Chronological

यहूदा क राजा अबिय्याम

15 नाबात क पूत यारोबाम इस्राएल पइ हुकूमत करत रहा। यारोबाम क राज्जकाल क अट्ठारहवें बरिस, अबिय्याम यहूदा क नवा राजा बना। ² अबिय्याम तीन बरिस तलक यरूसलेम पइ हुकूमत किहस। ओकर महतारी क नाउँ माका रहा। उ अबसालेम क बिटिया रहा।

³ उ उ सबइ पाप किहेस जउन ओकर बाप ओकरे पहिले किहे रहा। अबिय्याम क हिरदय यहोवा आपन परमेस्सर क प्रति पूरा भक्तिवान नाहीं रहेन जइसा ओकर दादा दाऊद किहे रहा। ⁴ दाऊद के वास्ते, यहोवा ओका यरूसलेम मँ एक ठू बंस दिहेस। उ दाऊद क बंसज क यरूसलेम पई सासन करइ द्या अउर एका सुरच्छित रखइ क प्रतिग्या किहेस। ⁵ दाऊद हमेसा ही उचित करम किहस जेनका यहोवा चाहत रहा। उ हमेसा ही यहोवा क आदेसन क पालन किहे रहा। सिरिफ एक दाईं दाऊद यहोवा क आदेस नाहीं माने रहा जब दाऊद हित्ती ऊरिय्याह क खिलाफ पाप किहे रहा।

⁶ रहूबियाम अउ यारोबाम हमेसा एक दूसर क खिलाफ जुद्ध लड़त रहेन। ⁷ जउन कछू दूसर काम अबिय्याम किहे रहा उ यहूदा क राजा लोगन क इतिहास नाउँ क किताबे मँ लिखा बाटइ।

उ सारे समइ मँ जब अबिय्याम राजा रहा, यारोबाम अउ अबिय्याम क खिलाफ जुद्ध चलत रहा। ⁸ जब अबिय्याम मरा तउ दाऊद-नगर मँ दफनावा गवा। अबिय्याम क पूत “आसा” ओकरे पाछे नवा राजा भवा।

यहूदा क राजा आसा

⁹ इस्राएल क ऊपर यारोबाम क राजा क रुप मँ सासन करइ क बीसवें बरिस मँ आसा यहूदा क राजा बना। ¹⁰ आसा यरूसलेम मँ इकतालिस बरिस तलक सासन किहस। ओकरे दादी क नाउँ माका रहा अउर माका अबसालोम क बिटिया रही।

¹¹ आसा अपने पुरखा दाऊद क तरह ओन करमन क किहस जेनका यहोवा उचित ठहराएस। ¹² ओन दिनन हुवाँ मन्दिर क देवदासन रहेन। आसा ओन लोगन क देस तजइ बरे मजबूर किहस। आसा ओन देव मूरतियन क भी दूर किहस जउन ओकरे पुरखन बनाए रहेन। ¹³ आसा अपनी दादी माका क, रानी पद स हटाइ दिहस। माका देवी असेरा क ओन भयंकर मूरतियन मँ स एक क बनाए रहा। आसा ओका काट डाएस अउर एका उ किद्रोन क घाटी मँ बारेस। ¹⁴ आसा ऊँच ठउरन क बर्बाद नाहीं किहस, किन्तु उ पूरी जिन्नगी भइ यहोवा क मनवइया रहा। ¹⁵ आसा यहोवा क मन्दिर मँ सोना, चाँदी अउर उ चिजियन लाएन जउन उ अउर ओकर बाप अर्पित किहे रहेन।

