Beginning
Dee 51 Psalm
To dän Haupt Musikaunt, en Psalm fonn Doft – Aus Natan dee Profeet no am kjeen no däm daut hee Fekjea haud jehaut met Batseeba.
1 Sie jnädijch to mie O Gott, no dien Erboarme, no diene groote leeftolje Erboarmunje, doo miene Äweträdunje utlasche.
2 Wausch mie gausentgoa fonn mien Beeset, un moak mie rein fonn miene Sind.
3 Dan ekj doo miene Äwträdunge bekjane; miene Sind es emma fer mie.
4 Jäajen die, un die auleen, ha ekj jesindijcht un Beeset jedone enn diene Uage; daut du muchst jerajchtfoadijcht senne wan du rätst, un kloa senne wan du rejchte deist.
5 See, ekj wort enne Sind jebuare, un miene Mutta deed mie enn Sind bejriepe.
6 See, du deist Woarheit felange enn daut ennalijchet, un enn daut festoakne deist du mie Weisheit leare.
7 Reinj mie met Iesopp, un ekj woa rein senne, wausch mie, un ekj woa witta senne aus Schnee.
8 Moak mie foll Freid un froo senne to heare, daut dee Knoakes dee du jebroake hast sikj freihe kjenne.
9 Festäakj dien Jesejcht fonn miene Sind, un doo aul miene Onnjerajchtijchkjeite utlasche.
10 Erschauf enn mie en reinet Hoat, O Gott; un doo en staunthauftja Jeist enn mie nie moake.
11 Doo mie nijch fonn dien Doasenne wajch schmiete, un nem dien Heilje Jeist nijch fonn mie.
12 Jeff mie wada dee Freid fonn diene Radunk, un hool mie opprajcht met dien welja Jeist.
13 Dan woa ekj Äwaträda enn dien Wajch unjarejchte; en Sinda woare to die bekjeat woare.
14 Rad mie fonn dee Schult fonn Bloot fejeete, O Gott; O Gott miene Radunk; miene Tunj woat äwalud sinje fonn diene Jerajchtijchkjeit.
15 O Herr, moak miene Leppe op, un mien Mul woat dien Preis fäa brinje.
16 Dan du west nijch Opfa ha, sest wudd ekj daut jaewe; du hast kjeen Fejneaje enn Braunt Opfa.
17 Gott sien Opfa es en jebroakna Jeist; en jebroaknet un Buessfoadjet Hoat, O Gott, woascht du nijch fe-achte.
18 Doo Goots enn dien gooda Plezhea to Zion; bu dee Jerusalem Wenj opp.
19 Dan woascht du en Jefaule ha aun dee Jerajchtijchkjeits Opfa, met Braunt Opfa un gaunse Opfa; dan woare see Bolles opfre opp dien Aultoa.
Dee 52 Psalm
To dän Haupt Musikaunt: en Nodenkje: en Psalm fonn Doft- aus Doeg dee Eedomieta kjeem en fetald Saul, en säd to am: "Doft es no däm Ahimilech sien Hus jekome."
1 Wuaromm deist du die enn Beeset puche, O majchtja Maun? Gott sien Erboarme es eewijch!
2 Diene Tunj deit Fenijchte utjrebble soo aus en schoapet Putsmassa, un deit Lest wirkje.
3 Du hast Beeset meeha leef aus Goodet; Leaje meeha aus Jerajchtijchkjeit to räde. Selah.
4 Du hast aule Wead leef dee oppschlucke, O lestje Tunj!
5 Gott woat die jrod soo fenijchte fa emma; Hee woat die wajch näme, soogoa wajch plekje fonn dien Tselt; un erut riete fonn daut Launt wua dee Läwendje sent. Selah.
6 Un dee Jerajchte sele seene un ferjchte, un äwa am lache, en saje:
7 Hia es dee Maun dee Gott nijch siene Tooflucht muak, hee fetrued sikj enn sien Rikjdom; hee wea stoakj enn sien Fenijchte.
8 Oba ekj sie soo aus en jreena Oliewaboom enn Gott sien Hus; ekj doo enn Gott sien Erboarme fetruehe fa emma un emma.
9 Ekj wel die fa emma danke, wiels du daut jedone hast, un ekj doo enn dien Nome hope, wiels daut es Goot enn dee Heilje äa Doasenne.
Dee 53 Psalm
To dän Haupt Musikaunt opp Mahalat: En Nedenkje; En Psalm fonn Doft.
1 Dee Noa haft enn sien Hoat jesajcht, "Doa es kjeen Gott!" Dee sent fe-aedelt; dee ha schrakjlijet Gottlossijchkjeit aunjegone; doa es nijch eena dee Goots deit!
