Beginning
Dee 66 Psalm
To dän Haupt Musikaunt, En Leet fonn Doft.
1 Moakt en froohet Jelud to Gott, aul jie oppe Ead!
2 Sinjt to dee Ea fonn sien Nome; jäft Harlijchkjeit to sien Preis.
3 Sajcht to Gott:"Woo wunndafoll sent diene Woakje. Derjch daut Grootet fonn diene Macht doone diene Fiend fäajäwe daut see jehuarsaum sent to die. Dee gaunse Ead saul dien aunbäde; dee preise dien Nome. Selah.
5 Komt en seet Gott siene Woakje, dee fetraflijch es enn sien Doone to dee Menschesäns.
6 Hee muak dreajet Launt wua doa See wea; dee gone tofoot derjch däm Riefa; doa woa wie onns met am freihe.
7 Hee rejeat derjch siene Macht fa emma; siene Uage seakje dee Natsjoone ut; lot dän dee jäajenaun sent sikj nijch puche. Selah.
8 O jie Felkja, doot onns Gott säajne, un lot dee Stem fonn sien Preis to heare senne;
9 Dee onnse Seel mank dee Läwendje helt, un erlaubt nijch daut onnse Feet jleppe sulle.
10 Dan du, O Gott hast onns jeprooft; du hast onns ajcht jemoakt soo aus Selwa ajcht jemoakt woat.
11 Du hast onns enn daut Nat jebrocht; du deetst Älend opp onnse Lende laje.
12 Du hast erlaubt daut Mane äwa onns Kopp riede deede; wie sent derjch Fia un derjch Wota jekome, oba du brochst onns no Follet.
13 Ekj woa enn dien Hüs enenn gone met Braunt Opfa; ekj woa mien Fespräakje betole,
14 daut miene Leppe jerät ha, en daut ekj enn mien Trubbel fespruak.
15 Ekj woa die Braunt Opfa opfre fonn fattet Fee, met dän seeta Ruak fonn Kosebakj; ekj woa Bolles opfre met Kose. Selah.
16 Komm, hea, un lot mie fetale, aul jie dee Gott ferjchte, waut Hee fa mie jedone haft to miene Seel.
17 Ekj schreajch to am met mien Mul, un met Preis unja miene Tunj.
18 Wan ekj Gottlooset aunjeseene ha enn mien Hoat, wudd dee Herr Gott nijch no dee Stem fonn miene Jebäd jeheat ha.
19 Sejchalijch haft Gott jeheat; Hee haft Oobacht jejäft opp dee Stem fonn mien Jebäd.
20 Jesäajent es Gott, dee sikj nijch wajch jedreit haft fonn mien Jebäd, oda sien Erboarme trigj jehoole haft.
Dee 67 Psalm
To dän Haupt Musikaunt, fe en Späldinkj met Seide. En Psalm, en Leet.
1 Mucht dee Herr erboarment senne to onns, un onns säajne, un mucht sien Jesejcht opp onns schiene. Selah.
2 Daut dien Wajch mucht oppe Ead bekaunt senne, diene Radunk mank aule Natsjoone.
3 Lot dee Felkja dien danke, O Gott, lot aul dee Felkja die danke.
4 O lot dee Felkja froo senne, un fa Freid sinje; dan du woascht dee Felkja enn Jerajchtijchkjeit rejchte, un äwa dee Felkja oppe Ead rejeare.
5 Lot dee Felkja die Dank jäwe, O Gott; lot aul dee Felkja die Dank jäwe.
6 Dee Ead haft äa Toonämet jejaeft; Gott, onns eajna Gott, woat onns säajne.
7 Gott woat onns säajne, un aul dee Winkjels enne Ead woare am ferjchte.
Dee 68 Psalm
To dän Haupt Musikaunt. En Psalm fonn Dift. En Leet.
1 Gott deit sikj opprejchte, un siene Fiend sent festreit, en dee, dee am hausse, rane fonn am wajch.
2 Doo an wajch driewe soo aus Ruak wajch jedräwe woat; soo aus Wauss schmelte deit ferem Fia, soo woare dee Beese ommkome fer Gott sien Doasenne.
3 Oba dee Jerjachte freihe sikj, dee schriehe fa Freid fer Gott; jo, dee juble met Freid.
4 Sinjt to Gott, sinjt Preis to sien Nome; häft däm huach dee enne Wiltnes riede deit, derjch Ja, sien Nome; jo, jubelt enn sien Doasenne.
