Beginning
Dee 40 Psalm
To daen Hauptmusikaunt, en Psalm fonn Doft
1 Sejchalijch luad ekj fa däm Herr Gott, un Hee buach sikj dol un head mein Hiele.
2 En hee neem mie ut daut schrakjlijet Deepet erut, un fonn daut blottjet Leem, un hee stald miene Feet opp en Steen, hee deed miene Staupe ennsaulwe.
3 Un Hee haft en niehet Leet enn mien Mul jejäft, preis to Gott; fäl woare daut seene un woare ferjchte, un woare enn däm Herr Gott fetruehe.
4 Jesäajent es dee Maun dee däm Herr Gott sien Fetruehe moakt, en dee sikj nijch no dee Stollte dreit, oda soone dee tosied dreihe no Leaje.
5 O Herr Gott mien Gott, du hast fäl jedone, soogoa diene wunndaboare Woakje un diene Jedanke onns jäajenäwa; doa es kjeene dee enne Reaj fa die kaun ennstale, dan dee sent meeha aus kjenne jetalt woare.
6 Opfa en Schlachtofa wusst du nijch, du hast miene Uare opjemoakt; du hast nijch jefroacht no Braunt Opfa en Sind Opfa.
7 Donn säd ekj, Kjikj, ekj kom; daut es fonn mie jeschräwe enn daut Roll fonn daut Buak.
8 Ekj ha Fejneaje dien Welle to doone, O mien Gott, un dien Jesats es enn daut bennaschtet fonn mie.
9 Ekj ha Jerajchtijchkjeit jeprädijcht enn dee groote Fesaumlunj, See, ekj woa nijch trigj hoole met miene Leppe to räde; O Herr Gott, du weetst.
10 Ekj ha diene Jerajchtijchkjeit nijch festoake enn mien Hoat; ekj räd fonn diene Jerajchtijchkjeit un diene Radunk; ekj da diene Leeftolijchkjeit un diene Woarheit nijch festoake fonn dee groote Fesaumlunj.
11 Hoole diene empfintlijche Erboarmunje nijch fonn mie, O Herr Gott, lot diene Leeftolijchkejit un diene Woarheit emma äwa mie oppausse.
12 Dan Beeset haft mie ommringt bott daut nijch to tale jeit, miene Onnjerajchtijchkjeite ha mie to hoole jekjräaje, un ekj kaun nijch nehejcht kjikje; dee sent meeha aus dee Hoa opp mien Kopp, un mien Hoat fesajcht.
13 O Herr Gott, lot die daut jefaule mie to rade; spood die mie to halpe.
14 Lot daen sikj schäme un jedeemietijcht woare dee miene Seel seakje dee to fenijchte; lot dän dee sikj freihe wäajen mien Trubbel trigj jedräwe woare un to Schaund jemoakt woare.
15 Lot dän eed senne aus Loon fa äare Schaund dee to mie saja: Aha! Aha!
16 Lot aul dän dee die seakje sikj freihe un Froo senne enn die, un emma saje: "Woo Groot es dee Herr Gott!"
17 Ekj sie Oam un Derftijch, dee Herr woat fa mie fesorje; du best mien Help un mien Rada; O mien Gott, doo nijch luare.
Dee 41 Psalm
To dän Haupt Musikaunt; en Psalm fonn Doft.
1 Jesäajent es dee, dee weis haundelt to dee Oame; dee Herr Gott woat am rade enn dän beesa Dach.
2 Dee Herr Gott woat wajchte äwa am un am aum Laewe hoole; hee saul jesäajent senne oppe Ead; un du woascht am nijch aun siene Fiend äwejäwe.
3 Dee Herr Gott woat am stoakj moake opp sien Krankebad, du woascht am moot too spräakje enn siene Krankheit.
4 Ekj saed: "O Herr Gott, sie mie jnädijch; heel miene Seel, dan ekj ha jesindijcht jäajen die."
5 Miene Fiend räde Beeset jäajen mie, un saje: "Waneeha woat hee stoawe, un sien Nome feschwinje."
6 En wan hee kjemt mie to seene, dan rät hee nutslooset; sien Hoat saumelt Gottloosijchkjeit to sikj selfst; hee jeit rut un rät.
7 Aul dee, dee mie hause, fuschle toop jäajen mie; see plone Beeset jäajen mie.
8 See saje: "Waut Beeset es opp am utjegote, un dee sikj dol lajcht woat nijch wada oppstone."
9 Soogoa mien Frint, enn däm ekj Toofetruehe haud, dee fonn mien Broot aut, haft siene Hack jäajen mie oppjehowe.
10 Oba du, O Herr Gott, sie mie jnädijch, un häw mie opp un ekj woa dän trigj tole.
11 Derjch dit weet ekj daut du en Fejnjeaje hast enn mie, wiels mien Fient deit sikj nijch freihe äwa mie.
12 Un enn miene Follstendijchkjeit deist du mie opprajcht hoole, un du deist mie opp emma fer dien Jesejcht hanstale.
13 Jesäajent es Iesrael äa Herr Gott fonn Eewijchkjeit bott Eewijchkjeit. Amen un Amen!
Dee Psalme II
Dee 42 Psalm
To dän Haupt Musikaunt, En Nodenkje; fa dee Korah Säns.
