Beginning
Dee 70 Psalm
To dän Haupt Musikaunt, en Psalm fonn Doft, tom aunjedenkj.
1 O Gott rad mie! O Herr Gott, spood die mie to halpe!
2 Lot dän dee no miene Seel seakje sikj schäme un blauss senne; lot dän trigj jedreit woare un to schaund jemoakt woare dee mie Beeset wensche.
3 Lot dän trigj jedreit woare dee Aha! Aha! saje, aus ne Loon fa äare Schaund.
4 Lot aul dän sikj freihe dee die seakje, un froo sent enn die; un dee, dee diene Radunk Leef ha emma saje: "Gott saul feharlijcht woare!"
5 Oba ekj sie oam un bederftijch, komm schwind no mie, O Gott; du best miene Help un mien Rada; O Herr Gott, doo nijch lenja luare.
Dee 71 Psalm
1 Ekj ha mine fetruehe enn die, O Herr Gott, lot mie nijch to Schaunde jemoakt woare opp emma.
2 Doo mie aufleewre un rade enn diene Jerajchtijchkjeit; horjch no mie un rad mie.
3 Sie en groota Steen fa mie no woont ekj emma gone kaun; du hast en aunkommendeare jejäft mie to rade; dan du best mien groota Steen un miene Fastinj.
4 O mien Gott, doo mie aufleewre ut däm Fient siene Haunt, un ut daem Onnjerjachta siene Bennehaunt, un fonn dee Ruchloose.
5 Dan du best miene Hopninj, O Gott Herr Gott, mien Toofetruehe fonn miene Jugent.
6 Ekj ha enn die jerüt fonn miene Muttalief; du best dee, dee mie ut miene Mutta aea Muttalief rut neem; mien Preis saul emma fonn die senne.
7 Ekj sie soo aus en Wunnda to Fäle, oba du best mien stoakja Torm.
8 Mien Mul es jefelt met dien Preis, met diene Harlijchkjeit dän Dach äwa.
9 Doo mie nijch auntsied schmiete nu enn mien oolet Ella. Doo mie nijch felote nu daut ekj Schwak sie.
10 Dan mien Fiend Fiend räde jäajen mie, un soone dee no miene Seel schuloarijch laure doone toop plone.
11 Un see saje: "Gott haft am felote; joag am hinjaraun un nämt am, dan doa es kjeene dee am aufleewre kaun."
12 O Gott, sie nijch wiet auf fonn mie; O mien Gott, komm schwind mie to halpe.
13 Lot daen sikj schäme; lot dän dee miene Seel äare Fiend sent fenijcht woare.; lot dän met Schaund bedakjt senne; un lot dän dee Beeset seakje jäajen mie, to Schaund jemoakt woare;
14 En ekj woa emma Hopninj ha, un ekj woa meeha toolaje to dien Preis.
15 Mien Mul saul fonn diene Jerajchtijchkjeit un diene Radunk dän dachäwa räde; dan ekj weet nijch dee Nummasch.
16 Ekj woa enn däm Aulmajchtja Herr Gott siene Macht kome; ekj woa fonn diene Jerajchtijchkjeit räde, en diene auleen.
17 O Gott, du hast mie ennjeleat fonn miene Jugent, un bott nu ha ekj diene Wunndasch bekaunt jemoakt.
18 En nu daut ekj Oolt un greiwkoppijch sie, O Gott, doo mie nijch felote; bott ekj diene Krauft bekaunt jemoakt ha to dit Jeschlajcht, diene Macht to en jieda dee noch kome woat.
19 Un nu, O Gott, diene Jerajchtijchkjeit es seeha huach, dan du hast groote Dinje jedone; O Gott, wäa es soo aus Du best?
20 Dee mie groote un beese Trubbels jewäse haft, du woascht mie dreihe; du woascht mie aum läwe hoole, un du woascht fonn daut Deepet enne Ead oppdreihe; Du woascht mie enopp brinje.
21 Du woascht mien Grootet femeare, un mie aun aule Siede treeste.
22 Ekj woa die uk met ne Hoap danke; O mien Gott, ekj woa to die sinje met dee Jittoa, O du Heilje enn Iesrael.
23 Miene Leppe sele fa Freid juble, ekj woa Preis to die sinje; un uk miene Seel dee Du jerat hast.
24 En miene Tunj saul enn Jedanke dreeme fonn diene Jerjachtijchkjeit dän dachäwa; wiels dee, dee Beeset fonn mie sochte sent to Schaund jemoakt, dee motte sikj schäme.
Dee 72 Psalm
Fonn Salamo.
1 Jeff däm Kjeenijch diene Jerejchte, O Gott; un diene Jerajchtijchkjeit to däm Kjeenijch sien Sän.
2 Hee saul dien Folkj enn Jerajchtijchkjeit rejchte, un diene Oame enn rajchtet Jerejcht.
3 Dee Boaj woare Fräd nehejcht häwe to daut Folkj, un dee läaje Boaj derjch Jerajchtijchkjeit.
4 Dee woat dee Oame fonn daut Folkj rajchtet jerejcht jäwe; un hee woat dee Bederftje äare Säns rade; un hee woat däm rejchte dee bedrekje deit
