Beginning
Dee Psalme I
Dee 1 Psalm
1 Jesäajent es dee Maun dee nijch enn dee Gottloose äa Rot jewaundelt haft, un dee nijch enn dee Sinda äare Wäaj jestone haft, un dee nijch enn dee Spatta äare Set jesäte haft.
2 Oba sien Fejneaje es bloos enn däm Herr Gott sien Jesats, un dee sikj Dach en Nacht enn sien Jesats besenne deit.
3 Un hee saul jeplaunt senne soo aus en Boom bie dee Wota Streem, dee äare Frucht brinjt to rajchte Tiet; sien Blaut woat nijch fewalkje; un aules daut hee deit woat am jelinje.
4 Oba dee Gottloose sent nijch soo; oba sent soo aus daut Sprie daut dee Wint fepliesat.
5 Doaromm woare dee Onnjerajchte nijch enn daut Jerejcht bestone, uk nijch Sinda enn dee Jerajchte äare Fesaumlunje.
6 Dan dee Herr Gott kjant dee Jerajchte äa Wajch, oba dee Gottloose äa Wajch woat feschwinje.
Dee 2 Psalm
1 Wuaromm sent dee Natsjoone rosent, un doone nutslooset bedenkje?
2 Dee Kjeenije oppe Ead stale sikj jäajenaun; jo, dee Harsche ha toop jeplont jäajent daem Herr Gott un sien Ennjesaulwda, un saje:
3 "Wie woare äare Baunde entwei bräakje, un schmiete äa Jebunjnet fonn onns."
4 Dee enne Himels set woat lache; dee Herr Gott woat an spotte.
5 Dan woat hee to an räde enn sien Oaja, Hee woat an trubble enn sien Rach.
6 Doch ha ekj mien Kjeenijch opp mien heilja Boajch jesat, opp Zion.
7 Ekj woa daut aus en Jesats moake, dee Herr Gott säd to mie: "Du best mien Sän, fonndoag sie ekj dien Foda jeworde!"
8 Froag mie, un ekj woa die dee Natsjoone jäwe aus dien Oawgoot, un dee wietste Kaunte fonn dee Welt aus dien Habgoot.
9 Du woascht dän bräakje met ne Iesestang; du woascht dän to Biete schmattre soo aus en Toppstrikja sien Jefäs.
10 Nu dan, siet Weis, O Kjeenije, siet ennjeleat, O jie Rejchta oppe Ead;
11 Deent däm Herr Gott met Forjcht; jo, freit junt met Tsetre.
12 Kusst dän Sän, sest woat hee oajalijch senne, un junt fonn dän Wajch fenijchte wan sien Rach uk bloos en bät aunjestekjt woat. O, dee Säajen fa aul dän dee äa Toofetruehe enn am ha!
Dee 3 Psalm
Doft sien Psalm aus hee fonn sien Saen Absalom flijchte must.
1 O Herr Gott, woo sikj miene Fiend femeat ha! Doa sent fäl dee jäajen mie oppjestone sent.
2 Fäl saje fonn miene Seel: "Doa es kjeene Radunk fa am enn Gott." Selah.
3 Oba du, O Herr Gott, best en Schilt romm mie; miene Harlijchkjeit, un dee, dee mien Kopp opphäft.
4 Ekj schreajch no mien Herr Gott met miene Stem, un Hee head mie fonn ut sien heilja Boajch. Selah.
5 Ekj läd mie dol en schleep; ekj wuak opp, dan dee Herr Gott bewoad mie.
6 Ekj woa mie nijch enjste fa dusende fonn Mensche dee sikj jäajen mie jestalt ha runnt omm.
7 Sto opp, O Herr Gott! Rad mie, O mien Gott! Dan du hast aul miene Fiend aune Backknoake jeschmattat; du hast dee Gottloose äare Täne jebroake.
8 Dee Radunk jeheat daem Herr Gott; dien Säajen es opp dien Folkj. Selah.
Dee 4 Psalm
1 Horjch no mie wan ekj roop, O du Gott fonn miene Jerajchtijchkjeit; du jeefst mie Rum enn mien Älend. Doo die äwa mie erboarme, un hea mien Jebäd.
