Beginning

Dee 74 Psalm

Ne Auflea, von Asaf.

¹ O Gott, du hast onns fa emma wajch jeschmäte; woat dien Oaja reakjre jäajen dee Schop enn diene Weid?

² Behool diene Fesaumlunj dee du enn fegone Tiede jekofft hast, dee Stang fonn dien Oawgoot daut du aufjeleewet hast, dis Boajch Zion wua du jewont hast.

³ Häw diene Staupe nehejcht no daut eewjet Eedet un Felotnet; dee Fient dee Beeset jedone haft enn daut Fesaumlunjshus.

⁴ Diene Fiend ha jebrellt enne med fonn diene heilje Städe; dee stale äare eajne Teakjens opp fa Teakjens.

⁵ Hee es bekaunt aus eena dee dee Akjs nehejcht brinjt jäajen dee dikje Beem.

⁶ Un nu bräakje see daut jekjoawdet Woakj dol toop met Akjs un Homa.

⁷ Dee ha Fia enn dien Fesaumlunjshus enenn jeschmäte; dee ha dee Städ besudelt wua dien Nome wont opp dise Ead.

⁸ Dee säde enn äare Hoate, "Wel wie dän toop fenijchte;" dee ha aul Gott siene Fesaumlunjstäde enn daut Launt febrennt.

⁹ Wie sage onnse Teakjens nijch; doa sent kjeene Profeete meeha, un kjeene mank onns weet woo lang.

¹⁰ O Gott, woo lang saul dee Fient Beeset räde? Saul dee Fient dien Nome fa emma lastre?

¹¹ Wuarom trakjst du diene Haunt trigj, soogoa dien rajchte Haunt? Doo dän fenijchte fonn ut dien Bossem.

¹² Dan Gott es mien Kjeenijch fonn jee häa, dee Radunk oabeide deit med enn daut Launt.

¹³ Du deetst dän See utaneen deele derjch diene macht; du deetst dee groote Seetiare äare Kjap bräakje enn daut Wota.

¹⁴ Du bruakst daem Leviatin siene Kjap enn Bieta; du muakst am fa Äte to daut Folkj enne Wiltnes.

¹⁵ Du deetst dee Wotakjwale utaneen deele, un uk dee majchtja Wotastroom, du deetst dee groota Riefasch oppdreaje.

¹⁶ Dee Dach es dient, un dee Nacht es uck dient. Du hast daut Lijcht un dee Sonn jejrint.

¹⁷ Du hast aul dee Jrense fonne Ead jesat; du hast Somma un Winta jemoakt.

¹⁸ Behool dit: dee Fient haft jelastat, O Herr Gott, un en noarischet Folkj haft dien Nome feacht.

¹⁹ Jeff nijch diene Turtelduw siene Seel äwa no dee wile Beeste; du woascht niemols daut Läwe fonn diene Betriebte fejäte.

²⁰ Kjikj no dien Bunt; dan dee dunkle Städe enn dise Ead sent foll Hiese fonn Ommenschlijchet.

²¹ O lot nijch too daut soone dän schlajcht behaundelt woat sulle met Schaund trigj dreihe; lot dee Oame un dee Bederftje dien Nome preise.

²² Sto opp, O Gott! un doo fa die selfst räde, bedenk woo dee Noare die dach fa dach waut fäa-schmiete.

²³ Fejat nijch diene Fiend äare Stem; daut Jetees fonn diene Fiend es eegol to heare.

Dee 75 Psalm

To dän Haupt Musikaunt. Doo nijch fenijchte. En Psalm von Asaf, en Leet.

¹ Wie ha die Dank jejäft, O Gott; wie ha die jepreist; dan dien Nome is dijchtbie; diene wundafolle Woakje sent fonn jerät worde.

² Wan ekj dee rajchte Tiet näme woa, dan woa ekj enn Jerajchtijchkjeit rejchte.

³ De Ead, un aul dee, dee doabenne wone, sent feschmolte; ekj ha dee Stendasch faust jesalt. Selah

⁴ Ekj säd to dee Stollte: "Siet nijch stollt;" un to dee Gottloose: "doot jun Huarn nijch opphäwe."

⁵ Doot jun Huarn nijch huach opphäwe, un doot nijch met en stiewet Jnekj räde.

⁶ Dan Huaget kjemt nijch fomm Ooste, oda fomm Waste, uck nijch fonn dee Wiltnes;

⁷ Oba Gott es dee Rejchta, hee deit disen rauf steete, un daem näakjsta nehejcht häwe.

⁸ Dan doa es en Kuffel enn däm Herr Gott siene Haunt, un dee Wien deit Schume, daut es em folle ennjereat; un hee deit daut utjeete doafonn; sejchalijch motte aul dee Gottloose doafonn drinkje bottet aules wajch es.