5 Dee sele die ferjchte met dee Sonn; un fer dee Mon fa aule Jeschlajchte.
6 Hee woat rauf kome soo aus Räajen opp daut jeheiwdet Graus; soo aus dee korte Räajen dee de Ead wotre.
7 Dee Jerajchte saulet jelinje enn siene Doag, met fäl Fräd, bottet nijch dee Mon es.
8 Hee saul uk fonn een See bottem däm aundra rejeare, un fonn dän Riefa botte Enj fonne Ead.
9 Soone dee enne Wiltnes wone, woare sikj fer am dol beaje; aule Natsjoone woare am deene.
10 Dee Tarschisch Kjeenije enn dee Insle woare am Gow brinje, dee Scheeba un Seena Kjeenijchs woare Gow opfre.
11 Jo, aule Kjeenije woare fer am dol faule; aule Natsjoone woare am deene.
12 Dan Hee woat dee Bederftje dee schriehe rade, un dee Oame dee kjeen Helpe ha.
13 Hee woat Metliet habe opp dee Oame un Bederftje; un Hee deit dee Bederftje äare Seele rade.
14 Hee woat dee Seele rade fonn Bedrekje un Jewault, un äa Bloot saul kjestlijch senne enn sien Aunseene.
15 En hee saul läwe, un Golt fonn Scheeba saul to am jejäft woare, un Jebäd saul uk eegol to am jejäft woare; dee saul am de Tietäwa säajne.
16 Doa saul follet Jetraeajd senne opp dee Boaj Spets, un daut Frucht saul soo senne aus Lebanon; un dän enn dee Grootstaede saulet soo jelinje aus daut Grauss oppe Ead.
17 Sien Nome saul fa emma duare; sien Nome saul fer dee Sonn bekaunt jemoakt woare; en dee woare sikj selfst saeajne bie am; un aule Natsjoone sele am jesäajent nane.
18 Jesäajent es Iesrael äa Herr Gott, dee auleen wundafolle Dinej deit.
19 En jesäajent es sien harlijcha Nome fa emma, un dee gaunse Ead es jefelt met siene Harlijchkjeit!. Amen en Amen.
20 Däm Jesse sien Sän Doft siene Jebäde sent to en Enj jekome.
Dee Psalme III
Dee 73 Psalm
En Psalm fonn Asaf
1 Werkjlich Gott es goot to Israel, to dän dee en reinet Hoat habe.
2 Un waut mie daut aunbelangt, miene Feet haude meist jestolpat; miene Staupe muake mie meist jleppe.
3 Dan ekj wia neidisch äwa dee Stollte; ekj bekjikjt dee Beese äare Fräd.
4 Dan doa wea kjeen Schrakj to äa Doot; oba äa Kjarpa es Fat.
5 Dee ha nich daut miseroblijet daut stoawlije Mensche ha; dee sent nijch soo jeploacht aus jeweenlije Mensche.
6 Un soo deit Stoltet dän bekjäde; ruchlooset deit dän bedakje soo aus en Wanikj.
7 Aeare Uage schwalle rut met Fatet; dee ha dee Ennbildunk fonn äa Hoat wieda jefeat.
8 Dee spotte un räde met Lest; fonn huach bowe räde see ommenschlijchet.
9 Dee stalle äare Miele enne Himels, un äare Tunj wankt derjch dee Ead.
10 Doaromm saul sien Folkj trigj hia häa kome; un dee woare en follet Kuffel ut drinkje.
11 En dee saje: "Woo deit Gott weete?" un, "Es doa Festentnis enn daem Aulahejchsta?"
12 Kjikj! Dit sent dee Gottloose dee emma enn Leijchtheit sent; dee näme too enn äa Hab un Goot.
13 Sejchalijch ha ekj mien Hoat emm sonnst rein jehoole; un ekj ha miene Henj enn Onnschult jewosche.
14 Dan ekj wea dän Dach äwa jeploacht, un miene Strof wea jieda Morje doa.
15 Wan ekj saj: "Dit es woo ekj räde woa;" dan see, ekj wudd en Jeschlajcht fonn diene Kjinje hinjem Lijcht feare.
16 Un wan ekj uk docht daut ekj daut festunnt, wea daut doch Weedoag enn miene Uage,
17 bott ekj enn Gott siene Fesaumlings Städ enenn jinkj; nu festo ekj äa Enj.
18 Sejchalijch woascht du äare Feet opp daut jlepprijet brinje; du woascht dän enn Fenijchte faule moake.
19 Woo dee fenijcht sent enn eene Moment, wajch jefäajcht met Schrakj!
20 Soo aus en Droom wan eena oppwakjt, O Herr Gott, wan du oppwakjst, woascht du äa Jestault feachte.
21 Dan mien Hoat wea febettat, un ekj wea jestoakjt enn miene Neare.
22 Ekj wea Hungsch un wist nijch; ekj wea soo aus Tiare fer die.
23 Un doch wea ekj emma bie die, du hast miene rajchte Haunt aunjefote.
24 Du woascht mie derjch dien Rot leide; un aum Enj woascht du mie no dee Harlijchkjeit näme.
25 Wäm ha ekj emm Himel? En ekj ha kjeen Janka fa irjent wäm opp dise Ead buta die.
26 Mien Fleesch un mien Hoat näme auf; Gott es mien Hoat sien groota Steen un mien Poat fa emma.
27 Dan see, soone dee wiet auf sent fonn die sent feloare; du hast aul dän fenijcht dee fonn die wajch leste.
28 Waut mie daut aunbelangt, daut es goot fa mie daut ekj mie no Gott nodre sull; ekj ha miene Tooflucht enn däm Herr Gott jemoakt, aul diene Woakje to fetale.
Copyright © 2001 by Elmer Reimer