2 Gott kjikjt rauf opp dee Menschesäns, tom seene auf doa irjent wäa Ennsejcht haud, dee no Gott socht:
3 Jieda eena haud sikj wajch jedreit; dee sent aulatoop drakjijch; doa es nijch eena dee Goots deit, nijch emol eena!
4 Ha dee, dee Beeset oabeide, nijch jewist, dee mien Folkj oppfräte soo aus see Broot äte? Dee ha Gott nijch aunjeroopt.
5 Doa weare see enn groote Forjcht wua doa kjeene Forjcht wea, dan Gott haft daen äare Knoakes festreit dee jäajen junt loagade, du hast dän to Schaund jebrocht wiels Gott dän feschmäte haft.
6 Wäa jeft dee Radunk fa Iesrael fonn Zion? Wan Gott dee Jefangenschoft fonn sien Folkj trigj brinjt, dan woat Joakopp sikj freihe, un Iesrael woat froo senne.
Dee 54 Psalm
To dän Haupt Musikaunt opp Neginot: en Psalm fonn Doft- aus dee Zifim kjeem en saed to Saul, Deit Doft sikj nijch festäakje mank onnse?
1 Rad mie, O Gott derjch dien Nome, un doo mie derjch diene Krauft rejchte.
2 Hea mien Jebäd, O Gott; horjch no dee Wead ut mien Mul.
3 Dan Framde sent oppjestone jäajen mie, un ommenschlijche Mane seakje miene Seel. Dee ha Gott nijch fer sikj jestalt. Selah.
4 See, Gott es mien Helpa. Dee Herr es met dän dee miene Seel opprajcht hoole.
5 Hee woat Beeset fejelte to dän dee miene Fiend sent; schnied dän auf enn diene Woarheit.
6 Ekj woa friewelijch to die opfre; ekj woa dien Nome preise, O Herr Gott, dan daut es goot.
7 Dan Hee haft mie ut aul miene Trubbels jerat; un mien Uag haft sien Felange jeseene opp miene Fiend.
Dee 55 Psalm
To dän Haupt Musikaunt opp Neginot; En Nodenkje; En Psalm fonn Doft.
1 Horjch no mien Jebaed, O Gott, en doo die nijch festäakje fonn mien Jeschrejcht.
2 Horjch no mie, un doo auntwuate; ekj sie onnruehijch, un stän enn mien kloage,
3 Wäajen däm Fient siene Stem, un wäajen daut bedrekje fonn dän Fient, dan dee scheddre Beeset äwa mie, un enn äa Oaja hausse see mie.
4 Mien Hoat es enn Weedoag enn mie, un daut Schrakj fonn dän Doot es opp mie jefolle.
5 Forjcht un Tsettre kome opp mie; un Schrakj haft mie bedakjt.
6 Un ekj saed: "Wäa woat mie Flijchte jäwe soo aus ne Duw?" dan wudd ekj wajch fleaje un enn Rue senne.
7 See, ekj wudd wiet waundre, wajch rane; ekj wudd enne Wiltnes bliewe. Selah.
8 Ekj wudd mie spoode wajch to rane fonn dän ruzhenda Wint, fonn dän Storm.
9 Schluck opp, O Herr; doo äare Tunj spoole, dan ekj see Jewault un Striet enne Staut.
10 Dach un Nacht gone see runnt omm opp dee Wenj, un Trubbel un Schowanackjet es enn äare Med.
11 Jietsjet es enn äare Med un Bedrekje un Lest felat äare Gause nijch.
12 Dan daut es nijch en Fient dee mie waut fäaschmiete deit, dan kunn ekj daut fedroage; daut es uk nijch eena dee mie hausst dee sikj jäajen mie opphäwe deit, dan kunn ekj mie fonn am festäakje.
13 Oba daut best du, en Maun dee so es aus ekj sie, mien Frint, un mien Metoabeida.
14 Wie neeme seeta Rot toop; wie mascheade toop no Gott sien Hus met dee Menj Mensche.
15 Lot dän Doot dän tohoole kjriehe! Dee gone läwendijch rauf no de Hal, dan Gottloosijchkjeit es enn äare Wonstaede.
16 Ekj woa Gott aunroope, un dee Herr Gott woat mie rade.
17 Oppenowent un Tsemorjenst un opp Meddach woa ekj bäde un äwalud schriehe, un Hee woat miene Stem heare.
18 Hee deit miene Seel rade enn Fräd fonn dän Kjrijch jäajen mie; dan doa weare fäl dee met mie weare.
19 Gott woat heare un dän auntwuate, soogoa dee, dee fonn jeehäa es oppem Troon jewast. Selah. To dän es doa kjeene Enndanis, Jo, dee doone Gott nijch ferjchte.