⁹ Oba ekj woa fa emma zeije, ekj woa Preis sinje to Joakopp sien Gott.

¹⁰ En ekj woa aul fonn dee Gottloose äare Heanna aufschniede, oba dee Jerajchte äare Heanna woare oppjehowe woare.

Dee 76 Psalm

To dän Haupt Musikaunt, fa Instrumente met seide. En Psalm von Asaf, en Leet fonn Preis.

¹ Gott es bekaunt enn Juda; sien Nome es groot enn Iesrael.

² Un siene Woning es enn Salem, un siene Wonstäd enn Zion.

³ Doa bruak Hee dee fiarije Fiele fonn dän Boage, daut Schilt, un daut Schweat, enn dän Kjrijch. Selah.

⁴ Du best Harlijch, meeha fetraflijch aus dee Boaj fonn daut Raup.

⁵ Dee Stoakjhoatje sent bestreept; dee schleepe äa Schlop, un kjeene fonn dee majchtje Mana ha äare Henj jefunje.

⁶ Derjch dien Dodel, O Joakopp sien Gott, sent beid Peat un Kjrijchswoage enn en deepa Schlop jesunke.

⁷ Du best engstlijch; un wäa kaun fer die bestone wan du oajalijch best?

⁸ Jerejcht es fomm Himel to heare derjch dien Wele; dee Ead deed sikj ferjchte un wea jestelt,

⁹ aus Gott oppstunt to Jerejcht, aul dee Macke oppe Ead to rade. Selah.

¹⁰ Dan dee Mensche äa Oaja woat die danke; du deist die ommrinje met daut Oaja daut äwejebläwe es.

¹¹ Fespräakj un bäd to däm Herr Gott dien Gott; lot aul dän dee romm sent Jeschenkje brinje to däm, däm to ferjchte es.

¹² Hee woat dän Jeist enn dee Kjeenijchsäns aufschniede; dee Kjeenije oppe Ead ha Angst fa am.

Dee 77 Psalm

To dän Haupt Musikaunt opp Jedutun.

¹ Miene Stem es no Gott, un ekj schrie; miene Stem es no Gott, un hee horjcht no mie.

² Enn dän Dach fonn miene Noot socht ekj däm Herr; miene Haunt goot ut enne Nacht, un wort nijch oone Jefeel; miene Seel leet sikj nijch treeste.

³ Ekj docht aun Gott, un sie jetrubbelt; ekj denkj no, un mien Jeist deit beschwieme.

⁴ Du jreepst miene Uage äare wajchte; ekj sie jetrubbelt, un ekj kaun nijch räde.

⁵ Ekj docht aun dee Doag fonn jeehäa, dee Joare fonn fegone Tiede.

⁶ Ekj woa aun mien Leet denkje enne Nacht; ekj woa met mien eajnet Hoat räde, un mien Jeist sorjfeltijch utforsche.

⁷ Woat dee Herr fa emma wajch schmiete; un woat Hee niemols wada gonstlijch senne?

⁸ Es sien Erboarme fa emma wajch? Haft sien Wuat Fälschlach jemoakt fa aule Jeschlajchte?

⁹ Haft Gott fejäte jnädijch to senne; haft hee sien leeftoljet Erboarme toojemoakt enn sien Oaja? Selah.

¹⁰ Un ekj säd: "Dit es miene Krankheit, dee Joare fonn dän Aulmajchtja siene rajchte Haunt."

¹¹ Ekj woa däm Herr Gott siene Woakje behoole; sejchalijch woa ekj diene Wunndasch fonn Joare trigj behoole.

¹² Ekj woa mie uk äwa aul diene Woakje bedenkje un woa jrebble äwa daut waut du deist.

¹³ O Gott, dien Wajch es enn Heiljchkjeit, wäa es Gott dee groot es soo aus du best?

¹⁴ Du best dee Gott dee Wundasch deit, du hast siene Krauft oppenboa jemoakt mank dee Felkja.

¹⁵ Du hast dien Folkj jerat derjch diene Macht, dee Säns fonn Joakopp un Joosef. Selah.

¹⁶ Dee Wotasch sage die, O Gott, dee Wotasch sage die; dee engste sikj; jo, daut Deepet deed tsetre.

¹⁷ Dee Wolkje deede Wota rut jeete; dee Himels jeewe ne Stem; un diene Fiele fluage rut.

¹⁸ Dee Stem fonn dien rummle enn dän Storm, Blitse deede dee Welt oppdache; dee Ead tsetad un scheddad.

¹⁹ Dien Wajch es enn dän See; un dien Stijch wea enn dee groote Wotasch; un diene Footstaupe sent nijch to weete.

²⁰ Du deetst dien Folk leide derjch Mooses un Oant soo aus ne Häad Schop.