5 Gott enn siene heilje Woninj es en Foda to dän dee kjeen Foda ha, un en Rejchte fa dee Wätfruehes.
6 Gott moakt daut soo daut dee Eensaume Tus wone kjenne; Hee brinjt dän rut dee met Kjäde jebunje sent, wäarent dee Oppsternootsche enn en dreajet Launt wone,
7 O Gott, aus du fer dien Folkj mascheare deetst, aus du derjch dee Wiltnes jinjst. Selah.
8 Dee Ead scheddad, un dee Himels folle rauf fer Gott, dis Sienaie fer Gott, Iesrael äa Gott.
9 O Gott, du schekjst en groota Räajen, derjch woont du dien Oawgoot bestädje deetst aus dee Meed wea, du deetst dee bestädje.
10 Diene Fesaumlunj wond doabenne; Du, O Gott hast dien Goodet reed jemoakt fa dee Oame.
11 Dee Herr Gott jeef daut Wuat, un doa wea ne groote Menj Mensche dee daut utjeewe.
12 Armeehe äare Kjeenijchs rande wajch, dee spoode sikj; jo, see dee Tus jebläwe wea haft daut Raup ennjedeelt.
13 Wan du die dol laje deist em Schophock, dan woare diene Flijchte soo senne aus met Selwa bedakjt, un dee Faddre met hallet Golt.
14 Wan dee Aulmajchtja Kjeenijchs doarenn festreihe deit, dan schniet daut opp Salmon.
15 Dee Baschan Boajch es Gott sien Boajch; dee Baschan Reaj es en Boajch fonn Spetse.
16 Wuaromm glup jie soo enn Neit, O Reaj fonn Boaj, no daen Boajch dän Gott jewält haft fa siene Woninj? Jo, dee Herr Gott woat doa fa emma benne wone.
17 Gott haft fäl Kjrijchswoagees, seeha, seeha fäl, dee Herr es mank dän; enn Sienaie dee heilje Staed.
18 Du best nehejchte jefoare; du hast dee Jefangne jefange jenome, du hast Gow jekjraeaje mank Mensche, soogoa mank dee Oppsternootsche, O Gott Herr Gott.
19 Jesäajent es dee Herr; dach fa dach deit hee Lauste droage fa onns, dee Gott fonn onnse Radunk. Selah.
20 Onns Gott es dee Gott fonn Radunk; un daut Looskome fomm Doot jeheat to däm Herr Gott.
21 Jo, Gott woat dee Fiend äa Kopp fewunnde; dee hoarija Kopp fonn dän dee enn siene Gottloosijchkjiet wieda jeit.
22 Dee Herr saed: "Ekj woa fonn Baschan trigj brinje; ekj woa mien Folkj trigj brinje fonn daut deepstet emm See;
23 Soo daut dien Foot kaun enducke enn daut Bloot fonn diene Fiend, dee Hunj äare Tunj doabenne.
24 Dee ha dien Mascheare jeseene O Gott; wua mien Kjeenijch, mien Gott gone deit enn dee heilje Städ.
25 Dee Senja jinje feropp, dan soone dee opp Späldinje spälde; un mank dän weare dee eentletsje Mäakjes dee opp kjleene Hoape spälde.
26 O säajent Gott enn dee Fesaumlunje, dee Herr, fonn daen Wotakjwal Iesrael.
27 So es Benjamin äa Harscha; dee Leida enn Judah enn dee Menj, un dee Lieida fonn Zebulon, dee Leida fon Naftalie.
28 Dien Gott haft diene Macht enjeordent; O Gott, doo stoakje enn daut waut du fa onns utjeoabeit hast.
29 Wäajen dien Tempel äwa Jerusalem, woare Kjeenije Gow brinje no die.
30 Doo dee wile Beeste fonn mank dee Schelprua dodle, dee Menj fonn dee Bolles met dee Kjalwe fonn daut Folkj, jieda eena deit dol traumple met bieta Selwa; Hee festreit dee Mensche dee sikj fejneaje enn Kjrijch.
31 Lot Bronz jebrocht woare fonn Iejipte; Itieopia saul äare Henj utstrakje no Gott.
32 Sinjt to Gott, jie Kjeeneijchrikje oppe Ead; Preist to däm Herr. Selah.
33 To däm dee opp dee Himels Himle riede deit fonn jee häa; see, Hee schekjt siene Stem rut, ne majchtje Stem.
34 Doo Gott Macht auneajne äwa Iesrael, siene Madastijchkjeit un siene Krauft enn dee Wolkje.
35 O Gott du best hejcha enn Ea ut diene heilje Städe; Iesrael äa Gott es dee, dee Krauft un Macht jeft to daut Folkj. Jesäajent es Gott!
Dee 69 Psalm
To dän Haupt Musikaunt, fonn dee Lelje, en Psalm fonn Doft.
1 Rad mie, O Gott, dan dee Wotasch sent enn miene Seel Jekome.
2 Ekj fesenkj enn daut deepet Blott, un doa es kjeen Stone; ekje sie enn dee deepe Wotasch jekome wua dee Äweschwamunj äwahaunt nemt.
