Beginning
Dee 21 Psalm
To dän haupt Musikaunt, en Psalm fonn Doft.
1 Dee Kjeenijch freit sikj enn diene Macht, O Herr Gott; un woo seeha deit hee sikj freihe enn diene Radunk.
2 Du hast am sien Hoat Janke jejäft, un hast daut Jebäd fonn siene Leppe nijch wajch jehoole. Selah.
3 Dan du woascht fer am feropp gone met Saeajens fonn Goots. Du hast ne Kroon fonn ajchtet Golt opp sien Kopp jesat.
4 Hee fruach die no Läwe: du jeefst am dee Lengd fonn Doag fa emma en emma.
5 Siene Harlijchkjeit es groot enn diene Radunk; du hast Ea un Madastijchkjeit opp am jelajcht.
6 Dan du hast am fa Säajens jesat fa emma; du hast am Freid jejäft enn dee Freid fonn dien Jesejcht.
7 Dan dee Kjeenijch deit enn däm Herr Gott fetruehe, un enn däm Aulahejchsta sien Erboarme; hee woat nijch wajch jeriemt woare.
8 Diene Haunt woat aul diene Fiend utfinje; diene rajchte Haunt woat dän utfinje dee die hause.
9 Du woascht dän soo aus en fiarija Owe sate enn dee Tiet fonn dien Doasenne; dee Herr Gott woat dän oppschlucke enn sien Rach, un daut Fia woat dän fenijchte.
10 Du woascht dän äa Frucht fonne Ead fenijchte, un äare Nokome fonn mank dee Mensche Saens.
11 Dan dee plonde Beeset jäajen die, see dochte aun en Beeset Dinkj; dee kjenne oba nijch jewenne,
12 dan du woascht dän moake trigjaun gone; du woascht diene Fiele reed moake opp dän Baunt jäajen äare Jesejchte.
13 O Herr Gott, sie je-eat enn diene Macht; soo woa wie sinje, un Psalme fonn diene Krauft sinje.
Dee 22 Psalm
To dän haupt Musikaunt; opp dän Ree fonn Sonnopgank, en Psalm fonn Doft.
1 Mien Gott, mien Gott, wuaromm hast du mie felote, un best soo wiet auf fonn miene Aufleewrunk, un dee Wead fonn mien Staene?
2 O mien Gott, ekj schrie wäarent dän Dach, oba du deist nijch auntwuate, un enne Nacht, oba aules es fa mie Stel.
3 Oba du best Heilijch, dee opp Iesrael äa Preis jetroont es.
4 Onnse Fodasch deede enn die fetruehe, dee fetruede, un du deetst an rade.
5 See roopte die aun, un worde jerat, see fetruede enn die un bruckte sikj nijch schäme.
6 Oba ekj sie en Worm, un nijch en Maun, en Aufschue fonn Menscheit, un fonn daut Folkj fe-acht.
7 Aule dee mie seene, lache äwa mie enn Spott; dee moake äare Leppe op un scheddre äa Kopp.
8 Hee feleet sikj opp däm Herr Gott, lot däm am nu aufleewre; lot däm am rade, sentamol hee en Jefaule haud enn am.
9 Dan du best dee, dee mie fonn daut Muttalief rut neemst, un leetst mie opp miene Mutta eare Brosste fetruehe.
10 Mie wort opp die jeschmäte fonn daut Muttalief; du best mien Gottt fonn miene Mutta äa Buk.
11 Sie nijch wiet auf fonn mie, dan Trubbel es dijcht bie wiels doa kjeene es tom habe.
12 Fäl Bolles ha mie ommrinjt, stoakje Bolles fonn Baschan sent runnt omm mie.
13 Dee muake äa Mul op jäajen mie soo aus en rietende un brelende Leiw.
14 Ekj sie utjegote soo aus Wota, un aul miene Knoakes sent utaneen jespreet, mien Hoat es soo aus Waus, daut es jeschmolte enne med fonn miene Dorm.
