo ang luwang: ang buong haba ay magiging dalawang pu't limang libo, at ang luwang ay sangpung libo.

¹⁴ At hindi nila ipagbibili, ^(X)o ipagpapalit man, ^(Y)o ipagkakaloob sa iba man ang mga unang bunga ng lupain; sapagka't ito'y banal sa Panginoon.

Ang bahagi para sa lahat upang gawing bayan, at mga nayon.

¹⁵ At ang ^(Z)limang libo na naiwan sa naluwangan, sa tapat ng dalawang pu't limang libo, magiging sa karaniwang kagamitan na ukol sa bayan, sa tahanan at sa mga ^(AA)nayon; at ang bayan ay malalagay sa gitna niyaon.

¹⁶ At ang mga ito ang magiging mga sukat niyaon: sa dakong ^(AB)hilagaan ay apat na libo at limang daan, at sa dakong timugan ay apat na libo at limang daan, at sa dakong silanganan ay apat na libo at limang daan, at sa dakong kalunuran ay apat na libo at limang daan.

¹⁷ At ang bayan ay magkakaroon ng mga nayon: sa dakong hilagaan ay dalawang daan at limang pu, at sa dakong timugan ay dalawang daan at limang pu, at sa dakong silanganan ay dalawang daan at limang pu, at sa dakong kalunuran ay dalawang daan at limang pu.

¹⁸ At ang labis sa haba, na nauukol sa banal na alay, magiging sangpung libo sa dakong silanganan, at sangpung libo sa dakong kalunuran; at magiging ukol sa banal na alay; at ang bunga niyaon ay magiging pinakapagkain sa nagsisigawa sa bayan.

¹⁹ At tatamnan nilang nagsisigawa sa bayan sa lahat ng mga lipi ng Israel.

^20 (AC)Buong alay ay magiging dalawang pu't limang libong tambo at dalawang pu't limang libo: inyong ihahandog na parisukat ang banal na alay, sangpu ng pagaari ng bayan.

Ang bahagi ng mga prinsipe.

²¹ At ang labis ay magiging ^(AD)sa prinsipe, sa isang dako at sa kabilang dako ng banal na alay at sa pagaari ng bayan; sa tapat ng dalawang pu't limang libo sa alay sa dako ng silanganang hangganan, at sa dakong kalunuran sa tapat ng dalawang pu't limang libo sa dako ng kalunurang hangganan, na ukol sa mga bahagi, magiging sa prinsipe: at ang banal na alay at ang santuario ng bahay ay malalagay sa gitna niyaon.

²² Bukod dito'y mula sa pagaari ng mga Levita, at mula sa pagaari ng bayan na nasa gitna ng sa prinsipe, sa pagitan ng hangganan ng Juda at ng hangganan ng Benjamin, magiging sa prinsipe.

Ang bahagi ng limang lipi.

²³ At tungkol sa nalabi sa mga lipi: mula sa dakong silanganan hanggang sa dakong kalunuran, ang Benjamin, isang bahagi.

²⁴ At sa tabi ng hangganan ng Benjamin, mula sa dakong silanganan hanggang sa dakong kalunuran, ang Simeon, isang bahagi.

²⁵ At sa tabi ng hangganan ng Simeon, mula sa dakong silanganan hanggang sa dakong kalunuran, ang Issachar, isang bahagi.

²⁶ At sa tabi ng hangganan ng Issachar, mula sa dakong silanganan hanggang sa dakong kalunuran, ang Zabulon, isang bahagi.

²⁷ At sa tabi ng hangganan ng Zabulon mula sa dakong silanganan hanggang sa dakong kalunuran, ang Gad, isang bahagi.

²⁸ At sa tabi ng hangganan ng Gad, sa dakong timugan na gawing timugan, ang hangganan ay magiging mula sa Tamar hanggang sa tubig ng Meribat-cades sa batis ng Egipto, hanggang sa malaking dagat.

²⁹ Ito ang lupain na ^(AE)inyong babahagihin sa sapalaran sa mga lipi ng Israel na pinakamana, at ang mga ito ang kanilang mga iba't ibang bahagi, sabi ng Panginoong Dios.

Mga pintuang-daan ng bayan.

³⁰ At ang mga ito ang mga ^(AF)labasan sa bayan: Sa dakong hilagaan ay apat na libo at limang daang tambo sa sukat;

³¹ At ang mga pintuang-daan ng ^(AG)bayan ay magiging ayon sa mga pangalan ng mga lipi ng Israel, tatlong pintuang-daan sa dakong hilagaan: ^(AH)ang pintuang-daan ng Ruben, isa; ang pintuang-daan ng Juda, isa; ang pintuang-daan ng Levi, isa.

³² At sa dakong silanganan ay apat na libo at limang daang tambo, at tatlong pintuang-daan: ang pintuang-daan ng Jose, isa; ang pintuang-daan ng Benjamin, isa; ang pintuang-daan ng Dan, isa:

³³ At sa dakong timugan ay apat na libo at limang daang tambo sa sukat, at tatlong pintuang-daan: ang pintuang-daan ng Simeon, isa; ang pintuang-daan ng Issachar, isa; ang pintuang-daan ng Zabulon, isa:

³⁴ Sa dakong kalunuran ay apat na libo at limang daang tambo, na may kanilang tatlong pintuang-daan: ang pintuang-daan ng Gad, isa; ang pintuang-daan ng Aser, isa; ang pintuang-daan ng Nephtali, isa.

³⁵ Magkakaroon ng labing walong libong tambo ang sukat sa palibot: at ang magiging pangalan ng bayan mula sa araw na yaon ay, ^(AI)Ang Panginoon ay naroroon.