3 Ekj sie meed fonn hiele, mien Hauls es dreajch, miene Uage fesaje mie wäarent ekj no mien Gott lua.
4 Dee, dee mie hausse sent meeha aus hee Hoa opp mien Kopp; soone dee mie fenijchte wele sent kjraftijch, miene majchtje Fiend, donn deed ekj trigj tole waut ekj nijch met Jewault jenome haud.
5 O Gott, du weetst woo noarisch ekj sie, un miene Sinde sent nijch fonn die festoakje.
6 Doo dän dee opp die wachte, O Aulmajchtja Herr Gott, sikj schäme omm mient haulwe; lot nijch dän dee die seakje sikj schäme wäajen mie, O Iesrael äa Gott.
7 Wiels ekj ha Schaund erfoare omm dienet haulwe, Schaund haft mien Jesejcht bedakjt.
8 Ekj sie en Utlenda jeworde to miene Breede, un en Framda to miene Mutta äare Kjinje.
9 Dan daut Iewa fa dien Hus haft mie fetäat, un dee Schaund fonn dän dee die Schende deede es opp mie jefolle.
10 Aus ekj miene Seel met Fauste deemietijcht, wea daut uk to miene Schaund;
11 Ekj trock mie Saktseijch aun; un dee muake Spott fonn mie.
12 Soone dee enn dee Puat saute, räde fonn mie; un ekj wea dee Besopne äa Leet.
13 Oba waut mie daut aunbelanjt, mien Jebäd es to die, O Herr Gott, enn ne aunjenäme Tiet, O Gott! Enn dee Butamote fonn dien Erboarme, doo mie auntwuate, enn dee Woarheit fonn diene Radunk.
14 Rad mie fonn ut daut Blott, soo daut ekj nijch sinkje woa; lot mie jerat woare fonn dän dee mie hausse; en fonn ut dee deepe Wotasch.
15 Lot dee Äweschwamunj nijch äwa mie kome, un lot daut Deepet mie nijch oppschlucke, un lot nijch dee Kul too gone äwa mie.
16 Hea mie, O Herr Gott, dan dien Erboarme es goot, drie die no mie enn dee Butamote fonn diene leeftolje Erboarmunje.
17 En doo dien Jesejcht nijch festäakje fonn dien Deena; dan ekj sie enn Trubbel, horjch schwind no mie.
18 Komm dijcht bie no miene Seel; rad dee; rad mie wäajen miene Fiend.
19 Du weetst miene Schaund un mien Schomp, un miene Onnea; miene Fiend sent aule fer mie.
20 Schaund haft mien Hoat jebroake, un mie es ommacklijch; un ekj luad daut wäa sull en Jaumahoat fa mie habe, oba doa wea kjeena; un fa Treeste, oba ekj funk kjeene.
21 Dee jeewe mie uk Gaul enn mien Äte; un enn mien Darscht jeewe see mie Ädikj tom drinkje.
22 Lot äa Desch ne Faul senne fer an; un ne Schlenj to soone dee enn Leijchtheit sent.
23 Lot äare Uage dunkel woare soo daut see nijch meeha seene kjenne, un lot äare Jelenkje de Tietäwa scheddre.
24 Jeet dien Rach ut opp an; lot dien heeta Oaja an bejriepe.
25 Lot äa Heim eed un felote senne; lot kjeenem enn äare Tselte wone.
26 Dee ha dän fefoljcht daen du jeschloage hast; un räde fonn dän äa Trua dän du jewunnt hast.
27 Doo Beeset toolaje to dän dee Beeset jedone ha; un lot dän nijch enn diene Jerajchtijchkjeit enenn kome.
28 Doo dän utlaschte fonn dien Läwes Buak; jo, lot dän nijch met dee Jerajchte ennjeschräwe senne.
29 Oba ekj sie Oam un enn Weedoag; O Gott, Lot diene Radunk mie opp daut Huaget stale.
30 Ekj woa noch Gott sien Nome preise enn en Leet, un ekj woa am feharlijche met Danksagunk.
31 En daut woat däm Herr Gott meeha jefaule aus Bolles dee Heanna un Heefte ha.
32 Dee Deemietje ha jeseene un freihe sikj; jie, dee jie Gott seakje, june Hoate sele läwe.
33 Dan dee Herr Gott heat dee Bederftje, un hee diet siene Jefangne nijch feachte.
34 Lot dee Himels un dee Ead am preise, dee See, un aule dee doabenne wanke.
35 Dan Gott woat Zion rade; un hee woat Juda äare Grootstaede oppbuehe, un dee woare doa wone un daut eajne.
36 Un siene Deene äare Nokome woare daut oawe, un dee sien Nome leef ha woare doabenne wone.
Copyright © 2001 by Elmer Reimer