15 Miene Krauft es oppjedreajcht soo aus en Biet fonn en Leemtopp, un miene Tunj es faust aun mien Unjamul;
16 Dan du hast bestemmt to daut Stoff fonn dän Doot. Dan Hunj sent runnt omm mie, ne Baund fonn dee Beese ha mie ommrinjt, dee spekjte mie derjch miene Henj en Feet.
17 Ekj tal aul miene Knoakes; dee kjikje un glupte mie aun.
18 See fedeele miene Kjleeda mank an un doone fa mien Rok Leese.
19 Oba du, O Herr Gott, sie nijch wiet auf; O miene Krauft, spood die mie to halpe.
20 Rad miene Seel fonn daut Schweat; mien eensja fonn däm Hunt siene Poot.
21 Rad mie fonn däm Leiw sien Mul, un fonn däm willa Oss siene Heanna hast du mie jeauntwuat.
22 Ekj woa dien Nome aundiede to miene Breeda, ekj woa die med enn dee Fesaumlunk preise.
23 Jie, dee jie däm Herr Gott ferjchte, doot am preise; aule fonn Joakopp siene Nokome, doot an feharlijche, Un aul dee Some fonn Iesrael, doot am ferjchte.
24 Dan Hee haft nijch daut Älend fonn dee Älendje fe-acht oda jehaust; en hee haft sien Jesejcht nijch festoake fonn am, oba aus hee no am schreajch head hee.
25 Mien Preis saul fa die senne enn dee groote Fesaumlunj; ekj woa mien Fespraeakje betole fer daen dee am ferjchte.
26 Dee Bedrekjte sele äte un tofräd senne; dee däm Herr Gott seakje woare am preise, dien Hoat woat fa emma laewe.
27 Dee Enje fonne Ead sele behoole un sikj no däm Herr Gott nodre, un aul dee Natsjoone Famieljes sele fer die aunbäde.
28 Dan daut es däm Herr Gott sient, Hee es Harscha mank dee Natsjoone.
29 Aul dee Fatte oppe Ead ha jeäte, un ha aunjebät fer am; un aule woare dolbeaje dee rauf gone nom Stoff, un hee hilt siene eajne Seel aum laewe.
30 En Sot woat am deene, daut woat fonn däm Herr jerät woare to daut komendet Jeschlajcht.
31 Dee woare kome un siene Jerajchtijchkjeit erkjläare to en Folkj dee noch nijch jebuare es, daut Hee utjeoabit haft.
Dee 23 Psalm
En Psalm fonn Doft.
1 Dee Herr Gott es mien Hoad, mie fältet aun nuscht.
2 Hee moakt mie dol laje enn jreene Weid; Hee deit mie biesied stelle Wotasch leide.
3 Hee deit miene Seel oppfresche. Hee deit mie enn dän Jerajchtijchkjeit Stijch leide omm sien Nome haulwe.
4 Jo, un wan ekj uk derjch dän Doodes-schaute Tol wank, woa ekj kjeen Beeset ferjchte, dan du best bie mie, diene Stang un dien Gonstock doone mie treeste.
5 Du moakst en Desch reed fa mien enn miene Fiend äare Jaeajenwoat; du deist mien Kopp ennsaulwe met Eelj, mien Kuffel rant aul aewa.
6 Sejchalijch, Goots en Erboarme woare mie nofolje mien Läwelank; un ekj woa enn daem Herr Gott sien Hus wone soo lang aus ekj laew.
Dee 24 Psalm
En Psalm fonn Doft.
1 Dee Ead es daem Herr Gott sient, un daut Follet doafonn, un dee, dee doabenne wone.
2 Dan hee haft haut opp dee See jejrint, un daut bestädijcht opp dee Riefasch.
3 Wäa woat enopp gone no däm Herr Gott sien Boajch? Oda wäa woat enn siene heilje Städ stone?
4 Dee, dee reine Henj haft, un en ajchtet Hoat; dee siene Seel nijch nehejcht jehäft haft to Faulscheit, un haft nijch hinjem Lijcht jefeat met Schweare.