¹⁶ जब तलक राजा आसा यहूदा क राजा रहा, उ हमेसा ही इस्राएल क राजा बासा क खिलाफ जुद्ध करत रहा। ¹⁷ बासा यहूदा क खिलाफ लड़त रहा। बासा लोगन क, आसा क देस यहूदा स आवइ या जाइ स रोकइ चाहत रहा। एह बरे उ रामा नगर क बहोत मजबूत बनाइ दिहस। ¹⁸ एह बरे आसा यहोवा क मन्दिर अउर राजमहल क खजानन स सोना अउ चाँदी निकारेस। उ इ सोना-चाँदी अपने सेवकन क दिहस अउर ओनका अराम क राजा बेन्हदद क लगे पठएस। बेन्हदद हेज्योन क पूत तब्रिम्मोन क पूत रहा। दमिस्क बेन्हदद क राजधानी नगर रहा। ¹⁹ आसा इ सँदेसा पठएस, “मोरे बाप अउर तोहार बाप क बीच एक ठु सान्ति-सन्धि रही। अब मइँ तोहरे अउर अपने बीच एक ठू सान्ति-सन्धि करइ चाहत हुउँ। मइँ तोहरे लगे सोना-चाँदी क भेंट पठवत अहउँ। इस्राएल क राजा बासा क संग अपनी सन्धि तोड़ द्या। तब बासा मोरे देस क तजि देइ।”

²⁰ राजा बेन्हदद आसा क सँदेसा क अंगीकार किहस। एह बरे उ इस्राएल क नगरन क खिलाफ लड़इ बरे अपनी फउज पठएस। बेन्हदद इय्योन, दान, आबेल्वेत्माका अउ गलीली झील क चारिहुँ ओर क नगरन क हराइ दिहस। उ सारे नप्ताली पहँटा क हराएस। ²¹ बासा एन हमलन क बारे मँ सुनेस। एह बरे उ रामा क मजबूत बनाउब बन्द किहस। उ उ नगर क तजि दिहस अउर तिर्सा क लउट गवा। ²² तब राजा आसा यहूदा क सबहिं लोगन क मदद करइ क हुकूम दिहस-कउनो मनई बिना मदद क नाहीं होइ। उ पचे रामा क गएन अउर उ पचे ओन पाथरन अउ काठन क उठाइ लिहन जेनकर उपयोग बासा नगर क मजबूत बनावइ बरे करत रहा। उ पचे ओन चिजियन क मिस्पा अउर बिन्यामीन प्रदेस मँ गेबा क लइ गएन। तब आसा ओन नगरन क बहोत मजबूत बनाएस।

²³ आसा क बारे मँ दूसर बातन व महान कारज जउन उ किहस अउर नगरन जेनका उ बनाएस यहूदा क राजा लोगन क इतिहास नाउँ क किताबे मँ लिखा बाटइ। जब आसा बुढ़वा भवा तउ ओकरे गोड़े मँ एक रोग पइदा भवा। ²⁴ आसा मरा अउर ओका ओकर पुरखा दाऊद का नगर मँ दफनावा गवा। तब आसा क पूत यहोसापात ओकरे पाछे नवा राजा बना।

यहूदा क राजा

13 जब राजा यारोबाम इस्राएल क राजा क रुप मँ अट्ठारहवें बरिस मँ रहा अबिय्याह यहूदा क नवा राजा बना। ² अबिय्याह यरूसलेम मँ तीन बरिस तलक राजा रहा। गिबा नगर क ऊरीएल क बिटिया, मीकायाह अबिय्याह क महतारी रही। अउर हुवाँ अबिय्याह अउर यारोबाम क बीच जुद्ध चलत रहा। ³ अबियाह क फउज मँ चार लाख वीर सैनिक रहेन। अबियाह जुद्ध बरे आपन फउज मँ गएन। यारोबाम अबिय्याह क खिलाफ जुद्ध बरे तइयारी किहस। ओकरे लगे आठ लाख वीर सैनिक रहेन।

⁴ तब अबिय्याह एप्रैम क पर्वतीय पहँटा मँ समारैम पर्वत पइ खड़ा भवा। अबिय्याह कहेस, “यारोबाम अउर सारे इस्राएल मोर बात सुना। ⁵ तू लोगन क जानइ चाही कि यहोवा, इस्राएल क परमेस्सर दाऊद अउर ओकरी सन्तानन क इस्राएल सासन करइ क अधिकार दिहस ह। यहोवा दाऊद क इ अधिकार सास्वत करार क संग दिहस। ⁶ किन्तु यारोबाम अपने सुआमी क खिलाफ होइ गवा। यारोबाम जउन नबात क पूत रहा, दाऊद क पूत सुलैमान क अधिकारियन मँ स एक रहा। ⁷ तब निकम्मे, बुरे मनइयन यारोबाम क मीत होइ गएन अउर यारोबाम अउर उ सबइ बुरे मनइयन सुलैमान क पूत रहूबियाम क खिलाफ होइ गएन। रहूबियाम जुवक रहा अउर ओका अनुभव नाहीं रहा। एह बरे रहूबियाम यारोबाम अउर ओकरे बुरे मीतन क रोकने न सका।