1 Soo aus dee Harsch no dee Woatstreem jescht, soo jescht miene Seel no die, O Gott.
2 Mien Seel darscht no die, O Gott, no däm läwendja Gott; waneeha woa ekj kome un fer Gott stone?
3 Miene Trone sent mien Äte jewast Dach en Nacht, wäarent see dän Dachäwa to mie saje: "Wua es dien Gott?"
4 Wan ekj dise Dinje behool, jeet ekj miene Seel ut enn mie. Dan ekj wea jewant met dee groote Menj; ekj jinkj met an no Gott sien Hus met dee Stem fonn Freid un Preis, dee Groote Menj dee daut Fast hilde.
5 O miene Seel, wuaromm best du doljeschloage enn mie, un deist Stäne enn mie? Hop enn Gott, dan ekj woa am noch danke fa dee Radunk fer dien Jesejcht.
6 O mien Gott, miene Seel es ennalijch dol jeschloage; doaromm behool ekj die fonn daut Jordan Launt, un fonn dee Boaj.
7 Daut Deepet roopt daut Deepet aun, derjch daut Jelud fonn dee Wotafaul; aul diene Walle, un deepe Walle sent äwe mie jekome.
8 Dee Herr Gott woat siene Leeftolijchkjeit aunkommendeare wäarent daen Dach, un enne Nacht woat sien Leet enn mie senne, mien Jebäd to dän Gott fonn mien Läwe.
9 Ekj woa to Gott mien groota Steen saje, "Wauromm hast du fonn mie fejäte? Wuaromm go ekj enn Trau wan dee Fient mie bedrekjt?"
10 Miene Fiend doone mie aulahaunt fäaschmiete soo aus met Knoakes tweibräakje –wan see jieda Dach to mie saje: "Wua es nu dien Gott?"
11 O miene Seel, wuaromm best du doljeschloage enn mie, un deist Stäne enn mie? Dan ekj woa am noch preise, dee Radunk fa mien Jesejcht un mien Gott.
Dee 43 Psalm
1 Doo mie rejchte, O Gott, un doo fa mie ennstone jäajen ne Natsjoon dee nijch jetlijch es, rad mie fonn däm Lestfola un onnjerajchta Maun.
2 Dan bloos du best dee Gott fonn miene Krauft; wuaromm deist du mie wajch schmiete? Wuraomm doo ekj dän dachäwa truare äwa daut Älend fonn daen Fient?
3 O schekj dien Lijcht un diene Woarheit erut; lot dän mie leide un mie no dien Heilja Boajch brinje, un no diene Fesaumlunjs Staed.
4 Dan woa ekj no Gott sien Aultoa gone, no Gott dee miene Freid un Fejneaje es; Jo, ekj woa die met dee Hoap danke, O Gott mien Gott.
5 O miene Seel, wuaromm best du doljeschloage enn mie, un deist Stäne enn mie? Dan ekj woa am noch preise, dee Radunk fa mien Jesejcht un mien Gott.
Dee 44 Psalm
To dän Haupt Musikaunt fa dee Korah Säns. En Nodenkje.
1 Wie ha jeheat met onnse Uare, O Gott, onnse Fodasch ha onns fetalt fonn daut Woakj daut du enn äare Doag deetst, enn dee Freajoasche Tiede.
2 Du deetst Natsjoone rut driewe met diene Haunt, un deetst dee plaunte. Du deetst dee Mensche betriebe un deetst dän rut driewe.
3 Dan dee deede daut Launt nijch oawe derjch äa eajnet Schweat, un äa eajne Oarm deed an nijch rade; oba daut wea diene rajchte Haunt un dien Oarm un daut Lijcht fonn dien Jesejcht – dan du hautst en Jefaule enn an.
