Beginning
Dee 80 Psalm
To dän Haupr Musikaunt, wäajen dee Lelje. En Psalm von Asaf.
1 O Iesrael äa Schop Hoad, Du, dee Du Joosef leide deist soo aus ne Häad; dee Du tweschen dee Cherubim wonst, doo schiene.
2 Doo diene Macht bewäaje fer Efraim, en Benjamin, un Manasse, un komm doo onns rade.
3 O Gott, doo onns wada trigj dreihe, lot dien Jesejcht schiene; dan woa wie jerat woare.
4 O Aulmajchtja Herr Gott, woo lang woascht du noch oajalijch senne jäajen daut Jebaed fonn dien Folkj?
5 Du deetst an foodre met daut Broot fonn Trone, un du jeefst an Trone to drinkje.
6 Du hast onns en Striet jemoakt to onnse Nobasch; un onnse Fiend lache to sikj selfst.
7 O Aulmajchtja Gott, doo onns wada trigj dreihe, un lot dien Jesejcht schiene, un wie woare jerat senne.
8 Du hast ne Wienrank ut Iejipte jeleit; Du hast dee Natsjoone rut jeschmäte un hast dee jeplaunt.
9 Du deetst Rum moake doafäa; un deetst dee ennwartle; daut haft daut Launt jefelt.
10 Dee läaje Boaj weare bedakjt met dän schaute; un dee Aste weare soo aus dikje Tseedabeem.
11 Dee schekjt siene Aste rut no dän See, siene Aste no dän Riefa.
12 Wuaromm hast Du dee Hakje dol jebroake, soo daut aul dee, dee doa febie gone dee beplekje?
13 En wila Kujel ut dän Woolt deit daut fenijchte; un dee Beeste em Felt doone daut äte.
14 O Aulmajchtja Gott, wie prachre Die, komm trigj! Kjikj rauf fomm Himel, un see, en doo dise Wienrankj beseakje,
15 un dee Wiengoade dee diene rajchte Haunt jeplaunt haft, un dee Sän däm du stoakje deetst fa die selfst.
16 Daut es met Fia febrent, doljeschnäde; dee fekome derjch dän Dodel fonn dien Jesejcht.
17 Lot diene Haunt opp däm Maun senne fonn diene rajchte Haunt; opp däm Menschesän dän Du stoakj jemoakt hast fa die selfst.
18 Dan woa wie nijch fonn die trigj wajch dreihe; jeff onns niehet Läwe, un wie woare dien Nome aunroope.
19 Brinj onns trigj, O Aulmajchtja Herr Gott; lot dien Jesejcht schiene, un wie woare jerat senne.
Dee 81 Psalm
To dän Haupt Musikaunt opp Gittit. Von Asaf.
1 Sinjt äawalud to Gott onnse Macht; moakt en frooet Jelud to Joakopp sien Gott.
2 Brinjt en Leet, un jäft dän Timbrel häa, dee scheene Jittoa met de Hoap.
3 Blost dee Trompeet enn dän niehe Mon, bie dee folle Mon opp dän eansta Fast Dach.
4 Dan dit wea en Aunkommendeare fa Iesrael, en Jesats von Joakopp sien Gott.
5 Dit deed Hee jrinde enn Joosef aus en Zeijchnes, aus Hee rut jinkj äwa daut Iejipte Launt; ekj head ne Sproak dee ekj nich festunt.
6 Ekj naum dee Laust fonn siene Schulre wajch; siene Henj weare fonn dän Korf jeleest.
7 Du deetst mie enn dien Trubbel aunroope, un ekj deed die rade; Ekj deed die auntwuate enn dee jeheeme Städ fonn dän Rummel; ekj deed die utproowe enn dee Meriba Wotasch. Selah.
8 O mien Folkj, horjcht, un ekj woa to junt Zeije: O Iesrael, wan jie no mie horjche woare;
9 doa saul kjeen Framda Gott mank junt senne; un jie sele uk nijch en framde Gott aunbäde.