⁸ “तू लोग परमेस्सर क राज्ज, जउन दाऊद क पूतन क जरिये सासित अहइ, हरावइ क जोजना बनाया ह। तू लोगन क गनती बहोत अहइ अउर यारोबाम क तोहरे बरे बनावा गवा सोने क बछवा तोहार ‘इस्सर’ अहइ। ⁹ तू लोग हारून क संतानन यहोवा क याजकन अउ लेवीबंसियन क बाहेर फेंकि दिहेस ह। तू पचे पृथ्वी क दूसर देसन क समान अपने याजकन क चुन्या ह। तब तउ कउनो भी मनई जउन एक जुवक बर्धा अउर सात ठु भेड़न लिआवइ, ओन ‘अइसन देवतन क जउन परमेस्सर ह ही नाही’ क सेवा करइवाला याजक बन सकत ह।

¹⁰ “किन्तु जहाँ तलक हमार बात अहइ यहोवा हमार परमेस्सर अहइ। हम यहूदा क निवासी लोग यहोवा क आग्या पालन स इन्कार किहा नाहीं ह। हम लोग ओका तजा नाहीं ह। जउन याजक यहोवा क सेवा करत हीं, उ पचे हारून क सन्तान अहइँ अउर लेवीबंसी यहोवा क सेवा करइ मँ याजकन क मदद करत हीं। ¹¹ उ पचे होमबलि चढ़ावत हीं अउर धूपे क सुगन्धि यहोवा क हर भिंसारे साँझ बारत हीं। उ पचे मन्दिर मँ बिसेस मेज पइ रोटियन कतारन मँ रखत भी अहइँ अउर उ पचे सोना क डीबट पइ रखे भए दीपकन क देख भाल करत हीं ताकि हर साँझ क उ प्रकास क संग चलइ। हम लोग यहोवा, अपने परमेस्सर क सेवा सावधानी क संग करित ह। किन्तु तू लोग ओका तजि दिहा ह। ¹² खुद परमेस्सर हम लोगन क संग अहइ। उ हमार सासक अहइ अउर ओकर याजक हमरे संग अहइँ। परमेस्सर क याजक आपन तुरही तोहका जगावइ अउर तोहका ओकरे लगे आवइ क उत्साहित करइ क बरे फूँकत हीं। ऐ इस्राएल क लोगो, अपने पुरखन क यहोवा, परमेस्सर क खिलाफ जिन लड़ा। काहेकि तू कामयाब नाहीं होब्या।”

¹³ किन्तु यारोबाम फउजियन क एक टुकड़ी क चुपके-चुपके गुप्त रूप स अबिय्याह क फउज क पाछे पठएस, इ तरह स जब यारोबाम क फउज अबिय्याह क फउज क समन्वा रही तब यारोबाम क फउज क गुप्त फउजी अबिय्याह क फउज क पाछे रही। ¹⁴ जब अबिय्याह क यहूदा क फउजियन चारिहुँ कइँती लखेन तउ उ पचे यारोबाम क फउज क आगे अउर पाछे स हमला करत पाएन। तउ यहूदा क लोग यहोवा क जोर स गोहराएन अउर याजकन तुरहियन बजाएन। ¹⁵ तब अबिय्याह क फउज क लोग चिचियाएस। जब यहूदा क लोग चिचियाएस तउ परमेस्सर यारोबाम क फउज क हराइ दिहस। यारोबाम क इस्राएल क सारी फउज क अबिय्याह क यहूदा क फउज क जरिये हराइ दीन्ह गइ। ¹⁶ इस्राएल क लोग यहूदा क लोगन क समन्वा भाग पराइ गएन। परमेस्सर यहूदा क फउज क जरिये इस्राएल क फउज क हरवाइ दिहस। ¹⁷ अबिय्याह क फउज इस्राएल क फउज क बुरी तरह हराएस अउर इस्राएल क पाँच लाख उत्तिम फउज मारे गएन। ¹⁸ इ तरह उ समइ इस्राएल क लोग पराजित अउर यहूदा क लोग बिजयी भएन। यहूदा क फउज बिजयी भइ काहेकि उ अपने पुरखन क परमेस्सर, यहोवा पइ निर्भर रही।