20 Hee schekjt siene Haunt rut jäajen dän dee am Fräd wensche doone; hee bruak sien Bunnt.
21 Siene Wead ut sien Mul weare glaute aus Botta, oba Kjrijch wea enn sien Hoat; siene Wead weare weakja aus Eelj, oba dee weare soo aus Schweate dee rut jetrocke weare.
22 Schmiet diene Laust opp däm Herr Gott, un hee woat die bewoare; Hee woat niemols erlaube daut dee Jerajchte sulle schwanke, fa emma.
23 Oba du, O Gott, woascht dän rauf brinje no dee Fenijchtunj Kul; Blootdarschtje un Lestje Mane woare nijch haulf fonn äare Doag utlaewe, oba ekj woa enn die fetruehe.
Dee 56 Psalm
To dän Haupt Musikaunt, daut met dee stelle Duw to doone haft – dee wiet auf; fonn Doft; en jeheemet Schats – aus dee Filiste am enn neeme.
1 Sie mie jnädijch, O Gott, dan dee Mensche wele mie oppschlucke; kjrieje met mie un bedrekje mie.
2 Miene Wajchta sochte mie dän dachäwa, dan fäl doone stollt äwa mie jachte.
3 Wanemma ekj Angst ha, woa ekj enn die fetruehe.
4 Enn Gott woa ekj sien Wuat preise; ekj ha en Gott fetruet; ekj woa mie nijch engste, waut kaun daut Fleesch mie aundoone?
5 Dee doone miene Wead dän Dachäwa fedreihe; aul äare Jedankje sent fa Beeset jäajen mie.
6 Dee reare Striet aun; see festäakje sikj; see beoobacht miene Staupe un luare fa miene Seel.
7 Doone see derjch Gottloosijchkjeit utretse? Doo dee Mensche enn dien Oaja dol schlone, O Gott.
8 Du hast mien Waundre jetalt; O doo miene Trone enn diene Buddel laje, sent dee nijch enn dien Buak?
9 Dan woare miene Fiend trigj dreihe, enn dän Dach woa ekj roope; dit weet ekj, dan Gott es fa mie.
10 En Gott woa ekj sien Wuat preise; enn daem Herr Gott woa ekj sien Wuat preise.
11 Ekj ha enn Gott fetruet; ekj woa mie nijch ferjchte, waut kaun dee Mensch mie aundoone?
12 Dien Bunnt es opp mie; ekj woa die Dankopfa brinje.
13 Dan du hast miene Seel fonn dän Doot jerat. Deist du nijch miene Feet bewoare fonn jleppe soo daut ekj mucht fer Gott waundle enn daut Lijcht fonn dee Laewndje?
Dee 57 Psalm
To dän Haupt Musikaunt. Doo nijch fenijchte. En jeheemne Schats fonn Doft, aus hee fonn Saul flijchte deed enn ne Heel.
1 Sie erboarment to mie, O Gott, sie erboarment to mie, dan miene Seel deit enn die fetruehe, jo enn daut Schaute fonn diene Flijchte es miene Festäakjestäd, bott dee groote Fenijchtunj febie es.
2 Ekj woa däm aulahejchsta Gott aunroope, to Gott dee fa mie wirkjt.
3 Hee woat fomm Himel schekje un mie rade, hee woat dän to schaunde moake dee mie fekjneddre deit. Selah. Gott woat sien Erboarme un siene Woarheit schekje.
4 Miene Seel es mank dee Leiw; ekj ligj mank dän dee aun Fia aunjtesekjt sent, dee Menschesäns, dän äare Täne Spiese un Fiele sent, un äare Tunj es en schoapet Schweat.
5 Sie jepreist hejcha aus dee Himels, O Gott; lot diene Harlijchkjeit äwa dee gaunse Ead senne.
6 Dee ha en Nat reed jemoakt fa miene Staupe, miene Seel es dol jeboage; dee ha ne Kul jegroft fa mie, dee sent doa enenn jefolle. Selah.
7 Mien Hoat es faust opp eene Städ, O Gott, mien Hoat es faust opp eene Städ; ekj woa sinje en Preis jäwe.
8 Wakj miene Harlijchkjeit opp!. Wakj opp, Hoap en Jittoa! Ekj woa dän Morjeroot oppwakje met Preis.
9 Ekj woa die mank dee Felkja preise, O Herr, ekj woa to die sinje mank dee Natsjoone.
10 Dan dien Erboarme es groot bott dee Himels, un diene Woarheit bott dee Wolkje.
11 Sie oppjehowe bowe dee Himels, O Gott; diene Harlijchkjeit äwa dee gaunse Ead.
Copyright © 2001 by Elmer Reimer