10 Ekj sie dee Herr Gott jun Gott, dee junt ut Iejipte rut brocht; moakt jun Mul groot op, un ekj woa daut felle.
11 Oba mien Folkj deed nijch no miene Stem horjche; un Iesrael jeef nijch Jehuarsaum to mie.
12 Un soo äwajeef ekj an to daut hoatnakjet fonn äa Hoat; dee waundle enn äa eajne Stolltheit.
13 O wan mien Folkj bloos no miene Stem wudd jehorjcht habe! Wan Iesrael wudd enn miene Wäaj jewaundelt habe,
14 dan wudd ekj äare Fiend boolt jebandijcht habe; un ekj wudd miene Haunt jäajen äare Fiend jedreit habe-
15 dee däem Herr Gott hause, sele fer am ut Ferjcht trigj trakje; äare Tiet es fa emma-
16 jo, Hee wudd an met daut Fattet fonn dän Weit jefoodat habe; un ekj wudd junt tofräd jemoakt habe met Honnijch ut dän Steen.
Dee 82 Psalm
En Psalm von Asaf.
1 Gott steit enn dee Fesaumlunj fonn Gott; Hee deit rejchte meddemank dee Jetta.
2 Woo lang woa jie onjerajcht rejchte, un dee Gottloose nehejcht häwe? Selah.
3 Doo dee Oame un dee Weisekjinje rajcht rejchte; doot dee Betriebte un Bederftje rajchtet Jerejcht jäwe.
4 Doot dee Oame un Bederftje rade; doot dän rade ut dee Gottloose äare Henj.
5 Dee weete nijch un woare uk nijch festone; dee waundle enn Diestanes; aul dee Gruntloag fonne Ead sent jescheddat.
6 Ekj ha jesajcht, "Jie sent Jetta;" un, "Jie sent aula däm Hejchsta siene Säns."
7 Oba jie sele stoawe soo aus dee Mensch, un faule soo aus eena fonn dee Harscha.
8 Sto opp, O Gott! rejcht dee Ead; dan Du saust enn aul dee Natjsoone oawe.
Dee 83 Psalm
En Leet. En Psalm von Asaf.
1 O Gott, hool daut stellet nijch to die selfst; sie nijch oone Räd; sie nijch stel, O Gott..
2 Dan see, diene Fiend doone brelle, un soone dee Die hause ha äa Kopp oppjehaeft.
3 Dee ha Rot jenomen jäajen dien Folk; dee ha jeplont jäajen diene festoakne.
4 Dee ha jesajcht: "Komt, wel wie dän aufschniede fonn ne Natsjoon to senne, soo daut dee Nome Iesrael niemols wada jebruckt woat."
5 Dan dee ha toop met een Hoat jeplont; dee ha en Bunt jemoakt jäajen Die;
6 dee Tselte fonn dee Edomiete un dee Iesmaeliete; Moab un Hagareen;
7 Gebal, un Ammon un Amalekj; Filiste met dee Tiarus Ennwone.
8 Assieria haft sikj uk met an ennjeschlote, dee weare däm Lot siene Säns soo aus en Oarm. Selah.
9 Doo to am soo aus to Midian, soo aus to Sisera, soo aus to Jabin bie dän Stroom Kischon.
10 Dee worde fenijcht bie Endor; dee worde soo aus Mest fa dee Ead.
11 Moak äare Ferschte soo aus Oreb en Zeeb, un soo aus Zeba un Zalmmuna un aul äare Ferschte
12 dee säde: "Wel wie Gott siene Weid besette fa onns selfst."