¹⁹ अबियाह क फउज यारोबाम क फउज क पाछा किहस। अबियाह क फउज यारोबाम स बेतेल, यसाना अउ एप्रोन नगरन पइ कब्जा कइ लिहेस। उ पचे ओन नगरन अउर ओनके आस पास क नान्ह गाँवन पइ अधिकार कइ लिहस।

²⁰ यारोबाम जियादा सक्तीसाली फुन कबहुँ नाहीं भवा जब तलक अबिय्याह जिअत रहा। यहोवा यारोबाम क मार डाएस। ²¹ किन्तु अबिय्याह सक्तीसाली होइ गवा। उ चौदह मेहररुअन स बियाह किहस अउर उ बाईस पूतन अउ सोरह बिटियन क बाप रहा। ²² दूसर जउन कछू अबिय्याह किहस, उ इद्दो नबी क किताबन मँ लिखा अहइ।

14 अबिय्याह अपने पुरखन क संग बिस्राम किहस। लोगन ओका दाऊद नगर मँ दफनाएन। तब अबिय्याह क पूत आसा अबिय्याह क जगह पइ नवा राजा भवा। आसा क समइ मँ देस मँ दस बरिस सान्ति रही।

यहूदा क राजा आसा

² आसा उहइ काम किहेस जउन यहोवा ओकर परमेस्सर क समन्वा अच्छा अउ ठीक रहा। ³ आसा ओन विचित्र वेदियन क हटाइ दिहस जेनकर उपयोग मूरतियन क पूजा क बरे होत रहा। आसा ऊँच जगहन क हटाइ दिहस अउर पवित्तर पाथरन क बर्बाद कइ दिहस अउर आसा असेरा खम्भन क तोर डाएस। ⁴ आसा यहूदा क लोगन क ओनकइ पुरखन क यहोवा परमेस्सर क अनुसरण करइ क आदेस दिहस। अउ आसा लोगन क यहोवा क नेमन अउ आदेसन क पालन करइ क आदेस दिहस। ⁵ आसा ऊँची जगहन क अउर सुगन्धि क वेदियन क यहूदा क सबहिं नगरन स हटाएस। इ तरह जब आसा राजा रहा, राज्ज सान्त रहा। ⁶ आसा यहूदा मँ सान्ति क समइ सक्तीसाली नगर बनाएस। आसा एन दिनन जुद्ध स मुक्त रहा काहेकि यहोवा ओका सान्ति दिहस।

⁷ आसा यहूदा क लोगन स कहेस, “हम पचन क नगरन क निर्माण अउ एनके चारिहुँ कइँती चरहदीवार बनावइ द्या। हम गुम्बद, दुआर अउ दुआरन मँ छड़न लगावइँ। हम पचन क तब तलक करइ द्या जब तलक इ देस हमार अहइ। इ हमार देस अहइ काहेकि हम लोग अपने यहोवा क अनुसरण किहा ह। उ हम लोगन क सब कइँती स सान्ति दिहस ह।” एह बरे उ पचे इ सबइ बनाएस अउर उ पचे सफल भएन।

⁸ आसा क लगे यहूदा क परिवार समूह स तीन लाख अउर बिन्यामीन क परिवार समूह स दुइ लाख अस्सी हजार फउज रही। यहूदा क मनइयन बड़ी ढारन अउर भालन लइके चलत रहेन। बिन्यामीन क मनइयन नान्ह ढारन अउ धनुस स चलइवाले बाण लइ चलत रहेन। उ पचे सबहिं बलवान अउर साहसी जोधा रहेन।

⁹ जब जेरह आसा क फउज क खिलाफ आवा। जेरह कूस द रहा। जेरह क फउज मँ दस लाख मनई अउर तीन सौ रथ रहेन। जेरह क फउज मारेसा नगर तलक गइ। ¹⁰ आसा जेरह क खिलाफ लड़इ बरे गवा। आसा क फउज मारेस क निअरे सापता घाटी मँ जुद्ध क बरे तइयार भइ।