4 Du best dee, mien Kjeenijch, O Gott; doo Radunk aunkommendeare fa Joakopp.
5 Derjch die woa wie onnse Fiend dol schuwe, derjch dien Nome woa wie dän dol traumple dee jäajen onns oppstone.
6 Dan ekj woa nijch enn mien Boage fetruehe, un mien Schweat woat mie nijch rade.
7 Oba du hast onns fonn onnse Fiend jerat, un hast dän to schaunde jemoakt dee onns hausste.
8 Wie doone Gott daen Dachäwa lowe, un doone dien Nome fa emma preise. Selah
9 Oba du hast onns wajch jeschmäte un onns to schaunde jemoakt; un du jeist nijch rut met diene Armeeha.
10 Du hast onns jemoakt fonn dän Fient wajch rane; un see, dee onns hausse doone onns plindre fa sikj selfst.
11 Du hast onns henjejäft soo aus Schop fa Äte, un hast onns festreit mank dee Natsjoone.
12 Du hast dien Folkj fekoft fa nuscht. Un du hast äa Pries nijch hejcha jestalt.
13 Du hast onns en Fluch jemoakt to onnse Nobasch, en Fe-achte un en Spott to dän dee runnt omm onns sent.
14 Du moakst onns soo aus en Sprejchwuat mank dee Natsjoone, en Koppscheddre mank dee Felkja.
15 Miene Schaund es fer mie dän Dach äwa, jo, dee Schaund fonn mien Jesejcht bedakjt mie;
16 wäajen däm siene Stem die mie schlajchtet noräde deit, un dee Spatta fer dän Fient un däm dee Rach eewe deit.
17 Dit es aules opp onns jekome, oba wie ha die nijch fejäte, un ha uk nijch faulsch jehaundelt met dien Bunnt.
18 Wie sent nijch trigjaun jegone met onnse Hoate, un wie sent uk nijch tosied jedreit fonn dien Wajch,
19 Wan du onns uk fekjneddat hast enn dee wile Tiare äare Städ, un hast onns bedakjt met dän Doodes Schaute.
20 Wan wie dän Nome fonn onns Gott fejäte ha, un ha onnse Henj utjestrakjt no en framda Gott,
21 sull Gott daut nijch utseakje? Dan hee weet daut Jeheemet fonn daut Hoat.
22 Jo, omm dienet haulwe sent wie dän dachäwa to dän Doot äwejäft; wie sent soo aunjseene aus Schop tom schlachte.
23 Wakj opp! Wuaromm deist du schlope, O Herr? Sto opp! doo onns nijch fa emma auntsied schmiete.
24 Wuaromm deist du dien Jesejcht festäakje, un deist onns Älend un Noot fejäte?
25 Dan onnse Seel es raufjebrocht bott daut Stoff. Onns Buk blift faust oppe Ead.
26 Sto opp fa onnse Help un doo onns rade, omm diene Leeftolijchkjeit haulwe.
Dee 45 Psalm
To dän Haupt Musilkaunt opp Schoschannim, fa dee Korah Säns. En Jedijcht; en Leet fonn miene Leefate.
1 Mien Hoat es äwafoll fonn ne goode Sach; ekj räd fonn miene Woakje to däm Kjeenijch; miene Tunj es dee Stolfada fonn en pienje Schriewa.
2 Du best dee Straumste mank dee Mensche Säns; Jnod es opp diene Leppe utjegote; doaromm haft Gott die fa emma jesäajent.
3 Stäakj dien Schweat enn diene Schajcht, O du Majchtja; met diene Harlijchkejit un Madastijchkjeit.
4 En lot die daut jelinje enn diene Madastijchkjeit; ried wieda wäajen Woarheit enn Saunftmoot un Jerajchtijchkjeit; un diene rajchte Haunt woat die wunndaboare Dinje leare.
5 Diene Fiele sent schoap enn däm Kjeenijch siene Fiend äare Hoate, Mensche faule unja die.
6 Dien Troon, O Gott, es fa emma en emma; dee Stang fonn dien Rikj es dee Stang fonn diene Jerajchtijchkjeit.
7 Du hast Jerajchtijchkjeit leef, un deist Beeset hausse; doaromm woat Gott, dien Gott, die met dee Freid Eelj saulwe meeh aus diene Komrode.
8 Aul diene kjleede rikje fonn Mir un Saulweelj; ut dee Aulfensteen Paulauste, derjch woont dee die froo moake.
9 Kjeenijchs Dajchta sent mank dee Kjestlijche; dee Kjeenijin steit to diene rajchte Haunt, enn Golt fonn Ofir.
10 Horjch, O Dochta, un kjikj; un horjch, un fejat fonn dien eajnet Folkj un dien Foda sien Hus.
11 En see doato daut dee Kjeenijch dien Straumet felange wudd; dan Hee es dien Herr un du saust am aunbäde.
12 Un dee Tiarus Dochta met ne Gow; dee Rikje mank dee Felkja woare dien Gonnst seakje.
13 Dee kjeenijchlijche Dochta es seeha harlijch fonn benne, äare Kjleede sent met Golt jewäft.
14 See woat no däm Kjeenijch jeleit woare enn utjeneidet Woakj; dee Eentletsje dee äare Komrode sent woare no die jebrocht woare.
15 Dee woare jebrocht woare froo un schaftijch; dee woare enn däm Kjeenijch sien Paulaust enenn kome.
16 Diene Säns sele enn diene Fodasch äare Städ senne; du woascht dän Ferschte moake enne gaunse Ead.
17 Ekj woa dien Nome bekaunt moake enn aule Jeschlajchte; doaromm woare dee Felkja die fa emma en emma danke.
Copyright © 2001 by Elmer Reimer