5 Dee woat däm Herr Gott sien Säajen kjriehe, un Jerjachtijchkjeit fonn däm Gott fonn siene Radunk.
6 Dit es daut Jeschlajcht fonn dän dee am utseakje, dee dien Jesejcht seakje, O du Joakopp sien Gott. Selah.
7 Häft june Kjapp opp, jie Puate; un siet oppjehaeft, jie eewje Däare; un dee Harlijchkjeits Kjeenijch woat enenn kome.
8 Waea es dis Harlijchkjeits Kjeenijch? Dee Herr Gott, majchtijch emm Kjrijch!
9 Häft june Kjapp opp, jie Puate; un siet oppjehaeft, O eewje Däare; un dee Harlijchkjeits Kjeenijch woat enenn kome.
10 Waea es dis Harlijchkjeits Kjeenijch? Dee Aulmajchtja Herr Gott, Hee es dee Harlijchkjeits Kjeenijch. Selah.
Dee 25 Psalm
En Psalm fonn Doft.
1 Ekj häw miene Seel opp no die, O Herr Gott.
2 O mien Gott, ekj doo enn die fetruehe, lot mie nijch to schaunde woare; lot miene Fiend nijch jewenne äwa mie.
3 Jo, lot kjeena dee enn die fetruehe deit to schaunde woare; lot dän to schaunde woare dee oone Uasoak sindje.
4 Moak mie diene Wäaj to erkjane, O Herr Gott, doo mie enn dien Stijch ennleare.
5 Leid mie enn diene Woarheit, un doo mie ennleare, dan du best miene Radunks Gott, ekj lua opp die dän Dach äwa.
6 Behool, O Herr Gott, diene Erboarmunje un diene Leeftolijchkjeit, dan dee sent fonn Eewijchkjeit häa.
7 Doo dee Sind fonn miene Jugent nijch behoole, oda mien Äweträde; doo aun mie denkje enn dien Erboarme omm dien Goots haulwe, O Herr Gott.
8 Dee Herr Gott es Goot un Opprajcht, doaromm woat hee Sinda enn daen Wajch ennleare.
9 Hee woat dee Saunftmootje enn Jerejcht leide, un hee woat dee Saunftmootje sien Wajch ennleare.
10 Aul däm Herr Gott siene Waeaj sent Erboarme un Woarheit to dän dee sien Bunnt un siene Zeijchnise hoole.
11 O Herr Gott, omm dien Nome haulwe, fejef mie miene Sind, dan dee es Groot.
12 Wäa es dee, dee daem Herr Gott ferjchte deit? Hee deit am dän Wajch ennleare dän hee wäle sull.
13 Siene Seel saul enn Goots wone, un sien Some saul dee Ead oawe.
14 Däm Herr Gott sien Jeheemnes es met dän dee am ferjchte, en hee woat an moake sien Bunnt to weete.
15 Miene Uage sent emma opp daem Herr Gott, wiels hee woat onnse Feet ut daut Nat rade.
16 Drei die no mie, un sie mie jnädijch, dan ekj sie Eensaum un Betriebt.
17 Miene Hoat Trubbels sent fejreetat; O brinj mie ut miene Noot.
18 See mien Älend un miene Weedoag, un fejef aul miene Sind.
19 See miene Fiend, dan doa sent fael, un dee hause mie met ommenschlijcha Haus.
20 O bewoa miene Seel, un rad mie; lot mie nijch to schaunde woare, dan mien Fetruehe es enn die.
21 Lot Ajchtet en Oprajchtijchkjeit mie bewoare, dan ekj wacht opp die.
22 Rad Iesrael, O Gott, ut aul siene Trubbels.
Copyright © 2001 by Elmer Reimer