¹¹ आसा यहोवा परमेस्सर क गोहराएस अउर कहेस, “यहोवा, तू केवल तू ही बलवान लोगन क खिलाफ कमजोर लोगन क मदद कइ सकत ह। हे मोर यहोवा परमेस्सर हमार मदद करा। हम तोह पइ निर्भर अही। हम तोहरे नाउँ पइ इ बिसाल फउज स जुद्ध करित ह। हे यहोवा, तू हमार परमेस्सर अहा। अपने खिलाफ कउनो क जीतइ न द्या।”

¹² तब यहोवा यहूदा कइँती स आसा क फउज क उपयोग कूस क फउज क पराजित करइ बरे किहस अउर कूस क फउज भाग खड़ी भइ। ¹³ आसा क फउज वूस क फउज क लगातार गरार नगर तलक पाछा किहस। एतने जियादा कूस क लोग मारे गएन कि उ पचे जुद्ध करइ बरे एक फउज क रूप मँ फुन बटुर न सकइँ। उ पचे यहोवा अउ ओकरी फउज क जरिये कूचर दीन्ह गएन। आसा अउर ओकर फउज दुस्मन स बहोत सारी लूट क माल लइ लिहन। ¹⁴ आसा अउर ओकर फउज गरार क नजिक क सबहिं नगरन क हराएस। ओन नगरन मँ रहइवाले लोग यहोवा स डरात रहेन। ओन नगरन मँ अनगिनत कीमती चिजियन रहिन। आसा क फउज ओन नगरन स एन कीमती चिजियन क संग लइ आइ। ¹⁵ आसा क फउज ओन डेरन पइ भी हमला किहस जेनमाँ गड़रियन रहत रहेन। उ पचे अनेक भेड़िन अउ ऊँट लूट लिहेन अउर ओनका लइ गएन। तब आसा क फउज यरूसलेम लउटि गइ।

आसा क परिवर्तन

15 परमेस्सर क आतिमा आदेद क पूत अजर्याह पइ उतरी। ² अजर्याह आसा स भेंटइ गवा। अजर्याह कहेस, “आसा अउ यहूदा अउ बिन्यामीन क सबहिं लोग मोर सुनइँ। यहोवा तोहरे संग तब अहइ जब तू ओकरे संग अहा। जदि तू यहोवा क हेरब्या तउ तू ओका पउब्या। किन्तु जदि तू ओका छोड़ब्या तउ उ तोहका तजि देइ। ³ बहोत समइ तलक इस्राएल बिना सच्चे परमेस्सर क, सिच्छा देइ वाला बिना याजक क अउ बिना नेम क रहेन। ⁴ किन्तु जब इस्राएल क लोग कस्ट मँ पड़इँ तउ उ पचे फुन इस्राएल क यहोवा परमेस्सर कइँती लउटइ। उ पचे यहोवा क हेरेन अउ ओका पाएन। ⁵ ओन बिपत्ति क दिनन मँ कउनो मनई सुरच्छित जात्रा नाहीं कइ सकत रहा। सबहिं रास्ट्र बहोत जियादा उपद्रव ग्रस्त रहेन। ⁶ एक रास्ट्र दूसरे रास्ट्र क अउर एक नगर दूसरे नगर क नस्ट करत रहा। इ एह बरे होत रहा कि परमेस्सर हर तरह क बिपत्तियन स ओनका परेसान करत रहा। ⁷ किन्तु आसा, तू अउर यहूदा अउ बिन्यामीन क लोगो, सक्तीसाली बना। कमजोर न पड़ा, ढीले न पड़ा काहेकि तोहका पचन्क अपने नीक काम क पुरस्कार मिली।”

⁸ आसा जब एन बातन अउर ओदेद नबी क संदेसा क सुनेस, तउ उ बहोत उत्साहित भवा। तब उ सारे यहूदा अउ बिन्यामीन छेत्र स घिनौनी मूरतियन क हटाइ दिहस अउर उ एप्रैम क पहाड़ी देस मँ अपने अधिकार मँ लाए गए नगरन मँ मूरतियन क हटाएस अउर उ यहोवा क उ वेदी क मरम्मत किहस जउन यहोवा क मन्दिर क ओसारे क समन्वा रही।