2 O jie Mensche Säns, woo lang woa jie miene Harlijchkjeit to Schaund moake? Woa jie Nutslooset leef habe? Woa jie ne Leaj hinjaraun rane? Selah.
3 Oba dit sel jie weete daut dee Herr Gott haft dee jetlijche fa sikj selfst auntsied jesat; dee Herr Gott heat mie wan ekj am aunroop.
4 Doot tsetre, un doot nijch sindje, räd met die selfst opp dien Bad un sie stel. Selah.
5 Doot dee Opfa fonn Jerajchtijchkjeit opfre, un doot enn däm Herr Gott fetruehe.
6 Fael saje: "Wäa woat onns irjent waut Goots wiese?" O Herr Gott, lot onns daut Lijcht fonn dien Jesejcht seene.
7 Du hast mie enn mien Hoat Freid jejäft, meeha aus donn aus äa Jeträajd un Wien tooneem.
8 Ekj woa mie beides dol laje enn Fraed, un uk schlope, dan du, O Herr Gott, moakst mie enn Fräd läwe.
Dee 5 Psalm
To dän haupt Musikaunt opp Nehilot, en Psalm fonn Doft.
1 Horjch no miene Wead, O Herr Gott, un behool mien Besennunj.
2 Jeff Oobacht opp miene Stem wan ekj schrie, mien Kjeenijch un mien Gott, dan ekj woa to die baede.
3 Du woascht miene Stem Tsemorjenst heare, O Herr Gott, ekj woa Tsemorjenst fer die kome, un ekj woa nehejcht kjikje.
4 Dan du best nijch en Gott dee Fejneaje haft enn Gottloosijchkjeit, un Beeset saul nijch enn dien Doasenne wone.
5 Soone dee sikj puche, woare nijch fer die bestone, du deist aul dee Gottloose Oabeide hause.
6 Du woascht dän fenijchte dee Laeajes räde. Dee Herr Gott woat daem Bloodrija un Lestja Maun feachte.
7 Oba waut mie daut aunbelangt, ekj woa no dien Hus kome enn dän Aewafluss fonn diene Jnod; ekj woa aunbäde enn diene Forcht fer dien heilja Tempel.
8 Leid mie, O Herr Gott, enn diene Jerajchtijchkjeit wäajen miene Fiend; moak dän Stijch jlikj fer mie.
9 Dan doa es kjeene Trueheit enn äa Mul, äa Gorjel es en opnet Grauf; dee schmeijchle met äare Tunj.
10 Hool an Schuldijch, O Gott, lot an faule derjch äa eajna Rot; driew an wajch enn äare fäl Äweträdunje, dan dee ha sikj jäajen die jestalt.
11 Oba lot aul daen sikj freihe dee enn die Fetruehe, lot daen emma juble fa Freid wiels du an beschutse deist; un lot daen dee dien Nome leef ha sikj enn die freihe.
12 Dan du, O Herr Gott, woascht däm Jerajchte säajne, du woascht am met Gonst ommrinje so aus met en Schilt.
Dee 6 Psalm
To dän haupt Musikaunt opp Neginot opp Scheminit, en Psalm fonn Doft.
1 O Herr Gott, doo mie nijch dodle enn dien Oaja; un doo mie uk nijch strofe enn dee Hett fonn dien Rach;
2 Doo die äwa mie erboarme, O Herr Gott, dan ekj sie schwack; heel mie O Herr Gott, dan miene Knoakes sent enn Trubbel.
3 Miene Seel es uk emm deepe jetrubbelt - en Du, O Herr Gott, woo lang?
4 O Herr Gott, komm trigj, rad miene Seel, rad mie omm dien Erboarme haulwe.
5 Dan enn dän Doot es doa kjeen Aunjedenkj aun die; wäa woat die danke fonn utem Grauf?
6 Ekj sie meed enn mien Stäne; mien Bad schwamt derjch dee gaunse Nacht; miene Rubenk schmelt met miene Trone.
7 Mien Uag es Dunkel wäajen mien Trua, daut woat moaga wäajen aul miene Fiend.
8 Wajch fonn mie, aul jie dee Gottloosijchkjeit oabeide, dan dee Herr Gott haft dee Stem fonn mien Hiele jeheat.
9 Dee Herr Gott haft mien Jeschrejcht jeheat, dee Herr Gott woat mien Jebäd aun näme.
10 Lot aul miene Fiend sikj schäme un emm deepe jetrubbelt senne; dee sele trig dreihe, un sikj schäme enn eene Moment.
Dee 7 Psalm
En Leet fonn Doft, daut hee to daem Herr Gott sunk wäajen däm Benjamiet Kusch siene Wead.