13 O mien Gott, moak dän soo aus kjriselstoff, soo aus Stoppel fer dän Wint.
14 Soo aus daut Fia en Woolt dol brennt, un dee Flaum dee Boaj aunstekjt,
15 Soo joag dän hinjaraun met dien groota Wint, un engst dän met dien Storm.
16 Fel äa Jesejcht met Schaund, un dee woare dien Nome seakje, O Herr Gott.
17 Lot an sikj schäme un fa emma Angst ha; jo, lot dän fewert senne, un omkome.
18 Un lot an weete – Dien Nome es Dee Herr Gott – daut Du auleen dee Aulahejchsta es äwa dee gaunse Ead.
Dee 84 Psalm
To dän Haupt Musikaunt opp Jittit. En Psalm fa dee Kora Säns
1 Woo harlijch sent diene Woninj, O Aulmajchtja Herr Gott!
2 Miene Seel sänt sikj un deit soogoa feschmachte fa däm Herr Gott siene Fäaleew; mien Hoat un mien Fleesch schriehe fa däm läwendja Gott.
3 Soogoa dee Spoalinkj haft en Hus jefunje; un dee Schwaulm en Nast fa sikj selfst wua see äare Junja kaun han laje, opp diene Aultoare, O Almajchtja Herr Gott, mien Kjeenijch un mien Gott.
4 Jesäajent sent dee, dee enn Dien Hus wone; dee woare Die emma preise. Selah.
5 Jesäajent es dee Maun däm siene Macht enn Die es; dee Huachwäaj sent enn äare Hoate.
6 Wan see derjch dän Tol fonn Hiele derjch gone, moake see daut ne Wotakjwal; jo, dee Räajen deit bekjleede met Säajens.
7 Dee gone fonn eene Karuft no dee Näakjste, un kome enn Zion fer Gott.
8 O Aulmajchtja Herr Gott, hea mien Jebäd; horjch, O Joakopp sien Gott. Selah.
9 See, O Gott onns Schilt, un kjikj opp dien Ennjesaulwda sien Jesejcht.
10 Dan een Dach enn diene Fäaleew es bäta aus Dusent; ekj ha jewält bie dee Däa fonn mien Gott sien Hus to stone, aus enn dee Gottloose äare Tselte to wone.
11 Dan dee Herr Gott es en Sonn un en Schilt; dee Herr Gott woat Jnod un Harlijchkjeit jäwe; Hee woat nuscht Goodet trigj hoole fonn dän dee opprajchtijch waundle.
12 O Aulmajchtja Herr Gott, jesäajent es dee Maun dee enn die fetruehe deit!
Dee 85 Psalm
To dän Haupt Musikaunt. En Psalm fa dee Kora Säns.
1 O Herr Gott, du best jnädijch jewast to dien Launt; du hast Joakop siene Jefangenschoft trigj jedreit.
2 Du hast dien Folkj äare Gottloosijchkjeit wajch jenomen; du hast aul äare Sind bedakjt. Selah.
3 Du hast aul dien Oaja toop jesaumelt; du hast fonn dee Hett fonn dien Oaja wajch jedreit.
4 O onnse Radunks Gott, drei onns romm, un sie onns nijch lenje ojalijch.
5 Woascht du opp emma oajlijch senne jäajen ons? Woascht du dien Oaja felenjre to aule Jeschlajchte?
6 Woascht ons niehet Laewe jäwe soo daut dien Folkj sikj en die freihe kaun?
7 Wies onns dien Erboarme, O Herr Gott, un jeff onns diene Radunk.
8 Ekj woa heare waut dee Herr Gott saje woat, dan Hee woat Fräd to sien Folkj räde, un to siene Heilje; oba lot dän nijch wada no Dommheit dreihe.
9 Sejchalijch es siene Radunk dijcht bie jekomen no dän dee Am ferjchte; soo daut daut Harlijchkjeit wone kaun enn daut Launt.
10 Erboarme un Woarheit ha sikj toop jetroffe; Jerajchtijchkjeit un Fraed ha sikj jekust.
11 Woarheit woat ut dee Ead rut sprinje, un Jerajchtijchkjeit kjikjt rauf fom Himel.
12 Jo, dee Herr Gott woat onns goodet jäwe, un onns Launt wudd dee Arnt femeare.
13 Jerajchtijchkjeit woat fer Am gone, un woat en Wajch moake fa siene Staupe..
Copyright © 2001 by Elmer Reimer