⁹ तब आसा यहूदा अउ बिन्यामीन क सबहिं लोगन क बटोरेस। उ एप्रैम, मनस्से अउर सिमोन परिवारन क भी बटोरेस जउन इस्राएल देस स यहूदा देस मँ रहइ बरे आइ ग रहेन। ओनकर बड़ी गनती यहूदा मँ आइ काहेकि उ पचे लखेन कि आसा क यहोवा परमेस्सर, आसा क संग अहइ।

¹⁰ आसा क हुकूमत क पन्द्रहवें बरिस क तीसरे महीने मँ आसा अउर उ सबइ लोग यरूसलेम मँ बटुरेन। ¹¹ उ समइ उ पचे यहोवा क सात सौ बर्धन अउ सात हजार भेड़िन अउ बोकरन क बलि दिहन। आसा क फउज ओन जनावरन अउर दूसर कीमती चिजियन क अपने दुस्मनन स लिहे रहा। ¹² तब उ पचे आपन पुरखन क यहोवा परमेस्सर क सेवा पूरे हिरदइ अउर आपन पूरी जान स करइ क एक करार अउर वाचा मँ किहन। ¹³ कउनो मनई जउन यहोवा परमेस्सर क सेवा स इन्कार करत रहा, मार दीन्ह जात रहा। इ बात क कउनो महत्व नाहीं रहा कि उ मनई महत्वपूर्ण या साधारण अहइ या मनसेधू या मेहरारु अहइ। ¹⁴ तब आसा अउ लोगन यहोवा क किरिया लिहन। उ पचे ऊँची अवाज मँ उद्घोस किहन। उ पचे तुरही अउ भेड़न क सींग बजाएन। ¹⁵ यहूदा स सबहिं लोग खुस रहेन काहेकि उ पचे पूरे हिरदइ स किरिया खाए रहेन। उ पचे पूरे हिरदइ स यहोवा क अनुसरण किहन अउ यहोवा क खोज किहन अउर ओका पाएन। एह बरे यहोवा यहोवा ओनके पूरे देस मँ सान्ति दिहस।

¹⁶ राजा आसा अपनी महतारी आका क राजमाता क पद स हटाइ दिहस। आसा इ एह बरे किहस काहेकि माका असेरा क सम्मान देइ बरे एक भयंकर खम्भा खड़ा किहे रहा। आसा इ खम्भा क काट दिहस अउर एका नान्ह नान्ह टूकन मँ तहस नहस कइ दिहस। तब उ ओन नान्ह टूकन क किद्रोन घाटी मँ बार दिहस। ¹⁷ ऊँच जगहन क यहूदा स नाहीं हटावा गवा, किन्तु आसा क हिरदइ जिन्नगी भइ यहोवा क बरे स्रद्धालु रहा।

¹⁸ आसा ओन पवित्तर भेंटन यहोवा क मन्दिर मँ लिआएस जेनका ओकर बाप राखस रहेन। उ सबइ चिजियन चाँदी अउ सोना क बनी रहिन। ¹⁹ आसा क हुकूमत क पैंतीस बरिस तलक कउनो जुद्ध नाहीं भवा।

आसा क आखिरी बरिसन

16 आसा क राज्जकाल क छत्तीसवें बरिस बासा यहूदा क भुइँया पइ हमला किहस। बासा इस्राएल क राजा रहा। उ रामा नगर गवा अउर एका लोगन क राजा आसा क लगे जावइ अउ आवइ स रोकइ बरे किला बनाइ दिहस। ² आसाने यहोवा क मन्दिर क कोसागार मँ रखे भए चाँदी अउर सोना क लिहस अउर उ राजमहल स चाँदी सोना लिहस। तब आसा बेन्हदद क सँदेसा पठएस। बेन्हदद अराम क राजा रहा अउर दमिस्क मँ रहत रहा। आसा क सँदेसा रहा: ³ “बेन्हदद, मोरे अउर अपने बीच एक ठु सन्धि होइ द्या। इ सन्धि क वइसे ही होइ द्या जइसा उ हमरे बाप अउर तोहरे बाप क बीच कीन्ह गइ रही। धियान द्या, मइँ तोहरे लगे चाँदी सोना पठवत हउँ। अब तू इस्राएल क राजा बासा क संग कीन्ह गइ सन्धि क तोड़ द्या जेहसे उ मोका अजाद छोड़ देब्या अउर मोका परेसान करब बन्द कइ देब्या।”