1 O Herr Gott mien Gott, ekj seakj no Tooflucht enn die; rad mie fonn aul dän dee mie hinjaraun sent, un doo mie aufleewre.
2 Daut hee nijch miene Seel feriete saul soo aus en Leiw, un daut to Bieta rit un doa kjeene es dee mie aufleewre woat.
3 O Herr Gott mien Gott, wan ekj dit jedone ha, un doa beeset es enn miene Henj;
4 Wan ekj Beeset to mien Frint jedone ha, oda wan ekj Raup jenome ha oone Uasoak fonn däm dee mien Fient wea -
5 dan lot dee Fient mie hinjaraun joage un miene Seel näme; un mien Laewe no de Ead traumple,un miene Ea enn dän Stoff laje. Selah.
6 Sto opp, O Herr Gott enn dien Oaja; sie oppjeräajcht wäajen miene Fiend äa Rach; un wakj opp fa mie! Du hast Jerejcht aunjekommendeat.
7 En dee Mensche äare Fesaumlunk saul romm die senne, un du woascht doa huach äwa trigj kome;
8 Dee Herr Gott woat sien Folkj rejchte. O Herr Gott, doo mie rejchte no miene Jerajchtijchkjeit, un no miene Follstendijchkjeit.
9 O lot dee Gottloose äare Gottloosijchkjeit to en Enj kome; un du woascht dee Jerajchte bestädje; dan dee Jerajchta Gott deit daut Hoat un Jewesse utproowe.
10 Mien Feteidje es opp Gott, dee dee Jerajchte enn Hoat rade deit.
11 Gott es en jerajchta Rejchta, un Gott es jieda Dach oajalijch äwa dee Sinda.
12 Wan dee sikj nijch omm dreihe woare, dan woat hee sien Schweat schoape; hee haft sien Boaje jeboaje, hee muak daut reed;
13 Jo, hee haft Jereetschoft reed jemoakt fa dän Doot; hee woat siene Fiele heet moake fa dän dee hinjaraun joage.
14 See, hee es met Beeset febunje, un woat Schowanackjet fäa brinje, hee es en Foda jeworde to Läajes;
15 Hee growd ne Kul, un es enn dän Growe enenn jefolle dän hee jemoakt haft.
16 Sien Showanackjet woat opp sien eajna Kopp trigj kome, un sien Jewault saul opp sien Scheedel trigj kome.
17 Ekj woa däm Herr Gott danke enn siene Jerajchtijchkjeit, un ekj woa Preis sinje to däm aulahejchsta Herr Gott sien Nome.
Dee 8 Psalm
To däm haupt Musikaunt opp Jittit, en Psalm fonn Doft.
1 O Herr Gott onns Herr, woo Madastijch es dien Nome enne gaunse Ead; du hast diene Harlijchkjeit hejcha jestalt aus dee Himels!
2 Ut dee Bäbes un soone aune Brosst äare Miele hast du Macht ennjeordent wäajen diene Fiend, soo daut dee Fient un dee Racheewa nojäwe motte.
3 Wan ekj mie äwa diene Himels, daut Woakj fonn diene Finjasch bedenkje doo, dee Mon un dee Stearns dee du bestädijcht hast;
4 Waut es dee Mensch daut du aun am denkje susst, un dee Säns fonn Mensche daut du dän beseakje susst?
5 Dan du hast am en bät läaje jemoakt aus Gott; un hast am met Harlijchkjeit un Ea jekroont.
6 Du hast am dee Harschoft jejäft äwa daut Woakj fonn diene Henj, du hast aules unja siene Feet jestalt -
7 Aule Schop un Osse, un uk dee Tiare emm Flekj,
8 dee Fäajel enne Lofft un dee Fesch em See, aule dee derjch dän See-stijch schwame.
9 O Herr Gott, onns Herr, woo Madastijch es dien Nome enne gaunse Ead!
Copyright © 2001 by Elmer Reimer