3 Masdan ninyo ^(A)kung gaanong pagibig ang ipinagkaloob sa atin ng Ama, upang tayo'y ^(B)mangatawag na mga anak ng Dios; at tayo'y gayon nga. Dahil dito'y hindi tayo nakikilala ng sanglibutan, ^(C)sapagka't siya'y hindi nakilala nito.

² Mga minamahal, ^(D)ngayon ay mga anak tayo ng Dios, at hindi pa ^(E)nahahayag kung magiging ano tayo. Nalalaman natin, na kung siya'y mahayag, ^(F)tayo'y magiging katulad niya: ^(G)sapagka't siya'y ating ^(H)makikitang gaya ng kaniyang sarili.

³ At sinomang mayroon ng pagasang ito sa kaniya ^(I)ay naglilinis sa kaniyang sarili, ^(J)gaya naman niyang malinis.

⁴ Ang sinomang gumagawa ng kasalanan ay sumasalangsang din naman sa kautusan: at ^(K)ang kasalanan ay ang pagsalangsang sa kautusan.

⁵ At nalalaman ninyo na siya'y ^(L)nahayag ^(M)upang magalis ng mga kasalanan; at sa kaniya'y ^(N)walang kasalanan.

⁶ Ang sinomang nananahan sa kaniya ay hindi nagkakasala; ^(O)sinomang nagkakasala ay hindi nakakita sa kaniya, ^(P)ni hindi man nakakilala sa kaniya.

⁷ Mumunti kong mga anak, huwag kayong padaya kanino man: ang gumagawa ng katuwiran ay matuwid, gaya niya na matuwid:

⁸ Ang gumagawa ng kasalanan ay sa diablo; sapagka't buhat pa nang pasimula ay nagkakasala ^(Q)ang diablo. Sa bagay na ito'y nahayag ang Anak ng Dios, ^(R)upang iwasak ang mga gawa ng diablo.

⁹ Ang sinomang ^(S)ipinanganak ng Dios ay hindi nagkakasala, sapagka't ang ^(T)kaniyang binhi ay nananahan sa kaniya: at siya'y hindi maaaring magkasala, sapagka't ^(U)siya'y ipinanganak ng Dios.

¹⁰ Dito nahahayag ang mga anak ng Dios, at ang mga anak ng diablo: ang sinomang hindi gumagawa ng katuwiran ay hindi sa Dios, ni ang hindi umiibig sa kaniyang kapatid.

¹¹ Sapagka't ^(V)ito ang pasabing inyong narinig buhat ng pasimula, ^(W)na mangagibigan tayo sa isa't isa:

¹² Hindi ^(X)gaya ni Cain na siya'y sa masama, at pinatay ang kaniyang kapatid. At bakit niya pinatay? Sapagka't ang kaniyang mga gawa ay masasama, at ang mga gawa ng kaniyang kapatid ay matuwid.

¹³ Huwag kayong mangagtaka, mga kapatid, kung kayo'y kinapopootan ^(Y)ng sanglibutan.

¹⁴ Nalalaman nating ^(Z)tayo'y nangalipat na sa buhay mula sa kamatayan, sapagka't tayo'y nagsisiibig sa mga kapatid. Ang hindi umiibig ay nananahan sa kamatayan.

¹⁵ Ang sinomang ^(AA)napopoot sa kaniyang kapatid ay ^(AB)mamamatay-tao: at nalalaman ninyong sinomang mamamatay-tao ay hindi pinananahanan ng buhay na walang hanggan.

^16 (AC)Dito'y nakikilala natin ang pagibig, ^(AD)sapagka't kaniyang ibinigay ang kaniyang buhay dahil sa atin; at nararapat nating ibigay ang ating mga buhay dahil sa mga kapatid.

¹⁷ Datapuwa't ang ^(AE)sinomang mayroong mga pagaari sa sanglibutang ito, at nakikita ang kaniyang kapatid na nangangailangan, at doo'y ipagkait ^(AF)ang kaniyang awa, ^(AG)paanong mananahan ang pagibig ng Dios sa kaniya?

¹⁸ Mumunti kong mga anak, ^(AH)huwag tayong magsiibig ng salita, ni ng dila man; kundi ng gawa at katotohanan.

¹⁹ Dito'y makikilala nating ^(AI)tayo'y sa katotohanan, at ^(AJ)papapanatagin natin ang ating mga puso sa harapan niya.

²⁰ Sapagka't ^(AK)kung hinahatulan tayo ng ating puso, ang Dios ay lalong dakila kay sa ating puso, at nalalaman niya ang lahat ng mga bagay.

²¹ Mga minamahal, kung tayo'y hindi hinahatulan ng ating puso, ^(AL)ay may pagkakatiwala tayo sa Dios;

^22 (AM)At anomang ating hingin ay tinatanggap natin sa kaniya, sapagka't tinutupad natin ang kaniyang mga utos at ginagawa natin ang mga bagay na kalugodlugod sa kaniyang paningin.

²³ At ito ang kaniyang utos, ^(AN)na manampalataya tayo sa pangalan ng kaniyang Anak na si Jesucristo, at tayo'y mangagibigan, ayon sa ibinigay niyang utos sa atin.

²⁴ At ang tumutupad ng kaniyang mga utos ^(AO)ay mananahan sa kaniya, at ^(AP)siya ay sa kaniya. At ^(AQ)dito'y nakikilala natin na siya'y nananahan sa atin, sa pamamagitan ng Espiritu na kaniyang ibinigay sa atin.