⁴ बेन्हदद आसा क बात मान लिहस। बेन्हदद आपन फउजे क सेनापतियन क इस्राएल क नगरन पइ हमला करइ क बरे पठएस। एन सेनापतियन इय्योन, दान अउर आबेल्मैम नगरन पइ हमला किहस। उ पचे नप्ताली देस मँ ओन सबहिं नगरन पइ हमला किहस जहाँ खजाने रखे रहेन। ⁵ बासा इस्राएल क नगरन पइ हमला क बात सुनेस। एह बरे उ रामा मँ किला बनावइ क काम रोक दिहस अउर आपन काम छोड़ दिहस। ⁶ तब राजा आसा यहूदा क सबहिं लोगन क बटोरेस। उ पचे रामा नगर क गएन अउर काठ अउ पाथर उठाइ लाएन जेनकर उपयोग बासा किला बनावइ बरे किहे रहा। आसा अउर यहूदा क लोग पाथरन अउ काठे क उपयोग गेवा अउ मिस्पा नगरन क जियादा मजबूत बनावइ बरे किहस।

⁷ उ समइ द्रस्टा हनानी यहूदा क राजा आसा क लगे आवा। हनानी ओहसे कहेस, “आसा, तू मदद क बरे अराम क राजा पइ आस्रित रह्या, किन्तु तू यहोवा आपन परमेस्सर पइ मदद बरे आस्रित नाहीं रह्या। एह बरे अराम क राजा क फउज तोहसे पराइ निकरी। ⁸ कूस अउ लुबी बहोत बिसाल अउ सक्तीसाली फउज रखत रहेन। ओकरे लगे अनेक रथ अउ सारथी रहेन। किन्तु आसा, तू उ बिसाल सक्तीसाली फउज क हरावइ मँ मदद क बरे यहोवा पइ आस्रित भए अउर यहोवा तोहका ओनका हरावइ दिहस। ⁹ यहोवा क आँखिन सारी धरती पइ ओन लोगन क लखत फिरत हीं जउन ओकरे बरे स्रद्धालु अहइँ जेहसे उ ओन लोगन क सक्तीसाली बनाइ सकइ। आसा, तू बेवकूफी क काम किहा। एह बरे अब स लइके आगे तलक तोहका जुद्ध क सामना करइ क पड़ी।”

¹⁰ आसा हनानी पइ उ बात स कोहाइ गवा जउन उ कहेस। आसा ऍतना किरोध स पागल होइ उठा कि उ हनानी क बन्दीघरे मँ डाइ दिहस। आसा उ समइ कछू लोगन पइ अत्याचार भी करत रहा।

¹¹ आसा जउन कछू सुरु स आखीर तलक किहस। उ इस्राएल अउर यहूदा क राजा लोगन क इतिहास क पुस्तक मँ लिखा अहइ। ¹² आसा क गोड़ ओकरे राज्जकाल क उनतालीसवें बरिस मँ रोगी होइ गवा। ओकरे रोग बहोत बुरा रहा किन्तु उ यहोवा स मदद नाहीं चाहेस। आसा वैद्यन स मदद चाहेस। ¹³ आसा अपने राज्जकाल क इकतालीसवें बरिस मँ मरा अउर इ प्रकार आसा अपने पुरखन क संग बिस्राम किहस। ¹⁴ लोग आसा क ओकरी कब्र मँ दफनाएन जेका खुद दाऊद क नगर मँ बनाए रहा। लोग ओका एक आखिरी चारपाई पइ रखेन जेह पइ सुगन्धित द्रव्य अउर अलग-अलग तरह क मिले इत्र रखे रहेन। लोग आसा क सम्मान करइ क आगी क महाज्वाला किहन।